عنتي
عنتي
| ||
| ||
| معلومات عامة | ||
| لحرفة | ماليك | |
| لفاميلة | ||
| لواليد | بوسيدون | |
| لواليدة | ڭايا | |
| شريك | تينڭا | |
عنتي (ب ليونانية لبالية Ἀνταῖος، أنطايوص) شخصية ف لأساطير ليونانية ؤ لأمازيغية، مشهور ب لمدابزة ديالو معا هرقول ف إطار 12 عطاشات د هرقول. عنتي كيتّعابر رب معبود عند لأمازيغ لقدام ؤ "حامي أرض ليبيا لقديمة" (أرض لأمازيغ ؤلا تامازغا ف لمصطلح لعصري).
ف لمعتقد لقديم، عنتي كان عملاق ؤ ولد لأرباب بوسيدون ؤ ڭايا.[1][2] مراتو هيّا رّبة تينڭا (لي لأسطورة كاتڭول بلي تسمّات عليها مدينة طانجا). بعض لأساطير كاتڭول بلي عندو جوج بنات، وحدة سميتها بارصي ؤلا ألسييس، ؤ لوخرة سميتها إفينوي.
كلمة Ἀνταῖος ب ليونانية كاتعني "داك لي ضد" ؤلا "لعدو".[2]
عنتي كان كيتحدّا أي واحد دايز من طريقو باش يتعابز معاه، ؤ ماعمّرو خسر أي معابزة طالمّا رجليه قايسين مّو ڭايا (لأرض). كان كيطيّح لخصوم ديالو ل لّرض، ؤ كيقتلهوم، ؤ بنا معبد ل بّاه بوسيدون ب لقلقولات ديالهوم. هرقول لي كان ف طريقو ل جّردة د لحوريات لغربيات (عطاشة نمرة 11 ديال هرقول)، قبل تّحدي ؤ تصارع معاه. هرقول عاق بلي مايقدرش يغلب عنتي ؤ هوّا واقف فوق لرض، فا هزّو ؤ بقا كيعصرو تا قتلو.[1][3]
موراها هرقول غادي ياخد مرات عنتي، تينڭا، ؤ غادي يولد معاها لبطل لأمازيغي صوفاكس، لي لأساطير كاتڭول بلي أسس مدينة طانجا ؤ سمّاها على مّو. هرقول ولـٰد وٰلد أخور سميتو پالايمون معا بنت عنتي إفينوي. لماليك يوبا لموريطاني كان كيدّاعي بلي لأصل ديالو كيرجع ل صوفاكس. صوفاكس كان عندو ولد سميتو ديوضوروس لي لأساطير كاتڭول بلي حتل بزاف د لمناطق ف شمال إفريقيا ب لارمي لي كان جاب هرقول.
لمعابزة مابين عنتي ؤ هرقول كانت من بين لمواضيع لمحببة ف لفترة د نّوضة ف ؤروپا (لقرن 15 ؤ 16)، سيرتو ف نّحت.[4]
بعض لأساطير كاتعتابر بلي عنتي هوّا نيت لماليك ديال مدينة إراسا، لي كانت ف مملكة قورينا (لي جا لموضع ديالها ف ليبيا ديال دابا)، ؤ لي كانت عندو بنت سميتها ألسييس ؤلا باركا.[2]
عنتي كان كيتڭال بلي كان ف شي موضع ف صّحرا د شمال إفريقيا. ف لغالب دخل ل لأساطير ليونانية ف نّص د لقرن 7 قبل لميلاد، بعدما ليونانيين لقدام دارو رجلهوم ؤ حتلو مناطق ف شمال إفريقيا. هاد لموضع مامحددش مزيان على لعرض د لمنطقة، ؤ يقدر يكون ف أي بلاصة ف شّرق ؤلا لغرب. متلاً واحد لقصة كاتّعاود بلي لجينيرال رّوماني كوينتوس سيرطوريوس ملي زار طانجا، ڭالو ليه ناسها بلي لقبر د عنتي كاين تحت واحد لكدية كبيرة مابعيداش بزاف على لمدينة. ملي حفر لقبر لقا عضام د عملاق، ؤ عاود ردم تّراب فوق منهوم، ؤ شارك ف طقوس تقديسية محلية ؤ عطا قربان باش "يعضّم لمكانة ديال لقبر". هاد لكدية تقدر تكون هيّا لمعلامة د مزورا لي جات على بعد د 50 كيلوميطر من طانجا، لي كاتّعتابر من أقدم لمعالم لميڭاليتية ف شمال إفريقيا. لأسطورة كاتڭول بلي لكدية لي مدفون فيها عنتي غير كايتخاد منها تراب كاطيح شّتا باش تعاود تعمر ديك لحفرة.[1]
لمدينة لقديمة د باركا، لي غالب جات ف لمرج ف ليبيا لحالية،[5] كانت كاتسمّا أنطاپوليس على عنتي (أنطايوس)، ؤ تا مدينة تجيبو ف مصر لقديمة كانو ليونانيين ؤ رّومان كيسمّيوها "أنطايوپوليس"، وخا "أنطايوس" لي تسمّات عليه، يقدر مايكونش هوّا نيت عنتي لأمازيغي.
- ^ a b c "Perseus, Antaeus". مأرشيڤي من لأصل ف 2023-07-08. تطّالع عليه ب تاريخ 2022-09-04.
- ^ a b c "Antaeus (Antaios)" (ب نڭليزية). مأرشيڤي من لأصل ف 2023-06-08. تطّالع عليه ب تاريخ 2022-09-04.
- ^ The New Student's Reference Work/Antæus. مأرشيڤي من لأصل ف 2023-07-08. تطّالع عليه ب تاريخ 2022-09-04.
- ^ لموسوعة لبريطانية، أنطايوس. 1911. مأرشيڤي من لأصل ف 2023-07-08. تطّالع عليه ب تاريخ 2022-09-04.
- ^ Matthew S. Gordon؛ Chase F. Robinson؛ Everett K. Rowson؛ Michael Fishbein, إيديتورات (2017). The Works of Ibn Wāḍiḥ al-Yaʿqūbī (Volume 1): An English Translation. Brill. ص. 182. ردمك 9789004364141. مأرشيڤي من لأصل ف 2023-01-01. تطّالع عليه ب تاريخ 2022-09-04.
لمواضيع مرتبين بشكل عام علا حساب نّوع | ||
| أساطير |  | |
| ملوك و ماليكات | ||
| شخصيات | ||
| أحدات | ||
| مدون |
| |
| معلامات أترية | ||
1 مواقع ف ليستة د ليونيسكو د تّرات لعالامي 2 مقتارحة ل هاد لّيستة | ||