تيران د كورة

من ويكيپيديا
اذهب إلى التنقل اذهب إلى البحث
لقياسات الصطوندار ديال التيران. ماشي ݣاع التيرانات دايرين هكّا، واخّا التيران اللي كايعجب بزاف ديال لفراقي لمحتارفة هو 105 على 68 ميترو، بواحد لميساحة دبال 7.140 ميتر كاري.

التيران د كورة[1] هي لبلاصة اللي كاتقصّر فيها الرياضة د كورة. لقياس ديالو ولعلامات اللي فالضس تاعو كايحددهوم لقانون اللول ديال لقواعد د اللعبة.[2] التيران غاليبا كايكون مفروش إمّا بݣازون طبيعي أولّا ݣازون صطيناعي، واخّا بزاف ديال لهوّاة كايلعبو فالتراب. لݣازون صطيناعي ضروري خاص يكون خضر.

ݣاع لخطوط ولعالامات اللي كاينين فالتيران كايشكّلو طرف من لبلاصة اللي كايحددوها. متلا، لكورة اللي فوق أولّا على خط التوش كاتكون مازالة ملعوبة، ولغلط اللي كايطرا فوق لخط اللي كايحدد لمينطاقة د پيلانتيات كايجيب پيلانتي على مولاه. على هكّاك خاص لكورة تفوت خط التوش لبرّا باش تسمّى خارجة، لكورة خاص تفوت لخط ديال لݣول مابين الرجلين د لݣول باش يتماركا بيت؛ إلا كان شي طرف من لبالون فوق أولّا على لخط، كاتكون مازالة ملعوبة.

لعلامات ديال التيران[بدل | بدل لكود]

التيران هو واحد لميساحة اللي مستاطلة وفيها بزاف ديال لعلامات ولخطوط اللي مرسومين فيه.

علامات وسط التيران[بدل | بدل لكود]

خط النص، الدويرة د لوسط والنقطة د النص.
  • لمينطاقة د لݣول: هي مستاطيل اللي فيه جوج خطوط بادين من خط لݣول ومتعامدين عليه وبادين بعاد 5.5 ميترو على الرجلين دلݣول والطول ديالهوم 5.5 ميترو. فهاد لحد واحد لخط آخور متعامد عليهوم ومتوازي معا خط لݣول كايجمعهوم.[3] فهاد لمينطاقة لحارس يقد يقيس لبالون بيديه.
  • لمينطاقة د پيلانتيات: هاد لبلاصة كايحددها لخط د لݣول، جوج خطوط بادين من خط لݣول ومتعامدين عليه وبادين بعاد 16.5 ميترو على الرجلين دلݣول والطول ديالهوم 16.5 ميترو. فهاد لحد واحد لخط آخور متعامد عليهوم ومتوازي معا لخط دلݣول كايجمعهوم.[4] لغلاط اللي كايدّارو هنايا كايتعاقب عليهوم ب پيلانتي.
  • النقطة د پيلانتي: كاتكون نقطة اللي بعيدة 11 ميترو على لوسط النيشان ديال لݣول. فهاد لبلاصة فاش كاتّحط لكورة قبل من پيلانتي.
  • لقوس د پيلانتي: كاين على برّات لمينطاقة د پيلانتيات، وكايوصل لبعد ديالو لكبير 9 ميترو من النقطة. هنا فين كايوقفو ݣاع لكوايرية من غير لحارس لمدافع واللعاب مول لپيلانتي فاش كاتكون.[5]
  • النقطة د النص: نقطة كاتكون فوسط التيران، هي لبلاصة اللي كايتلاقاو فيها خطوط فتيراضيين جايين من الركنيات.
  • الدويرة د لوسط: هي دوّيرة اللي لمركز ديالها هو النقطة د النص والشعاع ديالها هو 9.15 ميترو. كاتحدّد لمسافة لمينيموم اللي خاص لكوايرية يكونو فيها بعاد على نص التيران فلبدية بالصفّارة؛ لكورة كاتكون محطوطة فالنقطة بالنص.[4] فتيرات الترجيح، ݣاع لكوايرية من غير لحرّاس واللي كايتيري لكورة خاصهوم يكونو فالداخل ديال الدوّيرة.
  • خط النص: كايقسم التيران على جوج. كولّا فرقة كاتدافع على نص ديال التيران. فاش كايبدا شوط جديد كايتبادلو لفراقي هاد النص. فلبدية دلماطش خاص لكوايرية يكونو فالنص ديالهوم؛ وماكايتحاسبوش على التسلول فاش كايديروه فالنص ديالهوم. كايكونو رايات فالتقاطع مابين خط النص وخطوط التوش، ولاكين لقواعد د اللعبة كايݣولو باللي هادشي ختياري.[6]

علامات فالجنب[بدل | بدل لكود]

لبلاصة اللي كاتدار منها ركنية فلقنت ديال التيران.
  • خطوط التوش: خاص يكون فيهوم مابين 90 و120 ميترو، ويكونو بجوج بنفس الطولة.[7] لعرض ديالهوم ماخصّوش يفوت 12 سنتيميتر.[7] فلميطشان الدوليين ماخاصش خطوط التوش يكونو كتر من 110 ميترو أولّا قل من 100 ميترو فالطولة.[7]
  • خطوط لݣول: خاص يكون فيهوم مابين 45 و 90 ميترو، ويكونو بجوج بنفس الطولة.[7] لعرض ديالهوم ماخصّوش يفوت 12 سنتيميتر.[7] فلميطشان الدوليين ماخاصش خطوط لݣول يكونو كتر من 75 ميترو أولّا قل من 64 ميترو فالطولة.[7]
  • ركنية: كاتكون فلقنات الرّبعة ديال التيران. لمينطاقة ديالها هي ربع دوّيرة اللي الشعاع ديالها ميترو واحد.
  • علامات د ركنية فلخطوط: علامات بعاد ب 10 ميترو من النقطة د الركنية على خط لݣول وخط التوش، اللي كايعاونو لحكم يطبّق لقانون ديال ݣاع لكوايرية اللي من لفرقة لاخرة خاصهوم يكونو بعاد بلقليلة 9.15 ميترو حتا تكون لكورة ملعوبة.[8][9]

الدوزان ديال التيران[بدل | بدل لكود]

من غير لخطوط اللي مرسومين فلݣازون، شلّا حوايج كايكون ضاروري منهوم فالتيران:

  • لݣول: لبلاصة فين الداخل ديالها خاص يتماركاو لبيوتة. كايتحطّ لݣول مورا خط لݣول[9] ولوسط ديالو كايجي نيشان معا لوسط ديال هاد لخط. لعرض ديال لݣول هو 7.32 ميترو، كايحدّوه جوج رجلين اللي لعلو ديالهوم هو 2.44 ميترو من فوق الضس. هادشي كايعطي للكوايرية واحد لميساحة ديال 17.86 ميتر كاري فين يتيرو لبالون.[10] بالنسبة للشبّان والصغار لݣول كايكون تقريبا بنص هاد لقياسات. لعاريضة والرجلين خاصهوم يكونو بيضين ومصاوبين من لخشب أولّا لحديد أولّا أي مادة خرة مرخّص بيها، وماخاصش يتّركّبو بشكل اللي يقد يكون خطر على اللعّابة.
  • الشبكة: بزاف ديال التيرانات (بزّاف ف دياول لفراقي لمحتارفة) كايديرو الشباكي مورا لݣول. فلقواعد هادشي ختياري ومامفروضش.
  • الرايات: كاينين الرايات اللي كايتحطّو فبلاصة الركنية، وفلمقاطعة ديال خط النص معا خطوط التوش. هاد الرايات ماشي مفروضين فلقواعد د اللعبة.
  • لݣازون: يقدّ يكون طبيعي (يعني ربيع حقيقي) أولّا صطيناعي (فيبر ديال لپلاستيك أولّا مواد خرين اللي كايبان بحال ديال بصّح).

عيون لكلام[بدل | بدل لكود]

  1. ^ George Cuming, Manager Project Future Referees (9 دجنبر 2009). "Evolution of football field markings". Asian Football Confederation. مأرشيڤي من لأصل ف 23 أكتوبر 2013.
  2. ^ "Premiership football stadiums". TalkFootball. تطّالع عليه ب تاريخ 6 يناير 2011.
  3. ^ "Laws of the Game 2011/2012" (PDF). FIFA. ص. 30. تطّالع عليه ب تاريخ 20 مارس 2019.
  4. ^ a b Hornby, Hugh (2000). Football. Dorling Kindersley Ltd. ص. 13. ردمك 8778267633.
  5. ^ "Laws of the Game 2011/2012" (PDF). FIFA. ص. 42. تطّالع عليه ب تاريخ 20 مارس 2019.
  6. ^ "Laws of the Game 2011/2012" (PDF). FIFA. ص. 8. تطّالع عليه ب تاريخ 12 غشت 2011.
  7. ^ a b c d e f "Laws of the Game 2011/2012" (PDF). FIFA. ص. 7. تطّالع عليه ب تاريخ 12 غشت 2011.
  8. ^ "Laws of the Game: Law 1: The Field of Play: Field Markings". 2019. تطّالع عليه ب تاريخ 22 شتنبر 2019.
  9. ^ a b "Laws of the Game 2011/2012" (PDF). FIFA. ص. 9. تطّالع عليه ب تاريخ 12 غشت 2011.
  10. ^ "Laws of the Game : 2013/2014" (PDF). Fifa.com. تطّالع عليه ب تاريخ 21 شتنبر 2018.
Wikimedia Commons تقدر تزيد شوف بزاف د صور و معلومات ديال Association football fields ف ويكيميديا كومنز.
Wikimedia Commons تقدر تزيد شوف بزاف د صور و معلومات ديال Association football fields ف ويكيميديا كومنز.