حادة أوعكي

من ويكيپيديا
اذهب إلى التنقل اذهب إلى البحث
حادة أوعكي
حادة أوعكي
معلومات عامة
زيادة 1953 (66/67 عام)
خنيفرة
لجنسية لمغريب
لميهنة مغنية
معلومات خرى
لألة صوت بشري ترجم


حادة أوعكي (خلاقت ف 1953 ف آيت يسحاق - إقليم خنيفرة) مغنية مغريبية كاتغني ب شّلحة د لأطلس لمتوسط و دّاريجا، و هي من لمغنيات لمغريبيات لكبار ف نّص تّاني د لقرن لعشرين و من رّموز د لغنية لأمازيغية. رتابطات سّمية ديالها بزّاف ب بناصر أوخويا.[1][2]

حياتها[بدل | بدل لكود]

حادة خلاقت و كبرات ف زّاوية د آيت يسحاق ف جوايه د خنيفرة، جدودها كانو فيهوم سادات دينيين و هو لّي خلا لعائيلة ديالها تكون محافضة و رافضة لكار د لغنا. حادة عمرها ما قرات ف لمدرسة و تعلمات لغنا و لعيوط و لميزان د لموسيقا د شّلوح غير ب سّمع فاش و كان كايعجبها تگلس ف لمجامع د نّسا لّي كايغنيو ف لقساير و لعراسات.

فاش كانت عندها 14 لعام جوجوها دارهوم صحة ب واحد رّاجل عندو 70 عام، و كانت ديك تّجويجة غير سبة ديال لعائيلة ديالها باش يتهناو منها و من طّريق د لغنا لّي كانت حادة باغية تمشي فيها. ماقبلاتش حادة ب هاد ظّلم و مشات عند لقاضي باش تطلب طّلاق و قدرات تحرر راسها من بعد 15 يوم من جّواج.

هاد لقضية بدلاتليها حياتها حيت كان ما بقا ليها گعاد ف آيت يسحاق من بعد ما وقفات ف وجه عائيلتها و هاكدا هربات من دارهوم، و هي بنت 16 لعام، و مشات ل دّار لبيضا و تما وقف معاها بناصر أوخويا، لّي كان من شّيوخ لكبار د لموسيقا لأمازيغية وكان كايآمن ب لموهيبة ديالها.

حادة أوعكي و بناصر أوخويا شكلو تنائي فني كبير ب فضل صّوت لقوي و لفريد ديال حادة و لحرفة لكبيرة ديال بناصر ف لكتابة و شّيعر و لموسيقا. خدكو بجوج ل مدة 12 لعام قبل ما تدير حادة لگروپ ديالها ف 1981 مع شّاعير عبد الله زّهراوي.[3]

مصادر[بدل | بدل لكود]

  1. Cheikha Hadda Ouakki, la chanteuse rebelle de l’Atlas
  2. "Hadda Ouakki, la voix du Moyen Atlas", un magnifique documentaire à regarder ce dimanche sur 2M.
  3. CHEIKHA HADDA OUAKKI