أصيلا

أصيلا
‫أصيلة‬ (ar) ⴰⵚⵉⵍⴰ (tzm)
تاريخ التأسيس	1500 قبل لميلاد
لبلاصة
لبلاد	لمغريب
لإقليم	عمالة طنجة أصيلة
لإدارة
لعمدة	محمد بنعيسى (1992)
السكان
شحال دالسكان	36,039 (2024)
شحال دلفاميلات	7,947 (2014)
لجغرافيا
لعلو	2 م
معلومات خرين
توقيت ديال لمدينة	ڭرينيتش + 1
الرمز لجغرافي	2557055 و 6546678

أصيلا ؤلا أزيلا (ب لوغات لأمازيغية: Aẓila) مدينة مغريبية جات ف الشمال لغربي د لمغريب كاتطل على لمحيط لأطلسي، و جات 31 كيلوميطر ف الجنوب ديال طانجا. أزيلا معروفة ب لحصون و البيبان التاريخية ديالها لي باقين محفوضين.

أزيلا ساكنين فيها 31014 واحد، على حسب لإحصاء لعام 2014.

أصل السمية

تعرفت المدينة من لعصور الفينيقية بسمية الأمازيغية زيليس أو زيلي.و لي فيها لقاو لباحتين أتار ديال لبيع و الشرا معا لفينقيين، و بقايا ديال مباني من لفترة الرومانية. ومن بعد الإنشاء الإسلامي الثاني للمدينة، تعرفات بسمية أصيلة ولهي كلمة عربية، وممعروفش شنو سبب الشبه بين السمية لفينيقية ولعربية. ففترة لحتلال لبرتغالي تسمات أرزيلا واحتفظت لمدينة بهاد سمية حتى لمن بعد لاسترداد الإسلامي سنة 1550 ميلادية، وكتعرف عوتاني بسمية أزيلا وهي تسمية محرفة لكلمة أرزيلا. كيتسماو أهل منطقة جبالة لي كيسكنو فلمدينة بالزيلاشي.

تاريخ

العصور القديمة

تاريخ مدينة أزيلا / أصيلة كيرجع لأكثر من ألفين عام، سكنوها الأمازيغ ومن بعدهم لفنيقيين ولقرطاجنيين، حتى ولّات قلعة رومانية محتلة سميتها «زيليس» بعيدة بـ 40 كيلومتر فجنوب «طنجة». أغلب الكتابات تاريخية اللي كتهضر على الفترة اللي قبل الإسلام متضاربة وكتخلط بين مدينة زيليس (أصيلة) ومدينة زليل (الدشر لجديد) اللي كاينة فالجماعة القروية الخلوة وبعيدة غير بـ 13 كيلومتر فشرق أصيلة، داكشي علاش صعيب الواحد يعتمد عليها باش يحط تاريخ دقيق للمدينة قبل الإسلام.

العصور الإسلامية

مدينة أصيلة ما كانتش فوقت الفتح الإسلامي، ومن لمحتمل تكون تدمرات فاش هجموا الوندال. أما المدينة دييل دابا، تأسيس ديالها كيرجع لعام 229 هجرية على يد شي مرابطين من بربر كثامة وهوارة باش يواجهو لغزوات ديال لفايكنج من لبحر. المدينة فهاديك لوقيتة كانت عبارة على تجمعات سكنية دايرة بها أسوار وأبراج ديال العسّة. فآخر القرن ثالث لهجري، ستقبلات لمدينة وحدة من أهم لهجرات الأندلسية قبل ما تطيح غرناطة، وهي هجرة ناس شذونة اللي هربوا من الظلم ديال لأمير عبد الله بن محمد بن عبد الرحمن الأموي من بعد ما فشلات ثورة ديالهم. هاد لهجرة لجماعية خلات أصيلة تولي مركز حضاري مهم فشمال المغرب.

المسجد الجامع كيتعبر أقدم بنيان فمدينة أصيلة

لمدينة خدات أهمية كبيرة فعهد الأدارسة فشمال المغرب (922-985)، حيت بانت أصيلة كمرسى تجاري مهم كيربط المغرب بمدن الساحل الأوروبي على البحر الأبيض المتوسط. وهاد الأهمية بقات غادية وكتكبر مع الوقت فمثلاً عام 1307م كانت لمدينة عامرة بشركات الأجنبية ديال جنوة ولبندقية، ومن هاد لعام دخلات حتى برشلونة للمنافسة التجارية وولاو عندها حتى هي خمسة د الشركات. فعام 1465هم، دخلات أصيلة فوسط الصراع بين لوطاسيين ولمرينيين، حيت اختارها السلطان محمد الشيخ المهدي الوطاسي عاصمة ليه ومركز باش يهاجم لعاصمة لمرينية فاس. استغلو البرتغاليين فاش خرج سلطان محمد الشيخ المهدي من العاصمة ديالو باش يهاجم فاس عام 1471م، وهاجمو على المدينة بأسطول بحري فيه 477 باطو وعليها 30.000 برتغالي، وملك لبرتغال ألفونسو لخامس هو اللي قاد هاد الحملة براسو مع ولي عهدو ولوزراء وكبار نبلاء. سكان لمدينة قاومو بسفن ديالهم وقتلو 200 عسكري برتغالي، ولكن حيت ما كانش عندهم دعم خسرو قدام لمهاجمين اللي احتلوا لمدينة وقتلوا 2.000 واحد من سكان وأسرو 5.000 وحدا خرين، منهم ولي عهد سلطنة لوطاسية لأمير محمد البرتغالي اللي كان عندو ديك ساعة غير 10 سنين. فاش وصلوا لخبار للسلطان أحمد الشيخ لمهدي اللي كان قريب لفاس، تفاوض مع ملك لبرتغالي على الأسرى، وكان الجواب ديال لملك هو يسنيو هدنة بيناتهم لمدة 20 عام وتعترف السلطة لمغربية بالسيادة ديال لبرتغال على مدن: أصيلة وسبتة والقصر الصغير. من بعد ما طاحت لمدينة، لقبائل اللي ضايرة بها دارت تمرد صعيب وعنيف ورفضات لهدنة، وبناو قلاعي ورباطات باش يعسو على لمدينة ويهاجموها. هاد لقبائل هجمو على لمدينة 12 لمرة، وهاد لهجمات أثرات بزاف على لاقتصاد ديالها وحولاتها من مركز تجاري لهدف ديال لقراصنة لمغاربة، داكشي علاش لمستوطنين لبرتغاليين بداو كيهربو منها خايفين على راسهم. وهاد لهجمات اللي قادوها أمراء بني عروس سالات بأنهم رجعو المدينة عام 1550م وجراو على البرتغاليين منها.

عملية حتلال مدينة أصيلة

ملك لبرتغالي أفونسو الخامس فوسط لقصر سلطاني فأصيلة

فعام 1576م، سلطان محمد المتوكل سعدي سلم المدينة للبرتغاليين مرة خرى، وهاد الفعلة اللي تعبرات خيانة للشعب لمغربي خلاتهم يحيدو لمتوكل وينصبو عبد الملك الأول السعدي، ولكن لمتوكل طلب لمساعدة من حلفاؤو لبرتغاليين وهادشي تسبب فـقيام معركة وادي المخازن عام 1578م اللي مات فيها ملك البرتغال سان سيباستيان. وقدرات لمدينة ترجع للحكم المغربي مع سلطان أحمد المنصور الذهبي عام 1589م. من بعد عرفات المدينة أوج عمراني وقتصادي ورجعات كيف كانت، خصوصاً فعهد الأمير لخضر غيلان (1654م-1673م) اللي ردها مرسى تجاري ومركز للجهاد البحري باش يهاجم مدينة طنجة اللي كانت باقة محتلة. بقات المدينة تابعة لأمراء الجهاد فمنطقة الهبط حتى لعام 1692ه‍ فاش سيطر عليها السلطان إسماعيل بن علي الشريف العلوي. وفالعهد العلوي، تعرفات أصيلة كمرسى تجاري مهم وقاعدة للقراصنة لمسلمين فشمال المحيط الأطلسي.

برج القمرة من أهم لمعالم اللي بقات من الوجود لبرتغالي فأصيلة

العصر الحديث

بقات عمليات لقرصنة كتنطلق من سواحل أصيلة لعقود طويلة حتى لخر دلقرن 19، وهاد لقراصنة دارو مشاكل ديبلوماسية للمغرب، خاصة ملي هجموا على لأسطول نمساوي عام 1828م، وردات نمسا بقصف المدينة من البحر عام 1829م. وفبداية القرن عشرين، ولّات أصيلة معقل ديال القائد أحمد الريسوني اللي بسط السيطرة ديالو منها على بزاف د لأراضي فشمال، قبل ما يطردوه منها لإسبان عام 1924م ويحتلوها حتى لوقت لاستقلال عام 1956م.

ف التقسيم لإداري

أزيلا كاتّعتابر مدينة مغريبية و جماعة ترابية حضرية كاينة ف عمالة طنجة أصيلة، جهة طنجة تطوان الحسيمة.

تعليم

• نسبة لأمية (نّاس لّي ما كايعرفوش يقراو ولا يكتبو): 21,7%
• نسبة سّكان لّي قاريين فوق الليسي (ليسي و جامعة): 17,7%

قتيصاد

• نسبة نّاس نّشيطين (لّي يقدرو يخدمو): 49,8%
• نسبة لبطالة (نّاس لّي ما خدامينش و تايقلبو على خدمة): 19%
• نسبة نّاس اللي خدامين ف دّولة (ولا لبيطاليين اللي سبق ليهوم خدمو): 12,3%
• نسبة نّاس اللي خدامين ف لپريڤي (ولا لبيطاليين اللي سبق ليهوم خدمو): 49,2%

مصادر

ويكيميديا كومنز عندا تصاور و معلومات على أصيلا.

هادي زريعة ديال مقالة خاصها تّوسع. تقدر تشارك ف لكتبة ديالها.