قواس (موقع أركيولوجي)
قواس (موقع أركيولوجي)
| ||
| ||
| معلومات عامة | ||
| نوع د لموضع | موقع أركيولوجي و تجمع د بنادم | |
| لبلاد | لمغريب | |
| تّقافة | تقافة أمازيغية و روما القديمة | |
قواس (ب لحروف اللاتينية Kouass) هوّ واحد لموقع أركيولوجي جا على الضفة الشمالية ديال واد غريفة (ف لقديم كان معروف ب "أنيديص" Anides)،[1] على بعد 7,5 كلم من مدينة أصيلا.[2] وخا لموقع دابا جا بعيد ب كيلوميطر على جنب لمحيط لأطلسي، ف لقديم كان حداه مرسى كيطل على لبحر، و كان مربوط معا لقنالات ديال خليج كوطيص Kotes (السمية لقديمة ديال راس سپارطيل)[3] لي وصفها سيلاكس د بلعاني Pseudo-Scylax ف الرحلة ديالو. لمرسى غطاه التراب لي جابو لواد معا مرور الزمان.[4]
قواس كانت تجمع سكني ل أغراض تجارية، و كانت ف موقع سطراتيجي، حيت جات ف لملاقية ديال جوج طرقان قديمة وحدة على لاكوط كاتدي ل ليكسوس، و لوخرة كاتدي ل الداخل ل وليلي. زيادة على كونها ف ديك لوقيتة جات ديريكت على جنب لبحر.[1] لموقع ديال قواس كان مأهول من لقرن 6 قبل لميلاد، ف لفترة لي كاتسمى لفترة لموريطانية لعتيقة، و تّهجر مابين 50 تال 30 قبل لميلاد،[5] قبل ما يعاودو يسكنوه الناس ف لقرون لوسطانية.
السمية[بدل | بدل لكود]
السمية لأصلية ف لموضع مامعروفاش من لمصادر التاريخية و لإپيڭرافية.[3] السمية د "قواس" لي مخدّمة دابا جات من لبقايا د لبني د الرومان ف ديك لمنطقة لي كانلقاو فيه تقويسات.[1]
كرونولوجيا[بدل | بدل لكود]
التبقشيش د لأركيولوجيين ف لموقع من 2009 ف إطار لبرنامج د ربع سنين "لأبحات لأركيولوجية لفرانكو-مغريبية ف قواس" Recherches archéologiques franco-marocaines à Kouass، لي سيّروه ڤيرجيني بريدو، و محمد كبيري علوي، عطاو كرونولوجيا ديال السكنى فيه على 5 د لفترات:
- لفترة لموريطانية لعتيقة (قبل لقرن 5 ق.م)
- لفترة لموريطانية لقديمة (لقرون 5 و 4 ق.م)
- لفترة لموريطانية لوسطانية (لقرون 3 و 2 ق.م)
- لفترة لموريطانية الجديدة (لقرن 1 ق.م)
- لقرون لوسطانية (لقرن 12 تال 15)[6]
تاريخ[بدل | بدل لكود]
لفترة لموريطانية[بدل | بدل لكود]
التبقشيش لي تدار ف هاد لموقع كيبيّن بلي كان مأهول علّاقل من لقرن 6 قبل لميلاد. لباحتة ڤيرجيني بريدو قتارحات بلي لموقع يقدر يكون قدم، على عتيبار واحد لأمفورة من نوع "راشڭون Rachgoun 1" لي تّلقات تماك.
قواس وصلات ل لأوج د لإزدهار ديالها ف لقرن 5 و 4 ق.م، و كانت ف حلقة قوية ديال التبادل التجاري معا لمنطقة د مضيق جبل الطر، سيرتو معا مدينة ڭادير ؤلا ڭاديس (دابا كاديكس Cadix ف سپانيا). السيت تّلقاو فيه تا مصنوعات جايين من مناطق خرين ف لبحر الدخلاني، بحال إبيزا، سردينيا، جنوب الطاليان، ليونان و قرطاج.[7][8]
من لبدية تقريبا، قواس ولا عندها طابع حضري ب بلان مربّعي منضّم،[7] بنايات كبار، طرقان معبّدين[8] و مناطق د السكنى، و تا حيط دفاعي ضاير على لمدينة لغلض ديالو 1,2 تال 1,5 ميترو.[4]
تّلقاو مجوهرات ف لموقع ب ستيل فينيقو-بونيقي، لي منها ميدالية د النقرة ب نقشات مدهّبة، ڭورميطات د النقرة، خاتم مصاوب ب الجاج، و 500 حلية د النقرة ؤ لكوكياج و الجاج، و غيرهوم. هاد لمجوهرات كيرجعو ف لغالب ل فترة ديال التدمير د لمدينة ف اللخر د لقرن 4 قبل لميلاد، شي لي كيفسر علاش بقاو ف بلاصتهوم.[7]
واحد لبناية كبيرة ف لموقع لي كاترجع ل لقرن 4 ق.م، من لبقايا ديالها كايبان بلي كاتشبه ل معابد محلولين ل السما، لي تلقاو ف مواقع بونيقيين خرين ف تونس و لبرطقيز.[9] بناية خرة جات ف موضع عالي ف السيت، و لي تلقاو فيها شقفات د لفلوس و طراف د السيراميك كيرجعو ل مابين لقرن 3 تال 1 قبل لميلاد، تكهّن لباحت ميشيل پونزيش بلي تقدر تكون قشلة عسكارية قبل-رومانية، ف لوقت لي ف. لوبيز بارضو ڭال بلي تقدر تكون مخزن د لأمفورات.[2]
عدد د لمعامل تلقاو ف لموقع، منها معامل متعلقين ب تصنيع لمواد د لمعدن، لي كيرجعو ل فترة سابقة على لقرن 1 قبل لميلاد.[10] لمدينة تهجرات مابين عوام 50 و 30 قبل لميلاد، إما بسباب حملة عسكارية ديال لماليك بوكوس التاني،[5] ؤلا تأسيس مستعمرة رومانية ف زيليل (دابا الدشر الجديد) لي جات قريبة ليها.[8]
لفترة الرومانية[بدل | بدل لكود]
علَاحْقَّاش لموضع تّهجر، ماتّلقاوش بزاف د لأتار لي كيرجعو ل لفترة الرومانية. وخا داكشي، ميشيل پونزيش كيشير ل وجود 4 د لوزينات د التمليح تماك، لي كيرجعو ل لقرن 1 و لقرن 3 ميلادي، و لي يقدرو يكونو كانو ديجا خدّامين قبل مايجيو الرومان. تّلقات تا قناة مقنطرة aqueduct لي الطول ديالها 750 ميترو و كانت كاتدي لما ل لمرسى.[1]
فترة لقرون لوسطانية[بدل | بدل لكود]
قواس عاود تسكنات مابين لقرن 12 و لقرن 15، كيما كيدلو على هادشي بقايا ديال السراميك ب ستيلات إسلامية، سيرتو من لفترة لمرينية، و ب التأريخ ديال لعضام د لحيوانات. أغلب النواع د السيراميك كيرجعو ل لمراكز لكبار ف لأندلس و شمال إفريقيا، ولاكين كاينة نسبة لي تقدر تكون كاترجع ل فترات قدم، شي لي كيشير ل إمكانية ستيطان إسلامي ف فترات قبل من لقرن 12. تّلقاو تا شقفات ديال "فلس" د إفريقية (تونس دابا) لي تسك ف لقيروان ف عام 759 ميلادية. هادشي خلا لباحتين يڭولو بلي قواس هيّ نيت "نبروش" لي هضر عليها لبكري ف لقرن 11، و ڭال بلي كانو ساكنينها قبايل لواتة لأمازيغية.[11]
لمعمار[بدل | بدل لكود]
لمعمار ديال قواس كيتميّز بشكل عام ب تخدام مواد محلية، بحال ياجور مصاوب ب لغيس و تخدام لغيس ف تلصاق لياجور، و لڭبص.[8]
النضام د لماكلة[بدل | بدل لكود]
التحليل ديال لبقايا د لعضام د لحيوانات كيعطي فكرة على النضام د لماكلة ديال السكان ف لفترات لموريطانية و لإسلامية. هاد النضام كان معتامد على سيرتو على اللحوم لحمرا، بحال لبڭري، لغنمي، لعنزي، لخنزير، لعودان، لحمير، لكلاب، و اللحوم لبيضا بحال الدجاج. النسبة د لماكلة ديال لحيوانات لبرية قليلة بزاف، بحال لخنزير لبري، لڭنفود، لبط، و لقنان، زيادة على لحوت. لبڭري كيمتّل أكبر نسبة ف لماكلة د السكان، و لعودان تقريباً ماكانش كيتكال. ف لفترة لإسلامية دخلو تا الجمال، و نقصات لماكلة د لخنزير بشكل كبير. لغنمي تا هوّ ولا كيتكونصوما كتر شوية، معا حيوانات برية بحال الجدي و الطيور.[12]
تصاور[بدل | بدل لكود]
عيون لكلام[بدل | بدل لكود]
- ^ a b c d "MICHEL PONSICH : Kouass, port antique et carrefour des voies de la Tingitane". Insap (ب لفرانساوية). 2021-09-19. تطّالع عليه ب تاريخ 2023-08-09.
- ^ a b Bridoux Virginie. Les établissements de Maurétanie et de Numidie entre 201 et 33 av. J.-C. Synthèse des connaissances. In: Mélanges de l'École française de Rome. Antiquité, tome 120, n°2. 2008. Antiquité.
- ^ a b عبد المالك الناصري, إيديتور (2013). المدن المراسي في تاريخ المغرب: أشغال الأيام الوطنية الثامنة عشر للجمعية المغربية للبحث التاريخي، الدار البيضاء، 27-29 أكتوبر 2010 (ب لعربية). الرباط: الجمعية المغربية للبحث التاريخي. ص. 65. ردمك 9789954328002.
- ^ a b Nallbani، Etleva؛ Buchet؛ Bitri؛ Bregu (2010). "Activités archéologiques de l'École française de Rome". Mélanges de l’École française de Rome - Moyen Âge (122–2): 471–484. ISSN 1123-9883. تطّالع عليه ب تاريخ 2023-08-09.
- ^ a b Mohamed K. Alaoui et al., Un lieu de culte d'époque maurétanienne à Kouass ?, in: Du culte aux sanctuaires l'architecture religieuse dans l'Afrique romaine et byzantine, Actes du colloque 18-19 avril 2013, éditions de Boccard, 2018, p. 68
- ^ Bridoux، Virginie؛ Alaoui، Mohamed Kbiri؛ Lenoir، Éliane؛ Naji، Halima (2016-09-20). "Kouass (Asilah, Maroc)". Chronique des activités archéologiques de l’École française de Rome (ب لفرانساوية). doi:10.4000/cefr.1623. ISSN 2282-5703. تطّالع عليه ب تاريخ 2023-08-09.
- ^ a b c Bridoux، Virginie؛ Alaoui، Mohamed Kbiri؛ Biagi، Solange؛ Brahmi، Néjat (2011-04-15). "Kouass (Asilah, Maroc)". Mélanges de l'École française de Rome - Antiquité (ب لفرانساوية) (123–1): 336–351. doi:10.4000/mefra.567. ISSN 0223-5102. تطّالع عليه ب تاريخ 2023-08-09.
- ^ a b c d Bridoux Virginie, Kbiri Alaoui Mohamed, Kermorvant Alain. Kouass (Asilah, Maroc). In: Mélanges de l'École française de Rome. Antiquité, tome 121, n°1. 2009. Antiquité.
- ^ Mohamed K. Alaoui et al., Un lieu de culte d'époque maurétanienne à Kouass ?, in: Du culte aux sanctuaires l'architecture religieuse dans l'Afrique romaine et byzantine, Actes du colloque 18-19 Avril 2013, éditions de Boccard, 2018, p. 73
- ^ Bridoux، Virginie؛ Alaoui، Mohamed Kbiri؛ Brahmi، Néjat؛ Dridi، Hédi (2013-04-15). "Kouass (Asilah, Maroc)". Chronique des activités archéologiques de l’École française de Rome (ب لفرانساوية). doi:10.4000/cefr.896. ISSN 2282-5703. تطّالع عليه ب تاريخ 2023-08-09.
- ^ Bridoux، Virginie؛ Alaoui، Mohamed Kbiri؛ André، Nathalie؛ Clavel، Benoît (2014-07-23). "Kouass (Asilah, Maroc)". Chronique des activités archéologiques de l’École française de Rome (ب لفرانساوية). doi:10.4000/cefr.1236. ISSN 2282-5703. تطّالع عليه ب تاريخ 2023-08-09.
- ^ Benoît Clavel et al., La consommation animale sur le site antique et médiéval de Kouass (Maroc). Marqueur socio-culturel et artefacts taphonomiques, in: L'Homme et l'Animal au Maghreb, de la Préhistoire au Moyen-âge, Presses universitaires de Provence
