كوڤيد-19
المرض ديال ڤيروس كورونا 2019 (كوڤيد-19، من الاختصار ديالو ب النݣليزية "Coronavirus Disease 2019") هو واحد المرض معدي كيسبّبو الڤيروس ديال كورونا 2 المتعلق ب الساندروم التنفسي لمجهد الصعيب (سارس-كوڤ-2)،[1] و اللي كان معروف ف البدو ديال الانتشار ديالو ب فيروس كورونا الجديد (nCoV-2019). هاد المرض بان أول مرة ف ووهان، ف الوسط ديال الشينوة، و سبّب واحد الجايحة مستامرّة. حتى ل 23 شتنبر 2020، كتر من 31 مليون واحد تعادى ب المرض ف 188 دولة، منهم كتر من 971 ألف واحد اللي مات، و كتر من 21 مليون واحد اللي برا.[2]
الأعراض الشايعة ديال هاد المرض كاتشمل السخانة، الكحبة، العيا، النقص ف التنفس ولا صعوبات تنفسية، و الفقدان ديال الحاسة د الشمان و الدوق.[3] ف الوقت اللي الأغلبية ديال الناس عندهم أعراض خفيفة، كاين اللي كيطوّر المتلازمة ديال الضيقة التنفسية الحادة (ARDS). الفترة ديال الحضانة ديال المرض يمكن تكون مابين يوم واحد حتى ل 14 يوم.[4]
المرض كينتاشر مابين الناس ب شكل قوي ملي كيكونو قراب جسدياً. كينتاشر ب شكل ساهل بزاف ف الهوا، سيرتو ف الرداد التنفسي الصغير ملي المريض كيتنفس، كيكحب، كيعطس، كيهضر، ولا كيغني.[5][6] المرض يقدر ينتاشر من السطوحا الملوتين واخا هاد المسألة ما عليهاش إتبات استنتاجي قوي.[6][7][8] الڤيروس كيبدا الانتشار ديالو يوماين قبل ما الأعراض تبدا تضهر، و الناس اللي ما كاتضهرش عليهم أعراض حتى هما يقدرو يعاديو ناس اخرين.[6] الناس كيبقاو معاديين ل واحد المدة ديال 7-14 يوم ف الحالات الخفيفة، و حتى ل جوج سيمانات ف الحالات الخطيرة.[4][6] الطريقة المعيارية ديال الكشف هي التفاعل ديال الپوليمراز المتسلسل ديال النسخ المعكوس (RT-PCR) من مسحة بلعومية ف النيف. التصوير المقطعي ديال الصدر حتى هو يقدر يعاون بزاف ف الكشف، بلحاق التوجيهات الصحية ما كاتنصحش ب هاد النوع ديال الكشف يلا كان غادي يتستعمل ب شكل روتيني.
الإجراءات ديال الوقاية ضد العدوى كاتشمل الغسيل ديال اليدين ب شكل متكرر، التباعد الاجتماعي، الحجر الصحي، التغطية ديال الكحبة، و التأكد بيلا اليدين اللي ما مغسولينش يبقاو بعاد على الوجه.[9] الاستعمال ديال الكمامات (ولا أي حاجة كاتقدر تدير الخدمة ديال الكمامات، بحال الزيف، الوشاح ديال الراس ... إلخ) منصوح بيه من طرف بزاف ديال الخبراء ديال الصحة ف البلايص العموميين، و كاينين بلدان اللي فرضو الاستعمال ديال الكمامة باش ينقّصو من الاحتمال ديال العدوى. الخبراء ديال الصحة كيقولو عوتاني بيلا الكمامات الطبية، بحال من النوع ديال ن-95، خاصهم يبقاو خاصين ب الخدّاما ف المجال ديال الصحة و ب الناس اللي كيعتانيو ب المراضين.
مازال ما كاين حتى ڤاكسان ولا شي علاج معين ديال كوڤيد-19، واخا كاينين بزاف اللي مازالة عليهم الخدمة. المنضمة العالمية ديال الصحة (WHO) علنات ف 30 يناير 2020 بيلا التفشي ديال كوڤيد-19 ولات حالة طوارئ صحية عالمية،[10][11] و ف 11 مارس 2020 ولات جايحة عالمية.
كاين تنوع على المستوى ديال الأعراض ديال كوڤيد-19، بلحاق ف الأغلبية د المرات كاتكون السخانة و الكحبة.[12][13] الناس المراضين ب هاد الڤيروس يقدرو يطوّرو أعراض مختالفة، و هاد الأعراض يمكن ليها تتبدّل مع الوقت. متلاً، واحد الشخص يمكن تجيه السخانة بزاف، الكحبة، و العيا، و ف نفس الوقت، شخص اخر تقدر تجيه شوية د السخانة ف البدو ديال المرض و مع الوقت تجيه مشاكل ديال التنفس من مور سيمانة. الأعراض ديال كوڤيد-19 كلها ماشي خاصة؛ يعني نقدرو نلقاوها ف أمراض اخرين.
السخانة هي العلامة الشايعة ديال كوڤيد-19،[12] و تقدر تكون طالعة بزاف ولا هابطة. الأغلبية ديال الناس المراضين ب كوڤيد-19 كاتجيهم السخانة ف شي مرحلة من المراحل، و كاتجيهم الكحبة، اللي تقدر تكون إيما يابسة ولا فازݣة.[12]
أعراض اخرين شايعين هما العيا، صعوبات ف التنفس، و حريق ديال العضلات و المفاصل.[12][13] أعراض بحال المشاكل ديال التنفس كيكونو شايعين بزاف عند الناس اللي كيحتاجو العناية ف السبيطار.[13] المشاكل ديال التنفس كاتجي عادةً ف مرحلة معطّلة من التطوّر ديال المرض.
تقريباً 40% من الناس كاتجيهم الأنوسميا، يعني كاتمشي ليهم الحاسة ديال الشمّان، و الديسݣوسيا، يعني كيلاحضو اختلافات على المستوى ديال الحاسة د الدوق.[13][14] هاد العلامات يلا كانو غادين يبانو، كيبانو بكري.[14] هاد النوع ديال الأعراض شايع كتر عند الشباب، و يمكن على هادشي، كيعني بيلا الحالة ما غاداش تتعقد بزاف.[14] واخا الأغلبية ديال الناس المراضين ما كاتجيهمش هاد العلامة، هاد العلامة صعيب نلقاوها ف أمراض تنفسية اخرى.
كاينين أعراض اخرين ماشي شايعين بزاف ديال كوڤيد-19. كاينين ناس اللي كاتجيهم أعراض على المستوى ديال الجهاز الهضمي بحال الفقدان ديال الشهية، الكرش الجارية، الݣانة ديال القي.[13][15] كاينين ناس اللي كايجيهم الݣراجم، حريق الراس و الدوخة.[12][13]
بحال ما كيوقع مع ڤيروسات اخرين، كاينة واحد المدة كاتسمى ب المدة ديال الحضانة، كاتبدا ف اللحضة ملي الشخص كيتعادى و كاتسالي ملي كيبداو الأعراض يضهرو. هاد الفترة ديال الحضانة ب النسبة ل كوڤيد-19 كا معدل تقدر تكون مابين 4 و 5 أيام.[16] الناس اللي كيضهرو عليهم بزاف ديال الأعراض كيبداو يحسّو ب هاد الاضطرابات من يوماين حتى ل 7 أيام من مور العدوى، و الأغلبية ديال الناس اللي كيضهرو عليهم الأعراض ب شي علامة قبل اليوم 12.[16] كاينين أعراض كيبانو قبل اخرين. ف غشت 2020، العلماء ديال الجامعة ديال كاليفورنيا الجنوبية أكدو بيلا الترتيب المحتمل ديال الأعراض اللولية ديال كوڤيد-19 هو السخانة، متبوعة ب الكحبة و الحريق ديال العضلات، و الݣانة ديال القي (و شي مرات حتى القي) كاتجي قبل الكرش الجارية. هاد الترتيب كيختالف على الترتيب ديال الأعراض ديال الانفلونزا اللي فيها الكحبة كاتجي قبل السخانة.
شي د الناس واخا كيكون فيهم الڤيروس ما كيبيّنو حتى شي علامة. هاد الناس عادةً ما كيحسّو ب والو و يقدر ما يكونوش عارفين ريوسهم مراضين يلا ما دوّزوش الطيسط ديال الكشف. واخا هكداك، هاد الناس يقدرو ينشرو الڤيروس. كاينين ناس اخرين اللي الأعراض عندهم كاتجي معطلة بزاف، و كاينين اللي كاتجيهم أعراض خفيفة. هادو كاملين يقدرو ينشرو العدوى.
كوڤيد-19 كيجي ب سباب العدوى ب الڤيروس ديال كورونا 2 المتعلق ب المتلازمة التنفسية الحادة القوية (سارس-كوڤ-2)
كوڤيد-19 مرض جديد و مازال تحت البحت. كينتاقل من شخص ل شخص ملي كيكونو قرابين ل بعضياتهم، بلحاق واخا ما يكونوش قراب يلا كانو ف بلاصة مسدودة. ملي الشخص المعادي كيتنفس، كيكحب، كيعطس، كيهضر ولا كيغني، كينتج واحد الرداد ملوّت اللي كيمشي ف الهوا و كيعادي أي واحد ستنشقو. كل واحد مريض يقدر يعادي 2 حتى ل 3 ديال الناس (كتر من الانفلونزا، و قل من بوحمرون). هاد النوع من الانتقال ف الهوا كيوقع بزاف ف البلايص المسدودة اللي فيها الزحام و ما مهوّياش مزيان، بحال ما يقدر يكون الحال ف المطاعم، الديسكوطيكات، النقل العمومي، و التجمعات بحال العراسات و الݣنازات.
الناس يقدرو يتعاداو عوتاني يلا قاسو شي حاجة ملوتة ب الڤيروس و وراها قاسو عينيهم، نيفهم ولا فمهم بلا ما يكونو غسلو يديهم مزيان، واخا هاد المسألة ما كاينش عليها شي دليل استنتاجي قوي. الڤيروس كيكون ضعيف ملي كيكون برا الجسم ديال بنادم و كيموت ف مدة محدودة، و يقدر يتّقتل ب المعقمات ديال الدار. هاد المعقمات ما صالحينش ل الاستعمال يلا الڤيروس دخل ل الجسم ديال بنادم.
البزاق كيهز كمية كبيرة ديال الڤيروس. واخا كوڤيد-19 ماشي مرض اللي كينتاقل مع الممارسة الجنسية، الكونطاكط المباشر، بحال البوسان ولا شي ممارسات حميمية بحال الكونطاكط الفموي-الشرجي، مشكوك بيلا تكون عندهم القدرة ديال نقل العدوى. الڤيروس يقدر يكون موجود ف الحليب ديال البزولة، بلحاق السؤال ديال واش ممكن يدوز من البزولة ل البيبي مازال ما معروفش. المنضمة العالمية ديال الصحة كاتنصح المّيمات اللي فيهم الڤيروس ما يوقفوش الرضاعة ديال البيبي ديالهم.
الڤيروس ديال كورونا 2 المتعلق ب المتلازمة التنفسية الحادة القوية (سارس-كوڤ-2) هو ڤيروس جديد، ف البدو تستأصل من 3 ديال الناس عندهم مشاكل ف الرية متعلقة ب مرض تنفسي حاد ف ووهان. الخصائص ديال SARS-CoV-2 كلها كاتطرى حتى مع الڤيروسات ديال كورونا الاخرين.
هاد الڤيروس الجديد راه قريب بزاف ل الڤيروس الأصلي (سارس-كوڤ-1). العلماء كيعتاقدو بيلا الأصل ديالو جاي من الحيوان. التحاليل الجينية كشفات بيلا ڤيروس كورونا كيتجمّع ب شكل جيني مع الجنس ديال بيطاكوروناڤيروس، مع الفرع ديال ساربيكوڤيروس (السلالة ب)، مع جوج ديال السلالات ڤيروسية مشتقة من الخفاش. هاد الڤيروس مطابق ب 96% على المستوى ديال الجينوم مع العينات ديال ڤيروس كورونا ديال الخفاش (BatCov RaTG13)
- ^ "المرض ديال ڤيروس كورونا 2019 (كوڤيد-19) - الأعراض و الأسباب" مايو كلينيك. تّستخرج ف 14 أبريل 2020.
- ^ "اللوحة ديال كوڤيد-19 ديال المركز ديال الأنضمة، العلوم و الهندسة (CSSE) ف الجامعة ديال جونز هوپكينز." تّستخرج ف 25 شتنبر 2020.
- ^ "أسئلة و أجوبة على الڤيروسات ديال كورونا (كوڤيد-19)." المنضمة العالمية ديال الصحة. 17 أبريل 2020. مأرشف من الأصل ف 14 ماي 2020. تّستخرج ف 14 ماي 2020.
- ^ a b "أسئلة و أجوبة على كوڤيد-19: حقائق أساسية". المركز الأوروپي ديال الوقاية و التحكم ف الأمراض. تّستخرج ف 18 شتنبر 2020
- ^ "كيفاش كينتاشر كوڤيد-19." المراكز الميريكانية ديال السيطرة و الوقاية من الأمراض. 18 شتنبر 2020. ف الأرشيف من الأصل ف 19 شتنبر 2020. تّستخرج ف 20 شتنبر 2020
- ^ a b c d "الانتقال ديال كوڤيد-19." المركز الأوروپي ديال الوقاية و التحكم ف الأمراض. تّستخرج ف 12 شتنبر 2020.
- ^ "أسئلة و أجوبة: كيفاش كينتاقل كوڤيد-19." المنضمة العالمية ديال الصحة. تّستخرج ف 12 يوليوز 2020.
- ^ "الانتقال ديال سارس-كوڤ-2: الضمنيات ديال الوقاية من العدوى" (PDF) المنضمة العالمية ديال الصحة. 9 يوليوز 2020. ف الأرشيڤ من الأصل ف 9 يوليوز 2020. تّستخرج ف 18 شتنبر 2020.
- ^ نوسباومر-سترايت، ب. ماير، ڤ. دوبريسكو، أي. شاپمان، أ. پيرساد، ا. كليزينز، إ. و اخرين (أبريل 2020). "الحجر الصحي ب وحدو ولا مع اجراءات اخرى ديال الصحة العامة باش نسيطرو على كوڤيد-19: مراجعة خفيفة." السجل ديال كوشران ديال المراجعات النضامية.
- ^ "التصريح ف الاجتماع التاني على القوانين الصحية العالمية (2005) اللجنة ديال الطوارئ ديال التفشي ديال ڤيروس كورونا الجديد (2019-nCoV)" المنضمة العالمية ديال الصحة. ف الأرشيڤ من الأصل ف 31 يناير 2020. تّستخرج ف 11 فبراير 2020.
- ^ ماهتاني، س. بيرݣر، م. أوݣريدي، س. ياتي، م (6 فبراير 2020). "ميات ديال الناس اللي تنقدو غادين يتشدّو ف كاليفورنيا. هونݣ كونݣ و طايوان كيديرو قيود على السفر من الشينوة البرية الرئيسية". الواشنطن پوسط. ف الأرشيڤ من الأصل ف 7 فبراير 2020. تّستخرج ف 11 فبراير 2020.
- ^ a b c d e ݣرانت، م. س.، جيوغيݣان، ل.، محمد، ز.، ماك-ݣينيس، ل.، كلارك ا. ل.، ويد، ر. ݣ. (23 يونيو 2020) "الضهور ديال الأعراض عند 24410 راشد تأنفيكطا ب الڤيروس ديال كورونا الجديد (سارس-كوڤ-2؛ كوڤيد-19): مراجعة نضامية و تحليل متعمق ديال 148 دراسة من 9 ديال البلدان" پلوس وان. 15 (6).
- ^ a b c d e f "الأعراض ديال الڤيروس ديال كورونا". المراكز الميريكانية ديال السيطرة و الوقاية من الأمراض (CDC) ف 13 ماي 2020. ف الأرشيڤ من الأصل ف 17 يونيو 2020. تّستخرج ف 18 يونيو 2020.
- ^ a b c أݣييمان أ. أ.، تشين، ك. ل.، لاندرسدورفر، س. ب.، ليوو، د.، أوفوري-أسينسو، ر. (غشت 2020). "الاضطراب ديال الشمان و الدوق عند المراض ب كوڤيد-19: مراجعة نضامية و تحليل متعمق" الإجراءات ديال مايو كلينيك. 95 (8)
- ^ برلين، د. أ.، ݣوليك، ر. م.، مارتينيز، ف، ج. (ماي 2020). سولومون، ك، ݣ، (تعديل). "[[doi:10.1056/NEJMcp2009575 |الحالة الخطيرة ديال كوڤيد-19]]" الجريدة ديال الميدسين ديال نيو إنݣلاند.
- ^ a b ݣاندهي، ر. ت.، لينتش، ج. ب.، ديل ريّو، س. (أبريل 2020) "الحالة الخفيفة ديال كوڤيد-19" الجريدة ديال الميدسين ديال نيو إنݣلاند.
|
تقدر تزيد شوف بزاف د تّصاور و لمعلومات ديال COVID-19 ف ويكيميديا كومنز. |