ألمانيا
الجمهورية لفيديرالية د ألمانيا (ب لألمانية: Bundesrepublik Deutschland بوندس ريپوبليك دويتشلاند) هي واحد البلاد جات ف لوسط لغربي د ؤروپا. تيحدّوها من شمال: لبحر د شمال و دانمارك و لبحر د لبلطيق، من لجنوب لوطريش و سويسرا، من الشرق پولونيا و تشيك، و من لغرب فرانسا، ليكسمبورݣ، بلجيكا و هولاندا. ألمانيا هي لبلاد لي فيها أكبر عدد د السكان ف ؤروپا.
ألمانيا بلاد عندها تاريخ قديم و دخلات ف بزاف د الدول بحال لإمبراطورية الرومانية. ف لقرن 16، كان شمال د ألمانيا هو لبلاصة لي بدات فيه لإصلاحات ف لمسيحية، و لي خرج منها التيار لپروطيسطانتي. من مورا ما سالات لحرب لعالمية تانية، تقسمات ألمانيا على جوج: ألمانيا لغربية و ألمانيا الشرقية. ف 1957 كانت ألمانيا لغربية من لبلدان لي أسسو لإتحاد لأوروپي. ف 1990 عاود تجمعو ألمانيا لغربية و الشرقية ف بلاد وحدة، و لي هي لجمهورية د ألمانيا.
تايسكنو ف ألمانيا شوية كتر من 83 مليون د الناس، و لعاصمة ديالها هي برلين. لغة رسمية ديال لبلاد هي لألمانية، و لفلوس لي كاتخدّم هي لأورو. نضام د لحكيم ف ألمانيا هو جمهوري فيديرالي، فيه لبلاد مقسومة على 16 فيديرالية، كل وحدا فيهم عندها لحكومة ديالها، و عاد كاينة لحكومة لمركزية ف برلين. ألمانيا عندها أقوى قتيصاد ف ؤروپا و رابع أكبر قتيصاد ف لعالم.[1] لبلاد داخلة ف بزاف د لمنضمات عالمية بحال لأمم لمتحدة و لإتحاد لأوروپي و الناطو و جي 7 و جي 20 و لمنضمة د تعاون و تنمية لإقتصادية.
مقالة متعمقة: السميات د ألمانيا
ألمانيا عندها بزاف د السميات على حساب اللوغة. هادشي جاي من كون ألمانيا وخا بلاد فيها شعب قديم، ماتوحدات ف دولة وحدة تال اللخر د لقرن 19 (من 1871 تحديداً).
كلمة "ألمانيا" براسها كيرجع أصلها ل اللاتينية Alamanni لي كانو مجموعة قبلية جرمانية، و كاتعني ب الجرمانية لقديمة إما "لإنسان لكامل" ؤلا "شلا نواع د الناس" ؤلا "جميع الناس" (لاحض التشابه معا النݣليزية "all man" ؤلا "all men").
ف لألمانية، ألمانيا كاتسمى Deutschland لي كاتركب من deutsch (أصلها من كلمة جرمانية قديمة لي كاتعني "الشعب") ؤ Land يعني بلاد، يعني لكلمة ب لألمانية ف أصلها حرفياً كاتعني "بلاد الشعب". ف الطاليانية كيخدّمو كلمة Tedesco كا موقابيل ديال اللوغة لألمانية، و tedeschii على "لألمانيين" لي عندها نفس لإتيمولوجيا ديال "deutsch".[2]
ف النݣليزية كيخدّمو كلمة Germany لي جات من اللاتينية Germania، و هيّ لكلمة لي طلقها يوليوس قيصر على لأراضي لي جاو شرق واد الراين.[3]
ف لفينلاندية و لإسطونية كيسمّيو ألمانيا Saksa لي جات من السمية د قبايل الساكصونيين الجرمانية.
ف لپولونية و شي لوغات سلاڤية كاتسمى Niemcy لي ف أصلها كاتعني "زيزون".
- ↑ "لإقتصاد د ألمانيا - السيط د الدولة د ألمانيا بلعربية (2020)". Archived from the original on 2023-03-25. Retrieved 2020-09-26.
- ↑ "Allemagne (informations générales)". www.axl.cefan.ulaval.ca. Archived from the original on 2021-12-20. Retrieved 2023-08-14.
- ↑ Schulze, Hagen (1998). Germany: A New History. Harvard University Press. p. 4. ISBN 978-0-674-80688-7.
 |
ويكيميديا كومنز عندا تصاور و معلومات على ألمانيا. |
 هادي زريعة ديال مقالة خاصها تّوسع. تقدر تشارك ف لكتبة ديالها. |
| عالمي | |
|---|---|
| وطني | |
| جغرافيا | |
| أكاديميا | |
| فنانين | |
| ناس | |
| غيرهم | |
