بوݣود

من ويكيپيديا
بوݣود
بوݣود
معلومات عامة
زيادة لقرن 1 قبل لميلاد
موريطانية
لموت 31 قبل لميلاد
ميطوني
لكاريير ديال الشخص
شارك ف
لفاميلة
لواليد ماصطانيصوسوس
خوت بوكوس تّاني
شريك إينوا لمورية
لإتنية موريطنيون


بوݣودلأمازيغية ⴱⵓⴳⵓⴷ، مات ف 31 قبل لميلاد ف ميطوني ف ليونان) هوّا ماليك أمازيغي لي حكم مملكة موريطانية معا خوه بوكوس تّاني، من ؤلا قبل من 49 ق.م تال 38 ق.م، بعد ما مات بّاهوم ماصطانيصوسوس. بوݣود كان شاد طّرف لغربي د موريطانية، لي دابا كاين ف شمال لمغريب، ؤ خوه بوكوس كان شاد طّرف شّرقي لي كاين دابا ف غرب ؤ وسط دزاير. لماليك بوݣود كان حليف موهيم د يوليوس قيصر، ؤ بعد لموت د هاد لّخر، ساند ماركوس أنطونيوس ؤ كليوپاطرا سّابعة ف لحرب لأهلية لي واجهو فيها ؤكطاڤيوس، لي غادي يولي من بعد لإمبراطور أوݣوستوس قيصر.[1]

سّمية[بدل | بدل لكود]

سّمية د بوݣود مدكورة عند ليونانيين كا βoγoς، بوڭوص. ف شّقفات د لفلوس لي صدر بوڭود، سميتو مكتوبة ب لّاتينية Bocut لي غالباً قرب ل نّطقان لأمازيغي لأصلي. ب لبونيقية، هاد سّمية كانت كاتّكتب ب ڭ(ك) ت.

كاين شخص أخور من لفاميلة د بوڭود لي كانت عندو نفس سّمية، ؤ لي كان ولد لماليك بوكوس لّول، يعني عم لماليك بوڭود.[2]

حياتو[بدل | بدل لكود]

كيما لفترة لموريطانية بشكل عام، ماكانعرفوش بزاف على بوݣود ؤ لحكم ديالو. ف 49 ق.م، كان ديجا ماليك ديال موريطانية لغربية، ف لوقت لي بوكوس تّاني كان ماليك د موريطانية شّرقية (شرق واد مولوكا، ف لغالب ملوية). لعولاما كيرجّحو بلي بوڭود ؤ بوكوس كانو خوت، ب عتيبار لعادة د قسيم لممالك بين لخوت ف شمال إفريقيا (بحال بين ولاد لماليك ميكيپسا د نوميديا)، ؤ بلي كانو ولاد لماليك ماصطانيصوسوس. هادشي كيزيد يتوكّد حيت بوكوس تّاني كان صدر شقفات د لفلوس ب كتابة "بوكوس ولد سوس". شّقفات د لفلوس لي تسكات ب سميت بوڭود ب لموقابيل ماكاتدكر غير سميتو.[2]

ف شي وقت مامحددش تجوج بوڭود ب مرا لي كان سميتها إينوّا، ؤ لي كانت معروفة بلي كانت زوينة بزاف. بوݣود مشا ف مغامرة ل لجنوب، يمكن جيهت لمناطق سّتيوائية د قارة إفريقيا، ؤ جاب ل مراتو قصب عملاق ؤ أسپيرج كا هدية.[3]

لإشاعات كانت كاتضور بلي مراتو كانت عشيقة ديال يوليوس قيصر. حيت هاد لقصة مدكورة عند توارخي روماني واحد هوّا سويطونيوس، مايمكنش ناخدوها ب جدية كبيرة. ولاكين يلا كانت لواقعة حقيقية، فا لعلاقة بين إينوا ؤ يوليوس قيصر كانت ب لمعرفة ؤ لقبول ديال بوڭود، حيت لكوپل كانت كيتلقا هدايا سخية من عند قيصر. وخا هاد لقصة ماشي متبوتة، لمخيلة لؤروپية ستعمالات هاد لقصة ف أعمال مسراحية ؤ درامية ف لقرون لوسطانية.

يوليوس ضد پومپييوس[بدل | بدل لكود]

ف لحرب د يوليوس قيصر ضد پومپييوس، لخوت بجوج، بوكوس ؤ بوݣود، كانو ف صّف د يوليوس قيصر، ؤ عاونوه باش يغلب تّحالف د پومپييوس معا لماليك يوبا لّول د نوميديا. پومپييوس ضرب لمسافة ب لبحر من ؤتيكا ل موريطانية، و حاول يهجم على لموعسكار د بوݣود ف أسكوروم، ولاكين هاد لّخر قدر يرد لهجمة،[note 1] خوه بوكوس لونصا هجمة مضادة ؤ شاملة ضد لپومپيين ؤ لحولافا ديالهوم ف نوميديا. قيصر ديك سّاع سيفط جينيرال روماني سميتو سيتيوس، باش يعاون بوكوس ضد لماليك يوبا، لي لارمي ديالو كانت باغة تّجمع معا ديال پومپييوس. بوكوس قدر يسيطر على سيرتا (دابا قسنطينة ف دزاير) لي كانت عاصيمة د نوميديا، شّي لي فورصا لماليك يوبا باش يتراجع.[3]

ف 48 ق.م، بوڭود تدخّل ف سپانيا باش يضمن سّلطة ديال قيصر على لمناطق ديالها.[2] فاش نتاصر يوليوس قيصر ف 46 ق.م ف معراكة طاپسوس، لي طرات ف بلاصة جات دابا ف سّاحل د تونس ؤ ماشاركش فيها بوݣود، لماليك بوكوس تّاني شد طرف كبير من نوميديا، ؤ وسّع مملكة موريطانية جيهت شّرق. بوݣود شارك ف معراكة موندا ف 45 ق.م لي كانت آخر معراكة د قيصر ضد لفرقة د لؤپتيماطيس لي لپومپيين كانو وحدين منهوم، ؤ لماليك بوݣود لعب دور موهيم فيها فاش دار هجمة من لّور على لارمي د لپومپيين لي تلّفات ليهوم نّوامر ؤ عجّلات لخسارة ديالهوم.[note 2]

تورة ف سپانيا[بدل | بدل لكود]

أقاليم د هيسپانيا (سپانيا) لي تابعين ل رّومان ف لقرن لّول قبل لميلاد.

ف إقليم هيسپانيا لبعيدة Hispania Ulterior (لجنوب د سپانيا ديال دابا)، لي كان حاكم فيها كوينتوس كاسيوس لونڭينوس تحت سّلطة د قيصر من 49 ق.م، ناضت تورة قايدها واحد لكوماندان ف لجيش سميتو كلاوديوس ماركيلوس أيسيرنينوس. تّورة ناضت بسباب تّعسف ؤ ستيغلال سّلطة لي كان ليمارسو كاسيوس. هاد لّخر طلب لمعاونة ديال لماليك بوڭود باش يرد تّوار، لي لبّا دّعوة.

ف نفس لوقت يوليوس قيصر كلّف لحاكم ديال إقليم هيسپانيا لقريبة Hispania Citerior (شّرق د سپانيا ديال دابا) لي سميتو ماركوس أيميليوس ليپيدوس باش يخمد تّورة. تّدخل ديال ليپيدوس ماكانش من جيهت كاسيوس، مي كا طرف تالت موحايد لي كيمتّل قيصر. هادشي خلا لقايد د تّوار ماركيلوس باش يقبل يتشاور معاه، ؤ قدرو بجوج باش يتغلّبو على هجمة غفّالة ديال لماليك بوڭود على لموعسكار د ماركيلوس. بوڭود موراها دار تّيفاق معا ليپيدوس ؤ ماركيلوس باش يخليو كاسيوس يمشي فحالو معا لعساكريا ؤ لخدّاما لي موالين ليه. كاسيوس مابقاش حاكم د لإقليم ؤ غادر، ؤ مات ف عاصيفة ف لبحر ف طريقو ل روما. [5][6]

ؤكطاڤيوس ضد أنطونيوس[بدل | بدل لكود]

بعد لغتيال د يوليوس قيصر ف 44 ق.م ناض صراع على سّلطة ف روما، مابين لجينيرال ماركوس أنطونيوس، ؤ ؤكطاڤيوس حفيد خو قيصر. ف هاد لمطايفة لخوت بوڭود ؤ بوكوس تّاني ماتّافقوش ؤ كل واحد فيهوم تحالف معا طاراف، بوڭود معا أنطونيوس، ؤ بوكوس معا ؤكطاڤيوس (لي غادي يولّي من بعد لإمبراطور أوڭوستوس قيصر).

ف مارس 43 ق.م، بوڭود صيفط فرسان من لجيش ديالو باش يدعمو أنطونيوس. ف يونيو من نفس لعام، ستقبل ك. بالبوس لي كان من لأعيان د أنطونيوس ؤ كانو جرّاو عليه من سپانيا. ف لحرب د پيروسيا (41 تال 40 ق.م)، بوڭود حاصر قاديس، ؤ حاول يستولي على لكنوز ديال معبد هرقول ملقارت لي كيتّعتابر أقدم معبد ف جّيهة لغربية د لمتوسط.[2]

ف جوايه 38 ق.م، نّاس د طانجا تارو ضد لماليك بوڭود، ؤ ولّات لمدينة مستاقلة على سّلطة ديالو ؤ تابعة نيشان ل رّومان. بوكوس تّاني ستولا على موريطانية لغربية فاش كان خوه بوڭود ف سپانيا، ؤ هاد لّخر ضطر باش يمشي جيهت شّرق عند لحليف ديالو أنطونيوس. بوكوس تّاني ولّا ماليك على موريطانية كاملة، ب مساندة ديال ؤكطاڤيوس، ؤ ولات لمملكة ديالو كبر ب كتير من لي ورت من عند بّاه ماصطانيصوسوس ؤ جدّو بوكوس لّول.[1]

لماليك بوڭود مشا ل عند لحليف ديال أنطونيوس ف شّرق، و تّقتل ف معراكة أكتيوم ف ميطوني ف ليونان، ب أمر من لجينيرال رّوماني أڭريپا.[2]

إصدارات صولدية[بدل | بدل لكود]

شقفة د لفلوس د نّقرة ديال لماليك بوڭود تسكّات ف جوايه 47-46 ق.م[7]

لفلوس لي تسكّو ب سميت بوڭود تّلقا منّهوم عاداد قليل، ؤ أغلبية مصاوبين من نّقرة، ؤ شي وحدين من لبرونز.[2] سّتيل ديالهوم كيبيّن تأتير نوميدي ؤ إيبيري. عكس شّقفات نّوميدية، لفلوس د بوڭود مكتوبين ب لّاتينية بشكل كامل بلا تا شي أتار ديال لبونيقية. هاد لفلوس تسكّو ف لغالب ف لفترة د لحرب لأهلية د قيصر، غالباً ل غاراض سياسي، سيرتو ب سباب ستيعمال نّقرة لي نادرة ف لفلوس د شمال إفريقيا ف لقديم، ؤ تخدام لّاتينية بوحدها. لفلوس د بوڭود ف لغالب تسكّو ف ليكسوس ؤلا وليلي، ؤ لوجوه ديالهوم كيمتّلو رموز سياسية رومانية (بحال لباطو د لحرب)، ؤلا دينية.[8]

نوطات[بدل | بدل لكود]

  1. ^ هوك، ص. 353[4]
  2. ^ هوك، ص. 427-428[4]

عيون لكلام[بدل | بدل لكود]

  1. ^ a b لموسوعة لأمازيغية، بوكوس. تطّالع عليه ب تاريخ 1 مارس 2022.
  2. ^ a b c d e f "لموسوعة لأمازيغية، بوڭود". مأرشيڤي من لأصل ف 3 مارس 2022. Cite journal requires |journal= (معاونة)
  3. ^ a b دوان و. رولر. The World of Juba II and Kleopatra Selene: Royal Scholarship on Rome's African Frontier. ص. 57-58.
  4. ^ a b ناثانييل هوك (يناير 1818). "The Roman History, from the Building of Rome to the Ruin of the Commonwealth" (ب نڭليزية).
  5. ^ ريتشارد د. وايڭل (1992). Lepidus: The Tarnished Triumvir. نيويورك: Routledge. pp. 28–30.
  6. ^ لموسوعة لبريطانية، ڭزو 5. Bogud, king of Mauretania, and M. Lepidus, proconsul of Hither Spain, to whom Cassius had applied for assistance, negotiated an arrangement with Marcellus whereby Cassius was to be allowed to go free with the legions that remained loyal to him
  7. ^ Les monnaies de l'Afrique antique, Chapitre 6. Les royaumes maurétaniens à l’époque des guerres civiles : Bogud (49-38 av. J.-C.) Bocchus II (49-33 av. J.-C.) L’interrègne (33-25 av. J.-C.). pp. 409–411. مأرشيڤي من لأصل ف 20 يونيو 2020.
  8. ^ Les monnaies de l'Afrique antique, Chapitre 6. Les royaumes maurétaniens à l’époque des guerres civiles : Bogud (49-38 av. J.-C.) Bocchus II (49-33 av. J.-C.) L’interrègne (33-25 av. J.-C.). pp. 205–211. مأرشيڤي من لأصل ف 1 يوليوز 2020.