توش (كورة)
التوش (بلعربية: رمية تماس، بالنݣليزية: Throw-in) هي طريقة ديال لمعاودة د اللعب فالرياضة د كورة فاش لبالون كايخرج برّا التيران. لقانون 15 ديال لقواعد د اللعبة كاينضّم هاد التوش.[1]
منين لكورة كاتخرج برّا اللعب فاش كاتدوز من خط التوش فالجناب ديال التيران، كاتعطى لكورة للكوايري من لفرقة اللي ضد هاديك اللي خرّجات لكورة، سوا بلعاني أولا مامقصوداش.[1]
كايتدار التوش من لبلاصة اللي خرجات منها لكورة، سوا فوق الضس أولّا فلهوا، واخا لحكم يقدر يميّك على فروقات صغار بين فين خرجات لكورة وفين غايدّار التوش.[1] لكوايرية ديال لفرقة لوخرة خصهوم يكونو بعاد بجوج ميترو على هاداك اللي غايلوح لكورة، واللي براسو كايكون واقف فوق خط التوش.
خاص لكوايري يكون مواجه للتيران فلوقت فاش غايلوح لكورة. خاص طرف من رجليه يكون فوق خط التوش أولّا فالضس اللي على برّا،[2] ويناول يدّيه بجوج باش يلوح لكورة من مورا وفوق راسو.
لكورة كاتولّي ملعوبة فاش كاتدخل للتيران.
مايمكنش لبيت يتماركا من توش؛ إلا لكوايري لاح لكورة ودخلات على لݣول ديالهوم، كاتعطى ركنية للفرقة لوخرة.[3] بنفس الطريقة مايمكنش لبيت ديال لهجوم يتماركا من توش، إلا لكوايري لاح لكورة ودخلات على لݣول ديال لفرقة لمدافعة، كاتعطى ضربة مرمى للفرقة لمدافعة.
لكوايري ماكايجيهش إندار بالتسلول إلا خدا لكورة من عند صاحبو بتوش. لمهاجمين لمطورين كايستاغلّو هاد لقاعدة كايرجعو اللور من مورا ݣاع لمدافعين ديال لفرقة لوخرة، باش غير يشدّو لكورة يلقاو الطريق خاوية لجيهة لݣول.
باش توصل لكورة بعيد أحسن زاوية باش خصها تلاح هي 30 درجة من لأفق د الشوف لماكسيموم، بحساب ديراسة دارتها لجامعة د برونل.[4] بحساب الديراسة، لكوايرية يقدرو يوصلو لكورة بعيد إلا لاحوها فزوايا اللي قلال، بسباب السرعة اللي كاتجي. أحسن زاوية غادي تكون 45 درجة، لوكان ماكانتش السرعة وكان الليوح من الضس ماشي فوق الراس والجبيد ديال لهوا اللي كايتحكّمو.
إلا شي كوايري مابعّدش جوج ميترو على داك اللي غايقصّر التوش قبل ماتكون لكورة ملعوبة، أولّا كايحبسو باش يلوح بطريقة معيّقة، كاتعطاه صفرة بسباب السلوك اللي ماشي رياضي. إلا التوش تلعبات قبل مايوقّف لحكم اللعب على هاد لغلط، كايولّي يعطي ضربة غلط مانيشانش.
إلا ماقدرش مول لكورة يلوحها بالطريقة باش خاصها تلاح، أولا مالاحهاش من لبلاصة فاش خرجات، كاتعطى هاد التوش لكوايري من لفرقة لوخرة. هاد لحالة كاتسمى "توش مغلوطة".[5]
إلا داك اللي لاح لكورة عاود قاسها قبل مايقيسها شي لعّاب آخور، هادا غلط كايتعاقب عليه بضربة غلط مانيشانش كاتعطى للفرقة لوخرة من لبلاصة ديال لغلط. إلا كانت لقيسة التانية غلط كبير، فهاد لحالة كايتعاقب على هاد لغلط بضربة غلط نيشان أولّا پيلانتي.
إلا شي لعاب بان باللي كاياخد توش، ومن بعد نيشان عطاها لشي صاحبو فلفرقة باش يلوحها، كاتعطى صفرة للكوايري اللول على التعطال د اللعب.[6] أي واحد كايتعطل باش يلوح لكورة بتوش كاياخد صفرة.[6]
لحارس ماخصّوش يشد بيدّيه لكورة اللي جاتو من عند صاحبو فلفرقة من التوش. هادشي مايمكنش يتعوض بلحارس إلا قاس لكورة برجليه قبل من يدّيه. إلا طرا هاد لغلط فلمينطاقة د پيلانتي د لحارس، كاتعطى ضربة غلط مانيشانش. إلا طرا لغلط برا لمينطاقة د پيلانتيات د لحارس، كاتعطى ضربة غلط نيشان.
- ^ a b c "Laws of the Game 2019/2020" (PDF). IFAB. 1 يونيو 2019: 126–128. مأرشيڤي (PDF) من لأصل ف 2023-07-13. تطّالع عليه ب تاريخ 27 غشت 2019. Cite journal requires
|journal=(معاونة) - ^ Association، The Football. "The website for the English football association, the Emirates FA Cup and the England football team". www.thefa.com. مأرشيڤي من لأصل ف 2023-05-01. تطّالع عليه ب تاريخ 2021-08-07.
- ^ FIFA.com. "Education & Technical - Referees - Laws of the Game - FIFA.com". FIFA.com. مأرشيڤي من لأصل ف 2014-12-29. تطّالع عليه ب تاريخ 2021-08-07.
- ^ Linthorne، Nicholas P.؛ Everett، David J. (19 يناير 2006). "Release angle for attaining maximum distance in the soccer throw-in". Sports Biomechanics. 5 (2): 243–60. arXiv:physics/0601149. doi:10.1080/14763140608522877. PMID 16939156. Unknown parameter
|s2cid=ignored (معاونة) - ^ "Soccer Rules Q&A Search AskTheref.com". asktheref.com. مأرشيڤي من لأصل ف 2016-04-05. تطّالع عليه ب تاريخ 2021-08-07.
- ^ a b "Laws of the Game 2019/20" (PDF). 2019. ص. 110. مأرشيڤي (PDF) من لأصل ف 2022-11-13. تطّالع عليه ب تاريخ 2019-09-22.
|
تقدر تزيد شوف بزاف د تّصاور و لمعلومات ديال Throw-in ف ويكيميديا كومنز. |
.svg)
|
|
تقدر تزيد شوف بزاف د تّصاور و لمعلومات ديال Throw-in ف ويكيميديا كومنز. |