پيلانتي (كورة)

من ويكيپيديا
اذهب إلى التنقل اذهب إلى البحث
لكوايري لمهاجم (هنايا لابس كيطمة حمرة) نفّد پيلانتي على لحارس (لابس لبيض). لكوايري حط لكورة ف النقطة د پيلانتي وماتيراها حتى صفر لحكم.

پيلانتي أولّا پيل. (بلعربية: ركلة جزاء، بالنݣليزية: Penalty kick) هي طريقة ديال لمعاودة د اللعب فالرياضة د كورة، واللي فيها مسموح للكوايري يتيري لبالون على لݣول ديال لفرقة لوخرة اللي كايعس عليه لحارس بّوحدو. كاتعطى فاش لعّاب كايدير غلط اللي نورمالمو كايتعاقب بضربة غلط نيشان فلمينطاقة د پيلانتيات ديالهوم. كاتّحط لكورة اللي غاتّيرا فالنقطة د پيلانتي اللي بعيدة 11 ميترو على خط لݣول وجاية فنص الطريق مابين خطوط التوش بجوج.

فلواقيع، پيلانتي كاتجيب بيوتة كتر من فاش ماكاتجيبهومش، حتى ضد لحراس اللي عندهوم التجريبة. هادشي كايعني باللي لقرار ديال پيلانتي هو قرار اللي يقدر يقلب لماطش، خصوصا إلا كانو لبيوتة اللي تسجلو قلال أولّا ماكاينينش ݣاع.

نفس التيرات كايتدارو فتيرات الترجيح فبعض لبوطولات والتورنوايات باش يبان شكون اللي ربح واحد لماطش اللي لميطات ديالو سالاو بالتعادول. هاد التيرات كايتحكمو فيهوم قواعد اللي شوية مختالفين على لقواعد د پيلانتي.

لحالات فاش كاتّعطى[بدل | بدل لكود]

التعكال د فلمينطاقة د پيلانتيات كايجيب على لفرقة لمدافعة پيلانتي.

كاتّعطى پيلانتي فاش هاد لغلاط كايديرهوم شي كوايري فلمينطاقة د پيلانتيات ديالهوم ولكورة ملعوبة (لكورة خاصها تكون ملعوبة فلوقت اللي تدار فيه لغلط، ولاكين ماخصهاش بالضرورة تكون وسط لمينطاقة د پيلانتيات فديك لوقيتة).[1][2]

  • كورة مقيوسة بليد (من غير لحارس وف لمينطاقة د پيلانتيات ديالو)[3]
  • لكوايري اللي دار هاد لفعال ضد لعّاب من لفرقة لوخرة وعتابرهوم لحكم مهوّرين، معيّقين أولّا مجهدين:[3]
    • النقيز على
    • الركيل أولّا لمحاولات د الركيل
    • الدفيع
    • الضريب أوّلا لمحاولات د الضريب
    • التعكال
    • لغفيل أولّا لمحاولات د لغفيل
  • الشدّان ديال كوايري آخور[4]
  • لحبيس ديال كوايري آخور بلقيوس[4]
  • لعضّان أولّا الدفيل على واحد آخور[4]
  • لملاوحة ديال شي حاجة على لكورة أولا لكوايرية أولّا لحكم ديال لماطش، أولا لقيسان ديال لكورة بشي حاجة فليد[4]
  • أي تعدّو ولكورة ملعوبة على كوايري من لفرقة، كوايري بديل داخل أوّلا خارج، كوايري مترّي عليه، مسؤول ديال لفرقة أولّا حكم ديال لماطش[5]
  • كوايري اللي خاصو ليدن ديال لحكم باش يعاود يدخل للتيران، أولا كوايري بديل داخل أوّلا خارج، كوايري مترّي عليه، مسؤول ديال لفرقة أولّا حكم ديال لفرقة دار وحدة من هادو:
    • يدخل للتيران بلا ليدن د لحكم، ويقطع اللعب[6]
    • داخل للتيران بلا ليدن د لحكم، ولفرقة ديال داك اللي دخل ماركاو بيت (لبيت كايتحيّد)[7]
    • كايشيّر شي حاجة للتيران، وديك لحاجة كاتقطع اللعب، كوايري من لفرقة لخرة أولّا حكم.[8]

الطريقة[بدل | بدل لكود]

تمتيل مرسوم ديال لمينطاقة د پيلانتيات.

لكورة كاتحط فالنقطة د پيلانتي، وخا يكون لغلط اللي جاب لپيلانتي طرا فقنت آخور ديال لمينطاقة د پيلانتيات. لحكم حاصّو يعرف لكوايري اللي غادي يدير پيلانتي. هاد لكوايري ولحارس ديال لفرقة لوخرة هوما بّوحدهوم اللي خاصهوم يكونو ف لمينطاقة د پيلانتيات. ݣاع لكوايرية خاصهوم يكونو فالتيران برّا هاد لمينطاقة، مورا النقطة د پيلانتي بشي 9.15 ميترو (هاد لمسافة كايحددها لقوس د پيلانتي).[9]

لحارس عندو لحق باش يتحرك قبل ماتكون لكورة ملعوبة، ولاكين خاص يبقى فوق خط لݣول موالي للكوايري مول التير، بلا مايقيس الرجلين ولعاريضة د لݣول والشبكة. فاش كاتحرّك كورة خاص خاص طرف ديال واحد لݣدم بلقليلة تكون كاتقيس خط لݣول. لحكم لمعاون اللي مسؤول على خط لݣول ديال لبلاصة اللي تدارت فيها پيلانتي كايمشي للتقاطع مابين خط لݣول ولمينطاقة د پيلانتيات، وكايعاون لحكم ياك مايكون شي غلط و/أولّا واش تماركا بيت.

لحكم كايصفّر باش يبيّن باللي مومكين پيلانتي تبدا. لكوايري اللي غايشوتي يقدر يبدا يدير حركات فيهوم لقوالب والتحريميات فاش كايجري لجيهة لكورة، ولاكين ماعندوش لحق إلا وصل لعندها يديرهوم باقي. لكورة خاصها تكون مزݣّية قبل مايكون التير، والتير هادا خاص يكون للقدّام. لكورة كاتكون ملعوبة فاش كاتكون تّيرات وكاتّحرك، وفهاد لوقت لكوايرية لوخرين يقدرو يدخلو للقوس ولمينطاقة د پيلانتي. اللعاب اللي تيرا لكورة ماعندوش لحق يعاود يقيسها حتى يكون قاسها كوايري آخور من وحدة من لفراقي بجوج أولا لكورة تكون خرجات (واخّا يكون تماركا ݣول).

لغلاط فالتنفيد[بدل | بدل لكود]

كوايري كايماركي پيلانتي.

إلا طرا غلط فالتطبيق ديال لقواعد د اللعبة فپيلانتي، واللي هي فلغاليب الدخول للمينطاقة د پيلانتي، لحكم كايشوف واش دخلات لكورة للݣول وأشمن فرقة دارت لغلط.

النتيجة ديال التير ماكاينش غلط غلط من لفرقة لمهاجمة غلط من لفرقة لمدافعة غلط من لفراقي بجوج
كاتدخل لكورة للݣول بيت معاودة بيت معاودة
كاتخرج من التيران ضربة مرمى ضربة مرمى معاودة معاودة
كاتضرب فلحدود د لݣول/لحارس وكاترجع اللعب كايكمل ضربة غلط مانيشانش معاودة معاودة
شدها لحارس اللعب كايكمل اللعب كايكمل معاودة معاودة
خرجها لحارس برّا التيران ركنية ضربة غلط مانيشانش معاودة معاودة

إلا لفرقة لمهاجمة (مولات پيلانتي) دارت واحد من هاد لغلاط، كاتّعطى ضربة غلط مانيشانش للفرقة لمدافعة واخا يطرا اللي يطرا فالتير د پيلانتي:

  • كوايري آخور من نفس لفرقة ومن غير داك اللي عرّف راسو للحكم هو اللي ماركا لكورة (كاتعطى صفرة ليه)
  • لكوايري كايدير تحريميات وقوالب من مورا ما جرا عند لكورة قبل التير
  • لكوايري مازادش للقدّام
  • لكوايري قاس لكورة جوج مرّات قبل مايقيسها كوايري آخور (داخل فيها إلا رجعات من تير لجيهة لبارّة والرجلين)

لحكم يقدر يعطى صفرة للكوايري اللي كايعاود هاد لغلاط فوقت پيلانتي. ݣاع لغلاط اللي كايطراو قبل من پيلانتي كايتعامل معاهوم لحكم هاكّا، واخّا ماكايهمش فين تدار لغلط.

كاتعاود پيلانتي إلا لكورة قاست شي حاجة برّانية (متلا شي حاجة من برّا التيران فلوسط ديالو) وهي كاتزيد لقدّام من التير.

عيون لكلام[بدل | بدل لكود]

  1. ^ Laws of the Game 2019/20, passim; see esp. p. 103
  2. ^ Laws of the Game 2019/20, p. 87
  3. ^ a b Laws of the Game 2019/20, p. 103
  4. ^ a b c d Laws of the Game 2019/20, p. 104
  5. ^ Laws of the Game 2019/20, p. 114
  6. ^ Laws of the Game 2019/20, p. 53
  7. ^ Laws of the Game 2019/20, p. 54
  8. ^ Laws of the Game 2019/20, p. 115
  9. ^ "Laws of the Game 2019/20" (PDF). ص. 38.
Wikimedia Commons تقدر تزيد شوف بزاف د صور و معلومات ديال Penalty kick (association football) ف ويكيميديا كومنز.
Wikimedia Commons تقدر تزيد شوف بزاف د صور و معلومات ديال Penalty kick (association football) ف ويكيميديا كومنز.