حارس (كورة)

من ويكيپيديا
اذهب إلى التنقل اذهب إلى البحث
حارس باغي يشد لكورة

لحارس أولّا لݣارديان (بالنݣليزية: Goalkeeper) فماطش ديال لكورة هو كوايري اللي عندو بلاصة موهيمة فالتيران، وهي بلاصة ختيصاصية بزاف. لحارس هو اللي كايعسّ على لݣول ديال فرقتو وماكايخلّيش لفرقة لوخرة تماركي بيت عليها. هادشي كايكون فاش لحارس كايتبع الطريق اللي شادّها لبالون وإما كايشدو أولّا كايدفعو لبلاصة خرة بعيد على لݣول. لحارس عندو لحق يخدّم يديه غير فلمينطاقة د پيلانتيات اللي قبالة لݣول ديالو، الشي اللي كايخلّيه بوحدو (من غير لكوايرية فالتوش) اللي عندو هاد لحق. لحارس هو اللي كاتكون عندو بلاصتو بوحدو فلفرقة، وهادشي كايبان حتى فلكيطمة ديالو اللي لوانها ماكايشبهوش للوان ديال اللعّابة لوخرين.

قانون التير اللوراني كايمنع لحارس باش يشد لكورة اللي جاتو من عند شي صاحبو فلقرقة بيدّيه. لحارس غاليبا كاينفّد ضربة مرمى، وكايݣيّد الدفايعية فاش كاتكون ضربة غلط، كورنير أولّا لماركاج. لحارس عندو دور موهيم فالتݣياد ديال الستراتيجية والطاكتيك اللي واخداهوم لفرقة، حيتاش عندو شوفة مزيانة على التيران وكيفاش غادية فرقتو فلماطش.

لحارس كايتريني بوحدو بعيد على لفرقة ديالو وكايدرّبو مدريب ديال لحرّاس اللي كاتكون خدمتو ختيصاصية، حيتاش لبلاصة ديال لحارس كايخصها تقنيات ديالها اللي ماكاينينش فبلايص خرين ديال اللعب.[1] اللعابة لخرين خاص يكون عندهوم لكارديو (الجهد ديال لقلب) طالع بزاف باش يجريو ويقصّرو 90 دقيقة ديال لماطش، أما لحارس خاص تكون عندو ردة ديال لفعل اللي زربانة وجرى اللي خفيف وديال تيتسْويت. لحارس يقدر يلعب بزاف ديال لفترات فلماطش واللي كاتوصل ل 5 دقايق لكولّا فترة، حتى يبعدو لمدافعين لخطر. فلونطريما لحراس كايركّزو على لخدمة ديال الرجل وكيفاش ينوضو بالزربة من مورا مايعتقو لݣول ديالهوم من شي بيت. خاص ضروري لحارس يعرف كيفاش يكون فلوضعية ديال التوجاد، زعما قبل مايجيه شي بيت خاص يوقف محني للݣدام، لكتاف والركاب مفارقين على بعضياتهوم ويكون واقفين على صباع رجليه.[2] لحارس غاليبا كايلبس توني اللي فيه رقم واحد، ولاكين يقد يلبس أي رقم مابين 1 و 99.[3]

لقواعد د اللعبة[بدل | بدل لكود]

ݣارديان كايبعّد كورة جاية لجيهة لݣول ديالو.

لبلاصة ديال لحارس هي بوحدها اللي باينة على لبلايص لخرين ديال اللعب فماطش عادي. لقواعد د اللعبة كايفرقو لحارس على لكوايرية لوخرين، متلا لحارس يقدر يقيس لكورة بيدّيه، واخا راه غير فلمينطاقة د پيلانتيات ديالو صافي. إلا لحارس شد لكورة بيدّيه، لكوايرية ديال لفرقة لوخرة ماعندهومش لحق يحيّدوها ليه باقي. لحارس عندو دور ختيصاصي فلپيلانتي، حيتاش هو بوحدو اللي كايكون مدافع ديك الساعة. لحراس خاصهوم يلبسو توني اللي اللوان ديالو مختالفين على اللوان اللي لابسينهوم ݣرانو فلفرقة، وعندو لحق يلبس كاسكيطة إلا جاتو الشمش قبالتو.[4]

لقواعد كايفرضو باللي خاص واحد من لكوايرية ديال لفرقة ضروري يكون حارس فأي وقت من لماطش، يعني إلا لحارس خرج بدقّة كلاها وماقدرش يكمّل أولّا خدا حمرة، خاص ضروري كوايري آخور يدخل لبلاصتو ويكون حارس. لقواعد كايخلّيو لفراقي باش يبدلو اللعّاب اللي بغاوه يكون حارس فوسط لماطش فاش كايكون واقف[4]، ولاكين قليل فاش كايطرا هادشي. لحارس يمكن ليه يخرج برا لمينطاقة دپيلانتيات ديالو وماكاينش شي قانون فلقواعد اللي غايحبسو، ولاكين لحرّاس غاليبا كايفضلو يتسركلو حدا لݣول ديالهوم.

لحارس كايخصو ديما يبقى موݣّض لايجي ليه لهوجوم ديال لفرقة لوخرة، واخا ماكايتحرّكش بزاف فلماطش. خاص لحارس يعرف فين غادية لكورة ويعرف كيفاش يتعامل معاها وتحرك إلا شي واحد تيراها قبل ماتوصل لعندو. خاص يكون عند لحارس واحد الزربة باش يقرر واش يشد لكورة اللي جاية لجيهتو، يصيفتها بعيد للجنب أولّا يطيّرها للفوق.

شوف حتى[بدل | بدل لكود]

عيون لكلام[بدل | بدل لكود]

  1. ^ The Evolution of the Goalkeeper: What Makes the Perfect Modern-Day No. 1?, SAM TIGHE
  2. ^ Rebelo-Goncalves, Ricardo (شتنبر 2016). "Assessment of technical skills in young soccer goalkeepers: reliability and validity of two goalkeeper-specific tests". Gale Academic.
  3. ^ Khalil Garriot (21 يونيو 2014). "Mystery solved: Why do the best football players wear No. 10?". Yahoo!. تطّالع عليه ب تاريخ 19 ماي 2015.
  4. ^ a b "Laws". International Football Association Board | IFAB. International Football Association Board. تطّالع عليه ب تاريخ 8 فبراير 2018.
Wikimedia Commons تقدر تزيد شوف بزاف د صور و معلومات ديال Association football goalkeepers ف ويكيميديا كومنز.
Wikimedia Commons تقدر تزيد شوف بزاف د صور و معلومات ديال Association football goalkeepers ف ويكيميديا كومنز.