لحكم لمعاون بلڤيديو
لحكم لمعاون بلڤيديو أولّا لڤار (بالنݣليزية: Video assistant referee ولّا VAR) هو حكم فلماطش ديال كورة كايعاون لحكم د الساحة بلكليپات ديال لڤيديو وصنّاطات ديال لهضرة. هاد لحكم كايعاون يطيّح لعدد ديال لغلاط لبشريين اللي كايديرو تأتير كبير على النتيجة د لميطشان.
تكتب لڤار فلقواعد د اللعبة ف 2018 من مورا بزاف ديال التجاريب فبوطولات كبار.[1] السيستيم ديال لڤار كايعاون باش يتصححو لغلاط "لباينين ولواضحين" و"لحوادت اللي تفلّتو فالتيران"[2] بلفلسافة ديال "تدخّول قليل ومنفعة كبيرة".[3][4]
كاينين ربعة ديال لحالات اللي لحكم فيهوم كايرجع للحكم لمعاون بلڤيديو:[2]
- بيت/ماشي بيت: لفرقة لمهاجمة دارت غلط، كورة برا التيران، كورة دخلات للݣول، تسلول، كورة تقاست بليد، غلاط ودفيع فپيلانتي.
- پيلانتي/ماشي پيلانتي: لفرقة لمهاجمة دارت غلط، كورة برا التيران، بلاصة لغلط، پيلانتي تعطات بلغلط، غلط ماتعطاتش عليه پيلانتي.
- كارطة حمرة نيشان: النكران ديال فرصة تاع التسجيل، غلاط خايبين فاللعب، سلوك خايب/عضّان/دفال، هضرة ولّا حركات مهينة/خايبة/تحرش. ݣاع لحمرات اللي كايتعطاو ديريكت كايراجعهوم لڤار.
- غلط فلهوية ديال اللي تعطاتو كارطة حمرة/صفرة.
لفرقة ديال لڤار اللي كاينة فبيت لڤار (VOR) كاتأكد من أي قرار ديال لحكم متعلّق بوحدة من دوك الربعة دلحالات اللي كاينين لفوق. إلا مالقاش لڤار شي غلط كايدوز كولشي بيخير وهاد التأكود كايتسمى "تأكود ساكت". بعض لمرات إلا لڤار بان ليه باللي لحكم دار شي غلط، كايسرسر ليه فودنيه وكايعلمو باللي شي حاجة طارية. لحكم كايسمع للنصيحة (كايوقّف اللعب إلا كانت لكورة ملعوبة) وكايدير وحدة من هاد التلاتة:[5]
- كايبدّل لقرار ديالو على النصيحة د لڤار
- كايمشي يشوف اللقطة د لڤيديو فالتلفازة د التيران
- كايميّك على النصيحة د لڤار.
لقرار اللخر فأي حاجة طرات فالتيران كايبقى ديال لحكم بوحدو.[6]
كاينين بزاف ديال لعقوبات فلقواعد د اللعبة اللي كاتعطى فحق أي واحد دار شي حاجة ضد لڤار. كاتعطى كارطة صفرة لكوايرية ولمسؤولين د لفرقة إلا دارو ليشارة ديال لڤار (ليشارة ديال التلفازة) بيديهوم بزاف دلمرّات. كاتعطى صفرة لأي واحد مشى للبلاصة اللي محطوطة فيها التلفازة د لڤار. الدخول للبيت د لڤار كايخرّج مول لفعلة من التيران.
لحكم لمعاون د لڤار (AVAR) هو حكم اللي كايعاون لڤار فلبيت ديالو. لمسؤوليات ديال لAVAR هي يتفرج فلماطش مباشر فاش لڤار كايدير مراجعة لشي لقطة ديال لڤيديو، يسجل لحوايج اللي كايستاهلو مراجعة، ويعطي النتيجة ديال شي مراجعة للناس اللي مدوزين لماطش فلقنوات د التلفازة.[2]
تنتاقد التخدام ديال لڤار فكاس لكونفيديراليات د 2017 من مورا بزاف ديال التدخولات اللي دارهوم. بزاف ديال الناس تّاهمو لڤار باللي "زاد دوّخ الناس كتر مما وضّح ليهوم لومور".[7][8]
أشهر لقطة تعرفات من عند شي كوايري نتاقد لڤار فالتيران هي لفعلة اللي دار لكوايري لمغريبي نور الدين أمرابط فكاس لعالم د 2018. من مورا ماحسب لحكم لبيت التاني للبرطقيز بسباب نصيحة ديال لڤار، تشارشا نور الدين ومشا لأقرب كاميرا، دار ليشارة لڤار وهو كايݣول: "VAR, it's bullshit" (نݣليزية: ڤار، إتس بولشيت، هاد لڤار راه شي حاجة تافهة). لڤار كان حرّم على لمونتخاب د لمغريب ربحة تاريخية على لمونتخاب دلبرتقيز.[9]
واحد لحاجة خرة تنتاقد عليها لڤار فكاس لعالم 2018 هي فاش كايطوّل لميطشان بالتدخولات ديالو. لمعدّال ديال لمدة دالتدخول دلڤار هي 80 تانية كولّا مرة.[10] لعدد ديال پيلانتيات اللي تزاد فالتورنوة كان بسباب لڤار اللي كايحاسب على لغلاط، واللي كون ماشي هو ݣاع دوك لغلاط ماتعطات ليهوم لعقوبة اللي يستاحقّو.
فلمغريب مشات لينتيقادات ديال لڤار من ناحية ديال لفلوس. بزاف نتاقدو التمن لغالي ديالها، واللي كايوصل ل 12 مليون درهم فلعام (50 آلف درهم للماطش و400 آلف درهم للدورة) فبوطولا 1 بوحدها. بلمقارنة معا هادشي، لمينحة اللي كاتعطى للبطل ديال بوطولا 1 مافايتاش 3 دلمليون درهم، أولّا الربع ديال شحال باش كاتخدم لڤار.[11] نتيقاد آخور جا للڤار من لجمهور وحتى لفراقي بسباب ليستيعمال وليدارة لخايبة دلميطشان. فبوطولا 1 د 2019-20، شي حكام خدّمو لڤار كتر من لقياس، وفراقي ݣالو باللي ضلمهوم فحقهوم، وفراقي بحال مولودية وجدة والرجاء البيضاوي مشاو تشكاو للجامعة على هادشي.[12]
- ↑ "Historic step for greater fairness in football". International Football Association Board. 3 مارس 2018. Archived from the original on 30 يناير 2023. Retrieved 3 مارس 2018.
- 1 2 3 "video assistant referees (vars) Protocol". International Football Association Board. 26 أبريل 2017. Archived from the original on 2019-05-08. Retrieved 26 أبريل 2017.
- ↑ Staff writers (20 يونيو 2018). "World Cup 2018: VAR helps tournament reach 10 penalties – so is it working?". BBC Sport. Archived from the original on 23 ماي 2023.
- ↑ Staff, S. V. G. "EVS Xeebra Replay System Facilitates VAR Implementation for Copa do Brasil Tournament". Sports Video Group. Archived from the original on 2023-05-23. Retrieved 2021-09-01.
- ↑ "VIDEO ASSISTANT REFEREES (VAR)". FIFA. 22 يوليوز 2021. Archived from the original on 2021-08-15. Retrieved 22 يوليوز 2021.
- ↑ "VAR at the 2018 FIFA World Cup™". FIFA. 22 يوليوز 2021. Archived from the original on 2021-08-05. Retrieved 22 يوليوز 2021.
- ↑ McNulty, Phil (2 يوليوز 2017). "Confederations Cup: Video assistant referee system 'a shambles'". BBC Sport. Archived from the original on 23 ماي 2023. Retrieved 9 مارس 2018.
- ↑ Ogden, Phil (2 يوليوز 2017). "VAR creates as much confusion as clarity in Confederations Cup final". BT Sport ESPN. ESPN, Inc. and BT Group. Archived from the original on 13 ماي 2023. Retrieved 9 مارس 2018.
- ↑ Morgan, Jessica (26 يونيو 2018). "World Cup 2018: 'VAR is bull***t', says Morocco's Nordin Amrabat as he fumes after Portugal decision". independent.co.uk. Archived from the original on 26 يناير 2023. Retrieved 1 شتنبر 2021.
- ↑ Sengupta, Ayon (2 يوليوز 2018). "Mixed response for VAR". The Hindu (ب Indian English). Archived from the original on 23 ماي 2023. Retrieved 4 يوليوز 2018.
- ↑ حمزة بوملال (24 شتنبر 2019). "مليار و200 مليون تكلفة "الفار" لموسم واحد بالبطولة الإحترافية". lesiteinfo.com. Archived from the original on 12 غشت 2022. Retrieved 1 شتنبر 2021.
- ↑ "حكم الفيديو يثير أزمة وجدلا في الدوري المغربي". alarab.co.uk. 18 غشت 2020. Archived from the original on 1 شتنبر 2021. Retrieved 1 شتنبر 2021.
 |
ويكيميديا كومنز عندا تصاور و معلومات على لحكم لمعاون بلڤيديو. |
.svg)
|
ويكيميديا كومنز عندا تصاور و معلومات على لحكم لمعاون بلڤيديو. |