ليستة د ناس لي حكمو لمغريب لقديم

من ويكيپيديا
Ambox important.svg مقالة ناقصينها تصاور. هاد لمقالة ناقصينها تصاور، حاول تزيد تصاور ماعليهاش كوپيرايت ف/من كومنز. باش تعرف كيفاش تزيد تصويرة ف مقال، شوف دّوزان.

هاد لّيستة كاتجمع شخصيات تاريخية لي حكمات لمغريب ؤلا دويلات لي دازو منّو على أعلى مستوى، يعني لي كان عندها أعلى لقب د لحوكم (أݣليد، ماليك، سلطان، إمبراطور) ف دّولة. لووزارا ؤ لؤمارا، ؤ ناس د سّلطة لوخرين مامحسوبينش، حتا لو كانو عملياً هوما لحكام د لفعليين ديال دّولة ف شي فترة من لفترات.

لفترة لقديمة[بدل | بدل لكود]

لإمبراطورية لقرطاجية[بدل | بدل لكود]

بزاف د لأدبيات كيهضرو على ستيطان فينيقي ديال بحارة كنعانيين ف سّواحل ديال لمغريب لقديم، ؤ من لمؤكد بلي لعبو دور ف تطوير لقتيصاد لمحلي ؤ أترو ف تّقافة ؤ تّنضيم جّتيماعي. وخا داكشي ماكانعرفوش بزاف على لمغريب ف هاد لفترة، ؤ لبحت لأركيولوجي باقي ضعيف. ماشي مستبعد بلي لمناطق د لمغريب، سيرتو حدا لاكوط كانو تابعين، وخا غير ب سّمية، ل لإمبراطورية لقرطاجية، لي كان عندها نيضام شبه جمهوري، ؤ ربما كانت متحكمة ف لمدون د سّاحل قتيصادياً ؤلا حتا سياسياً. شوف ليستة د لحكام ديال قرطاج.

مملكة موريطانية[بدل | بدل لكود]

من لقرن 3 ؤلا 4 قبل لميلاد تّنضيم جّتيماعي ؤ سّياسي ديال لقبايل لأمازيغية لمورية ف لمغريب لقديم، كيعطي لولادة ديال مملكة كاتسمّا مملكة موروسيا ؤلا موريطانية. لحدود لجانوبية ديالها مامحدداش ب دقة ؤ لملوك لّولين ديالها مامعروفينش، حتال حدود نّص تّاني ديال لقرن تّالت ق.م فاش لكتوبا د تّاريخ كيدكرو سّمية ديال لماليك باݣا.[1]

لإمبراطورية رّومانية[بدل | بدل لكود]

بعد لغتيال ديال لماليك پطوليمايوس لموريطاني ف 40 ميلادية، كاتولّي مملكة موريطانية تابعة فعليّاً ل رّومان، بعدما كانت مملكة كليان عندها حوكم داتي. رّومان قسّمو لمملكة ل جوج أقاليم هيّا موريطانية طّنجية ؤ موريطانية لقيصرية. رّومان وخا داكشي ماقدروش يسيطرو على لمملكة كاملة، ؤ ولّاو مناطق فيها مستاقلة ؤ تابعة ل لحوكم د قبايل أمازيغية بحال لبكوات ؤ مكناسة، ؤ لأوطولول. هادي ليستة د لأباطيرا رّومان لي حكمو ف لفترة فاش كانت موريطانية طّنجية تابعة ل روما. فيها غير لي كانو معتارفين بيهوم بشكل رسمي ف أغلبية د لمناطق، ماشي لي كان عندهوم عتيراف جغرافي محدود، ؤلا حاولو يديرو نقيلاب ؤ يسيطرو على لإمبراطورية. ؤ غير لي شادّين حوكم فيعلي (ماشي إمبراطور موساعيد).

لإمبراطورية رّومانية لغربية[بدل | بدل لكود]

لمصطلح ديال لإمبراطورية رّومانية لغربية كيتݣال على لموقاطعات رّومانية لي جات ف نّص لغربي ديال لإمبراطورية رّومانية، ؤ كانت ديجا عندها إدارة إمبراطورية ديالتها. لمؤرخين كيستعملو هاد لمصطلح سيرتو من 286 ميلادية فاش تقسمات لإمبراطورية بشكل فيعلي، ؤ ولاو جوج أباطيرا مستاقلين كيحكمو جّيهة شّرقية ؤ جّيهة لغربية ديالها، وخا ف شي فترات كان سّلطة كاترجع ف ليد ديال إمبراطور واحد (بحال كونسطانتينوس لّول). ف هاد لفترة كانو رّومان تخلاو على مناطق كتيرة ف موريطانية طّنجية، ؤ بقاو شادّين مناطق محدودة مابين طانجا ؤ سالا كولونيا. ف 476 طاحت لإمبراطورية رّومانية لغربية، ؤ ف 480 تّقتل آخر إمبراطور ديالها يوليوس نيپوس لي كان موعتاراف بيه بشكل واسع.

لفترة لمضلّمة[بدل | بدل لكود]

عيون لكلام[بدل | بدل لكود]

  1. ^ "موريطانية". لموسوعة لأمازيغية (بلفرانساوية).