ماصطانيصوسوس

من ويكيپيديا
ماصطانيصوسوس
لفاميلة
لواليد بوكوس لول
لولاد بوكوس تّاني
بوݣود


ماصطانيصوسوس ؤلا صوسوس ؤلا سوسلأمازيغية ⵎⴰⵙⵟⴰⵏⴻⵚⵓⵙⵓⵙ، ب لّاتينية Mastanesosus) هوّا ماليك موري أمازيغي كان حكم مملكة موريطانية ف لقرن لّول قبل لميلاد، ؤ كان ف لغالب ولد لماليك بوكوس لّول ؤ بّات لملوك بوݣود ؤ بوكوس تّاني، ؤ حكم ما بين 80 ؤ 49 قبل لميلاد.[1]

لأدلة علا لوجود ديال لماليك ماصطانيصوسوس قليلة، ؤ كاترتاكز سيرتو علا شقفات د لفلوس من لعهد ديال ولدو بوكوس تّاني لي مكتوب فيهوم ب لّاتينية لماليك بوكوس ولد صوسوس REX BOCCHVS SOSI F، ب لإضافة ل واحد تّسافيرة كان دارها سياسي روماني سميتو پوبليوس واتينيوس ف شمال إفريقيا، ؤ كتب عليها لكاتيب رّوماني لمعروف كيكيرو ف كتابو ئن واتينوم In Vatinum. واتينيوس يقدر يكون تلاقا شخصيا معا لماليك ماصطانيصوسوس ف 62 قبل لميلاد.[1][2][3][4]

بعض لمؤرخين بحال صطيفان ݣزيل كانو خلطو مابين ماصطانيصوسوس ؤ لماليك ماسينيسا تّاني ديال نوميديا، ولاكين لأدلة لأركيولوجية ؤ تّفاصيل ديال تّسافيرة د واتينيوس كيخليو مجال قليل د شّك بلي كان ماليك سميتو صوسوس حكم موريطانية مورا بوكوس لّول ؤ قبل من بوكوس تّاني ؤ بوݣود.

لحوكم ديال ماصطانيصوسوس ف لغالب كان ضعيف ب لمقارنة معا لفترة ديال بّاه، حيت ف لوقت ديالو لمنطقة ديال طانجا كانت ستاقلات ؤ ولات تحت لحكم ديال أمير موري سميتو يفتاس ؤ من بعدو ولدو أسكاليس. لجنرال رّوماني كوينتوس سيرطوريوس ف خيلال حملة عسكارية ديالو عاون ف تحياد لأمير أسكاليس من لحوكم ديال طانجا. ف هاد لحملة علا حساب لمؤرخ ليوناني پلوطارخوس، زار سيرطوريوس لبلاصة لي كانو لمور كيآمنو بلي مدفون فيها رّب لمعبود ديال لأمازيغ عنتي، لي علا حساب لأساطير ليونانية لقديمة كان تقاتل معا هرقل، ؤ هاد لموضع كان ف لغالب ف لكرومليك ديال مزورا.[5][6]

عيون لكلام[بدل | بدل لكود]

  1. ^ a b لإنسايكلوپيديا لأمازيغية، بوكوس (بلفرانساوية). تطّالع عليه ب تاريخ 19 أبريل 2020.
  2. ^ "Coin of Bocchus II". تطّالع عليه ب تاريخ 19 أبريل 2020. REX BOCCHVS SOSI F
  3. ^ Duane W. Roller. The World of Juba II and Kleopatra Selene: Royal Scholarship on Rome's African Frontier (Routledge Classical Monographs). ص. 56.
  4. ^ Cicero, In P. Vatinium testem interrogatio, 5, 12.
  5. ^ Encyclopédie Berbère - Ascalis. تطّالع عليه ب تاريخ 19 أبريل 2020.
  6. ^ Plutarch. Life of Sertorius, 9. تطّالع عليه ب تاريخ 19 أبريل 2020.
Midori Extension.svg
هادي زريعة ديال مقالة خاصها تّوسع. تقدر تشارك ف لكتبة ديالها.