موريطانية

ل معاني وحدين خرين، شوف موريطانية (توضيح).

خريطة مملكة موريطانية فأقصى تساع ديالها.

موريطانية ؤلا موروسيا هي سّْمية ديال منطقة ؤ مملكة أمازيغية كانت ف شّمال لْغربي ديال لْمنطقة لّي كتسما ليوم ب لْمغريب لْكبير، جات من لّاتينية Mauretania ؤلا Mauritania. عند لْيونان لْقدام كانت كتسما موروسيا Maurusia - Μαυρουσῐ́ᾱ. لْمجال لْجغرافي لّي كانت كتشغلو هاد لمملكة تطور معا مرور لْقرون، ؤ فأقصى مْتداد كانت موريطانية شادّا من لْمحيط لأطلسي تال شرق دزاير، فلعهد ديال لماليك بوكوس تاني.

لكتبة ديال موريطانية ب تّا مربوطة هُوّا باش تميز علا دولة موريطانيا (بلّيف د لْمد) لّي جغرافياً ماعندها حتا علاقة بيها، حيت وخا لحدود ديال موريطانية فلْجنوب ماكانوش واضحين، ماعمرها وصلات بعد من جنوب لأطلس جيهت لبلاصة فين غادي تبنا مدينة مراكش. دولة موريطانيا تسمات بهاد سّْمية من طرف لمستعمرين لفرانساويين، مي قبل من داكشي كانت معروفة بسميت بلاد شنݣيط.

لْاصل د سّْمية

•  مقالة متعمقة: مور

موريطانية جات من سّْمية لّاتينية لي سْتعملوها رّومان ؤ خداوها من عند لْيونان لْقدام، لّي كانو كيسميو لمنطقة ديال شمال لمغريب موروسيا Μαυρουσῐ́ᾱ ؤ سّكّان ديالها موروسيوس Μαυρούσιος ؤ منها جات لكلمة لّاتينية موري Maur لّي تسمات علا شعب لْمور.

تّاريخ

لفترة لأسطورية

لأصول ديال مملكة موريطانية مامعروفينش مزيان، حيت قلال لكتوبا ؤ لوتايق لّي بقاو من ديك لفترة لّي كيهضرو عليها. لأدلة لأركيولوجية، خصوصا من معلمة مزورا ؤ معالم خرين، كتبين أن لمملكة تأسسات ف لقرن لخامس ؤلا لقرن رّابع قبل لميلاد. بعض لمزاود كتهضر علا ماليك أسطوري سميتو أطلس لموري، لّي واقيلا عندو علاقة معا لأسطورة ديال أطلس لإله لّي كانو لأمازيغ ؤ ليونانيين لقدام كيعبدوه. هاد لماليك ماكاين حتا شي تأكيد تاريخي علا لوجود ديالو، ؤ تقدر تكون لأسطورة ديالو عندها نفس الأصل ديال رّب أنطايوس، حامي أرض لأمازيغ، لّي تقدر تكون تّبنات علا شّخصية ديال شي ماليك موري حقيقي، تدفن ف مزورا.

على حساب پلين لقديم لمور كانو ف لأصل قبيلة قوية لّي سيطرات علا لمغريب لقديم، ولاكين ب سباب لحروب، مابقاو منها غير بعض لفاميلات. لحاجة لّي مأكدة هيّا بلي من بعد ما مات لماليك بوكوس تاني مابقا حتا حد موراه لّي عندو لحق باش يحكم.

مملكة موريطانية

شقفة د لفلوس من فاوستوس سولا، ولعكس ديال صورة للملك الموريتاني بوكوس لول (ليسر) وهو كايسلّم يوغرطن (ليمن) ل فاوستوس لوكيوس سولا.

أقدم ماليك مأكد تاريخيا هوّا باݣا لّي دكرو تيتوس ليويوس، حيت كان عاون ماسينيسا باش ياخد لملك ديالو من ولد عمو لاكومازيس، ب 4000 فارس موري، ؤ من بعد عاون ف لحرب لبونيقية تانية ضد قرطاج.

على حساب ݣابرييل كامپ هادشي كيبيّن أن باݣا كان ماليك قوي ؤ مسيطر علا مجال جغرافي كبير، غالبا كان محدود ف لغرب ب لمحيط لأطلسي، ف شّرق ب واد مولوكا (لّي غالبا هوّا نيت واد ملوية). ف لجنوب، لحدود ماكانوش واضحين ولاكين غالبا كانو واصلين حتال لجنوب د جبال لأطلس.

لماليك بوكوس لول ورت هاد لمملكة علا باݣا ؤلا من شي ماليك أخور لّي ورتها من باݣا. ؤ غادي يزيد يوسعها لجيهت شّرق ف 105 ق.م.، فاش غادي ياخد تلت ديال مملكة نوميديا، من بعد ما سلّم يوغرطن ل رّومان. موراه غادي يحكم ولدو ماستانيسوسوس، لّي علا ما كيبان ماكانش شاد سّلطة مزيان، حيت لمنطقة ديال طنجيس كانت ستاقلات واحد لمدة تحت لحكم ديال فاميلة أمازيغية كيتزعّمها لْأمير ييفطاس ؤ موراه ولدو أسكاليس، حتا جا لجنرال رّوماني كوينتوس سيرطوريوس ؤ سالا معاهم.

ف 49 ق.م. غادي تقسّم مملكة موريطانية لجيهة شرقية حاكمها بوكوس تاني ؤ جيهة غربية حاكمها بوݣود. هاد لملوك بجوج كانو خوت ؤ ولاد ماستانيسوسوس، ؤ لحدود بيناتهم كانت ف واد ملوية. حسب سطرابو، بوݣود حارب لإتيوپيين، ؤ هادشي كيدل علا أنه غالبا كان وسّع مملكتو جيهت لجنوب، ولاكين مامعروفش بضّبط فين كانت واصلة. ف خلال لْحرب لْأهلية لْقيصرية، لخوت بجوج غادي يساندو يوليوس قيصر ف لحرب ديالو لّي كانت ضد تحالف فيه ݣنايوس پومپيوس ماݣنوس ؤ لماليك د نوميديا يوبا لول ؤ وحدين خرين. فاش غادي يخسر هاد تّحالف، بوكوس تاني غادي ياخد من لأراضي ديال نوميديا ؤ يزيد يوسع مملكتو ل شّرق، ؤ لْماباقي غادي يولّي مقاطعة تابعة ل رّومان.

ولاكين ف لحرب لأهلية لأنطونية، بوكوس ؤ بوݣود ماغاديش يتافقو علا شكون يساندو. بوكود تّاني غادي يساند ݣايوس أوكطاويوس، لّي من بعد غادي يولّي أوݣوستوس قيصر، مي بوݣود ساند ماركوس أنطونيوس ؤ كليوپاترا سابعة فيليپاطور لمليكة د مصر. ف 38 ق.م. بوكوس تاني غادي يهرف علا مملكة خوه ؤ يولي لماليك ديال موريطانية كولها حتال 33 ق.م. فاش غادي يموت.

لعرش ديال موريطانية هنا بقا خاوي حتال 25 ق.م. فاش لإمبراطور رّوماني أوݣوستوس قيصر غادي يعطي لحكم لصاحبو ؤ عشيرو يوبا ؤ مراتو كليوپاطرا سيليني بنت كليوپاطرا سّابعة.

مملكة موريطانية غادي تعرف لأوج ديالها ف لعهد ديال لماليك يوبا ؤ ولدو پطوليمايوس لموري لّي غادي يطورو لقتيصاد ديالها، ؤ يجيبو فنانين ؤ أدباء ؤ صناع من روما ؤ ليونان. أغلبية ديال لمعالم تّاريخية لقديمة ف لمغريب ؤ لغرب ديال دزاير كترجع ل هاد لفترة.

من بعد ما تقتل پطوليمايوس بأمر من لإمبراطور ݣايوس ݣيرمانيكوس لّي معروف ب سمية كاليݣولا، ف 40 ميلادية، غادي تولي موريطانية تابعة ل روما، ؤ غادي تقسّم ل جوج مقاطعات: موريطانية طّنجية ؤ موريطانية لقيصرية، لّي لحدود بيناتهم كانو بحال موريطانية شرقية ديالت بوكوس تّاني ؤ موريطانية لغربية ديالت بوݣود.

الطوپنوميا القديمة

من خلال خريطة أݣريپا لي صاوبوها الرومان فعهد لماليك يوبا لموريطاني و من نصوص راڤينا لي كترجع للقرن السابع نقدرو نجبدو واحد ليستة مابيهاش تاع مدن مملكة موريطانية لي هوما:

• طنجيس
• كادوم كاسطرا
• كاسطرانوڤا
• ليكسوس
• فريجيديس
• باناصا
• جيݣانتيس
• تاموسيدا
• سالا
• ݣيتول صوفي
• جيوتوليدار
• زيليس
• ثويلاث
• بينتا
• ݣالافا

أهم شّخصيات

لّيستة د لْمْلوك

سّْمية	فترة د لْحكم	ملاحضات	تصويرة
أطلس لموري	لقرن سادس ق.م	ماليك أسطوري
باݣا	225 ق.م	اول ماليك د موريطانية متوكد تاريخيا دكرو المؤرخ تيتوس ليويوس بمناسبة دّعم العسكري لي عطاه لماسينيسا
بوكوس لول	تقريبا 110 – تقريبا 80 ق.م	اول ماليك كيتعاملو معاه رّومان بشكل مباشر
ماصطانيصوسوس	تقريبا 80 ق.م – 49	سّلطة ديالو فلغالب كانت محدودة ؤ لمصادر عليه قليلة بزاف، و كنعرفو عليه بلي كان واخد منصب أمير ملكي وشارك فلحرب لّي وقعات بين رّومان و تّحالف نّوميدي-لموري
بوݣود	49 – تقريبا 38 ق.م	متقاسم لحكم معا خوه بوكوس تاني تحارب فجيهت ماركوس أنتونيوس ؤ كليوپاترا ف لحرب لأهلية رّومانية تّانية ؤ خسر مملكتو مات فليونان ؤ قتلو لجنرال اݣريپا
بوكوس تاني	49 – تقريبا 33 ق.م	متقاسم لحكم معا خوه بوݣود خدا طرف لغربي ديال لمملكة من خوه فاش كان مشغول فمعارك فسپانيا ف لوقت ديالو وصلات مملكة موريطانية ل اقصى مْتداد ديالها
يوبا لموري	25 ق.م – 23 ب.م	تابع ل رّومان وهو أكتر ماليك معروف و عندو إنجازات علمية كبيرة فمجال لبوطانيك و لأركيولوجيا و ليسانيات و لموسيقا و لجغرافيا
پطوليمايوس لموري	20–40	آخر ماليك ديال موريطانية بدا لحكم ديالو متشارك معا بّاه يوبا تّاني تقتل بأمر من كاليݣولا

أهم شّخصيات تّاريخية

• أطلس لموري
• أنطايوس
• باݣا
• بوكوس لول
• بوكوس تاني
• ماݣدولوسا
• ماصطانيصوسوس
• بوݣود ولد بوكوس
• ڤولوكس ولد بوكوس
• بوݣود
• يوبا تاني
• كيليوپاطرا سيليني
• أوفورب
• أسكاليس بن يفتاس
• ييفطاس
• پطوليمايوس لموري
• دروسيلا أمقران
• دروسيلا أمزيان
• إينوا لمورية
• يوليا أورانيا
• لوسيوس كويتوس
• إيديمون
• مازيبا
• ݣومون

عيون لكلام

تقدر تزيد شوف بزاف د تّصاور و لمعلومات ديال Mauritania ف ويكيميديا كومنز.