وليلي (مدينة قديمة)

من ويكيپيديا
اذهب إلى التنقل اذهب إلى البحث
وليلي (مدينة قديمة)
وليلي
معلومات عامة
لبلاد لمغريب
تّقافة روما القديمة، الأمازيغ و بونيقيون
عاصمة ديال اَدارسة و موريطانية
مستوى تراتي مواقع التراث العالمي و تراث ثقافي ديال المغرب
مساحة 42 هكطار
سّيت رّسمي sitedevolubilis.org

وليلي ؤلا وليلةلأمازيغية ⴰⵍⵉⵍⵉ، أليلي، ب لّاتينية لقديمة ؤ بزّاف د لّوغات لأوروپية Volubilis، نّطق ب لّاتينية لكلاسيكية وولوبيليس) ؤلا قصر فرعون، لّي هيّا سّمية لّي كانو لمغاربة كايسمّيو بيها لهديم ديالها، كانت مدينة أمازيغية قديمة تّبنات ف لقرن 3 ؤلا 4 قبل لميلاد، ؤ كانت واقيلا عاصمة د مملكة موريطانية. دابا هيّا موقع أركيولوجي كاين ف سّهل د سايس ف لجماعة لقروية د وليلي، إقليم مكناس.[1]

وخا لبني لّي بقا واقف ف وليلي كيرجع ف أغلبيتو ل لفترة لمورية لّخرة ؤ لفترة رّومانية (مقاطعة موريطانية طّنجية)، ؤ تّبنا ب سّتيل رّوماني، لمدينة د وليلي، عكس ما كيتروّج ليه بزاف ف لإعلام، هيّا ف لأصل ماشي مدينة رومانية، مي مدينة أمازيغية قديمة لّي بناوها سّكان لمحليين لأمازيغ، لّي معروفين ب سمية لمور.

سّمية[بدل | بدل لكود]

سّمية د وليلي غالبا جات من واليلت ⵡⴰⵍⵉⵍⵜ لّي هيّا سّمية لأمازيغية ديال نبتة زهرية كتنبت ف نّواحي ديالها. هاد سّمية موتقة مزيان ف لكتوبا لقدام د تّاريخ، ؤ ف نّقيشات لّاتينية علا لحيوط ؤ ستيلات لّي تلقاو فيها.[2] هاد سّمية تقدر تكون عندها علاقة معا لقبيلة لأمازيغية لّي دكروها لمؤرخين رّومان ب سمية ؤلوبيليتاني.[3]

عدد د لباحتين لؤروپيين حاولو يلقاو معنى ل وولوبيليس ف لّوغة لّاتينية، ف إطار تجاهل تام ل بيئة تّقافية لمحلية لأمازيغية، شّي لّي كنلقاوه بزاف ف لأبحات لغربية علا تّاريخ لقديم د شمال إفريقيا.[3]

لموضع[بدل | بدل لكود]

منضر عام د وليلي

مدينة وليلي جات ف وادي خصب ف جّنب ديال واد خومان ؤ مابعيداش علا واد فرطاسة، علا سّفح ديال جبل زرهون، ف بلاصة ستراتيجية ساهل دّفاع عليها من هجومات عسكرية. ؤ كاينة علا بعد 3 كيلوميطر ف لغرب ديال مولاي دريس زرهون، 30 كيلوميطر من مدينة مكناس ؤ 63 كيلوميطر من فاس. سّهول لّي حداها فيها تربة مزيانة ل لفلاحة، ؤ كينبت فوق منها شجر ديال لفواكه، سيرتو زّيتون، لّي كانت ؤ مازال عندو أهمية قتيصادية كبيرة ف لمنطقة. لمساحة لّي شادة وليلي كتوصل ل 42 هكطار، لأغلبية ديالها باقا ماتستكشفاتش مزيان من طرف لعولاما د لأركيولوجيا.[2]

تّاريخ[بدل | بدل لكود]

لعصر نّيوليتي[بدل | بدل لكود]

أقدم لآتار ديال لبشري لّي تّلقاو ف وليلي كيرجعو ل لعصر نيوليتي، 3000 عام قبل لميلاد.[4] أغلبية د هاد لآتار علا شكل مّاعن د لفخّار ؤ أدوات بسيطة. طّبقة د لأرض فين كاينين هاد لآتار باقا ماتحفراتش مزيان، ضونك ف لغالب كاينين معلومات كتيرة غادي يكتاشفوها لعولاما ف سّنوات جّاية. تّحليل لجيني ديال عينات د لڭمح ف نّواحي د وليلي بيّن بلي راه من نفس نّوع لّي كان منتاشر ف لعصر نّيوليتي ف شرق لأوسط ؤ شمال إفريقيا.[5] ولاكين ماشي واضح واش زّراعة د لڭمح وصلات ل وليلي ف نفس لفترة فاش نتاشرات ف بلايص خرين ف لعالم، ؤلا ف فترة معطلة، علا طريق إيبيريا. ف جميع لحوال، لعينات د لڭمح لّي تّلقاو تأرخو ب لكربون 14 ل عام 1000 قبل لميلاد علا أقصا تقدير.[6] لبحت ف طّبقات لقديمة بيّن حتا نواع خرين د لمزروعات بحال لفول، لعدس، لعنب ؤ لكرموص.[5]

لفترة لقبلمورية[بدل | بدل لكود]

ما بين لمجي د لفينيقيين، لّي كانو بحارة ؤ تجار من سّاحل لّي دابا كاين ف لبنان ؤ شمال سوريا، تال تّأسيس د مملكة موريطانية، ماكانعرفوش بزاف علا لمغريب ؤ نضام سّياسي ؤ لجتيماعي لّي كان فيه. لفينيقيين كانو ديجا وصلو ل سّواحل د لمغريب ف لقرن سّابع ؤ لقرن سّات قبل لميلاد، ؤ لّوغة ؤ تّقافة ديالهم نتاشرات ؤ وصلات حتال وليلي فين كنلقاو نقيشات ب لّوغة لبونيقية. ماشي مستبعد تكون وليلي، لّي تقدر تكون بدات كا قرية نيوليتية، كانت ديجا ديك سّاعة تجمّع سكّاني مابيهش. واحد من لمعابد لّي كشفو عليهم لعولاما د لأركيولوجيا، تم تّأريخ ديالو ما بين 1000 ؤ 300 ق.م، ولاكين باقي خاص لمزيد د لأبحات باش نعرفو كتر علا هاد لفترة.[5]

لفترة لمورية[بدل | بدل لكود]

واحد من أهم شّواهد لّي كيدلو علا لقدومية ديال وليلي كا مجتمع حضري، واحد سّتيلة تلقات ف لفترة ديال لستيعمار، ؤ درسها لباحت لفرانساوي جيمس فيڤريي، ؤ نشر ورقة د لبحت ديالو ف 1963. هاد سّتيلة كترجع ل لقرن لّول قبل لميلاد، ؤ مكتوب عليها ب لحروف د لّوغة لبونيقية سّميات ديال شخصيات من نفس سّلالة شغلو لمنصب ديال شوفيط، لّي هو منصب عسكري ؤ سياسي كبير، ؤ أقدم جد كان شاد هاد لمنصب كان ف نّص تّاني ديال لقرن رّابع قبل لميلاد، لّي هيّا فترة سابقة ب 100 عام لفترة ديال لماليك باڭا، لّي هوّا أقدم ماليك موري متوكد تاريخيا. من غير جد واحد لّي عندو سمية بونيقية، لوخرين كاملين عندهم سميّات أمازيغية.[7]

ستيلة ڭنايزية تّلقات ف وليلي مكتوب فوق منها ب حروف بونيقية: ستيلة كيديدييها [..] ولد [..] لّي كان شوفيط، ؤ مات سعيد علا 90 عام، لأصل ديالو من ق ف ڭ و د

وليلي ضونك كانت ديجا موجودة كا مدينة من لقرن رّابع ؤلا تّالت قبل لميلاد، شّي لّي كيجعلها بدات معا ؤلا شوية مورا تأسيس ديال مملكة موريطانية، ؤ كانت عندها أهمية قتيصادية ؤ سياسية كبيرة عند لمور. لبني لقديم ديالها كان ب سّتيل ليوناني ؤ لبونيقي ؤ لمساحة ديالها غالبا ماكانتش فايتة 12 هكطار.[8] من بين لمباني لّي دّارت ب سّتيل لبونيقي، ؤ لّي قدرو لباحتين يكشفو عليها، كاين معبد كيرجع ل لقرن تّاني قبل لميلاد، ؤ معابد خرين تّبناو ف نّص ديال لقرن لّول قبل لميلاد، ب لإضافة ل ديور د سّكنى، حيوطا ؤ فرّان، كولهوم كيرجعو ل لفترة قبل رّومانية.[3] كاين حتا سور دفاعي قديم تّبنا ف هاد لفترة مي ما مأرخش مزيان ل إينا فترة د حكم ماليك موري فاش دّار.[9]

معا تّزايد ديال تّأتير رّوماني ف شمال إفريقيا، سيرتو مورا ما مات لماليك بوكوس تّاني، ؤ تولا لحكم يوبا لموري، لّي كان تربا ف روما، غادي يوليو لبني ؤ لفن د نّحت ؤ لفسيفسا غاديين معا سّتيل رّوماني. وليلي ف لغالب ماكانتش هيّا لعاصمة د موريطانية ف هاد لفترة، مي كانت من أهم لمدون ديالها. ف لعهد ديال لماليك يوبا لموري ؤ ولدو پطليموس، غادي توصل وليلي ل لأوج ديال لزديهار ديالها. هادشي كيشهد عليه تّوسع لعمراني لكبير ديال لمدينة ف ديك لفترة، ؤ لجمالية د لمعمار ديالها.[3]

لفترة رّومانية[بدل | بدل لكود]

لمؤرخين رّومان عطاونا معلومات شوية محدودة، ؤ شي مرات غالطة علا وليلي. پومپونيوس ميلا ڭال بلي وليلي "مدينة متواضعة ف لحجم" وخا ماعمرو زارها براسو.[9] لكتاب د رحلة أنطونينوس، دكر بلي وليلي بعيدة علا طنجة ب 144 ميل روماني، ؤ ب 4 ميال رومانية علا قرية طوكولوسيدا، لّي كانت أبعد بلاصة ف لجنوب تحت سّلطة د رّومان.[8]

قوس نّصر ف وليلي، تبنى علا شرف لإمبراطور كاراكالّا

ف 40 ميلادية، لإمبراطور رّوماني كاليڭولا غايأمر لغتيال ديال لماليك پطليموس لموري، ؤ هوّا ف طّريق ديالو ل لوڭدونوم لّي لموضع ديالها كاين دابا ف ليون ف فرانسا. سّباب ديال لغتيال مامعروفاش، مي تقدر تكون سباب شخصي بحال لغيرة من تّروة لكبيرة ؤ لجاه ؤ نّسب ديال پطليموس لّي من جيهت لفاميلة د مّو، كليوپاطرا سيليني، كانت عندو إمكانية وخا قليلة، باش يشد لحكم ديال روما. هادشي غادي يشعل تورات ؤ حروب ضد رّومان ف مملكة موريطانية كاملة، منها تّورة د إيديمون، لّي ستامرات ربع سنين تقريبا، ؤ كانت متمركزة سيرتو ف وليلي.[10]

من بعد ما هداو تّورات، وليلي غادي تولّي مونيكيپيوم ؤ غالبا عاصمة ديال مقاطعة موريطانية طّنجية (ؤلا تقدر تكون طنجة هيّا لّي كانت عاصمة) ل كتر من جوج قرون. رّومان غادي يستاغلّو لموارد لفلاحية د وليلي ؤ نّواحي ديالها، ف لإنتاج ديال زّيتون ؤ لڭمح، ب لإضافة ل تصدير لحيوانات علا ود لمتعة، بحال سّبوعا ف لمدابزات ديال لڭلادياتورات ف لكولوسيوم.[5] بلا لأمازيغ مّالين لبلاد، عدد د لمهاجرين، يهود، إيبيريين ؤ سوريين جاو ستاقرو فيها.[9]

ف لعهد ديال لإمبراطور ماركوس أوريليوس، غادي يتّبنا حيط جديد ضاير علا لمدينة، ب 8 د لبوّابات. ؤ ف لوقت ديال سيپتيميوس سيويروس ؤ ولدو كاراكالّا صونطر د لمدينة غادي يعاود يتّبنا ؤ غادي تولي فيه باسيليكا ؤ كاپيطول. هادشي ماكانش غادي يوقع كون كاراكالّا مادارش قرار باش يحيد ضّرايب، ؤلا عل أقل واحد نّوع منها، ؤ كا حتيفال ب هاد لحدت غادي يتّبنا قوس نصر ب سميتو.[9]

هادشي كولو طرا قبل ما يتخلّاو رّومان علا وليلي ف عام 258 ل سباب باقا مامعروفاش مزيان، ؤ ينساحبو لإدارة ؤ لعسكر رّومانيين باش يبقاو شادّين غير سّاحل لغربي د موريطانية من ليكسوس ل طنجة. هنا وليلي غادي تدخل ف فترة مضلّمة لّي ماكانعرفوش عليها بزاف ب سباب قلة لوتايق تّاريخية، ؤ ضعف لبحت لأركيولوجي ل حد سّاعة.[8] كاينين أدلة كتشير بلي نّاس د وليلي ف هاد لفترة أسسو مملكة حاكمة راسها، سميتها مملكة وليلي.

لعصور لقديمة لّخرة[بدل | بدل لكود]

فسيفسا كتمتل حيوانات

فاش خرج لحكم رّوماني، ف لغالب ضعاف لقتيصاد ديال وليلي، ؤ مابقاوش سّكّان قادّين يحافضو علا لمدينة كيفما كانت. ف هاد لفترة أغلبية ديالهم كانو من قبيلة لبكوات. مورا ماتهرسو لقنوات د لما لّي كانو كيجيبو لما ل لمدينة من واد خومان، لْوليليين غادي يتحوّلو ل لغرب ديال قوس نّصر، ؤ غادي يبنيو حي جديد تماك قريب ل لواد، باش يكون عندهوم أكصي ل لما. هاد لحي ولّا مصيپاري علا باقي لمدينة ب حيط ديفاعي جديد، لّي كان واصل حتال عند لواد. حدا قوس نّصر دارو مقبرة.

ربعة د نّقيشات تأرخو ل ما بين 599 ؤ 655، كيبينو بلي سّكان كانو ديجا مسيحيين، ؤ بلي لمؤسسات لمدنية ف لمدينة، لّي كانت ف لفترة رّومانية، كانت باقة خدامة عادي.[9] لآتار ديال لمّاعن د لفخار ؤ لأدوات، كيبينو بلي وليلي كانت عندها علاقات تجارية معا بلايص خرين ف لبحر دّخلاني ؤ ف شمال إفريقيا، منها منتوجات مستوردة من تونس. هادشي كيدل بلي تكونات سلطة سياسية قوية، لّي كانت كتحكم ف شّؤون لإدارية ؤ لقتيصادية ؤ لعسكرية د لمدينة (حيت أمرات لبني د حيط ديفاعي جديد ف لقرن سّات)، ؤ لّي تسمات مملكة وليلي. لّي كيزيد كدعم هادشي، هوّا شاهد ديال قبر ديال واحد سّيدة مسيحية سميتها يوليا روڭاتيڤا، لّي كيڭول بلي أصلها من مدينة ألطاڤا، لّي كاينة دابا حدا تلمسان ف دزاير، ؤ بلي كانت أسيرة حرب. سّلطة د مملكة وليلي ضونك تقدر تكون دارت تدخّل عسكري ف ألطاڤا، لّي شدّو فيه أسرى ؤ رجعو بيهم ل لمدينة.[11]

لقرون لوسطانية[بدل | بدل لكود]

علا حساب لأدلة د لوتايق ؤ لعملات، سّكان د وليلي كانو ديجا تحولو ل لإسلام قبل ما يجي لمولى إدريس،[2] لّي علا حساب رّوايات هوّا لمؤسس ديال دّولة لإدريسية. وليلي غادي تكون لعاصمة ديالو واحد لمدة، قبل ما يموت ؤ يأسس ولدو إدريس تّاني مدينة فاس ف 809 ؤ يردها لعاصمة ديال لأدارسة.[1][12] طرف من سّاكنة د وليلي تحوّلات ل فاس معا إدريس تّاني، مي بقات لحياة تماك مستامرة حتال لقرن 17 فاش هجروها نّاس ب شكل نيهائي. ما بين لهجومات ديال لمرابطين ف لقرن 11، ؤ لفترة فاش خرجو نّاس من لمدينة، يقدرو يكونو وقعو هجرات تدريجية ل فاس ؤلا ل مولاي دريس زرهون لّي قريبة.[5]

ف لّخر د لقرن سبعطاش، سّلطان مولاي سماعيل غادي يدمر طرف من لبني د وليلي باش ياخد لحجر يبني بيه لقصر ديالو ف مكناس.[5]

رسمة ديال ويندوس ل قوس نّصر ف وليلي

لقرن 18 تال دابا[بدل | بدل لكود]

لموقع د وليلي جبد لنتيباه ديال لؤروپيين لمرة لولة، ف خيلال لبعتة نڭليزية ل سّلطان مولاي سماعيل ف 1721. لباحت نّڭليزي جون ويندوس لّي كان ف لبعتة غادي يرسم لباسيليكا، قوس نّصر، ؤ لباب لّي كاين ف شّمال شّرقي د لمدينة.[3] ويندوس دكر بلّي سّكان د لمنطقة كيسمّيو لهديم ديال وليلي ب قصر فرعون.[8][3] دّيپلوماسي ؤ عاليم د لأركيولوجيا لفرانساوي شارل تيسو، لّي كان زار وليلي ف 1878، هوّا لباحت لول لي بين بلي وليلي ؤ قصر فرعون هوما جوج سميات ديال نفس لموضع.[3][13]

ف 1755، زّلزال لّي دمر لشبونة ف لبرطقيز، غادي يدمر لمباني لعاليين د وليلي.[9]

تنقيبات لولة لّي دّارو ف وليلي بداهم لباحت لفرانساوي هنري دو لا مارتينيير ما بين 1887 ؤ 1892، ؤ كتاشف فيها سور حساب ليه بلي سور بيزنطي.[14][3]

ف 1915، بداو لفرانسيس لحفير ف وليلي علا ود لبحت لأركيولوجي، ب لقيادة ديال لعاليم د لأركيولوجيا لويس شاطلان. هاد لحملة ستامرات 15 عام، ؤ كشفات علا شي مكوّنات د لمدينة. لمحابسية د لحرب لألمانيين ديال لحرب لعالامية لّولة عاونو ف لعمليات د لحفير.[15]

لحملات د لحفير ؤ لبحت ستامرو ف لعهد د لستيعمار لفرانساوي حتال 1941، من طرف باحتين بحال ريموند توڤنو، أرموند لوكي ؤ موريس ؤزينا. لهدف لأساسي ديال هاد لباحتين كان هوّا يلقاو آتار ديال لحضارة رّومانية، حيت لفرانسيس كانو كيعتابرو راسهم ورتة شرعيين ديال رّومان. وخا داكشي كانو شي أبحات محدودة علا لفترة لمورية لّي سبقاتها.[3]

هاد لبحت مستامر حتال دابا بشكل تدريجي. كتر من 50% من لمدينة باقي ماتحفرش ؤ مخبي لكنوز ديالو، سيرتو لحي لّي سكنوه نّاس ف لقرون مورا لحتيلال رّوماني ؤ قبل لإسلام.[8]

ضّاهير ديال 19 نونبر 1920 عطا حماية ل لمنطقة لّي كتشمل مولاي دريس زرهون ؤ وليلي، ؤ لمساحة لّي بيناتهم. ضّاهير ديال 14 نونبر 1921، زاد خصّص وليلي ب عتيبارها منطقة محمية من طرف دّولة.[9]

ف دجنبر 1997 ولّات وليلي موقع د تّرات لعالمي علا حساب لقرار ديال لمنضمة د ليونيسكو.[9]

ف أبريل 2021، لويزارة د تقافة خصصات ميزانية د 10 د لملاير د درهم باش يتبدا واحد لمشروع رقمي ف واليلي ب تقنية د لواقع لمزيود فيه[16]؛ لمشروع حبس واحد لوقيتة، قبل مايعاودو يردوه.[17][18]

لقتيصاد ؤ لموارد[بدل | بدل لكود]

معصرة د زّيتون ف وليلي

وليلي جات ف منطقة خصبة صالحة ل زّراعة من عصور قديمة، داكشي علاش جبدات لنتيباه د لبشري ف لعصر نّيوليتي، باش يستاقرّو فيها ؤ يستاغلو لأراضي ديالها علا ود لفلاحة. من بين لمزروعات لقديمة لّي تّلقاو لآتار ديالها كاين لڭمح، لفول، لعدس، لعنب ؤ لكرموص. لباحتين لقاو حتا آتار ديال ببوش لّي كانو ؤ مازالو لمغاربة ب شكل عام كياكلوه.[5]

تّصدير ديال لڭمح ؤ زّيتون ؤ زيت زّيتون، ب لإضافة ل لحيوانات د لمتعة ؤ لمدابزات (بحال سّبوعا)، من بين أهم نّشاطات لقتيصادية ديال وليلي، سيرتو ف لفترة لمورية لّخرة ؤ لفترة رّومانية. 57 معصرات د زّيتون تّلقاو فيها، مأرخين ل هادي 2000 عام تقريبا.[5]

لمعمار[بدل | بدل لكود]

ماعندنا حتا شي فيكرة كيفاش كان سّتيل د لبني ف لفترة لقبلمورية يلا فتارضنا بلي لمدينة كانت ديجا موجودة ف ديك لوقت. ف لفترة لمورية حتال لّخّر ديال لقرن لّول قبل لميلاد، كان تّخطيط د لمدينة ؤ سّتيل د لبني يوناني بونيقي.

ف لفترة لمورية لّخرة (25 ق.م. حتال 40 ميلادية) ؤ ف لفترة رّومانية كان لبني غادي معا سّتيل رّوماني. هاد لفترة عرفات لأوج ديال لحركة د لبني ؤ تّوسع د لمدينة.[9]

أغلبية د لبني ديال وليلي تصاوب ب حجر د جّير لونو رمادي كيميل ل زّروقية، لّي تّخاد قريب من جبل زرهون. وليلي كتميّز ب عدد كبير ديال لفسيفسات لّي باقين ف بلاصتهم، ؤ كيتناولو مواضيع حقيقية (بحال لحيوانات) ؤ ميطولوجية مختالفة.[9]

أهم لمعلمات ف لمدينة[بدل | بدل لكود]

لمؤسسات[بدل | بدل لكود]

لخريطة ديال وليلي ؤ لبني لّي فيها
  • لباسيليكا: كانت كتلعب دّور ديال محكمة. عندها مساحة كبيرة ؤ قاسمينها 4 د صّفوفا ديال سّاريات ل 5 د لكولوارات كيتسالا كولّا واحد منها ب سدّة مقوسة. تم تّرميم ديالها ما بين 1965 ؤ 1967.[9]
  • لكاپيطول: كاين ف لجنوب د لباسيليكا. تّبنا ف لوقت ديال لإمبراطور ماكرينوس ف عام 217، ف نفس لبلاصة ديال لفوروم لقديم. تم تّرميم ديالو ف 1962.[9]
  • لفوروم

لبيبان[بدل | بدل لكود]

  • باب طنجة: تم تّرميم ديالو ف 1967.
  • لباب شّمالي
  • لباب لجنوبي
  • قوس نصر د كاراكالا: جا علا عرض دّيكومانوس ماكسيموس (شّاريع رّئيسي)، ؤ كيفصل ما بين طّرف لقديم د لمدينة لّي تّبنا ب سّتيل ليوناني لبونيقي، ؤ لحي لّي تّبنا ب سّتيل رّوماني. ف لقديم كان مزوّق ب تّماتيل ديال لفصول رّبعة ؤ تمتال ديال كاراكالّا راكب علا كرويلة مدهّبة ؤ كيجرّوها ستة د لعودانات. لقوس تم تّرميم ديالو ما بين 1930 ؤ 1934.[9]

دّيور د سّكنى ؤ لحوانت[بدل | بدل لكود]

أغلبية د دّيور دياول نّاس لمرفّحين د وليلي كانو علا دّيكومانوس ماكسيموس، لّي هوّا شّاريع رّئيسي ف لمدون لمبنية علا سّتيل رّوماني.[9]

لحمّامات[بدل | بدل لكود]

  • حمّامات لفوروم
  • حمّامات ڭاليينوس

معابد[بدل | بدل لكود]

  • معبد ساتورن: معبد ديال لإلاه رّوماني ساتورن. لآتار لّي فيه قدم بزاف من لفترة رّومانية، ؤ تّلقاو فيه كتر من 600 ستيلات ؤ طراف ديال حوايج منحوتين ؤ مصبوغين كيرجعو ل لقرن تّاني ؤلا تالت قبل لميلاد، شّي لّي كيبيّن بلي كان معبد قديم كانو كيتعبدو فيه آلهة محلية، ؤ بلي دّيانة رّومانية ستوعبات ؤ تقبلات لمعبودات لأمازيغية لقديمة.[9]

عيون لكلام[بدل | بدل لكود]

  1. 1.0 1.1 "Archaeological Site of Volubilis". ليونيسكو (بنڭليزية).
  2. 2.0 2.1 2.2 "African World Heritage Fund, ARCHAEOLOGICAL SITE OF VOLUBILIS" (بنڭليزية).
  3. 3.0 3.1 3.2 3.3 3.4 3.5 3.6 3.7 3.8 "مجلة زمان، وليلي أو قصر فرعون" (بلعربية). 20 مارس 2015.
  4. "Volubilis began its story in Neolithic times" (بنڭليزية).
  5. 5.0 5.1 5.2 5.3 5.4 5.5 5.6 5.7 "Volubilis - Ancient Village or Settlement in Morocco" (بنڭليزية).
  6. ماريا زاهارييڤا، نيڭاش ڭيليتا أيانا، أمين الحكيمي، ساتيش س. ميسرا، فيليپ مونوڤو. "Cultivated emmer wheat (Triticum dicoccon Schrank), an old crop with promising future: a review" (بنڭليزية). doi:10.1007/s10722-010-9572-6. Cite journal requires |journal= (مساعدة)CS1 maint: uses authors parameter (link)
  7. "Inscriptions puniques et néopuniques [نّقيشات لبونيقية ؤ نّيوبونيقية]" (بلفرانساوية).
  8. 8.0 8.1 8.2 8.3 8.4 "History of Volubilis" (بنڭليزية).
  9. 9.00 9.01 9.02 9.03 9.04 9.05 9.06 9.07 9.08 9.09 9.10 9.11 9.12 9.13 9.14 "World Heritage List, Volubilis, Morocco, N 836". ليونيسكو (بنڭليزية).
  10. "A rebellion lead by Aedemon a freedman loyal to Ptolemy followed which took four years to put down" (بنڭليزية).
  11. "Walīlā aux Moyen Age : les données de la fouille" (بلفرانساوية). نونبر 2018.
  12. "Les chemins de l'écriture". doi:10.3406/horma.1998.1638. Cite journal requires |journal= (مساعدة)
  13. "Volubilis - Geschichte" (بلالمانية).
  14. "Henri Poisson of La Martinière, France, 1859-1922" (بنڭليزية).
  15. "Prisoners leaving work in the Roman ruins of the camp (ICRC, France, n°87)" (بنڭليزية).
  16. Mehdi Idrissi (2021-04-25). "Meknès : 10 MDH pour la digitalisation du site de Volubilis". leseco.ma (بلفرانساوية).
  17. Soufiane Sbiti (2021-04-21). "Faux départ pour le projet de réalité augmentée de Volubilis vanté par El Ferdaous". ledesk.ma (بلفرانساوية).
  18. Soufiane Sbiti (2021-04-30). "Réalité augmentée du site Volubilis: El Ferdaous relance l'appel d'offres malgré les critiques". ledesk.ma (بلفرانساوية).

شوف تا[بدل | بدل لكود]

لمزاود[بدل | بدل لكود]

Wikimedia Commons تقدر تزيد شوف بزاف د صور و معلومات ديال Volubilis ف ويكيميديا كومنز.