زهرة الفاسية
زهرة الفاسية
| ||
| ||
| معلومات عامة | ||
| زيادة | 1905 صفرو | |
| لموت | 4 نونبر 1994 (88/89 عام) عسقلان | |
| لجنسية | إسرائيل لمغريب | |
| لحرفة | مغنية و ملحّين | |
| لّوغات لي كيعرف | عربية و لوغات أمازيغية | |
| لفاميلة | ||
| لمحيط | مارك طوبالي (حفيد) | |
| لإتنية | يهود | |
| معلومات خرى | ||
| ستيل | لملحون، طرب غرناطي، الشعبي و حوزي | |
| لألة | صوت | |
   
| ||
زهرة لفاسية، تولدات ف 1905 ف صفرو ؤ ماتت ف 4 نونبر 1994 ف عسقلان، إسرائيل)، هي مغنية مغريبية يهودية تشهرات ف لقرن لعشرين، و ب ضبط مابين ربعينات و ستّينات ب لغنا ديال لعيطة من مورا مابدّلات السكنى ل رباط. سجلات لأغاني لولين ديالها ف لبدية ديال لعشرينات معا شركة پاطي و ڭراموفون من مورا ما رحلات ل كازا. هاجرات زهرة لفاسية ل فرانسا ف لبدية د ستّينات ومنها ل إسرائيل ف 1964.[1]
تولدات زهرة ؤلا زوهرة لفاسية ف صفرو، و سميتها لحقيقية هيّ إيستر، ف فاميلة يهودية بسيطة. بّاها هاجر ل فاس باش يتاجر، ولاكين من بعد تحول ل الرباط، و عاود ل الدارلبيضا فين ستاقرات لفاميلة ف بوطويل ف لمدينة لقديمة. بّاها كان كيعرض السلعة ديالو ف درب عوا. بدات زهرة لفاسية علاقتها معا لفن ب تنشيط لحفلات د ليهود، و كانت كاتهرب من لمدراسة باش تّريني معا لفراقي د لموسيقى لمغريبية ليهودية، و منّها تعرّفات على فنانين مغاربا يهود بحال السولامي، سليم عزرا، بوحبوط و شلومو الصويري.[2]
كانت زهرة لفاسية ف اللول كاتلقّب ب الصفريوية، ولاكين باش تّعرف كتر خدات اللقب ديال "لفاسية". تشهرات بزاف عند لعائلات لبورجوازية لمغريبية لي كانت كاتعرض عليها باش تحيي لمناسبات.
تجوّجات زهرة ب قرار من بّاها لمرة اللولة من صنايعي سميتو عزرا من مدينة فاس، و ولدات معاه جوج ولاد. حيت راجلها عتارض على لخدمة ديالها ف لفن، تطلقو، و مشات زهرة ل الرباط، فين عاشت قصة حب معا حوّات و تاجر يهودي طالياني، و تجوّجو.
تحوّلو من بعد ل كازا، و من بعد ل فرانسا، و ف اللخر هاجرو ل إسرائيل. راجها تابيرو كان كيلبس ديما الجلابة لمغريبية و الطربوش، و زهرة لفاسية كان معروف عليها بلي ديما لابسة لقفطان. النهاية ديالها كانت حزينة، حيت بعدما هاجرات ل إسرائيل، تجاهلاتها قنوات لميديا لإسرائيلية لي كانت كاتفضّل لموسيقى لغربية، و بحال بزاف د ليهود من بلدان شمال إفريقيا و الشرق لأوسط تعرّضات ل لحڭرة و لعنصرية. الشاعر ليهودي لمغريبي إريز بيطون ملي سمع قصتها كتب عليها قصيدة، لي ولات دابا جزء من لمقرر د لمدراسة ف إسرائيل.[3]
تشهرات زهرة لفاسية بتلاتة ديال لأغنيات: عيطة بيضاوية، عيطة مولاي إبراهيم وعيطة نشكي لربي. سجلات ليها وزارة تقافة ف لمغريب كاسيطة خاصة على شكل تكريم ليها، وفيها تمنية ديال لأغاني:
- حبيبي ديالي فين هو
- يا محلى وصولكم
- حبك تلفني على شغالي
- يا وردة
- الغربة
- زاد علي الغرام
- شعلت النار
- سعدي ريت البارح
- ^ Tamar Sella (23 يونيو 2021). "Zohra El Fassia". Jewish Women's Archive (ب نڭليزية). مأرشيڤي من لأصل ف 2023-08-31. تطّالع عليه ب تاريخ 2021-12-26.
- ^ "«تابيرو».. بائع السمك الذي تزوج المطربة اليهودية الزوهرة الفاسي بعدما لقبته بـ «تون» البحر". 2016-04-13. تطّالع عليه ب تاريخ 2024-03-30.
- ^ Meri، Josef (23 June 2016). The Routledge Handbook of Muslim-Jewish Relations (ب نڭليزية). Routledge. pp. 435–436. ردمك 978-1-317-38321-5.
 هادي زريعة ديال مقالة خاصها تّوسع. تقدر تشارك ف لكتبة ديالها. |