باݣا

باݣا
معلومات عامة
زيادة	قيمة مجهولة
لحرفة	عاهل
لفاميلة
لمحيط	بوكوس لول ()

باݣا ؤلا باݣاس هو لماليك لّول ف تّاريخ لّي معروف بلي حكم مملكة موريطانية (سمية لقديمة د لمغريب) مامعروفش بزاف على حياتو من غير كونو عاون لماليك د نوميديا ماسينسا ف لحرب لبونيقية تانية. ؤ لعاصيمة ديالو كانت واقيلا ف شالة (الرباط دابا) ؤلا ف تامودا حدا تطوان.

لمعنى ديال سميتو

سّمية د باݣا واقيلا عندها علاقة معا أبݣي ⴰⴱⴻⴳⴳⵉ لّي هيّا سمية معروفة عند توارݣ، ؤ كتشير لواحد لحيوان كيشبه ل لكلب كيعيش ف صّحرا (ب لعربية ابن آوى).

شنو كنعرفو عليه

باݣا ماشي هوّا أول ماليك ديال موريطانية، ولاكين هوّا أول ماليك دكرو تّاريخ، ب تّحديد عند لمؤرخ روماني تيتوس ليويوس، ف كتابو تّاريخ د روما:

باݣا كان ف هاد لوقت ماليك ديال لمور
Baga ea tempestate rex Maurorum erat
تيتوس ليويوس، تّاريخ د روما، لجزء 29 فقرة 30

باݣا كان طرف من سلالة مورية قديمة لّي غالبا بدات من لقرن 4 ؤلا 5 قبل لميلاد، ؤ ستامرات حتال 33 قبل لميلاد فاش مات لماليك بوكوس تاني بلا مايخلي شي حد يخلفو. ف 206 ق.م. باݣا عاون ماسينيسا لّي كان ديك سّاع أمير ديال مملكة ماسيليا (نوميديا شّرقية)، ؤ كان راجع من إيبيريا باش ياخد لحق ديالو ف لحكم، من بعد ما مات بّاه لماليك ݣايا، ؤ زرب عليه ولد عمو لاكومازيس. حيت ماسينيسا كان خاصو يسافر وسط لمملكة د ماسيسيليا ديال سيفاكس، لّي كان لعدو ديالو، باݣا عطاه 4000 فارس موري كا حراس شخصيين. ملي ماسينيسا وصل ل لهدف ديالو، ݣال ل دوك لفرسان باش يرجعو ل بلادهم، وخا كانو عندو غير 500 فارس نوميدي.

هاد رّواية كتبين أن باݣا كان ماليك عندو حكم فعلي ؤ سلطة كبيرة علا مساحة د لأرض مابيهاش، غالبا من لمحيط لأطلسي تال واد مولوكا لّي أغلبية د لمؤرخين متافقين أنه واد ملوية ف لمغريب، مي لحدود لجنوبية ديالو مامعروفاش مزيان. لقبايل ديال لأطولول لّي هيّا قبايل جيتولية، كانت واقيلا ديجا ف لجنوب ديال مملكة موريطانية، ؤ كانت كتحد من سّلطة ديالو ف دوك لمناطق. من أهم لمدون لّي كانو تحت سّلطة ديالو، كاين ليكسوس، طنجة، وليلي، تامودا، ؤ سلا.

ف نّقيشات لّي تلقاو ل حد سّاعة سّمية ديال باݣا كتّكتب عادة ب هاد شّكل BGY.