باناصا

من ويكيپيديا
باناصا
باناصا
معلومات عامة
نوع د لموضع مستوطنة، موقع أثري و مدينة قديمة
لبلاد لمغريب
طرف من موريطانية و لإمبراطورية الرومانية
تّقافة أمازيغ و رومان
تاريخ د لبني 400 قبل لميلاد
مستوى تراتي ترات تقافي ديال لمغريب


باناصا هيّا مدينة مورية أمازيغية رومانية قديمة، كترجع لؤصول ديالها ف لغالب ل لقرن رّابع قبل لميلاد، ؤلا حتا قبل. باناصا كانت عندها أهمية قتيصادية كبيرة حيت جات علا واد سوبوبوس (واد سبو)، ؤ كانت مكونيكطية مزيان معا رّيزو د تّيجارة لمتوسطية ف لعصر لقديم.

من لعصر د لموحدين لموضع ولات عندو أهمية دينية كبيرة ب سباب لأضرحة ديال أوليا بحال سيدي علي بوجنون، سيدي حمد لݣرج ؤ سيدي بوعزة.[1]

مدينة باناصا حدد لموضع ديالها لباحت لفرانساوي شارل جوزيف تيسو ف 1871 من نقيشة تّلقات فيها، ؤ كانت قبل معروفة غير من لمكتوبات رّومانية.[2]

سمية[بدل | بدل لكود]

تحت لحتيلال رّوماني كانت رسميا معروفة ب سمية يوليا والينتيا باناصا Iulia Valentia Banasa. ف لوقت ديال لإمبراطور ماركوس أوريليوس تبدلات سّمية ل كولونيا أوريليا باناصا Colonia Aurelia Banasa. سّباب ديال هاد تّبدال د سّمية ل حد سّاعة مامعروفش، مي تقدر تكون عندها علاقة معا ضطيرابات طرات ف لمدينة.[1]

لموضع[بدل | بدل لكود]

لموضع ديال باناصا

باناصا جات علا طّريق ما بين طنجيس ؤ سالا كولونيا، علا ضّفة لجانوبية ديال سّوبوبوس، 17 كيلوميطر من مشرع بلقصيري.[1]

تاريخ[بدل | بدل لكود]

لفترة لمورية[بدل | بدل لكود]

60 ديناريوس ديال لماليك يوبا لموري تّلقاو ف باناصا ف 1907

لمدينة بدات غالبا كا ڤيلاج موري ف لقرن رّابع ق.م.، ؤلا قبل. كاينين أتار تّلقاو فيها يقدرو يكونو كيرجعو ل لقرن لخامس ؤلا سّات قبل لميلاد. من بعد ما مات لماليك بوكوس تّاني ف 33 ق.م.، لإمبراطورية رّومانية ولات مسيطرة علا مملكة موريطانية بشكل ماشي مباشر. ف لفترة ما بين فاش مات لماليك لّخر د سّلالة لمورية ديال باݣا، ؤ فاش تولا لماليك يوبا لحوكم ف 25 ق.م.، لإمبراطور أوݣوستوس غادي يرد باناصا كولونيا، باش يسكنو فيها لعساكريا لمتقاعدين لي شاركو ف معركة أكتيوم ف 31 قبل لميلاد، ولاكين لحوكم لفيعلي غادي يكون ف يد لماليك يوبا.[3] باناصا كانت من بين تلاتة د لمدون لي ردّها لإمبراطور أوݣوستوس كولونيا رومانية؛ جّوج لوخرين هوما بابّا ؤ زيليس. علا حساب لمؤرّخ لألماني طيودور مومزن، علاين 10000 عساكري روماني ستاقرو ف هاد لمدون ب تلاتة ف لمجموع.

ملي وقع غتيال ديال لماليك پطوليمايوس لموري ف 40 ميلادية، لمدينة ف لغالب عرفات ضطيرابات سياسية ؤ جتيماعية. لكوش د لرض لي كاترجع ل لفترة قبل رّومانية، مغطية دابا ب طبقات غليضة ديال تّرسبات لوادية من فياضانات د واد سبو. يلاه شي جوج بلايص، ف لجانوب ؤ شمال د لمدينة، فين كشفو لعولاما عليها. نقدرو نݣولو بلي باناصا ل حد سّاعة باقة ماكشفات علا أغلبية د لأسرار ديالها. لأتار لقدام لّولين لي تلقاو كانو علا عمق 10 ميترو تقريبا، ؤ هوما عيبارا علا طراف د لفخار لي ماكيشبهو ل حتا شي حاجة خرة تّلقات ف لموضع ؤ ماقدروش لباحتين يأرخوها ب تّدقيق.[1]

علا عمق 4.5 ميترو، تحت من طّبقة رّومانية، تّلقاو لأتار ديال بني قديم ديال طّين ؤ لقرمود ؤ فرارن ديال لمصاوبة د لفخار كيرجعو ل لقرن تّاني ؤ تّالت ق.م. ل نفس لفترة كيرجعو قبورا لي كاينين ف لجانوب شّرقي ديال لفوروم، ؤ تّلقاو فيهوم مجوهرات ب صيناعة بونيقية لي قدم من لقبورا، ؤ كيرجعو غالبا ل لقرن لخامس ؤ سّادس قبل لميلاد.[1]

لفترة رّومانية[بدل | بدل لكود]

ف 40 ميلادية ولات باناصا تابعة ل رّومان بشكل موباشير. من بين لأتار د لحياة ليومية د هاد لفترة لي تّلقاو كاينين حوانت، مخبازات، فرارن، حمامات ؤ معابد. تّلقاو حتا نقيشات علا لحجر ؤ علا لبرونز، منهوم عاداد د دّيپلومات لعسكارية، ربعة د لمراسم (جمع مرسوم) ديال لپاطروناج، ؤ جوج ديال تّيكستات لقانونية، واحد منهوم كيعفي فيه لإمبراطور كاراكالا سّكان د باناصا من ضّرايب ف عام 216، ؤ لاخور لي كيتسما طابولا باناصيطانا،[4] من لعهد ديال ماركوس أوريليوس ؤ ديال كومودوس، لي كيحدد شّروط باش لأجانب يقدرو ياخدو لجنسية رّومانية، ؤ طّاريقة د تّنضيم ديال لمجلس د لمستشارين.[1]

ف لقرن تّالت لميلادي، تخربات لمدينة ؤ تهجرات، قبل ݣاع من لقرار ديال لإمبراطور ديوكليتيان ف عام 258 باش تّخلا سّلطة رّومانية علا لجانوب د موريطانية طّنجية.[5]

لفترة لحديتة[بدل | بدل لكود]

لمدينة تعرف عليها لباحت لفرانساوي شارل جوزيف تيسو ف 1871 من نقيشة تّلقات فيه، ؤ زاد توكد هادشي ملي تّلقات كمشة فيها لألاف د لعوملات لقديمة حدا ضّاريح د سيدي علي بوجنون ف 1904. ولاكين لبحت لأركيولوجي ف باناصا مابدا حتال 1911، ؤ بشكل فيعلي ف 1933 تحت لإشراف ديال رايموند توڤنو، ؤ ب لمعاونة ديال ؤجين ألبيرطو ؤ أرمان لوكي. هاد لباحتين كانو مهتمين غير ب لأتار رّومانية، ؤ ماتسوقوش ل لبقايا د لحضارة لمورية لي سبقاتها.[3]

لمعمار[بدل | بدل لكود]

لمدينة تّبنات علا سّتيل رّوماني ف عهد أوݣوستوس، علا شكل تربيعة ب توجيه شمال جانوب، ؤ ف لفترة لّخرة ديال لإمبراطورية رّومانية لغربية، تعاود لبني ديال تّربيعة ب توجيه شمال شرقي جانوب غربي.[1]

أقدم بني كشفو عليه لعولاما ل حد سّاعة ف أغلبيتو كيرجع ل لقرن لّول لميلادي. ل هاد لفترة تأرخ لفوروم ف باناصا، لي تّبنا ف وقت لإمبراطور ماركوس أوريليوس فوق من فورومات قدام. هاد لفوروم كاين ف صّونطر د لمدينة، ؤ لأبعاد ديالو 34 ف 37 ميترو. علا جّناب ديالو كاينين پورتيكات (كولوارات رومانيين)، ف شّمال ديالو باسيليكا ؤ ف شّرق ديالو قاعة ب جنب مقوس. ف لجانوب كاينين خمسة د سّيلات قدّامهوم پورتيكة. هاد سّيلات مديورين فوق مينصة لي قدّامها حجرات مربعين لي ف لغالب كانو فوق منهوم تماتيل. لبلان د لبني كيشبه لبلان ديال معابد تّلقاو ف مدون د موريطانية بحال وليلي، شالة ؤ شرشال لي دابا كاينة ف دزاير. حتا بنيان ديني أخور ماتّلقا ل حد سّاعة، من غير مبنى صغير يقدر يكون معبد كيرجع ل فترة مامعروفاش كاين ف لجانوب لغربي د لمدينة.[1]

ستيلة رومانية مكتوبة ب لّاتينية

من بين لمباني لعمومية لي تّكشف عليهوم، كاينين لحمامات، لي تّلقاو منهوم خمسة غير ف لبلاصة لي تحفرات ل حد دابا. ب لإضافة ل ماكيلوم (سوق مغطي) كاين ف لغرب ديال لفوروم، لي كان شاد تقريبا حي كامل بوحدو.[1]

دّيور د سّكنى د لأغنيا ف باناصا ماكيختالفوش علا دياول وليلي، من غير بلي ماشي مرفّحين ب نفس لمستوى. دّيور د نّاس لعاديين مامنضمينش مزيان، ؤ لبلان ديالهوم كيشبه ل دياول ليكسوس ؤ تامودا. بزاف د لحوانت حتا هوما تّكتاشفو، من بينهوم مخبازات، لي تّم تّعرف عليهوم ب دّوزان لي فيهوم، شّي لي كينساجم معا نّوع د لمنتوج د لمنطقة بحال لݣمح، عكس لمعاصر د زّيتون لي قلال يلا قارنّاهوم معا لي كاينين ف وليلي. لمضهر لعيان ديال هاد لمباني سبابو هوّا تّخدام د مواد رخيصة ف لبني، حيت لمقالع د لحجر ب جودة مزيانة كانو بعاد علا لمدينة. لقرمود لمقطع مزيان علا شكل مستطيل مخدمينو غير ف لمباني لعمومية، ؤلا ف تّزواق، لي زاد تطور ف لقرن تّاني ؤ لقرن تّالت ميلادي ب زّليج لي تأمپورطا من بلايص خرين، ؤلا مرسومات د لحيط (فريسكوات).[1]

تصاور تخادو من سّما بينو بلي كاينين أتار ديال قشلة عسكارية ؤ قلعة ديفاعية ف لجانوب شّرقي د لمدينة، مي علا لرض مالقاو لعولاما حتا شي أتار باينة.[1]

لقتيصاد ؤ لموارد[بدل | بدل لكود]

صّيناعة د لفخار[بدل | بدل لكود]

لأتار ديال فرارن د لفخار من لقرن تّاني ؤ تّالت قبل لميلاد كاتدل علا صّيناعة لمحلية ف باناصا. صّناع لباناصيين كانو كينتجو ماعون د لفخار مصبوغ ب ستيل لي كان متأتر ب سّتيل د لفخار لإيبيري ؤ لبونيقي لي كانو معروفين ؤ منتاشرين بزاف ف لمنطقة د لبحر دّخلاني.

طّقوس دّيانية[بدل | بدل لكود]

كاينين نقيشات كيدلو علا لممارسة د طّقوس ديال دّيانة رّومانية ف باناصا. ب لإضافة ل رّبايب د ليونان بحال رّبة سيبيل، ؤ رّبة لمصرية إيزيس.

عيون لكلام[بدل | بدل لكود]

  1. ^ a b c d e f g h i j k "باناصا (سيدي علي بوجنون)، لمغريب" (ب نڭليزية). تطّالع عليه ب تاريخ 19 يونيو 2021.
  2. ^ فرانسيسكو مارطوريلا (2020). "An urban warehouse for foodstuffs in the Iulia Valentia Banasa colony (Mauretania Tingitana, Morocco) [مخزن حضري د لمواد د لماكلة ف يوليا والينتيا باناصا (موريطانية طّنجية، لمغريب)]". Antiquités africaines. doi:10.4000/antafr.1888. Cite journal requires |journal= (معاونة)
  3. ^ a b سيلڤي جيرار (1984). "Banasa préromaine, un état de la question [باناصا لقبلرومانية، لمعرفة لحالية]". Antiquités africaines. Cite journal requires |journal= (معاونة)
  4. ^ ويليام سيستون; موريس ؤزيناط (1961). "La citoyenneté romaine au temps de Marc Aurèle et de Commode, d'après la Tabula Banasitana [لجنسية رّومانية ف لعهد ديال ماركوس أوريليوس ؤ كومودوس، علا حساب طّابولا باناصيطانا]". Comptes rendus des séances de l'Académie des Inscriptions et Belles-Lettres. Cite journal requires |journal= (معاونة)
  5. ^ "باناصا ف عهد رّومان" (ب نڭليزية). تطّالع عليه ب تاريخ 19 يونيو 2021.

شوف تا[بدل | بدل لكود]

Wikimedia Commons تقدر تزيد شوف بزاف د تّصاور و لمعلومات ديال Banasa (Morocco) ف ويكيميديا كومنز.