ركنية (كورة)

من ويكيپيديا
اذهب إلى التنقل اذهب إلى البحث
تصويرة ديال اللقطة دلوقيتة ديريكت فاش لفرقة لبيضة-الزرقة غايتيريو ركنية.

ركنية أولّا كورنير (بلعربية: ضربة زاوية، بالنݣليزية: Corner kick) هي طريقة ديال لمعاودة داللعب فماطش ديال كورة فاش لبالون كايكون برا التيران فوق خط لݣول بلا مايتماركا بيت، ويكون اللي قاسها آخر مرّة قبل ماتخرج لعّاب ديال لفرقة لمدافعة. التير كايدّار فلقنت ديال التيران اللي قريب للبلاصة اللي خرجات منها لكورة.

الركنية كاتعتابر فرصة زوينة للفرقة لمهاجمة باش تماركي بيت، ولاكين ماشي بحال پيلانتي أولّا ضربة غلط نيشان قريب من لمينطاقة د پيلانتيات.

فاش كايماركي شي كوايري بيت من ركنية كايعتابرو لحكم بيت قانوني، وكايتسمى بيت أولمپي (بالصبليونية: Olympico).

فاش كاتّعطى[بدل | بدل لكود]

لبلاصة اللي كاتدار منها ركنية فلقنت ديال التيران.

كاتّعطى ركنية فاش كوايري ديال لفرقة لمدافعة كايخرّج لكورة لجيهة خط لݣول ديالهوم. فهاد لقاعدة ماكايهمش واش بلعاني باش تدارت هاد لحالة، يعني متلا ماكايهمش واش لعّاب ديال لفرقة لمهاجمة هو اللي عطا كورة للكوايري ديال لفرقة لمدافعة قبل ماتمشي ليه. هاد لقضية راها طاكتيك مسموح بيه.

كايتعطى كورنير بلاصة لبيت على نفس لفرقة فاش لفرقة كاتماركي على راسها من بعض لمعاودات دلبدية. هادشي داخل فيه إلا شي فرقة مهاجمة ماركات لبيت من ركنية دييالهوم على راسهوم (لݣول ديالهوم). هادو كاملين حالات اللي قليل بزاف فاش كاتطرا.

التير كايدّار فلقنت ديال التيران اللي قريب للبلاصة اللي خرجات منها لكورة. هاد لقنت كايكون بعض لمرّات معلّم بواحد الراية صغيرة.

فاش كاتّنفّد[بدل | بدل لكود]

درّي كايشوتي لكورة من ركنية.
  • لحكم لمعاون كايطلّع الراية ديالو وكايشيّر جيهة لبلاصة د الركنية. لحكم من بعد كايحدد منين غاتدار هاد الركنية على حساب أقرب بلاصة خرجات منها لكورة. لحكم فهاد لحالة كايطلّع الدراع ديالو لفوق من بعد لجيهة لقنت اللي غاتنفّد منو الركنية.
  • لكورة خاصها تكون زاݣية ماكاتحرّكش وفلقنت أولا لمينطاقة د الركنية، اللي هي قنت مداور بربع دايرة اللي الشعاع ديالها من النقطة اللي فيها الراية قياسو 90 سانطيم.[1][2]
  • ݣاع لكوايرية اللي من لفرقة لاخرة خاصهوم يكونو بعاد بلقليلة 9.15 ميترو حتا تكون لكورة ملعوبة. يقدّو يكونو علامات بعاد ب 10 ميترو من النقطة د الركنية على خط لݣول وخط التوش، اللي كايعاونو لحكم يطبّق هاد لقانون.[3]
  • لكورة كاتكون ملعوبة فاش كاتشيّر وكاتبان مزيان كاتحرّك، وماشي بالضرورة تخرج من لقنت.[1]
  • لكوايري اللي لعب الركنية ماعندوش لحق يقيسها مرّة خرة حتى يقيسها لعّاب آخور.[1]
  • لفرقة لمهاجمة تقدر تماركي بيت نيشان من لكورنير، واخّا هاد لحالة نادرة شي شوية. مايمكنش يتحسب بيت على نفس لفرقة إلا كانت، بقدرة قادر، لفرقة لمهاجمة عندها ركنية ولاكين مشات لكورة لجيهة لݣول ديالهوم وماركاو بيت على راسهوم. كاتّعطى ركنية للفرقة لخرة.
  • مايمكنش يتّحسب التسلول على كوايري مهاجم واخد لكورة نيشان من عند صاحبو فالركنية.

لغلاط[بدل | بدل لكود]

خاص اللعّاب يشوتي لكورة من مورا مايصفّر لحكم.

كاتّعاود ركنية إلا تدارت بكورة كانت كاتحرّك قبل أولّا فبلاصة غالطة.[4]

لكوايرية خاصهوم يشهدّو التيساع اللي مدكور لفوق. إلا دارو بلعاني اللعبة ديال مايقادّوهاش ويديرو اللي كاتنصّ عليه هاد لقاعدة كاتجيب ليهوم تنبيه على لبسالة، ويقدر لحكم يعطي عليها صفرة.[5]

لكوايري اللي كايتعطّل وماكاينفّدش ركنية كايدور فيه لحكم.[6]

إلا لكوايري قاس ديال ركنية مرّة تانية قبل مايقيسها كوايري أخور هادشي كايتعتابر غلط، وكايتعاقب عليه بضربة غلط مانيشانش كاتّعطى للفرقة لمدافعة من لبلاصة اللي طرا فيها لغلط[7]، من غير إلا كانت لقيسة التانية غلط كبير (متلا داخل فيها التعكال)، ديك الساعات لحكم كايعطي ضربة غلط نيشان للفرقة لمدافعة.[4]

عيون لكلام[بدل | بدل لكود]

  1. ^ a b c "Laws of the Game: Law 17: Corner Kick: Procedure". 2019. تطّالع عليه ب تاريخ 22 شتنبر 2019.
  2. ^ "Laws of the Game: Law 1: The Field of Play: The Corner Area". 2019. تطّالع عليه ب تاريخ 22 شتنبر 2019.
  3. ^ "Laws of the Game: Law 1: The Field of Play: Field Markings". 2019. تطّالع عليه ب تاريخ 22 شتنبر 2019.
  4. ^ a b "Laws of the Game: Law 17: Corner Kick: Offences and Sanctions". 2019. تطّالع عليه ب تاريخ 22 شتنبر 2019.
  5. ^ "Laws of the Game: Law 12: Fouls and Misconduct: Disciplinary Action". 2019. تطّالع عليه ب تاريخ 22 شتنبر 2019.قالب:Dead link
  6. ^ "Laws of the Game 2019/20" (PDF). ص. 110. تطّالع عليه ب تاريخ 2020-02-09.
  7. ^ Law 17 - The corner kick, Laws of the game on FIFA.com (أرشيڤ، 10 أبريل 2014)
Wikimedia Commons تقدر تزيد شوف بزاف د صور و معلومات ديال Corner kick ف ويكيميديا كومنز.
Wikimedia Commons تقدر تزيد شوف بزاف د صور و معلومات ديال Corner kick ف ويكيميديا كومنز.