مولاي سماعيل

من ويكيپيديا
مولاي سماعيل
مولاي سماعيل
معلومات عامة
زيادة 1646
الريصاني
لموت 22 مارس 1727 (80/81 عام)
مكناس
لجنسية لمغريب
لحرفة ماليك و slaveholder
لّوغات لي كيعرف لعربية
لفاميلة
لواليد الشريف بن علي
خوت محمد بن الشريف و رشيد بن الشريف
شريك خناتة بنت بكار
لولاد أبولعباس أحمد
محمد تاني
لمستضيء
أبولحسن علي
عبد الملك بن إسماعيل
عبدالله تاني
زين العابدين بن سماعيل
لإتنية عرب
معلومات خرى
دين إسلام


مولاي سماعيل بن الشريف (مزيود ف جوايه 1645 ف سيجيلماسة، مات ف 22 مارس 1627 ف مكناس) هوّا سلطان عربي[1] حكم لمغريب ما بين عوام 1672 و 1727، من بعد ما خلف خوه مولاي رشيد. باه هوّا الشريف بن علي حاكم تافيلالت. لي كان كيتݣال بلي تينحادر من لحسن الداخل (واحد من حفاد الرسول لي جا ل لمغريب ف لقرن 13 ميلادي). مولاي سماعيل كان والي د مكناس ف عهد خوه مولاي رشيد. من بعد هاد لخّر عينو كا حاكم ل شمال لمغريب، فاش مولاي رشيد هبط يرجع ل لجنوب، خصوصا مراكش، لي كانت تحت حكم السعديين.

مولاي سماعيل تولا لحكم من بعد وفاة مولاي رشيد. ف لبدية واجه مجموعة من تّمردات سيرتو من عند ولد خوه حمد بن محرز. ولاكين قدر يحبس هاد تّمردات و يرجع عدد من الثغور لمغريبية من حكم لؤروپيين منهم طانجا، لعرايش و لمهدية.[2] مولاي سماعيل قدر يقوي السلطة لمركزية ديالو من خلال إنشاء جيش عبيد لبخاري و تطوير "لݣيش" لي هي جيش لقبايل لعسكارية التابعة ل سّلطان. أيضا حوّل لعاصيمة ديالو من فاس ل مكناس لي وسعها. و بنا فيها لقصر ديالو، دورها ب سّور لي مازال دابا سميتو لأسوار لإسماعيلية.

مولاي سماعيل حكم لمغريب ل مدة 55 عام ملي كان عندو 26 عام حتال لوفاة ديالو ف عمر 81 عام. هادي كانت أطول مدة ديال حكم من بين 84 سلطان ؤ ماليك حكمو لمغريب من لمجي د لإسلام حتال ليوم.[3] لوفاة ديالو غادي تدخّل لمغريب ف أزمة سياسة ل عقود بسباب صّراع مابين ولادو على لحكم و تدخل جيش عبيد لبخاري ف سّياسة.

برّا لمغريب، مولاي سماعيل معروف سيرتو حيت كان عندو عاداد كبير د لولاد كيتجاوز 1000 ولد ؤ بنت على حساب تّقديرات. على حساب موسوعة ݣينيس د رّوكورات لعالمية، سّلطان مولاي سماعيل هوّا مول رّوكور ديال أكبر عاداد د لولاد ف تّاريخ ب كتر من 1042، ب 342 بنت ؤ 700 ولد ؤلا كتر.[4]

حياتو[بدل | بدل لكود]

سّياق تّاريخي[بدل | بدل لكود]

لباب شّمالي ف مدينة سيجيلماسة لأترية

بعدما مات سّلطان سّعدي أحمد لمنصور دّهبي، ناضو لقلاقل ف لمغريب حيت ولادو تدابزو على شكون يحكم، ؤ شّيفان لعسكاريين ؤ دّينيين قسّمو لبلاد بيناتهوم. لمغريب ديك سّاع تقسّم ل دويلات، بحال زاوية ديلا ف لوسط، زاوية إليغ ف سوس، جمهورية سلا، ؤ تطوان ولّات دولة-مدينة تحت لحكم ديال فاميلة نقسيس. تافيلالت حتا هيّا ولّات إمارة مستاقلة من 1631، تحت لحكم ديال لعلويين ب عتيبار لؤصول شّريفة لي كانت معروفة عندهوم حيت كينحادرو من رّاسول، ؤ كانو جدودهوم جاو من مدينة ينبع ف لݣزيرة لعربية (دابا ف سّعودية). هادشي كان كيعطيهوم هالة روحانية ؤ سلطة دينية عند عامة نّاس.[5]

كاينين تلاتة د لؤمارا لي سبقو مولاي سماعيل: بّاه الشريف بن علي، ؤ خوتو لكبار محمد بن شّريف ؤ مولاي رشيد بن شّريف. الشريف بن علي نجح باش يحافض على سّتيقلالية ديال تافيلالت على زاوية ديلا. ف 1636، عتازل من لحكم ؤ عطاه ل ولدو محمد. سيدي محمد بن شّريف غادي يوسّع لمجال د لحكم ديال لعلويين، بحيت خدا تافنا ؤ لمنطقة ديال واد درعة، ؤ قدر يرد وجدة من لحكم لعتماني. ف 1645، غادي يخسر قدّام دّلاويين، ؤ سيجيلماسة غادي تعرّض ل هجوم ؤ نهب من طارافهوم. هاد لحادات غادي يخلق شيقاق مابينو ؤ مابين خوه مولاي رشيد، لي عتابرو مسؤول على لهزيمة.

ف هاد لفترة تقريبا، تّولد سماعيل بن شّريف ف سيجيلماسة (دابا الريصاني) ف عام 1645 ؤلا 1646.

توحيد لمغريب[بدل | بدل لكود]

ف صّراع مابين خوتو لكبار سيدي محمد ؤ مولاي رشيد، مولاي سماعيل خدا جيهت مولاي رشيد، ؤ هادشي غادي يكون ف صاليحو، حيت غادي يكافأو ب منصب د والي د مكناس، بعد ما تّقتل سيدي محمّد ف 3 غشت 1664، ف لوقت لي مولاي رشيد كان ولّا سلطان د لمغريب بعدما خدا فاس ف 27 ماي ف نفس لعام.

كاراكطير ديالو[بدل | بدل لكود]

كاينين توصيفات مختالفين ؤ شي مرات متعارضين د شّخص د سّلطان على حساب واش من مصادر ؤروپية ؤلا مغريبية. تّوارخيا متافقين بلي مولاي سماعيل كانت عندو روح ماكاتنهازمش، ؤ حيوية ماكاينش بحالها لي ستامرات حتا ف فترة شّرف. ؤ ماكاينش شي سلطان مغريبي دوّز وقت فوق لعود ديالو قد مولاي سماعيل. ل 3 د لعقود تقريبان، كان مولاي سماعيل مشغول ب لحركات ؤ لمعارك، ؤ كيقود لجيش ديالو ؤ كيقسم معاهوم لمصاعب، بحال واحد لمرة فاش كانو قطعو جبال لأطلس لكبير ف فصل شّتا ؤ كان علاين يمشي فيها. شّخصية ديالو كانت قاسحة ؤ ماكاتساومش، ولاكين عقلو كان منفاتح على لمداكرات لفلسفية، ؤ كان كيبغي لمعمار ؤ لحيوانات، سيرتو لعودان.[3]

ب لموقابيل نّتيقادات ضدو كانت سيرتو على تّعامول لقاسي ديالو، لي خلا لبعض، سيرتو لمحابسيا لي دوزو لعداب ف لمغريب، باش يوصفوه ب لوحش. مولاي سماعيل على حساب هاد نّضرة، كان زقرام لي كان كيتعامل بحال يلا لخيرات د لبلاد ديالو بوحدو. داكشي علاش كان ديما حاضي جنابو من لولاة د لأقاليم، ؤ كان مشكاك ل درجة لپارانويا، ؤ كيراقب علّ قرب نّاس د طّبقة لحاكمة، لي كانو عايشين ف خوف دايم منو. مولاي سماعيل من هاد لمنضور كان كيخدّم لخوف كا وسيلة باش يرد لي ضايرين بيه كائنات مطياعة ؤ منباطحة ليه. لميزاج ديالو كان متقلب، ؤ فاش كيكون مقلّق واحد لهالة د شّلل كانت كاتصيب لموحيطين بيه، ف واحد لمشهد لي وصفوه موراقيبين ؤروپيين بلي كيدهشر ؤ كيخلع ف نفس لوقت.[3]

بزاف د لقيصاص ديال لقسوة ؤ تّعديب لي مارسهوم مولاي سماعيل، كانلقاوهوم ف مرويات ؤروپية، لبعض منها موبالغ فيه ب زّايد. على حساب تّوارخي لمغريبي يونس نكروف هاد لمرويات "خبتية ؤ ماكاتستاحقش لإجابة". ؤ ماشي مستبعد بلي هاد لكتابات د لمحابسيا ؤ دّيپلوماسيين لؤروپيين لي كانو ف لمغريب كان لغرض منها باش يستعطفو لجمهور لمسيحي، ؤ ياخدو عطايا من لكنيسة ؤلا من نّاس، ؤلا باش يديرو ترويج ل دوك لكتوبا. واحد لكتاب متلاً ب عنوان "موغامرات طوماس پيلو" كانو فيه قيصاص منقولين من عند دّيپلوماسي نّݣليزي دجون ويندوس. هاد لكتوبا عادتن ماكانوش كيميّزو مابين شهادات ب لعين، ؤلا لي عندها مصدر موتوق، ؤلا غير موخودة من إشاعات ؤ هضرة متداولة ؤ ماعندها مصداقية. ف نفس لوقت هادشي ميكيعنيش بلي هاد لمرويات غالطة 100% ؤلا بلي مافيهاش علّاقل شوية د لحقيقة.[3]

ولادو وعيالاتو[بدل | بدل لكود]

بعض لمصادر التاريخية لي عاصرات السلطان سماعيل بن الشريف، كتقول بلي سّلطان عندو ولاد بزاف و جاريات بزاف، بحكم لحروب ديالو لي دارهم على الصحرا و سوس والشرق. كيقول واحد الديپلوماسي فرانساوي معروف لي سميتو دومينيك بونو Dominique Busnot، لي عاصر السلطان كيقول بلي كان عندو 1171 ولد أغلبهم من الجاريات، وهادشي لي غادي يأثر على الديموغرافيا ديال لمغريب بشكل ملحوض على حساب لباحيتين،[خاص شي عين/مصدر ل هادشي] و ف نفس السياق كيقول المؤرخ لمغريبي المعروف أبو القاسم الزياني ف كتاب "البستان الظريف في دولة مولاي الشريف" ولي كتب كتاب "الاستقصا" بلي سّلطان سماعيل عندو 28 ولد ؤ 28 بنت. و سّلطان عندو ربعة ديال الزوجات هوما:

سّياسات ديالو[بدل | بدل لكود]

لعلاقات معا لخاريج[بدل | بدل لكود]

مولاي سماعيل كان معروف ف زمانو عند لبلدان لغربية، سيرتو بسباب لأنشطة ديال لقراصنة، حيت كان عندو مونوپول على لمحابسيا لؤروپيين لي تشدّو ف لبحر، ؤ كانت أي بيعتة جات باش تعتقهوم ؤلا تفديهوم إلا وخاصها تتعامل معا لحوكومة ديالو ؤلا معاه شخصياً. بزاف د شّهادات تّاريخية على مولاي سماعيل جاو من كتابات ديال محابسيا ؤروپيين لي تعتقو ؤ ألّفو كتوبا على تّجربة ديالهوم،[3] بحال جيرمان موويط لي دوّز 11 عام كا عبد ف لمغريب.

دّين[بدل | بدل لكود]

كان مهتم بالانتاجات الدينية فبلادو وخا كانو بعض لخلافات معا الزوايا ؤ بعض لفقها لي عاروضوه ف طريقة لحكم ديالو.

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها


لبني[بدل | بدل لكود]

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها

لإصلاحات لعسكارية[بدل | بدل لكود]

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها

لميرات د مولاي سماعيل[بدل | بدل لكود]

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها


عيون لكلام[بدل | بدل لكود]

  1. ^ "المعسول في الإلغيين وأساتذتهم وتلامذتهم وأصدقائهم 1-21 ج16 - صفحة 340".
  2. ^ السلطان مولاي إسماعيل.. هذه حقائق بن الشريف!
  3. ^ a b c d e كومر پلامر تّالت (15 يناير 2020). Empire of Clay: The Reign of Moulay Ismail, Sultan of Morocco (1672-1727) [مملكة د لغيس: لحكم ديال مولاي سماعيل، سلطان لمغريب]. Lulu Publishing Services. ردمك 9781684712595.
  4. ^ "Guiness World Records, Greatest number of descendants" (بنڭليزية).
  5. ^ جورج بنسوسان. Il Était Une Fois Le Maroc, Témoignages Du Passé Judéo-Marocain [حاجيتك ماجيتك لمغريب، شهادات على لماضي ليهودي لمغريبي]. ص. 67.
Wikimedia Commons تقدر تزيد شوف بزاف د تّصاور و لمعلومات ديال Moulay Ismail ف ويكيميديا كومنز.