توريخية

تّوْريخية (ب نّݣليزية: Historicity) مفهوم ف علم تّاريخ لي كيعني لقيمة ديال شي حاجة، بحال ديال شي شخص ؤلا حادات، لي عندها وجود حقيقي ف تّاريخ. لأشخاص ؤ لأحدات لي ماكيحققوش تّوريخية كيتّعتابرو ؤسطورة ؤلا خيال. لأدلة ديال تّوريخية كاتكون ف لعادة على شكل أدلة مادية (قبورا، معلامات، شقوفا د لفلوس، ؤ غيرهوم)، ؤلا توتيقية (روايات تاريخية تكتبات ف زمان ؤ مكان قراب ل لأشخاص ؤ لأحدات لي كيوصفو).

تّوْريخية ف لمعنى لعام ديالها كاتهتم ماشي غير ب "شنو طرا بصّح ف تّاريخ" (سؤال ؤنطولوجي)، مي تا ب "كيفاش لإنسان ديال دابا يقدر يعرف شنو طرا بصّح" (سؤال إپيستيمولوجي)، يعني ب طّرقان و لأساليب ديال لبحت لي كاتوصّلنا باش نجاوبو على هاد سّؤال ف ما كيتعلّق ب أحدات ؤلا شخصيات محددة.

بزاف د شّخصيات و لأحدات لي داخلين ف معتقدات محدّدة، سيرتو دينية، وخا كيعتاقدو فيهوم لملاين د نّاس، ماكيتّعتابروش شخصيات ؤلا أحدات تاريخية عند لحرايفيا ديال علم تّاريخ، حيت ماكيحققوش شّروط ديال تّوريخية.

يلا كانت شخصية ؤلا حادات ماعندهومش توريخية، هادا ماكيعنيش بلي ماعندهومش قيمة ف تّاريخ د بنادم، ؤ لعولاما د تّاريخ ؤ د مجالات مرتابطة بحال لأنطروپولوجيا وخا داكشي يقدرو يدروسوهم، يلا كان لعتيقاد ف لوجود د ديك شّخصية ؤلا لوقوع د داك لحادات، سوا ف لماضي ؤلا تا دابا، عندهوم تأتير كبير ؤلا صغير على تّقافة ؤ تّاريخ لبشري.

شروط تّوريخية

تّوارخيا ديال تّاريخ لقديم، باش يتبتو تّوريخية د شي شخص ؤلا حادات، ف لعادة كيعتامدو على 3 د شّروط:

1. لمعاصرة: كلما كانت لمصدر تّاريخي قريب ف زّمان ؤلا معاصر ل لحاجة، كلما تزادت تّوريخية ديالها.
2. تّماسك لمنطقي ؤ لكرونولوجي: خاص لمصدر يعاود داكشي لي طرا بشكل منطقي ف لمكان و زّمان ؤ سّياق تّاريخي.
3. سّتيقلالية: خاص لمصدر تّاريخي يكون محايد على قدر ليمكان ؤ مستاقل على داكشي لي كيعاود عليه، يعني ما عدو ما صديق.

ملي كانهضرو على تّاريخ لقديم، لأغلبية سّاحقة ديال شّخصيات تّاريخية لمعروفة صعيب نتبتو لوجود ديالهوم ؤ شنو طرا ليهوم 100%. متلاً كليوپاطرا سّابعة كتبو عليها توارخيا رومانيين بحال پلوطارخ، سويطونيوس، ؤ أپيان السكندري بشكل عدائي بزاف، قرن مورا لموت ديالها، ؤ لمكتوبات تّاريخية لي بقاو تال دابا و لي تكتبو ف وقتها، بحال ديال كيكيرو، إما كيدكروها غي دايزين، ؤلا ماكيديروش سميتها ڭاع، ؤ كيكتبو متلاً غي "لماليكة".

تّوارخيا لقدام، بحال أي بنادم، يقدرو يغلطو، يتلفو، يعتاقدو ب إخلاص ف شي حاجة غالطة، ؤلا تا يكدبو ؤ يغلّطو لقاري بلعاني؛ كيما ليوم كانشوفو لإعلام ؤ صّحافيين يقدرو يكتبو حوايج غالطين ب لغالاط ؤلا بلعاني. وخا نتبتو بلي شي نص تاريخي راه غي تعاويد، هادا ماكيعنيش بلي داكشي لي كيعاود ماطراش، ؤلا بلي شّخصيات ماعاشوش بصّح. إپيستيمولوجياً نقدرو ماعمّرنا نلقاو شي طريقة باش نتبتو ؤلا نّفيوْ تّوريخية ديال شي حاجة.

عيون لكلام

هادي زريعة ديال مقالة خاصها تّوسع. تقدر تشارك ف لكتبة ديالها.