تماشق

من ويكيپيديا
تماشق
النوع لوغة و لغة حية
ليستيعمال
اللي كبرو بيها 281,200
كايتهضر بيها ف بوركينا فاصو، مالي، لجزاير و نيجر
لوغة رسمية ف منطقة جاو، منطقة كيدال و منطقة تمبكتو
أصلية ف الشمالي، الساحل، مقاطعة لوروم، مقاطعة أودالان، محافظة ياتنغا و مالي
لخصائيص
لكتبة تيفيناغ و لكتابة اللاتينية
النّيڤو دالضعف (3) معرضة للخطر
لوضعية داللوغة 5 كاتطور
لفاميلة داللوغات
لوغة د بنادم
لغات أفريقية آسيوية
لوغات أمازيغية
لوغات توارݣية
لكواض لي كايعرّفو اللوغة
إيزو 639-3 taq
ڭلوطولوڭ tama1365
لينڭواسفير 10-AAA-b
إيطنولوڭ taq
يونيسكو 701


تماشَق ولّا تماشَك (اللي كايهضرو بيها كايسمّيوها تفاغيست) هي لوغة من اللوغات لأمازيغية من لفرع داللوغات التوارݣية كايهضرو بيها لقبايل دالرحل فشمال إفريقيا فلبلدان ديال بوركينا فاصو، مالي، الدزاير و النيجر. هادي وحدة من التلاتة داللوغات التوارݣية، الجوج لاخرين هوما تماجق وتماهق.[1]:2

كاينة تماشق بزاف فمالي، وخصوصا فلمناطيق ديال كيدال، تيمبكتو وݣاو. هاد اللوغة كاتهضر بيها ناس قليلة فبوركينا فاصو. ف2014 شي 500 ألف ديال لبشري كايهضرو بتماشق، 378 ألف هوما ماليين.[2] لمعيشة ديال التوارݣ ولّات فخطر بسباب التغيُّر دلمناخ والصراعات دالسياسة، بلخصوص التورة التوارݣية على لحوكومة دمالي ف1990-95 اللي كانت جابت ليهوم التطهير لعرقي على الشكل ديال لقتيل لينتيقامي ولمنفى.[1]:5-6 تماشق دابا مصنفة باللي هي لوغة كاتطور (5)، وهادشي راجع للترويج ديال لحوكومة دمالي لهاد اللوغة: ليوما كاتقرّا تماشق فلمدارس ديال الدولة من لبتيدائي حتال لأقسام ديال محاربة لأمية.[2]

لمصطلح ديال تماشق كايتّفهم منو فمالي باللي كايعني ݣاع لمتغيرات اللي كايهضرو بيها التوارݣ.[1]:3 لأسماء لخرين ديال هاد اللوغة هوما تَماشَن، تَماشَكين وتوماتشَك.[2]

اللهجات ديال تماشق فمالي[بدل | بدل لكود]

كاينين آراء متباينة على التقسيمات ديال اللهجات فتماشق. شي كايݣول كاينين غير جوج، وكايتسمّاو تيمبكتو وتادهاك.[2]

وحدين خرين كايݣولو باللي كاينين تلاتة ديال اللهجات فتماشق تاع مالي:[1]:6

  • كال أنصار فحدا تمبكتو (كاتسمى T-Ka (ت-كا))
  • تماشق لمدرّجة وكاينة فكيدال، تسّاليت، ݣاو، ولمجموعات اللي ماشي من كال أنصار حدا تمبكتو
  • لهجات كايهضرو بيها شي مجموعات فݣورما وأصونݣو.

النطق[بدل | بدل لكود]

الصوايت[بدل | بدل لكود]

تماشق فيها 7 ديال الصوايت فلمجموع. جوج قدّاميين /i/ و/æ/، تلاتة وسطانيين /ə/ و/æ/ و/a/، وجوج لورانيين /u/ و/o/. كاينين جوج دالصوايت لقصار: /ə/ و/æ/، لماباقي كولهوم صوايت طوال. ماكاينينش صوايت مضوبلين فهاد اللوغة.[1]:34 ݣاع الصوايت يقدّو يجيو فاللول أولّا لوسط ديال لكلمة، من غير اللخر اللي كايجي فيه غير الصوايت الطوال.[1]:34

الصوايت لقصار
لوراني وسطاني قدامي
مسدود ə
محلول æ
الصوايت الطوال
لوراني وسطاني قدامي
مسدود u i
موسط o e
محلول a

لحروف[بدل | بدل لكود]

تماشق فيها 33 حرف، هوما نيت اللي كاينين فهاد لجدوال:[1]:23

شفايهي لتايوي لتايوي
محلقن
غاري طبقي لهايوي حلقي قرجوتي
مفجر ماعندوش صوت (p) t (tˤ) k (q) (ʔ)
عندو صوت b d g
حكاك ماعندوش صوت f s (sˤ) ʃ χ (ħ) h
عندو صوت z ʒ ʁ (ʕ)
نيايفي m n ɲ ŋ
ساكن l (ɫ)
مكرر r
شبه ساكت w j

لجدوال فيه جوج دلحروف قرجوتيين: لها /h/ و لهمزة /ʔ/ (لمصدر ماحددش منين كايتنطقو).

لحروف اللي مابين جوج قواس فلجدوال ماكايتستعملوش بزاف، وكاينين غير فلكلمات اللي تسلفاتهوم تماشق.[1]:23 لحروف اللي من جاية من لعربية واللي هي السين /s/ واللام /l/ ولحا /ħ/ ولعين /ʕ/ ولهمزة /ʔ/ كاينين فلكلمات اللي جايين من لعربية. لهمزة /ʔ/ غابرة من اللهجات لعربية ديال تمّا، وكاينة غير فلكلمات اللي عندها علاقة بلإسلام.[1]:24

لحروف اللي فوسط ربعة دلقواس كايجيو غير تشديد لحروف خرين. حرف لقاف /q/ كايجي مشدد هاكّا /qq/، ولاكين يقدر يتفسّر بلغين لمشددة /ɣɣ/.[1]:24

التراكيب[بدل | بدل لكود]

الترتيب دلكلمات[بدل | بدل لكود]

الترتيب ديال لكلمات فلجمل لبساط تاع تماشق هو: فيعل-فاعيل-مفعول بيه.[1]:16 متال:

ənhæ̀y-æn médd-æn élu.
أَنْهايَن مَدَّن أَلو
شافو الرجال فيل
الرجال شافو فيل.[1]:17
--------------
ənhæy-æ̀ɤ hæræt.
أَنْهاي-ـَـغ هَرَت
أنا شفت حاجة
شفت شي حاجة.[1]:95

لجمل لفيعلية[بدل | بدل لكود]

لفيعل كايسبق لفاعيل كيمّا لميتال اللي قبل.

لفعال لمعاونة كاتجي هي اللولة فلجملة لفيعلية. كاتزاد àd (أَد) فاللول ديال لجملة باش تكون لهضرة على لمستقبل.[1]:589 متال:

àd i-jə́l.
آدْ إِ-يَل
غادي هو.ي-يمشي
غايمشي بعيد.[1]:590

النفي ديال لفيعل كايبدا ب wæ̀r (وآر)، وكاتّسمع غير [wər] (وَر) إلا جات ديريكت قبل من ə (لهمزة)، u (الضمة) و i (لكسرة).[1]:587 متال:

wər ə̀ssen-æɤ.
وار أَسَّن-ــَغ
ما (نفي) أنا.عارف
(أنا) ماعارفش.[1]:587

لجمل دالسمية[بدل | بدل لكود]

فتماشق لجملة دالسمية كاتبدا بالسمية الرئيسية (لمبتدأ) وعاد كايتبعو شرح ونعيت ديالو (خبر) إما بالسمية دليشارة، لجملة النسبية أولّا لملكية. تماشق مافيهاش التحديد.[1]:14 شي متلان ديال لجمل دالسمية راه معطيّين لتحت:

تاع السمية دليشارة[بدل | بدل لكود]

æ-háles w-á.
أَ-هآلَس و-آ
راجل هادا
هاد الراجل.[1]:15

تاع لجملة النسبية[بدل | بدل لكود]

æ-háles mæqqór-æn.
أَ-هآلَس مَقُّور-ــَنْ
راجل هو.كايكون.كبير
راجل كبير.[1]:15

تاع لملكية[بدل | بدل لكود]

é-dægg [n æ-háləs].
إِداݣّ [نْ أَ-هآلَس]
بلاصة [ديال راجل]
لبلاصة ديال الراجل.[1]:15

تاع لارقام[بدل | بدل لكود]

هادي تاع ارقام مختالفة على اللي تݣالو قبل، حيتاش لارقام كايتبعو السمية ماكايجيوش قبل منها. واحد ليستيتناء اللي كاين هو فاش الرقم واحد كايولّي يخدم فلجملة كيف النعت ماشي كيف الرقم.[1]:14 متال:

əssín méddən.
أَسّين مَدَّن
جوج رجال
جوج رجال.[1]:15

حروف لجر ولإضافة[بدل | بدل لكود]

تماشق فيها حروف لجر ولإضافة

dæ̀ɤ æ-ho.
دَغ أَ-هو
ف دخان
فالدخّان.[1]:96
-----------------
jèr-əs dætén burkína.
جِر-ــَـسْ داتِن بوركينا
مابين-هي و بوركينا
مابينها (شي ڤيلاج) و بوركينا.[1]:289

لأسئيلة[بدل | بدل لكود]

لأدوات ديال ليستيفهام فتماشق كايجيو فلبدية ديال لجملة:[1]:649-662

ajə́mm' ə́ttižal ə́n ʕali wæ̀r ø-æwwed̩.
أَجَمْ أَتّيزَل أَن علي وار أَوِّض
واش وقت.الرونديڤو تاع علي ما هو.وصل."فيعل منفي"
واش مازال ماوصل الرونديڤو ديال علي؟[1]:649

----------------

mí i-táttæ-n.
مي إِ-تاتَّ-ـنْ
شكون هو.دابا-"وقت طويل".ياكل-هو.مدكار.واحد
شكون كايّاكل؟[1]:650

لبدية دلهضرة[بدل | بدل لكود]

التقديم للهضرة كاين فتماشق، وواحد لمكوّن اللي كايقدّم لهضرة كايجي فاللول ديال لجملة. متال:[1]:615

næ̀kk ə̀nta əqqìm-æɤ.
نَكّ أَنتا أَقّيم-اغ
أنا هو ݣلس.لماضي.أنا-لفاعيل
بالنسبة ليا، أنا ݣلَست.[1]:615

التوكيد[بدل | بدل لكود]

كاين التوكيد فتماشق. الشي اللي كايتأكد عليه كايجي فاللول ديال لجملة. لحرف à (أَ)، اللي هو سمية دليشارة صغير، كايجي غاليبا من مورا الشي اللي تدار ليه توكيد.[1]:643 متال:

t-a-də̏ɤnu-t-t [à kánn-æɤ].
ت-ا-دَغنو-تّ [أَ كَنّ-ــَـغ]
مؤنّات-واحد-عصيدة.الزوان-مؤنّات.واحد     [توكيد صاوب."وقت طويل".لمضارع-أنا.لفاعيل]
عصيدة الزوان[توكيد] اللي كانصاوب.[1]:645

عيون لكلام[بدل | بدل لكود]

  1. ^ a b c d e f g h i j k l m n o p q r s t u v w x y z aa ab ac ad ae af Heath, Jeffrey. (2005). A grammar of Tamashek (Tuareg of Mali). Berlin: Mouton de Gruyter. OCLC 60839346. ردمك 3110184842.
  2. ^ a b c d "Tamasheq". Ethnologue (بنڭليزية). تطّالع عليه ب تاريخ 2019-04-11.