كوايري بديل (كورة)
.jpg)
لكوايري لبديل أولّا الشونجمو (بالنݣليزية: Substitute) هو كوايري اللي كايعوّض واحد آخور فالتيران فماطش ديال لكورة. كاينين بزاف ديال السباب علاياش لمدرّيب يقدر يدير الشونجمو. لكوايري لبديل خدمتو هي يعاون فالجهد دلفرقة ويبدل الطريقة ديالها فاللعب فلماطش. لقانون 3 من لقواعد د اللعبة كايتعامل معا الشونجمو.[1]
السباب[بدل | بدل لكود]
تبديل د الطاكتيك[بدل | بدل لكود]
التبديل د الطاكتيك هو تبديل اللي كايدخّل فيه لمدريب كوايري بديل وكايخرج كوايري من التيران حيتاش:[2][3]
- بانت ليه لفرقة عيانة وخاص يخدّمها واحد الشوية؛
- بغا يبدّل الطاكتيك من لهوجوم للديفاع أولّا لعكس؛
- لكوايري لبديل كايعرف لشي تويشيات/عندو شي خطة ماكايناش عند خوه اللي فالتيران؛
- إلا كانت لفرقة ديالتو رابحة، كايدير شونجمو باش يضيّع لوقت.
تبديل د الزيّار[بدل | بدل لكود]
التبديل د الزيّار هو تبديل اللي كايدخّل فيه لمدريب بزّز منو كوايري بديل وكايخرج كوايري من التيران حيتاش:
- شي كوايري كلّا دقة (طيحة، دفيع، ضريب) وخاصو يتبدّل؛
- شي كوايري مابقاش قادر (فحالة خاصة سخف) يكمّل لماطش.
الطريقة[بدل | بدل لكود]
كاتّعطى للحكم ليستة فيها سمية ديال لكوايرية لبديلين قبل مايبدا لماطش، وأي كوايري ماكاينش فلاليست ماعندوش يدخل (أي واحد دخل كاتعاقب عليه لفرقة بضربة غلط نيشان كاتّعطى للفرقة لوخرة). باش يدّار شونجمو خاص يمشي داكشي مزيان:[4]
- لحكم كايعرف أي تبديل قبل مايتدار؛
- لكوايري اللي غايخرج كاياخد ليدن من عند لحكم (من غير إلا كان نيت خارج)؛
- من غير إلا كان هادشي مسموح بيه فلماطش، اللي خرج ماكايعاودش يدخل؛
- إلا مابغاش شي كوايري يخرج، كايكمل اللعب.
كايدخل لكوايري شونجمو غير إلا ماكانتش لكورة ملعوبة ومن لخط د نص التيران، غير إلا عطاه لحكم ليشارة ومن مورا ماكايخرج لكوايري اللي غايتبادل معاه. إلا مادارش لكوايري لبديل هادشي كايشد كارطة صفرة.[5]
تيفاق على لعدد ديال الشونجمو[بدل | بدل لكود]
فلقواعد ديال اللعبة، "3 دلكوايرية شونجمو بلكتيرة هوما اللي عند لمدرّيب لحق يخدّمهوم فميطشان منضماهوم لفيفا ولجاميعات د كورة". زيادة على هادشي،
- فلمونتخبات اللولين، أكتر عدد ديال لكوايرية شونجمو هوما 6 فلماطش.
- ف ݣاع لميطشان لوخرين، يقدر يتخدم عدد كبير ديال لكوايرية لبديلين إلا:
- لفراقي لمعنيين تّافقو على شحال ديال الشونجمويات غايخدّمو؛
- لحكم عندو لخبار على هادشي قبل لماطش.
- إلا لحكم مافخباروش، أولّا لفراقي ماتّافقوش، ماكايفوتش لعدد ديال لكوايرية لبديلين فلماطش 6.
عيون لكلام[بدل | بدل لكود]
- ^ "The Laws of the Game. Law 3 – The Players. 3. Substitution Procedure". The IFAB. 15 يوليوز 2018. مأرشيڤي من لأصل ف 2019-05-04. تطّالع عليه ب تاريخ 15 يوليوز 2018.
- ^ "Soccer 101: Everything You Need to Know About Substitutions". orlandocitysc.com. 1 يناير 2016. مأرشيڤي من لأصل ف 2023-05-29. تطّالع عليه ب تاريخ 30 غشت 2021.
- ^ "7 Reasons Why Soccer Teams Make Late Substitutions". explainsoccer.com. 25 مارس 2021. مأرشيڤي من لأصل ف 2023-02-05. تطّالع عليه ب تاريخ 30 غشت 2021.
- ^ "Soccer Substitution Rules". rookieroad.com. مأرشيڤي من لأصل ف 2023-06-02. تطّالع عليه ب تاريخ 30 غشت 2021.
- ^ "Yellow Card in Soccer: A Complete Guide to What It Means". yoursoccerhome.com. مأرشيڤي من لأصل ف 2023-08-27. تطّالع عليه ب تاريخ 30 غشت 2021.
|
تقدر تزيد شوف بزاف د تّصاور و لمعلومات ديال Association football substitutions ف ويكيميديا كومنز. |
.svg)
