انتقل إلى المحتوى

كورة (سپور)

بدل ليانات
سمع (فيشي)
من ويكيپيديا
ل معاني وحدين خرين، شوف كورة (توضيح).
كورة
نوع ديال sport industry و رياضة د كورة
التسيير ليتيحاد الدولي ديال كورة
بانت ف لمملكة لمتاحدة د بريطانيا لكبيرة و إيرلاندا (1848)
شحال كايقصّرها 7 حتال 22 لاعب
اللي كايقصّر
باش كاتقصّر
الرمز لأولمپي



كورة ؤلا لفوت (بلعربية: كرة القدم، بالنݣليزية: Soccer أولّا Association Football)، كاتكنّى باللعبة الزوينة أولّا رياضة لعالام (بالنݣليزية: World Game)[1] هي رياضة جماعية كيلعبوها جوج ديال لفراقي ضد بعضياتهم. كل فرقة د لكورة تيكونو فيها 11 لعّاب تيلعبو برجليهم بكورة مكوّرة. تاتّعتابر لكورة هي الرياضة اللي شعبية ݣاع فلعالم حيتاش كايقصرها كتر من 250 مليون د بنادم ف 200 بلاد.[2] كاتّلعب لكورة ف بلاصة مستطيلة سميتها التيران فيه جوج ديال الشبكات مقابلين بعضياتهوم ف الضلوع الصغار د لمستطيل. لهدف ديال هاد الرياضة هو باش لفرقة تماركي بيوتا كتر من اللي لاعبة كونطر ديالها. هادشي كايجي فاش لفرقة كاتدخّل لكورة من مورا لخط اللي تحت الشبكة د لفرقة لاخرا. لوقت لقانوني ديال لماتش هوّ 90 دقيقة أولّا كتر (على حساب بزاف ديال الشروط).

كاتقصّر كورة تحت بزاف ديال لقواعد كايتسمّاو لقواعد د اللعبة. لمحيط ديال لكورة فيه مابين 68 و70 سانطيم وكاتسمّى لكورة. لفراقي بجوج كايتنافسو باش يجيبو لكورة فالشبكة ديال لفرقة لخرة (مابين لعمايد د الشبكة و تحت لعارضة)، يعني يماركيو بيت. لكوايريا ماعندهوم لحق باش يقيسو لكورة بيدّيهوم أولّا درعانهوم فاش كايكون لماطش خدّام، من غير لحارس وغير فلمينطاقة د پيلانتيات. لكوايريا يقدّو يقيسو لبالون بأي قنت آخر من الدات ديالهوم باش يشّيرو بيها أولّا يپّاصيوها، وكايخدّمو غاليبا رجليهوم. لفرقة اللي ماركات أكبر عدد ديال لبيوتا هي اللي كاتربح. يلا لفراقي بجوج ماركاو نفس لعدد ديال لبيوتا إمّا كايتعلن تعادول أولّا كايدوز لماطش لأشواط زايدين وحتال تيرات الترجيح على حساب النوع ديال لمنافسة. كولا فرقة عندها كاپيتان اللي عندو غير مهمة وحدة رسمية على حساب لقواعد د اللعبة: كايمتّل لفرقة ديالو ف لقرعة د الريالة قبل من لبدية أولّا ف شي پيلانتي.[3]

ليتيحاد الدولي ديال كورة (بلفرانساوية: Fédération Internationale de Football Association، FIFA) هو اللي كايسيّر وكاينضم هاد اللعبة فلعالام وهو اللي كاينضّم كيسان لعالام دالرجال و لعيالات مرة كولّا ربع سنين.[4] كاس لعالام كاتكون مرّة كولّا ربع سنين من 1930 (من غير 1942 و 1946 اللي تلغاو بسباب لحرب لعالمية التانية). تقريبا مابين 190 و200 دولة كاتنافس على بلاصة ف لفّينال تحت لمضلّة ديال لكونفيديراليات تاوع لقارّات. لأدوار د لفينال كايدوزو كولّا ربع سنين ف 4 د السيمانات و كاتقصّر فيهوم 32 بلاد. هادي هي لمنافسة الراقية مابين لمنافسات ديال كورة فلعالام كامل. كاس لعالام ديال لعيالات حتى هي كاتقصّر مرة فكولّا ربع سنين من 1991، واخا لعيالات كانو كايقصرو كورة من نهار بانت. شي مليار و 120 مليون واحد تفرّجو فكاس لعالام عيالات د 2019 واللي تدارت ف فرانسا.[5]

تصايبت لقوانين د لكورة ف النݣليز و دارها ليتيحاد د لكورة د لينݣليز ف 1863. تطورات لأساليب ديال لكورة مع لوقت و تبدًلات معاها بزاف د لقوانين حتا وصلنا للكورة لعصرية. ف هاد لمرحلة، ولاو لفراقي تايخدمو تا على الطكتيك و لمهارات د اللعب، و هوما حوايج تيخدمو عليها لمدربين باش يربّحو لفراقي ديالهم. أحسن بوطولة ديال لكورة ف إفريقيا هي كاس إفريقيا، أمّا ف ؤروپا أحسن واحد هوما دوري أبطال ؤروپا (رجال و عيالات)، اللي كايجيب مشاهدات كتار بزاف ف التلفازة من لعالام كامل. لفينال ديال الدوري د ؤروپا د لأبطال د الرجال ولّا ف لعوام اللخرين أكتر حدت رياضي كايتشاف ف التلفازة.[6] أحسن بوطولة محلية ديال كورة ف إفريقيا هي بوطولا 1 لا من ناحية التصنيف ديال "لكاف على خمس سنين د2020"[7] ولا من ناحية لجمهور لممكين واللي واصل ل 2 د لمليار واحد ف 53 مليون دار ف 154 دولة. أحسن بوطولا فلعالام هي لپريمر ليݣ ديال النݣليز.[8]

لقواعد

[بدل | بدل لكود]

كاينين 17 قانون ف لقواعد ديال كورة الرسميين، كولّا وحدة فيهوم عندها الشروط و التعليمات ديالها. نفس لقواعد هي اللي كاتطبّق على ݣاع لمستويات دياول كورة، واخّا كايكونو شي تغييرات فيهوم باش يتوالمو معا لفئات ديال الشبان والصغار، و لعيالات و اللي عندهوم حاجات خاصّين. لقواعد مصايبين مرخوفين شي شوية باش يتݣاد التطبيق تاعهوم مع الضروف ديال اللعب. لفيفا هي اللي كاتنشر هاد لقواعد، ولايني لمجليس ديال ليتيحاد الدولي دكورة (IFAB) هو اللي كايسهر على التطبيق ديالهوم.[9] زيادة على لقوانين سبعطاش، بزاف ديال لقرارات من لIFAB كايساهمو ف التقنين ديال كورة.[10][11]

لكوايريا، الدوزان، و لحكّام

[بدل | بدل لكود]
لحكم كايسيّر ماطش د كورة

كولّا فرقة كاتكون فيها ماكسيمو 11 كوايري (بلا لكوايريا دالتبديل)، و واحد من هاد لحضاش خاص يكون حارس. لقواعد ديال لمنافسات يقدرو يقررو عدد قل ديال لكوايريا، غالبا كايكون سبعة منهوم. لحرّاس هوما بوحدهوم اللي يقدّو يقيسو كورة بيديهوم، هلّي خاص يكونو لداخل ديال لمينطاقة د پيلانتيات قبال لݣول ديالهوم. من غير هكّاك كاينين بزاف ديال لبلايص اللي يقدّ لمدرّيب يحددهوم لدوك لعشرة اللي باقين، وهاد لبلايص ماكاتحددهومش لقواعد.[12]

لكيطمة الرئيسية اللي خاص تكون عند لكوايريا فيها تيشورت، شورط، تقاشر، سبرديلة د كورة وواحد التويشية كاتحمي الساق. الطبّة ولخبراء ديال الطب كايوصّيو لكوايريا الرجال بمايو دخلاني باش يحميهوم من الدقّات اللي كايجيو جيهة لحجر.[13][14] لغطا دالراس ماشي ضروري فلكيطمة، واينّي اللعابا يقدرو يديروه باش يخفّو من الدقات اللي كاتجيهوم فالراس.[15] لكوايريا ممنوعين باش يلبسو أي حاجة فيها لخطار عليهوم و على لكوايريا لخرين، بحال الدهوبات و لمواݣن. لكوايريا ديال لفرقة خاص يلبسو توني اللي كايفرّقهوم على لفرقة لخرة أولّا على لحكّام.[16]

واحد لعدد ديال اللعابا يقدر لمدرّيب يبدّلهوم فوسط اللعب. لعدد ديال الشونجمو لمسموح بيه فلأغلبية ديال لبوطولات هو تلاتة فتسعين دقيقة، و كايتزاد لعدد إلا لماطش كان غادي للميطات الزايدين، واخّا هاد لعدد كاتبدّل على حساب النوع ديال لمنافسة أولّا لودّيات. يقدر يتدار تبدال إلا كان لكوايري لداخل واكل الدق، عيان، ماعندوش فعالية أولا إلا لمدرّيب باغي يبدّل الطاكتيك أولّا يضيّع لوقت فماطش اللي النتيجة ديالو غير على سبّة. فلميطشان لعادين ديال لكبار لكوايري اللي خرج ماكايعاودش يدخل.[17] IFAB كاتنصح "مايكملش لماطش اللي فيه قل من سبعة ديال لكوايريا فكولّا فرقة". بالنسبة للميطشان اللي ماكاتحضرش ليه شي فرقة لعقوية و النقاط اللي كاتعطى/كاتحيّد على هادشي كاتبقى من ختيصاص لعوصبات اللي كاتسيّر لمنافسة.[18]

لماطش كايسيّرو حكم اللي "عندو السلطة لكاملة باش يفرض لقواعد د اللعبة بعلاقة معا لماطش اللي كايسيير" (قانون 5) واللي لقرارات ديالو مافيهومش نقاش. لحاريس كايعاونوه جوج دلحكام لمعاونين. ف بزاف ديال لبوطولات لكبار كاين لحكم الرابع اللي كايعاون لحكم اللول و يقدر يبدّل لحكّام لمعاونين إلا كان هادشي ضروري.[19]

تيكنولوجيا خط لݣول كاتساتعمل باش يتحيد الشك من إلا دازت كورة مورا لخط دلݣول وتماركا بيت أولا لا. لحكم لمعاون بلڤيديو (لڤار) هي تيكنولوجيا بدات كاتبان فلبوطولات لكبار باش تعاون لحكّام اللي فالتيران بحساب لإعادة د لڤيديوات باش يتأكدو من لقرارات ديالهوم أولّا يلغيوها. كاينين ربعة ديال لحوايج اللي كايدير ليهوم لڤار لمراجعة: كارطة حمرا أولا صفرا تعطات بلغلط، لبيوتا ؤ واش كان فيهوم موشكيل ف لبني د لهوجوم ديالهوم، لقرارات اللي تعطات فيهوم كارطة حمرا نيشان، و لقرارات ديال پيلانتي.[20]

لبالون

[بدل | بدل لكود]
بالون ديال كورة

لكورة عندها شكل مكوّر و الضورة ديالها خاصها تكون مابين 68 و 70 صانطيم. التقل ديالها كايكون مابين 410 و 450 ݣرام، و الضغط ديالها مابين 0.6 و 1.1 ديال الضغط لجوي اللي كاين حدا لبحر. شحال هادي كان لبالون كايتصاوب من وراق ديال الريش مخيطين و ميكة ديال لاݣوم باش الضغط يتشدّ. لكواري اللي كاينين دابا صطيناعيين.[21][22]

التيران

[بدل | بدل لكود]
لعبار لعادي ديال التيران

الشكل ديال التيران ف لميطشان الدوليين ديال لكبار كايكون مستطيل اللي الطول ديالو مابين 100 و 110 ميترو و لعرض ديالو مابين 64 و 75 ميترو. ف لميطشان اللي ماشي دوليين التيران كايكون الطول ديالو مابين 90 و 120 ميترو و لعرض مابين 45 و 90 ميترو، غير مايوليش التيران مربّع. ف 2008 قررات IFAB يكون الطول ديال التيران هو 105 ميترو فالطول و 68 ميترو ف لعرض للميطشان الدوليين[23]، ولاكين هاد لقرار ماعمرو تطبق حيتاش مازال ماكايناش موافقة عليه.[24]

لخدود الطوال سميتهوم خطوط التوش، أما لحدود الصغار اللي لݣول محطوط عليهوم سميتهوم خطوط لݣول. كولّا خط ديال لݣول محطوط عليه مستطيل ديال لݣول، ف نص الطريق مابين خطوط التوش.[25] لعرض ديال الداخل د لݣول (من لعمود ليمني للعمود ليسري) فيه 7.44 ميترو، أما لعلو ديال لعارضة اللي هازينها لعمايد فيه 2.44 ميترو من فوق الضس. الشباكي كايكونو مورا لݣول، ولايني لقواعد د اللعبة مافارضينهومش.[26]

قبالة لݣول كاينة لمينطاقة د پيلانتيات. هاد لبلاصة كايحددها لخط د لݣول، جوج خطوط بادين من خط لݣول و متعامدين عليه و بادين بعاد 16.5 ميترو على لعمايد دلݣول والطول ديالهوم 16.5 ميترو. ف هاد لحد واحد لخط آخور متعامد عليهوم و متوازي معا لخط د لݣول كايجمعهوم. هاد لبلاصة عندها بزاف ديال لغراض، لأهم منهوم هوما: هي لبلاصة فين يقدّ لحاريس يقيس لبالون بيدّيه و لبلاصة فين يلا تدار غلط على كوايري من لفرقة لخرة كايتعاقب بپيلانتي. علامات خرين فالتيران كايبينو فين كاينة النقطة ديال لبدية تاع لماطش، لبلاصة منين كايشوتي لحاريس لكورة للداخل، لبلاصة فين كاتحط كورة وقت لپيلانتيات أولا ركنية.[27]

مدة لماطش وتهراس التعادول

[بدل | بدل لكود]

90 دقيقة

[بدل | بدل لكود]

لماطش لعادي ديال لكبار فيه جوج ميطات ديال 45 دقيقة لكولّا واحد فيهوم. كولا ماطش كايمشي لوقت ديالو نيشان و ماكايحبسش فاش لبالون كايخرج برّا التيران. كاينة واحد 15 دقيقة ديال الراحة مابين لميطات.[28] لاربيط هو اللي رسميا كايشد لوقت ديال لماطش، و يقدر يزيد وقت على هاد الشواط كايعوّض بيه داكشي اللي ضاع فالتبديلات، لغلاط، لپيلانتيات، لوقت ديال لكوايريا اللي كاياكلو الدق. ف لوراق ديال لفيفا هاد لوقت كايتسمى "لوقت الزايد"[29][30]، ولايني يقدر يتسمى حتى "لوقت بلاصت الضايع". لمدة ديال هاد لوقت كايحددها لحكم بوحدو. لوقت بلاصت الضايع ماكايعوضش ݣاع لوقت اللي لكورة خارجة فيه.[31][32] لحكم هو نيت اللي كايحدد لافّان ديال لماطش. فلميطشان اللي فيهوم لحكم الرابع، كايهز واحد اللوحة كايبيّن فيها للعّابا و الجمهور شحال ديال الدقايق ناويين يزيدو. هاد لوقت كايقد لاربيط يزيد عليه مازال.[28] لقانون كايݣول باللي لمدة ديال الشوط كايتزاد ليها حتى كاتسالي لپيلانتي.[33]

تهراس التعادول

[بدل | بدل لكود]
لأغلبية ديال لمنافسات فيهوم تيرات الترجيح باش يتحدّد شكون ربح شي ماطش.

فلمنافسات ديال لبوطولات يقدّ لماطش يسالي بتعادول. ولايني ف لمنافسات اللي ضروري خص واحد لفرقة تّقصى كاينين طرقان باش كايهرّسو التعادول يلا كان؛ و يقدر ݣاع لماطش يتعاود. لماطش اللي كايساليو لميطات ديالو ب التعادول كايدوز للميطات الزايدين، و اللي هوما جوج ديال الشواط كولّا واحد فيهوم فيه ربع ساعة. يلا بقا التعادول، كايدوزو نيشان للپيلانتيات (ف لقواعد د اللعبة كايتسمّاو "التيرات من النقطة د لپيلانتي") باش يتحدد إينا فرقة غاتدوز للدور لماجي ديال التورنوة. لبيوتا اللي كايتماركاو ف لميطات الزايدين كايتحسبو على النتيجة د لافّان د لماطش، ولايني لپيلانتيات كايبينو هلّي شكون غايدوز للدور لماجي (لبيوتا ف پيلانتيات ماكايتحسبوش معا النتيجة د لافّان تاع لماطش).[3]

فلمنافسات و التورنوات اللي فيهوم ميطشان لألي والروتور، كولّا فرقة كاتضايف مرة وحدة، و لمجموع ديال لبيوتا من لميطشان بجوج كايحدد النتيجة د لافّان و كايبان إنا فرقة غاتدوز. يلا كان لمجموع متساوي، يمكن يتّحتاكم لقانون لبيوتا د الضيف باش يتّعرف شكون ربح. ف هاد لحالة لفرقة اللي ماركات بزاف و هي ضيفة عند لفرقة لخرة هي اللي كاتربح لماطش. يلا كان التعادول باقي، لميطات الزايدين، و من بعد لپيلانتيات هوما اللي كايهرّسو التعادول.[3]

كورة ملعوبة و برا التيران

[بدل | بدل لكود]
لكوايري كايدير ضربة حرة، و لكوايريا من لفرقة لخرة دايرين حيط باش يبلوكيو لكورة

ف لقواعد ديال اللعبة، لماطش و هو خدام عندو جوج د لحالات ديال اللعب: كورة ملعوبة وكورة برا التيران. من لبدية تاع كولّا فترة (ميطا) بالصفّارة حتال لافّان ديالها، لكورة كاتكون فلحالة لملعوبة من غير يلا كانت خارجة أولّا لاربيط حبس لقصارة. فاش لكورة كاتولّي ف لحالة ديال برّا التيران، كاتعاود لبدية د اللعب ب وحدة من هاد التمنية الطرقان، على حساب كيفاش خرجات. نفتارضو كاينة فرقة (أ) مهاجمة و فرقة (ب) مدافعة:

  • بدية ب الصفارة: من مورا شي بيت، أولّا ف لبدية ديال لميطا.[34]
  • توش: فاش لكورة كاتقيس خطوط التوش؛ كاتعطى للفرقة اللي لاعبة ضد هاديك اللي خرجات ليها لكورة.[35] يلا كوايري من لفرقة (أ) خرج لكورة، لكوايري من فرقة (ب) هو اللي كايلعب التوش.
  • كورنير: فاش كورة كاتخرج من خط لݣول بلا مايماركا بيت و يلا تقاست قبل ماتخرج من شي واحد ف لفرقة لمدافعة. كاتعطى للفرقة لمهاجمة.[36] يلا لفرقة (ب) خرجو لكورة من خط لݣول ديالهوم، لكوايري من لفرقة (أ) هو اللي كايقصّر الركنية.
  • ضربة مرمى: فاش كورة كاتخرج من خط لݣول بلا مايتماركا بيت و يلا تقاست قبل ماتخرج من شي واحد ف لفرقة لمهاجمة. كاتعطى للفرقة لمدافعة.[37] يلا لفرقة (أ) خرجو لكورة من خط لݣول ديال لفرقة (ب)، لحارس ديال لفرقة (ب) نيت هو اللي كايقصر ضربة مرمى.
  • ضربة غلط مانيشانش: كاتعطى للفرقة لخرة فأغلاط اللي ماكاتعطاش فيهوم كارطة، فلأغلاط التقنية، أولّا فاش اللعب كايتوݣف باش لحكم يخاصم على أولّا يضور فشي كوايري. صعيب بزاف لبيت يتماركا من ديك لبلاصة، من غير يلا قاسها كوايري آخور.[38] يلا شي كوايري من لفرقة (ب) دار شي غلط، لحكم كايعطي هاد الضربة للفرقة (أ) من بعيد.
  • ضربة غلط نيشان: كاتعطى للفرقة لخرة ضد فلفرقة اللي دارت غلط.[38] من هاد لبلاصة يمكن يتماركا بيت.
  • پيلانتي: كاتعطى للفرقة لخرة فلمينطاقة د پيلانتيات ضد فلفرقة اللي دارت غلط اللي نورمالمو كايتعاقب عليه بضربة غلط نيشان.[39] يلا لفرقة (ب) دارت غلط فلمينطاقة د پيلانتيات ديالهوم، كايتعطى پيلانتي للفرقة (أ).
  • كورة مليوحة: كاتعطى فاش لحكم كايوقّف اللعب على شي حاجة موهيمّة طرات، بحال فاش شي لعّاب كلا شي دقّة بلبيان، شي شخص براني دخل ف لماطش، أولّا لكورة مابقاتش صالحة.[34]

لأغلاط

[بدل | بدل لكود]

ف التيران

[بدل | بدل لكود]
لحكم هاز كارطة حمرا على كوايري ديال لمنتخاب د فينلاندا.

لغلط كايطرا فاش لكوايري كايدير غلطة كاينة ف لقواعد د اللعبة و كورة كاينة ف الداخل و ملعوبة. لحوايج اللي كايتعتابرو غلاط كاينين فلقانون 12. لهزان ديال لكورة ب ليد، الدفيع أولّا التعكال ديال شي كوايري من لفرقة لخرة هي ميتال على "غلط ب پيلانتي" و اللي كايتعاقب عليه إما بضربة غلط نيشان أولّا پيلانتي. كاينين غلاط خرين كايتعاقب اللي دارهوم بضربة غلط مانيشانش.[40]

لحكم يقدر يعاقب لكوايري (كارطة صفرا) أولّا يجري عليه من لماطش (كارطة حمرا). لكارطة التانية لشي لعّاب ف لماطش كاتعني نيشان حمرا و لخروج من التيران. لكوايري اللي شد صفرة كايتحسب "مقيّد"، حيتاش لحكم كايقيّد سميتو ف لكناش الرسمي ديالو. يلا اللعّاب خرج ب حمرا، ماكايتعوّض بواحد آخور و يقدر ݣاع مايدخلش لميطشان خرين. لأغلاط كايطراو مرة مرة، و التعريف ديال لحالات ديالهم واسع بزاف واخا لمخالفات اللي كايتحسبو عليها مقيدين ف لقواعد د اللعبة. زيدون، لمخالفة ديال "السلوك اللي ماشي رياضي" كاتستعمل باش تتعامل معا لحالات اللي كاتريّب الروح د اللعبة، واخّا ماكاينينش ف لمخالفات لمحددة. لحكم يقدر يهز حمرا ولّا صفرا على كوايري كاين ف التيران من لبدية، كوايري اللي دخل و لماطش خدّام أولّا كوايري اللي ݣالس ف ليحتياط. الناس اللي مالاعبينش بحال لمدرّيب و الطاقم التقني ماكاتّهزش عليهوم لكارطة، ولاكين يقدر لحكم يجري عليهوم إلا ماقدروش ينضابطو.[40]

لحكم يقدر يخلّي اللعب عوض مايوقّفو يلا كان هادشي غاينفع لفرقة اللي تّرتاكب ضدها لغلط. هادشي كايتسمى "لأولوية فلقصارة".[41] لحكم كايوقّف اللعب و كايعطي عقوبة للغلط اللي تدار يلا لأولوية ماتنفداتش "فتواني قلال". واخا لغلط ماتعاقبش عليه فوقت لأولوية، لحكم كايعاقب عليه ف أقرب وقيتة كايوقف فيها اللعب.[42] لقرارات اللي كايعطيها لحكم فوسط لماطش هي اللولة و اللخرة.[43] النتيجة ديال لماطش ماكاتّبدلش منين كايسالي واخّا يكون دليل باللي لغلط طرا بالصح (واخّا ف لقبول أولّا التحياد ديال لبيوتا).

برّا التيران

[بدل | بدل لكود]

لجامعات د كورة و لمنضّيمين ديال لمنافسات كايفرضو التربية ف بزاف ديال النواحي د اللعبة، زيادة على التنضيم اللي كايديروه، بحال فاش كايتعاملو معا التعليقات اللي كايعطيوها لكوايريا، لمدرّيبين و الطاقم التيقني و لإدارات د لفراقي، التدبير ديال لفلوس ف لفراقي، الضوپاج، لغش ف لعمر و حتى لبيع د لميطشان. بزاف ديال لمنافسات كاتحبس لكوايريا اللي خداو حمرا و ماكايحضروش لواحد لعدد ديال لميطشان.[44] ف بعض لحالات ديال لبسالة فالتيران، يلا تعتابرو خطيرين بزاف (بحال لعنصرية)، لجامعات كاتفرض عقوبات كبر من داكشي اللي كاياخد داك اللي خرج ب كارطة حمرا. بعض لجامعات كاتخلّي لفراقي تدير ستيئناف على لقرارات د لحبيس ديال لكوايريا ديالها يلا حسّو باللي لحكم كان ضالمهوم فحقهوم.[44]

هاد النوع ديال لعقوبات تقدر تهبط على شي وحدين أولّا لفرقة كاملة ݣاع. لعقوبات تقدر تكون خطيّات، تحياد د النقاط (ف لبوطولات)، أولّا ݣاع يتّرّا عليهوم من لمنافسات. فلميتال، ليتيحاد د كورة د النݣليز كايحيّد 12 نقطة لكولّا فرقة دخلات لإدارة[45] (لإدارة فالنݣليز كاتدار للفراقي اللي ماقدراتش تخلص لكريديات اللي عليها، و كاتبقى تحت لجنة اللي كاتسيّر كولشي فلفرقة من غير التدريب ديال اللعّابا و لختيار ديال التشكيلة).[46] من لعقوبات لخرين اللي كاتعطيهوم لجامعات ولعصبات هوما فاش كاتّربّح واحد لفرقة حيتاش ديك اللي غاتقصّر معاها ماحضراتش للماطش.

التنضيم

[بدل | بدل لكود]

لمنضّامة الرسمية اللي كاتنضّم و كاتجيري الرياضة د كورة هي ليتيحاد الدولي د كورة (FIFA). لمقر ديالها كاين فمدينة زوريخ فسويسرا. ستة ديال لمنضّمات لإقليمية مرتابطة ب لفيفا هي اللي كاتسيّر لكورة فلقارّات:[47]

لمنافسات اللي كاينين فلعالام

[بدل | بدل لكود]
كاس لعالم هي أكبر تورنوة دولية ف كورة و أكتر حدت رياضي كايتشاف ف لعالام.

لمنافسات د لعالام ف كورة فيهوم جوج د لݣناس: لمنافسات اللي فيهوم مونتخبات كايمتّلو لبلاد، و منافسات اللي فيهوم فراقي من بلدان و بوطولات محلية مختالفين. لكورة د لعالام بلا تأهول كايتقصد بيها الشكل اللول ديال لمنافسات. ف لحالة ديال لمشاركات الدولية تاوع لفراقي، اللي كيخلّيها تكون دولية هي لبلاد لأصلية د لفرقة ماشي لجنسيات ديال لكوايريا.

أكبر تورنوة دولية ديال لكورة ف لعالام هي كاس لعالم اللي كاتنضّمو لفيفا. كاس لعالام كاتكون مرّة كولّا ربع سنين من 1930 (من غير 1942 و1946 اللي تلغاو بسباب لحرب لعالمية التانية). تقريبا مابين 190 و 200 دولة كاتنافس على بلاصة ف لفّينال تحت لمضلّة ديال لكونفيديراليات تاوع لقارّات. لأدوار د لفينال كايدوزو كولّا ربع سنين ف 4 د السيمانات وكاتقصّر فيهوم 32 بلاد (من كاس لعالم 2026 غادي تولي 48 بلاد).[48] هادي هي لمنافسة الراقية مابين لمنافسات ديال كورة فلعالام كامل. لمجموع لمراكم ديال لمشاهدات د لميطشان كاملين فكاس لعالم 2006 وصل ل 26 مليار و 290 مليون و شي 715 مليون تفرجو ف لفّينال. 715 مليون هي تقريبا واحد من كولّا تسعود دلبشري فلأرض.[49][50][51][52] من مورا كاس لعالم، كاينين لبوطولات د لقارّات، و اللي كاتنضّمهوم لكونفيديراليات د كورة مابين لمونتخابات. ف إفريقيا كاينة كاس إفريقيا، و و ف ؤروپا كاينة كاس أوروپا.

لبوطولات لمحلية

[بدل | بدل لكود]

لجامعات د كورة اللي شادّين هاد لمجال كايخدّمو السيستيم د لبوطولة ف لموسم لمحلي، و اللي فيه غاليبا بزاف ديال لقسام، و اللي فيهوم لفراقي كايربحو النقاط على حساب النتائج د لميطشان. لفراقي كايتستفو ف طابلويات ب الترتيب ديال النوقاط اللي جمعو فاش كايكونو ضيوف و مضايفين، ف سيستيم كايتسمى تورنوة روبين. ف اللافان ديال لموسم، لفرقة اللولة ف الترتيب كاتدّي لبوطولة. واحد أولّا شوية من لفراقي د لفوق يقدّو يطلعو لقيسم كبر ف النيڤو، ؤ وحدة أولّا شوية من لفراقي ديال لتحت د الطابلو كايهبطو لقيسم قلّ فالنيڤو.[53]

لفراقي اللي كايساليو لموسم ف لفوق ديال الترتيب يقدرو يدوزو ل بوطولة د لفراقي اللي هي دولية ف لموسم اللي تابع. لأغلبية ديال لبلدان كاتزيد على السيستيم ديال لكورة تورنوة أولّا كتر ديال لكاس مبازية على السيستيم د خروج لخاسر. فلمغريب، لبوطولات اللي كاينين عند الرجال ب لقسام هوما لقيسم اللول ؤ التاني ؤ التالت ؤ الرابع ؤ لخامس، زيادة على لبوطولات د لعصبات تاع لجيهات اللي كاتمشي حتال لقيسم التامن. التورنوة د لكاس اللي مبازية على السيستيم د خروج لخاسر ف لمغريب هي كاس لعرش. أول بوطولة حتيرافية ديال لعيالات هي لبوطولا د 2020-21.

لقسام اللولين ديال شي بلدان كايكون فيهوم كوايريا اللي كايتخلّصو بلبيان، ف لبلدان الصغار و لأغلبية ديال لفراقي د لعيالات، لكوايريا كايقدرو يخدمو ف بلايص خرين ولّا كيكونو غير هواة كاتعجبهوم لقصارة د كورة.

عيون لكلام

[بدل | بدل لكود]
  1. ^ "In a globalised world, the football World Cup is a force for good". The Conversation. 10 يوليوز 2014. مأرشيڤي من لأصل ف 2023-03-06. تطّالع عليه ب تاريخ 11 يوليوز 2014.
  2. ^ "السيط د لفيفا". مأرشيڤي من لأصل ف 2023-06-30. تطّالع عليه ب تاريخ 2017-06-08.
  3. ^ a b c "Procedures to determine the winner of a match or home-and-away" (PDF). Laws of the Game 2010/2011. FIFA. pp. 51–52. تطّالع عليه ب تاريخ 4 مارس 2011.
  4. ^ "2002 FIFA World Cup TV Coverage". FIFA. 5 دجنبر 2006. مأرشيڤي من لأصل ف 14 مارس 2005. تطّالع عليه ب تاريخ 6 يناير 2008.
  5. ^ Glass، Alana (21 أكتوبر 2019). "FIFA Women's World Cup Breaks Viewership Records". Forbes. مأرشيڤي من لأصل ف 3 ماي 2023. تطّالع عليه ب تاريخ 24 أبريل 2021.
  6. ^ "Champions League final tops Super Bowl for TV market". BBC Sport. British Broadcasting Corporation. 31 يناير 2010. مأرشيڤي من لأصل ف 2 فبراير 2023. تطّالع عليه ب تاريخ 25 فبراير 2010.
  7. ^ "best football leagues in Africa 2021 statistically ranked". 3 ماي 2021. مأرشيڤي من لأصل ف 2023-05-05. تطّالع عليه ب تاريخ 27 يوليوز 2021.
  8. ^ "Top best football leagues in the world statistically ranked in 2021". 7 أبريل 2021. مأرشيڤي من لأصل ف 2021-10-16. تطّالع عليه ب تاريخ 27 يوليوز 2021.
  9. ^ "Laws of the Game". FIFA. مأرشيڤي من لأصل ف 1 شتنبر 2007. تطّالع عليه ب تاريخ 2 شتنبر 2007.
  10. ^ "Offside and handball laws under Ifab review along with concussion substitutions". BBC Sport. 29 فبراير 2020. مأرشيڤي من لأصل ف 16 يناير 2023. تطّالع عليه ب تاريخ 3 دجنبر 2020.
  11. ^ Reilly، Thomas؛ Williams، A. Mark, إيديتورات (2005). Science and Soccer (طبعة Second). London: Routledge. ص. 235. ردمك 978-0-415-26231-6.
  12. ^ "Laws of the game (Law 3–Number of Players)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 24 شتنبر 2007.
  13. ^ "Health Advice for Boys". Strikingeagles.tripod.com. مأرشيڤي من لأصل ف 2023-01-16. تطّالع عليه ب تاريخ 24 شتنبر 2013.
  14. ^ "Soccer Position Paper" (PDF). مأرشيڤي (PDF) من لأصل ف 2023-03-27. تطّالع عليه ب تاريخ 24 شتنبر 2013.
  15. ^ "Football's biggest headache". Marca. Spain. 12 مارس 2017. مأرشيڤي من لأصل ف 21 أبريل 2023. تطّالع عليه ب تاريخ 17 ماي 2018.
  16. ^ "Laws of the game (Law 4–Players' Equipment)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 24 شتنبر 2007.
  17. ^ "Laws of the game (Law 3–Substitution procedure)". FIFA. مأرشيڤي من لأصل ف 11 أكتوبر 2007. تطّالع عليه ب تاريخ 24 شتنبر 2007.
  18. ^ "Law 3 – The Number of Players" (PDF). Laws of the Game 2010/2011. FIFA. ص. 62. تطّالع عليه ب تاريخ 4 مارس 2011.
  19. ^ "Laws of the game (Law 5 – The referee)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 24 شتنبر 2007.
  20. ^ "Video Assistant Referees (VARs) Experiment – Protocol (Summary)". International Football Association Board. 26 أبريل 2017. مأرشيڤي من لأصل (PDF) ف 27 أبريل 2017. تطّالع عليه ب تاريخ 26 أبريل 2017.
  21. ^ "Laws of the Game 2013/2014" (PDF). FIFA. مأرشيڤي (PDF) من لأصل ف 2020-06-03. تطّالع عليه ب تاريخ 2021-07-28.
  22. ^ "Football manufacturing". FIFA quality program. FIFA. مأرشيڤي من لأصل ف 4 شتنبر 2016. تطّالع عليه ب تاريخ 3 يوليوز 2014.
  23. ^ "Goal-line technology put on ice". FIFA. 8 مارس 2008. مأرشيڤي من لأصل ف 22 مارس 2019. تطّالع عليه ب تاريخ 19 يونيو 2010.
  24. ^ "FIFA Amendments to the Laws of the Game, 2008" (PDF). FIFA. مأرشيڤي (PDF) من لأصل ف 2020-06-03. تطّالع عليه ب تاريخ 4 مارس 2011.
  25. ^ "Laws of the game (Law 1.1 – The field of play)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 24 شتنبر 2007.
  26. ^ "Laws of the game (Law 1.4 – The Field of play)". FIFA. مأرشيڤي من لأصل ف 11 أكتوبر 2007. تطّالع عليه ب تاريخ 24 شتنبر 2007.
  27. ^ "Laws of the game (Law 1.3 – The field of play)". FIFA. مأرشيڤي من لأصل ف 11 أكتوبر 2007. تطّالع عليه ب تاريخ 24 شتنبر 2007.
  28. ^ a b "Laws of the game (Law 7.2 – The duration of the match)". FIFA. مأرشيڤي من لأصل ف 11 أكتوبر 2007. تطّالع عليه ب تاريخ 24 شتنبر 2007.
  29. ^ "Interpretation of the Laws of the Game – Law 07" (PDF). FIFA. مأرشيڤي من لأصل (PDF) ف 21 يوليوز 2012.
  30. ^ "Law 7 – The Duration of the Match" (PDF). FIFA. مأرشيڤي (PDF) من لأصل ف 2020-06-03. تطّالع عليه ب تاريخ 2021-07-28.
  31. ^ "Football reforms: Scrapping 45-minute half to be debated at Ifab". BBC Sport. 18 يونيو 2017. مأرشيڤي من لأصل ف 16 يناير 2023. تطّالع عليه ب تاريخ 7 مارس 2018.
  32. ^ "We Timed Every Game. World Cup Stoppage Time Is Wildly Inaccurate". مأرشيڤي من لأصل ف 2020-11-12. تطّالع عليه ب تاريخ 2021-07-28.
  33. ^ "Laws of the game (Law 7.3 – The duration of the match)". FIFA. مأرشيڤي من لأصل ف 19 أكتوبر 2007. تطّالع عليه ب تاريخ 3 مارس 2010.
  34. ^ a b "Laws of the game (Law 8)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 24 شتنبر 2007.
  35. ^ "Laws of the game (Law 15 – The Throw-in)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 14 أكتوبر 2007.
  36. ^ "Laws of the game (Law 17 – The Corner Kick)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 14 أكتوبر 2007.
  37. ^ "Laws of the game (Law 16 – The Goal Kick)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 14 أكتوبر 2007.
  38. ^ a b "Laws of the game (Law 13 – Free Kicks)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 14 أكتوبر 2007.
  39. ^ "Laws of the game (Law 14 – The Penalty Kick)". FIFA. مأرشيڤي من لأصل ف 13 شتنبر 2007. تطّالع عليه ب تاريخ 14 أكتوبر 2007.
  40. ^ a b "Laws of the game (Law 12)". FIFA. مأرشيڤي من لأصل ف 11 أكتوبر 2007. تطّالع عليه ب تاريخ 24 شتنبر 2007.
  41. ^ "Referee's signals: advantage". BBC Sport. 14 شتنبر 2005. مأرشيڤي من لأصل ف 16 يناير 2023. تطّالع عليه ب تاريخ 4 مارس 2011.
  42. ^ "Law 5: The Referee: Advantage" (PDF). Laws of the Game 2010/2011. FIFA. ص. 66. تطّالع عليه ب تاريخ 4 مارس 2011.
  43. ^ "Law 5: The Referee" (PDF). The Laws of the Game. FIFA. ص. 24. تطّالع عليه ب تاريخ 5 ماي 2012.
  44. ^ a b "DISCIPLINARY PROCEDURES". The Football Association. مأرشيڤي من لأصل ف 2022-09-22. تطّالع عليه ب تاريخ 1 فبراير 2016.
  45. ^ "Football League administration penalty raised to 12 points". BBC Sport. 5 يونيو 2015. مأرشيڤي من لأصل ف 16 يناير 2023. تطّالع عليه ب تاريخ 17 ماي 2018.
  46. ^ Farquhar، Gordon (20 مارس 2008). "Football administration". BBC Sport. مأرشيڤي من لأصل ف 17 فبراير 2009. تطّالع عليه ب تاريخ 26 فبراير 2010.
  47. ^ "Confederations". FIFA. مأرشيڤي من لأصل ف 2020-07-04. تطّالع عليه ب تاريخ 4 مارس 2011.
  48. ^ "How the FIFA World Cup 26™ will work with 48 teams". 2023-03-01. تطّالع عليه ب تاريخ 2024-10-15.
  49. ^ "2006 FIFA World Cup broadcast wider, longer and farther than ever before". FIFA. 6 فبراير 2007. مأرشيڤي من لأصل ف 2015-03-23. تطّالع عليه ب تاريخ 11 أكتوبر 2009.
  50. ^ Tom Dunmore, Historical Dictionary of Soccer, p. 235, quote "The World Cup is now the most-watched sporting event in the world on television, above even the Olympic Games."
  51. ^ Stephen Dobson and John Goddard, The Economics of Football, p. 407, quote "The World Cup is the most widely viewed sporting event in the world: the estimated cumulative television audience for the 2006 World Cup in Germany was 26.2 billion, an average of 409 million viewers per match."
  52. ^ Glenn M. Wong, The Comprehensive Guide to Careers in Sports, p. 144, quote "The World Cup is the most-watched sporting event in the world. In 2006, more than 30 billion viewers in 214 countries watched the World Cup on television, and more than 3.3 million spectators attended the 64 matches of the tournament."
  53. ^ Fort، Rodney (September 2000). "European and North American Sports Differences(?)". Scottish Journal of Political Economy. 47 (4): 431–55. doi:10.1111/1467-9485.00172.
Wikimedia Commons تقدر تزيد شوف بزاف د تّصاور و لمعلومات ديال Association football ف ويكيميديا كومنز.
مرجّعة من "https://ary.wikipedia.org/w/index.php?title=كورة_(سپور)&oldid=377279"