انتقل إلى المحتوى

شالة

من ويكيپيديا
شالة
معلومات عامة
نوع د لموضعمدينة ڭنايزية و موقع أركيولوجي
لبلادلمغريب
تّقافةأمازيغ، روما لقديمة و لمرينيين
تاريخ د لبني700 قبل لميلاد
مدكورة فEsmeraldo de Situ Orbis
لقيمة لأثرية
مستوى تراتيترات تقافي ديال لمغريب
لبلاصة
لمدينةالرباط


شالة (ب لأمازيغية ⵛⴰⵍⵍⴰ) هوّا موقع تاريخي ؤ أركيولوجي كاين ف مدينة رّباط كترجع لؤصول ديالو ل لفترة ديال لستيكشافات لقرطاجية ف لقرن سّابع قبل لميلاد، ؤ بقا لستيغلال ديالو ف لفترة لمورية ؤ لفترة رّومانية ؤ لقرون لوسطانية.

لمدينة د سالا ؤلا سالا كولونيا كانت ف لعهد لموري لّخر ؤ رّوماني هيّا نيت شالة لّي كانعرفو دابا. لمدينة لمورية لّي كانت قبل منها عندها تقاطع معا شالة، ولاكين لحدود ديالها مامعروفينش. شالة ماشي غير مدينة عادية ف تّاريخ، ولايني لعبات أدوار تيجارية ؤ عسكرية ؤ دينية موهيمة ف لعصور لقديمة ؤ لوسطانية، ؤ كانت عندها دلالات روحانية كبيرة عند لمغاربة خلاتهوم ينسجو أساطير ؤ حجّايات عليها، ؤ يمارسو طقوس فيها عندها علاقة ب معتقدات قديمة، كاين منها لّي بقا حتال لفترة لعصرية.

سّمية

[بدل | بدل لكود]

سمية شالة هيّا تحريف ديال سيلا، سالا، ؤلا سلا، لّي هيّا سّمية لقديمة د لمدينة لّي كانت تماك قبل ما تّبنا مدينة سلا لّي كانعرفو دابا. سّمية يقدر يكون أصلها من لبونيقية 𐤔𐤏𐤋𐤕 شالاط لي كاتعني "صخرة" ولّا من "سيل" لي كاتعني "كتير".[1]

لموضع

[بدل | بدل لكود]

شالة جات ف مدينة رّباط علا شّط ديال واد بورݣراݣ، لّي كان ف لقديم معروف ب سمية واد سلا، علا 3.5 كيلوميطر من لمصب ديالو ف لمحيط لأطلسي. لموضع ديالها عطاها أهمية قتيصادية كبيرة من لعصور لقديمة، ب عتيبار بلي كانت مرسا ديال لباطوات ؤ مركز د تّيجارة معا لمناطق د لبحر دّخلاني.[2][3]

مامعروفش مزيان قداش كانت لمدينة لأصلية، ولاكين كتّقدر لميساحة ديالها ب 23 هيكطار منها 4 هيكطار لّي تستكشفات ل حد سّاعة.[2]

تاريخ

[بدل | بدل لكود]

لعصر نّيوليتي

[بدل | بدل لكود]

كاينين أتار ديال سّكنة د بنادم من لعصر نّيوليتي تّلقاو ف شالة، ولاكين تأريخ ديالهوم ممحددش بشكل دقيق. هاد لكتيشاف تدار ف لعشرينات ديال لقرن لعشرين من عند لعالم لأركيولوجي هنري باصي، لّي لقا أدوات قبلتاريخية مصنوعة من لݣرانيت، ؤ لّي كتدل بلي لباشار كان عاش ف ديك لمنطقة. لّي باقي ماشي متوكد هوّا واش بنادم كان ديجا مستاقر تماك، يعني بناو شي قرية ؤلا مدينة، ؤلا هاد لستيقرار ماطرا حتال فترات معطلة.[4] باصي كيأكد ف لمونوݣراف ديالو علا لمدينة بلي لموضع ديالها كان مناسب ل سّكنة ف جميع لفترات لقبلتاريخية ؤ تّاريخية، بعتيبار لوجود ديال لما ب كمية كبيرة، لحوت ف لما ؤ لبحر، أراضي د لفلاحة، ؤ بلايص د صّيد ف لولجة د سلا، ؤ سّهولة د دّيفاع عليها من نّاحية لعسكرية.[5]

لعصر لقديم

[بدل | بدل لكود]

شالة بدات بحال موضع فين كيوقفو لباطوات علا واد سلا (واد بورݣراݣ)، ما بين ليكسوس ؤ موݣادور ف لقرن سّابع قبل لميلاد. ف لفترة لمورية (مملكة موريطانية) كانت شالة موقع تيجاري موهيم ؤ معروفة ب سمية سالا ؤلا سيلا. عوملات تّلقاو فيها كيرجعو ل لفترة لمورية لّخرة كيدلو بلي كانت عندها ستيقلالية خلّاتها تسك لعوملات ديالها ب راسها.[2][6]

لهديم من لفترة رّومانية ؤ ف لّور جّامع لمريني د شالة

لأهمية تّيجارية ديالها ستامرّات ف لفترة رّومانية. سميتها رّسمية ديك سّاعة ولات سالا كولونيا Sala Colonia، ؤ دكروها شحال من مؤرخ روماني منهوم پلين لقديم ؤ پومپونيوس ميلا ف لقرن لّول لميلادي؛ هاد لّخر دكر بلي كانت مدينة موهيمة بحال ليكسوس. ف هاد لفترة بزاف د لمباني لمورية بقاو، ولاكين وحدين خرين تهدّمو ؤ تّبناو بلاصتهوم مباني رومانية بحال لكاپيطول، لفوروم، لباسيليكا، معبد روماني ؤ لكوريا ؤلا بلاصة د لجتيماعات ديال لمجلس د شّيوخ ديال لمدينة. لمدينة بقات تحت سّيطرة رّومانية حتال لقرن رّابع ؤلا لبدية ديال لخامس لميلادي، وخا رّومان كانو نساحبو من لمناطق لجنوبية ديال موريطانية طّنجية من نّص د لقرن تّالت.[2]

ف لقرن لّول، لقبايل ديال لأطولول لأمازيغية هجمو علا شالة ؤدارو ليها حصار ب لفيولا. باش يحميو لمدينة من هجومات خارجية، لمور رّومان دارو سيستيم ديفاعي علا شكل خندق ؤ حيط، كان شاد من لمحيط لأطلسي حتال واد عكراش، ب بروجا د لمراقبة ؤ علّاقل جوج قشالي. وحدة من هاد لقشالي كانت ف لجنوب لغربي د شالة، ؤ لوخرة ف لولجة د سلا.[2]

علا ما كيبان، شالة هجروها ناسها ف لقرن سّابع لميلادي ؤ بقات مهجورة علّاقل تلاتة د لقرون مورا داكشي.[7]

لعصر لوسطاني

[بدل | بدل لكود]

ف لبدية د لعصر لوسطاني من بعد ما دخل لإسلام ل لمغريب، كانت شالة رباط ديني فين كيتجمعو بعض نّاس باش يحاربو لهرطقة ديال لبرغواطيين. لبحت لأركيولوجي كشف علا ديور د سّكنة من لفترة لإسلامية ؤ مرافق عمومية، شّي لّي كيدل بلي شالة كانت مدينة علا حقها ؤ طريقها لّي كانت كاتلعب أدوار دينية ؤ عسكرية.[7]

ف لفترة د لمرينيين، ولات شالة عندها دور ديال مدينة ݣنايزية فين تدفنو سلاطن مرينيين ؤ حبابهوم. سّلطان لمريني بو يوسف يعقوب ف 1284 بنا جامع ؤ قبة ݣنايزية فين تدفنات مراتو أم لعز لمرينية. ف 1339، سّلطان بو لحسن لمريني زاد وسّع شالة ؤ دوّر عليها سور. ولدو سّلطان بو عنان لّي حكم مابين 1348 ؤ 1358 بنا مدرسة تقليدية، حمّام مغريبي، ؤطيل، ؤ قباب جداد علا لأضرحة د جدودو. ف لقرن خمسطاش ملي تخلاو لمرينيين علا شالة، باش يبداو يدفنو سّلاطن ديالهوم ف لقلة ف فاس، غادي تفقد لأهمية ديالها ؤ غادي يتشفرو لكنوز ديالها.[2]

لفترة لعصرية

[بدل | بدل لكود]
تّمتال د لماليك پطوليمايوس لموري تّلقا ف شالة، كاين دابا ف لمتحف د تّاريخ ؤ لحضارات د رّباط

ف لقرن تمنطاش، لفرايلي ؤ لمؤرخ لفرانساوي دومينيك بونو كتب وصف قصير ديال شالة، ؤ كتب بلي لموضع أصلو روماني، ؤ بلي لمور باعو شي شقفات د لفلوس تّلقاو تماك ل نّصارا. ؤ زاد مونصيونا بلي تماتيل كبار ديال رّخام كانو تخادو من تماك ف لقرن سبعطاش ؤ تسيفطو ل مكناس باش يتخدمو ديكور ف لقصر د السلطان. لموضع دكروه لقناصل ݣيورݣ هوست ؤ لويس شينيي ف لكتابات ديالهوم، ولاكين ماقدوش يدخلو ليه، عكس مسافرين ؤروپيين خرين لّي كاين منهوم لّي دار راسو مسلم باش يقد يدخل. لمغامر سّپنيولي علي باي لعباسي دار وصف رومانسي ل شالة ف لبدية د لقرن تسعطاش. ؤ لمغامر لألماني هاينريش بارت من بين لّولين لّي بينو بلي شالة هيا نيت سالا كولونيا د رّومان. ف 1901، سّوسيولوجي ؤ لمستشريق لفرانساوي إيدمون دوتي دار لبلان ديال لموقع كامل ؤ داكشي لّي فيه. ؤ ف 1917 ؤ 1918، هنري باصي ؤ لموساعدين ديالو دارو ستيكشاف أركيولوجي ل لجيهة لغربية د شالة. حيت ماكتبوش لمولاحضات ديالهوم ؤ ماخداوش تصاور، نّتائج ديال دوك لأبحات مامعروفاش مزيان.[8]

ف لفترة د لستيعمار لفرانساوي، لجينيرال ليوطي غادي يرد شالة بحال جردة محمية.[9] شالة ولات منطقة محمية ؤ معلمة تقافية وطنية علا حساب ضّاهير ديال 11 نونبر 1920.[10] ف 1922، هنري باصي ؤ إيڤاريست ليڤي پروڤونصال نشرو مونوݣراف علا تّاريخ د شالّة ف لعصر لوسطاني ؤ وصف فني ل معلامات رئيسية ديالها. ؤ زادو حتا پارتية علا لأساطير ؤ طّقوس لّي متعلقة بيها. لأبحات لحقيقيين لّولين لّي تدارو ف شالة، كانو ف لّخر ديال لعشرينات ؤ لبدية د تّلاتينات، من عند جول بوريلي، لّي كان لمدير ديال سّربيس د لفنون جّميلة ف ديك لفترة ف عهد لستيعمار، ؤ لأميرة لمصرية خديجة رياض باي. بجوج بيهوم قادو حملة باش يرممو لبني ؤ ينقيو لبلاصة ؤ يكشفو علا لمعلامات لّي كانو مخبيين تحت تّراب ؤ لحجر، بحال لباز ديال قوس نّصر. ف لخمسينات ؤ سّتينات دّكتور عثمان عثمان إسماعيل دار بحت ف لأتار لمرينية، سيرتو ضّاريح ديال سّلطان بولحسن، ؤ نشرو ب لعربية. لعاليم د لأركيولوجيا لفرانساوي جون بوب دار أبحات دقيقة مابين 1958 ؤ 1980، ؤ دكر بلي لموقع د شالة صعيب ف لبحت حيت لبني فيه مديور علا لحافة د وادي، ؤ حيت كانو تحفرو فيه بزاف د لبلايص ؤ تشفرو منو لكنوز ديالو ف لعصر لوسطاني.[8]

ف 2012، دخلات شالة للّيستة ديال تّرات لعالمي د ليونيسكو كا طرف من مدينة رّباط.[11] ف شتنبر 2019 بداو أشغال د تّرميم ديال شالة لّي ركزات سيرتو علا لمدرسة لمرينية ؤ لفسيفسات ؤ لقنالات د لما، ب تشارك معا لويكالة طّاليانية ديال تّعاون ؤ تّنمية، ؤ ب ميزانية ديال 4 د لمليون د دّرهم.[12] لمرحلة تّانية ديال تّرميم غادي تركز علا جّامع ؤ صّمعة ؤ سّور دّخلاني ؤ لبراني، ؤ ضّاريح ديال سّلطان بو لحسن، ؤ لميزانية ديالها 7 مليون د دّرهم.[13]

لمعمار

[بدل | بدل لكود]

ب حوكم لحضارات لّي دازو منها، كنلقاو أتار ديال بني ب ستيلات مختالفين، من لمعمار لموري لقديم لّي كان متأتر ب لحضارة ليونانية ؤ لقرطاجية، ل سّتيل رّوماني، ؤ سّتيل لموري لإسلامي ديال لمرينيين.

لمباني د لفترة لمورية

[بدل | بدل لكود]
  • معبد بونيقي

لمباني د لفترة رّومانية

[بدل | بدل لكود]

لبحت لأركيولوجي كشف علا لباب لقديم د لمدينة لّي كان كيدي ل مرسا علا واد سلا. هاد لمرسا دابا مدفون تحت رّملة ؤ تّراب حيت واد سلا (بورݣراݣ) بدل لمجرا لأصلي ديالو لّي كان ف لعهد رّوماني.[9]

  • لكاپيطول
  • لباسيليكا
  • لكوريا
  • لحمام رّوماني
  • لحوانت

لمباني د لفترة لمرينية

[بدل | بدل لكود]
زخرفات ف ضّاريح ديال سّلطان أبو لحسن
  • جّامع: أسسو سّلطان بو يوسف يعقوب ف 1284 حدا لهديم ديال مدينة سلا رّومانية. وخا تضعضع ب سباب زّنزال ديال 1755، باقين فيه زخرفات مزيونين، ؤ صّمعة ديالو واقفة.[7]
  • لمدرسة: كانت طرف من زاوية دينية.
  • لحمام لمغريبي
  • لأضرحة: بو يوسف يعقوب لّي كان سّلطان لمريني لّول، ختار لموضع ديال شالة ف 1284 باش تكون نيكروپوليس (مدينة ݣنايزية) فين يتدفن هوّا ؤ فاميلتو. ف 1286 تّدفن تماك نيت، ؤ موراه مراتو ؤ 4 ديال لخولافا ديالو. من بينهوم كاين بو لحسن علي بن عتمان لّي كان ملقب ب سّلطان لكحل ؤ مراتو شمس ضّوحا لمرينية، لّي كانت معروفة ب سمية لالة شالة ؤ كانت عندها قداسة كبيرة عند لمغاربة.[14]
  • سّور ؤ لباب: بدا لبني ديالهوم علا سّاس ديال سّور رّوماني ف لعهد ديال سّلطان بوسعيد عتمان بن عبد لحق ؤ كمل ف 1339 ف عهد ولدو سّلطان أبو لحسن.[7]

دّلالة رّوحانية ديال شالة

[بدل | بدل لكود]

لمرينيين ماختاروش لموضع ديال لمدينة لݣنايزية ديالهوم غير هكاك. دّلالة رّوحانية د شالة ف لمنطقة كانت ديجا متوكدة، كيفما كيدل علا هادشي لجتيماع ديال موجاهدين ضد برغواطة فيها بشكل مستامر من لقرن لعاشر. ف لغالب لأتار ديال رّومان ف شالة لعبات دور ف حجّايات ؤ أساطير عطات هالة روحانية ل لموضع، ؤ هادشي كيفسر علاش لمرينيين بناو معلامات دينية حدا لبني رّوماني ؤ ماحيدوهش ف مرة. من غير هادشي كانو لمغاربة قرون ؤ هوما كيزورو ضّاريح ديال لالة شالة مرات سّلطان أبو لحسن باش ياخدو لبركة.[3][14] شالة كانت ل مدة قرون ممنوع يدخل ليها شي حد ماشي مسلم.[8]

لعين د لما لّي حدا لأضرحة كانت عندها دلالة قدسية من لقديم، ؤ تقدر تكون هيّا سّباب ف لقدسية ديال لموضع براسو. لعيالات ف لقديم كانو كيعطيو لبيض لمسلوق ل نّقليس (حوت طويل ف شّكل ديالو) لّي كيعيش تماك، حيت كانو كيعتاقدو بلي هاد طّقس كيعطي لخصوبة.[15]

من بين لأساطير لّي كانت متداولة وحدة كتݣول بلي رّسول محمد براسو صلا ف زّاوية ديال شالة.[9]

من بين لحجّايات لي هضر عليهوم لباحت لفرانساوي هنري باصي، كاينين مجموعة د لحجّايات لّي كيلعب فيهوم سّلطان لكحل، كا ماليك د جّنون ؤ بنتو لالة شالة دور رئيسي بعتيبارهم حاكمين لمورعالام، ؤ معاهوم سبعاتو رجال ديال شالة.[5]

تّأتير تّقافي

[بدل | بدل لكود]
"لمشية د قافيلة من دّخلة د شالة"

شالة كانت موضوع ديال عاداد د لّوحات لفنية، من بينهوم لوحة ب عنوان "لمشية د قافيلة من دّخلة د شالة" The Departure Of A Caravan From The Gate Of Shelah Morocco، لّي رسمها إدوارد لورد ويكس.[16] ؤ رسمة ديال لفنانة لفرانساوية لوسي رانڤيي شارتيي ب عنوان شالة ف رّباط Le Chellah à Rabat لّي كاتصور مجموعة د لعيالات ملتمات ؤ خارجين من شالة.[17]

شالة كاتحتاضن حتا مهرجان د لمزّيكة د دجاز من 2005[18] كولا عام ف شتنبر، من غير لعام د 2020 ب سباب جّايحة د كورونا.[12] ؤ كاتحتاضن وحدة من لمنصات ديال مهرجان ماوازين كولا عام.[19]

مصادر

[بدل | بدل لكود]
  1. ↑ سيدي محمد العيوض (2020). من سلا إلى شالة: ذاكرة مدينة (ب العربية). جمعية رباط الفتح للتنمية المستديمة. pp. 15–17.
  2. 1 2 3 4 5 6 سهام بلحاج; لحسن باهي; أحمد أخصاص (نونبر 2016). "Study of Moroccan Monumental Heritage Traditional for Valorization and Conservation of Collective Memory and for Socio-eco- Tourism Sustainable Development-case Kasbah Chellah, Rabat [دراسة د تّرات تّقليدي د لمعاليم د لمغريب علا ود تّقييم ؤ لحفاض علا دّاكيرة لجماعية]". doi:10.1016/j.egypro.2016.10.068. {{cite journal}}: Cite journal requires |journal= (معاونة)
  3. 1 2 "Chellah, Magie der Nekropole [شالة، سّحور ديال نّيكروپول]" (ب لألمانية).{{cite web}}: CS1 maint: unrecognized language (link)
  4. ↑ "Les musées de sites archéologiques appréhendés en tant que vecteurs de développement local à travers trois études de cas préfigurant la mise en valeur opérationnelle du site de Chellah" (ب الفرنسية). 21 دجنبر 2011. Archived from the original on 2021-06-24. Retrieved 2021-06-18.
  5. 1 2 هنري باصي; إيڤاريست ليڤي پروڤونصال (1923). Chella, une nécropole mérinide [شالة، نيكروپوليس مرينية] (ب الفرنسية). E. Larose (Paris).
  6. ↑ "لمتحف لبريطاني، عوملة من شالة" (ب الإنجليزية). Archived from the original on 2023-08-13. Retrieved 16 يونيو 2021.
  7. 1 2 3 4 "كتاشف لفن لإسلامي، شالة" (ب الإنجليزية). Archived from the original on 2023-08-13. Retrieved 2021-06-18.
  8. 1 2 3 "Histoire de la recherche au Chellah" (ب الفرنسية). Archived from the original on 2023-08-13. Retrieved 2021-06-18.
  9. 1 2 3 إنݣبورݣ ليمان; ريتا هينس (29 أبريل 2015). Baedeker Reiseführer Marokko [ݣيد ديال لمغريب] (ب الألمانية). Mair Dumont DE. ISBN 9783829794534.
  10. ↑ بومدين تانوتي. "La politique culturelle – Maroc [سّياسة تّقافية ف لمغريب]" (PDF) (ب الفرنسية). Archived from the original (PDF) on 24 يونيو 2021. Retrieved 16 يونيو 2021. {{cite journal}}: Cite journal requires |journal= (معاونة)
  11. ↑ "Rabat, Modern Capital and Historic City: a Shared Heritage" (ب الإنجليزية).
  12. 1 2 "Rabat : Chellah, un nouveau coup d'éclat" (ب الفرنسية). 8 يوليوز 2020. Archived from the original on 2023-08-13. Retrieved 17 يونيو 2021.
  13. ↑ "Lancement de la restauration de la Medersa Merinide et la nécropole de Chellah" (ب الفرنسية). 18 شتنبر 2019. Archived from the original on 18 يونيو 2021.
  14. 1 2 "شالة، نّيكروپوليس لمرينية لميستيريوزية". Archived from the original on 2023-08-13. Retrieved 17 يونيو 2021.
  15. ↑ لوكاس بيترز (25 أكتوبر 2016). لمغريب (ب الإنجليزية). أڤالون پابليشينݣ. ISBN 9781640491342.
  16. ↑ "The Departure Of A Caravan From The Gate Of Shelah Morocco" (ب الإنجليزية). Archived from the original on 2023-08-13. Retrieved 2021-06-17.
  17. ↑ ماري كيلي (2021). French Women Orientalist Artists, 1861–1956 [لفنانات لفرانساويات لمستشرقات ما بين 1861 ؤ 1956] (ب الإنجليزية). طايلور ؤ فرانسيس. ISBN 9781000405347.
  18. ↑ "Jazz au Chellah, De la Musique et des Hommes" (ب الفرنسية). Archived from the original on 27 يوليوز 2010. Retrieved 19 يونيو 2021.
  19. ↑ "HISTORICAL SITE OF CHELLAH" (ب الإنجليزية). Archived from the original on 2023-08-13. Retrieved 2021-06-19.
Wikimedia Commons ويكيميديا كومنز عندا تصاور و معلومات على شالة.

شوف تا

[بدل | بدل لكود]
مرجّعة من "https://ary.wikipedia.org/w/index.php?title=شالة&oldid=459961"