تاغماريت
تاغماريت
| ||
| النوع | لوغة و لغة حية | |
| تخدام | ||
| كايتهضر بيها ف | لمغريب | |
| أصلية ف | جهة طنجة تطوان الحسيمة | |
| لخصائيص | ||
| النّيڤو دالضعف | (5) مهددة بلينقراض | |
| لوضعية داللوغة | 6a مزيانة | |
| لفاميلة داللوغات | ||
| لوغة د بنادم لوغات أفرو-أسيوية لوغات أمازيغية لوغات أمازيغية دالشمال لوغات أمازيغية دلأطلس | ||
| لخاريطة | ||
 | ||
| لكواض لي كايعرّفو اللوغة | ||
| إيزو 639-3 | gho | |
| ڭلوطولوڭ | ghom1257 | |
| إيطنولوڭ | gho | |
| يونيسكو | 512 | |
| لوغات مهددة | 8469 | |
تاغماريت أولّا أمازيغية غمارة هي لوغة أمازيغية دلأطلس[1][2] من لفرع ديال اللوغات لأمازيغية دالشمال كاينة فلمغريب وكايهضرو بيها لغماريين اللي واصل لعدد ديالهوم ل10 آلاف واحد.[3] هاد اللوغة كاينة فالشمال ديال المغرب، مابين لقبايل دبني بوزرة وبني منصور. اللوغة مازال كاتدوز للصغار واخّا هي مصنفة باللي راها فخطر.[4]
كاتشبه تاغماريت لتاصنهاجيت اللي كاينة حدا كتامة. واخّا هكاك، واحد كايهضر بتاريفيت صعيب عليه يفهم تاغماريت.
من لخواص اللي كاتفرّق تاغماريت على الريفية هي لستيعمال ديال ضرف لمكان dar (دار، بالدارجة: عند) بلاصة ghar (غار) دالريفية، لجمع دلمؤنات اللي كايسالي ب-an (-أَنْ) بلاصة -in (-إِنْ)، ولغياب ديال الترخاف دلحرف اللولاني فلكلمة.
اللوغة مازال كاتعتابر فخطر واخا لكبار مازال كايعلّمو اللوغة للصغار وكايهضر بيها 10 آلاف واحد. هادشي يقدر يتْفسّر بلميساحة الصغيرة اللي كاينة فيها اللوغة ولستيعمال لكبير ديال الدارجة فلمغريب.
كاينين فتاغماريت غير تلاتة دالصوايت ( a- وi- وu-)، بحالها بحال لعربية ولوغات أمازيغية خرة:[5]
| قدامي | وسطاني | لوراني | |
|---|---|---|---|
| مسدود | i | u | |
| محلول | a |
لغمارية فيها 44 حرف، لأغلبية فيهوم تقدر تكون فيه الشدّة.[6]
| شفايهي | سنايني | لتايوي | لتايوي غاري | غاري | طبقي | لهايوي | حلقي | قرجوتي | ||||||
|---|---|---|---|---|---|---|---|---|---|---|---|---|---|---|
| باين | محلقن | باين | محلقن | باين | مشفه | باين | مشفه | |||||||
| مفجر | ماعندوش صوت | p | t | tˤ | k | kʷ | q | (ʔ) | ||||||
| عندو صوت | b | d | dˤ | g | gʷ | |||||||||
| حكاك | ماعندوش صوت | ɸ | θ | s | sˤ | ʃ | x | xʷ | χ | χʷ | ħ | |||
| عندو صوت | β | ð | (ðˤ) | z | zˤ | ʒ | ɣ | ɣʷ | ʁ | ʁʷ | ʕ | |||
| موقّف حكّاك | ماعندوش صوت | t͡ʃ | ||||||||||||
| عندو صوت | d͡ʒ | |||||||||||||
| نيايفي | m | n | ||||||||||||
| شبه ساكت | l | (lˤ) | j | w | ʔ̞ | |||||||||
| منقّر | r | rˤ | ||||||||||||
لأسماء فتاغماريت عندها بزّاف ديال لتيجاهات مشتاركة. لحرف لقبلاني a- ولّا i- ولّا u- (أَ- ولّا إِ- ولّا أُ-) كايعرّفو السمية لمدكّرة لواحدة. متال: arg'az (أَرْݣاز، راجل). بالنسبة للمؤنّات كاين ديما حرف قبلاني وواحد آخور فاللخر، بالشكل ديال ta-...-t (تا-...-ات). متال: tarbat (تارْبات، بنت). هادي هي الطريقة لمعروفة ديال التأنيت دشي كلمة. السميات دلجمع دلمدكّار كايتصاوبو ب i-...-en أولّا i-...-an (إِ-...- َنْ أولّا إ-...- ْنْ). متال: irg'azen (إِرْݣازْنْ، رجال). بالنسبة لسميات دلجمع دلمؤنّات أشهر طريقة هيّ ti-...-an (تي-...- َنْ). متال: tirbatan (تيرْباتَنْ، درّيات).[5]
تاغماريت فيها ضماير منفاصلة ديال لمفراد ولجمع.
| الضمير بتاغماريت | الضمير بالدارجة | الضمير بتاغماريت | الضمير بالدارجة |
|---|---|---|---|
| nekkin (نَكّين) | أنا | nuçna (نُسْنا) | حنا |
| kedžin (كَدْجين) | نتا | kunna (كُنّا) | نتوما |
| kemmin (كْمّينْ) | نتي | ||
| netta (نَتّا) | هو | niçma (نيسْما) | هوما |
| nettaθa (نتّاثا) | هي |
لفعال فتاغماريت عندهوم حروف دالزيادة اللي كايمتلو لفرد، لجمع ووجهة النضار. فلجدوال متال ديال التصريف دلفيعل ara (أرا، بالدارجة كتب):
| لمفراد | لجمع |
|---|---|
| ara-x (أرا-خْ، أنا كتْبتْ) | n-ara (نـ-ارا، حنا كتْبنا) |
| t-ara-t (تَ-أرا-تْ، نتا/نتي كتْبْتي) | t-ara-m (تـ-ارا-م، نتوما كتبْتو) |
| y-ara (يـ-ارا، هو كْتْب) | ara-n* (أرا-ن، هوما كتْبو) |
| t-ara (تـ-ارا، هي كتْبات) |
النعوت فلغمارية إما ماعندهش حرف لخراني -ø اللي كايميّز لمدكار لواحد، أوّلا -θ (-ث) اللي كايميّز لمؤنات لواحد ولجمع (مدكّار ولّا مؤنّات). لمتال كاين فلجدوال:
| النوع | لمتال بتاغماريت | لمتال بالدارجة |
|---|---|---|
| لمدكّار لواحد | tayfur mellulø (طايْفور مْلّول) | طبلة بيضة(*) |
| لمؤنات لواحد | tamɣart mezziθ (تامْغارْت مَزّيث) | مرة صغيرة |
| لجمع دلمدكار | irgazen muqqreθ (إرْݣازْنْ مُقْرَثْ) | رجال كبار |
| لجمع دلمؤنات | timettutan muqqreθ (تيمَطّوطَنْ مُقْرَثْ) | عيالات كبار |
(*) الطبلة فتاغماريت مدكار وسميتها tayfur (طايْفور)
متال ديال لكلمات اللي كاينين فتاغماريت:
| لكلمة بلغمارية | الطرجامة بالداريجة | ملاحضات |
|---|---|---|
| targat (تارْݣات) | حلمة | - |
| tamuda (تامودا) | حلّوف | - |
| tanebdut (تانَبْدوت) | الصيف | - |
| ahlan (أهْلَن) | مرحبا | جاية من لعربية |
| lmakla (لماكْلا) | الطعام، ماكلة | جاية من الدارجة |
| hemmam (حمّام) | لحْمّام | جاية من الدارجة |
| kama (كاما) | فراش | جاية من الصبليونية |
| تاغماريت | تشلحيت | داريجة |
|---|---|---|
| يان ن نهار, بابا نّس ن جاحا ئفك-اس سونتيم, باش اسوغ اغف (ازلّيف) ن تبرّيكت. ئسغا ت, ئشّ لحم نّس كامل تقّيم غير لكسدا خاويا. ئبّاهد داو بابا نّس. لات ئژڕ ئسدّاع : " شنو ايها ؟ " ئنّا-اس: " اغف ن تبرّيكت ".
-انا لّان ئمزݣان نّس ؟
-انا هلّان تيطّيوان نّس ؟
-انا يل ئلس نّس ؟
-لجلد ن ئغف نّس فاينووا ؟
|
يان واسّ, بابا-س ن جاحا ئفكا-اس-د سونتيم, باش اد ئسغ ئخف (اݣايّو) ن تيخسي. ئسغا ت, ئشّ تيفييّي نّس كولّو ت, غامان غار ئخسان خوانين. ييوّي ت ئ بابا-س. لّيغ ت ئژڕا ئلهو : " ما ئݣا غاياد ؟ " ئنّا اس : " ئخف ن تيخسي ".
-ماني غ لّان ئمزݣان نّس ؟
-ماني غ لّان الّن نّس ؟
- ماني غ ئلّا ئلس نّس ؟
-د واليم ن ئخف نّس ماني غ ئلّا
|
واحد نهار، لواليد ديال جاحا عطاه سنتيم، باش يشري راس ديال نعجة. شراها، و كلا اللحم كولو، بقا منو غي جثة خاوية، داه للواليد ديالو. مني غوت "شنو هادشي؟" ݣالو جاحا "راس نعجة".
- فين ودنيها؟
-فين عينيها؟
-فين لسانها؟
-و جلد ديال راسها، فين هو؟
|
كاتستعمل تاغماريت سيستيم ديال النوامر كايشبه لديال لوغات وحدين خرين. لأرقام لوحيدة اللي بقات فلغمارية بلأمازيغية هي yan (يان، واحد) وyat (يات، وحدة). لماباقي دلأرقام (من جوج ونتا/نتي طالع(ة)) جاي من الدارجة.
- ↑ Maarten Kossmann, Berber subclassification (preliminary version), Leiden (2011)
- ↑ Sebastian Nordhoff et al., "Ghomara", in: Glottolog 2.2, Leipzig: Max Planck Institute for Evolutionary Anthropology (2013)
- ↑ Jamal El Hannouche, Arabic influence in Ghomara Berber, 2010
- ↑ "Did you know Ghomara is threatened?". Endangered Languages (ب الإنجليزية). Archived from the original on 2023-07-08. Retrieved 2017-07-19.
- 1 2 El Hannouche, Jamal (2008). Ghomara Berber: A Brief Grammatical Survey (Master thesis). Archived from the original on 19 نونبر 2021.
- ↑ Mourigh, 2015