انتقل إلى المحتوى

پطوليمايوس لموري

من ويكيپيديا
پطوليمايوس لموري
معلومات عامة
زيادة 9 قبل لميلاد
شرشال
لموت 40 (47/48 عام)
روما القديمة
طريقة دلموت لإعدام
لحرفة سياسي
لفاميلة
لواليد يوبا التاني
لواليدة كليوپاطرا سيليني التانية
خوت دروسيلا الموريطنية الكبرى
شريك جوليا أورانيا
لولاد دروسيلا الموريطنية الصغرى


پطوليمايوس لموري ؤلا پطوليمايوس لموريطاني (مات ف 40 ميلادية) كان ولد لماليك يوبا تّاني ؤ لماليك لّخراني ديال مملكة موريطانية، ؤ لّخراني من سّلالة لپطليمية. جدّاتو من مّو، كليوپاطرا سيليني، هيّا كليوپاطرا سّابعة لماليكة لمصرية لمشهورة، ؤ جدّو من مّو هوّا لجينيرال رّوماني ماركوس أنطونيوس. پطوليمايوس ب هادشي كانو عندو ؤصول أمازيغية، رومانية، ؤ يونانية. ؤ كانت عندو علاقة قرابة تا معا بزاف د لأباطيرا ؤ شّخصيات سّياسية رّومانية، بحال يوليوس قيصر، كاليݣولا ؤ نيرو.

پطوليمايوس ف لغالب تزاد ف قيصرية (دابا شرشال ف دزاير). واليديه سيفطوه ل روما باش يتربّا فيها، ؤ ياخد تعليم روماني. مابين 19 ؤ 21 ميلادية رجع ل موريطانية، ؤ تقاسم لحكم معا بّاه يوبا، لي مات ف 23 ميلادية، باش يولي پطوليمايوس ماليك كليان د روما. پطوليمايوس عاون روما باش يقضي على تورات أمازيغية، بحال تّورة د تاكفاريناس لي بدات ف 17 ميلادية ؤ تسالات ب نتيصار د رّومان ف عام 24، وخا كانو خسائر بزاف من لأطراف بجوج. على هاد لولاء لي بيّنو ل روما، پطوليمايوس تّعتابر صديق و حليف، ؤ مجلس شّيوخ رّوماني أكّد لمنصب ديالو كا ماليك د موريطانية ؤ عطاه صولجان د لعاج و طوݣا مطرّزة ب دّهب كا جايزة رمزية.

تصويرة ديال تّمتال د لماليك پطوليمايوس لموري من لمتحف د تّاريخ ؤ لحضارات ف رّباط

پطوليمايوس كان كيزور مدينة لإسكندرية ف مصر ف شلا مناسبات. تجوج ب أميرة سورية سميتها يوليا ؤرانيا، لي كانت من عائلة ملكية ديال إيميصا (دابا حمص ف سوريا)، ؤ ولدو بنت لي هيّا دروسيلا صّغيرة، لي تزادت ف ؤلا مورا عام 38 ميلادية. ف عام 40، عرض عليه لإمبراطور كاليݣولا لي كيجيه من جيهت مّو، باش يجي ل روما، ؤ پطوليمايوس لبّا دّعوة. كيتݣال بلي پطوليمايوس دخل ل لومفيطياطر لي كان غايتدار فيه عرض ديال لݣلادياطورات (مدابزة تال لموت مابين عبيد مدرّبين) ب لبسة قوقية لي عجبات لحاضرين. كاليݣولا غار منو، ؤ يقدر يكون هادا هوّا سّباب علاش أمر ب لقتل ديالو. لقتيلة ديالو غادي تشعل تورات ف مملكة موريطانية، أشهر وحدة هيّا تورة إديمون. من بعد ما خمادت تّورة ف 44 ميلادية، لإمبراطور كلاوديوس أمر ب تقسيم موريطانية ل جوج أقاليم هوما موريطانية طّنجية (شمال لمغريب) ؤ موريطانية لقيصرية (شمال غرب دزاير).[1]


مسبوق ب مملكة موريطانية - فترة د لحكم
23 م - 40 م
متبوع ب
تا واحد (لماليك اللخراني)

عيون لكلام[بدل | بدل لكود]

  1. ^ "Ptolemy of Mauretania". مأرشيڤي من لأصل ف 2022-09-04. تطّالع عليه ب تاريخ 2022-09-04.
هادي زريعة ديال مقالة علا موضوع عندو علاقة ب شخصيات د لمغريب خاصها تّوسع. تقدر تشارك ف لكتبة ديالها.