1984 (رواية)
ميّز على 1Q84 (رواية). عنداك سپويلر!. عنداك... هاد لفقرة يمكن تديرليك سپويلر و تحرقليك لقصّة.
|
1984 (رواية)
| ||
| ||
| معلومات عامة | ||
| عنوان أصلي | Nineteen Eighty-Four | |
| لموضوع رئيسي | مراقبة الدولة، حقوق لإنسان، حرية الفكر و شمولية | |
| نوع د لكتاب | خيال علمي اجتماعي، خيال سياسي، خيال عيلمي و خيال بائس | |
| طبعات ؤ طرجمات | Nineteen Eighty-Four (first edition)، 1984 (German translation)، 1984، 1984، 1984، 1984، 1984، 1984، 1984، 1984، 1984، Nineteen eighty-four، 1984، 1984، Devatenáct set osmdesát čtyři، Devatenáct set osmdesát čtyři، Devatenáct set osmdesát čtyři، 1984، 1984، 1984 و 1984 | |
| مؤلف | جورج أورويل | |
| لبلاد لأصلية | لمملكة لمتاحدة | |
| لّوغة لأصلية | نڭليزية و نيوسبيك | |
| تاريخ د نّشر | 1949 | |
| لكوپيرايت | حقوق التأليف والنشر محفوظة | |
ألف ؤ تسعمية ؤ ربعة ؤ تمانين ؤلا شي مرات كاتّكتب ب نّماري 1984 هيّا رواية ديسطوپية د لخيال لعلمي ديال لكاتب نّݣليزي جورج ؤرويل. صدرات لمرة لّولة ف 1949، ؤ كينتاقد فيها ؤرويل لأنضمة شّمولية ؤ دّيكتاتورية.[1] 1984 كانت آخر ؤ يمكن أشهر رواية كتبها ؤرويل. كان عندها تأتير تقافي كبير على لأداب ؤ سّينيما ؤ تّقافة، ب مصطلحات بحال لخو لكبير، ؤلا ؤرويلي لي ولّاو مستعملين بزاف، ؤ طيمات لي بقاو كيعاودو يتخدّمو ف روايات موراه (بحال 1Q84 ديال هاروكي موراكامي) ؤ أفلام. نّيضام شّومولي لي وصف ؤرويل ف روايتو مستلهم من ألمانيا نّازية ؤ روسيا ف عهد سطالين.[1]
رّواية تطرجمات ل كتر من 65 لوغة، ؤ كاتّعتابر من بين أفضل رّوايات ف لأداب نّݣليزي.[2]
لعنوان د لكتاب، 1984، كيدل على لعام لي غالبا كايطراو فيه لأحدات د رّواية. بسباب تّضليل ؤ تّزوير د تّاريخ لمقصود من طاراف لحوكومة ديال ؤصيانيا، شّخصيات د لقصة ف لواقع ماعارفينش تّاريخ بشكل دقيق.
كاينين شلا فرضيات علاش ؤرويل ختار هاد لعام ب تّحديد. لفرضية لّولة هيّا بلي قلب نّماري ديال 1948، لي هوّا لعام فاش بدا كيكتب رّواية ؤ فاش سالاها ؤ صيفطها ل نّاشر (ف 4 دجنبر 1948). لفرضية تّانية، هيّا بلي خداه من واحد لقاصيدة د شّيعر كانت كتباتها مراتو ب عنوان "نهاية لقرن: 1984". ولاكين كاين حتيمال بلي ختارو بشكل عشوائي كا تاريخ ف لموستقبال، حيت ف لواساخات لّولة ديال رّواية كان ستعمل عناوين خرين بحال رّاجل لّخر ف ؤروپا The Last Man in Europe، ؤلا 1980، ؤلا 1982.[3]
لقصة كيطراو لأحدات ديالها ف نّص تّاني ديال لقرن عشرين، لي ولات فيها لبشرية محكومة من تلاتة د دّوال عضيمة، هيّا: ؤصيانيا (أمريكا لجانوبية ؤ شمالية، لݣزاير لبريطانية ؤ نّص لجانوبي ديال إفريقيا)، ؤراسيا (روسيا ؤ ؤروپا) ؤ أسيا شّرقية (شّينوا ؤ كوريا ؤ جّاپون ؤ بعض لمناطق ف جانوب شّينوا). داكشي لاخور (نّص شّمالي د إفريقيا، شّرق لأوسط ؤ أسيا لوسطانية)، ف حالة د حرب دايمة مابين دوك دّوال ب تلاتة. رّواية مركّزة على شخصية ديال وينسطون سميث، لي خدّام موضّاف ف لوزارة د لحقيقة، ؤ عضو ف لحيزب لبراني، لي عندهوم متيازات على لمواطنين لعاديين (لي كيتسماو پرول ؤلا پروليين، ختيصار ديال پروليطاريا)، ولاكين ماشي ب نفس دّرجة ديال لأعضاء ديال لحيزب دّخلاني لي فيديهوم سّلطة د بصّح. وينسطون عايش ف لوندريس، ؤ لخدمة ديالو هيّا يزوّر لوتائق ؤ سّجلات على حساب شنو بغات لحوكومة ديال ؤصيانيا. وينسطون، بسباب لخدمة ديالو، كيبدا يشك ف لمصداقية ديال نّيضام لي عايش فيه، لي كيراقب لمواطنين 24 ساعة على 24، ؤ كيبدا يتسائل على تّاريخ لحقيقي ديال مدينتو، على نّاس لي كيغبرو على غفلة ؤ كيتّقطع خبارهوم، على مفهوم لحرية، ؤ واش نّيضام ديال لخو لكبير يقدر يطيح شي نهار.
كيولّي كيتلاقا معا ساطة خدّامة معاه ف نفس لوزارة سميتها دجوليا، بشكل سري، حيت لخو لكبير كيمنع حتا لحب ؤ سّيكس بلا غاراض د تّوالد. دجوليا حتا هيّا كاتّافق معاه ف لأفكار ديالو، ؤ كيتلاقاو بجوج معا واحد لعضو د لحيزب دّخلاني، سميتو ؤبراين، لي كان كشف ل وينسطون بلي خدّام معا لخوت، لي هيّا حاراكة سرية معارضة ل نّيضام كيترأسها إيمانويل ݣولدستين، لعدو لّول ديال لخو لكبير. كيتبيّن من بعد بلي ݣولدستين ف لغالب شخصية وهمية، بلي كتابو لي عنوانو لكتاب ف لواقع مكتوب من طاراف أعضاء ديال لحيزب دّخلاني، ؤ وينسطون كيتعرّض ل تّعديب من طاراف ؤبراين شخصياً، لي كيدير ليه غسيل د دّماغ باش يولّي كيطيع، بل ؤ ݣاع كيبغي لخو لكبير. لماصير د وينسطون ف لّخر كيبقا مفتوح، ؤ ماكانعرفوش واش غادي يتّعدم ؤلا غادي يبقا عايش.
رواية 1984 كان عندها تأتير تقافي كبير، سوا ب لأعمال سّينيمائية ؤ لمسراحية لي أضابطاتها ل تّلفازة ؤ لمسرح، ؤلا لأعمال لأدابية ؤ لموسيقية لي خدات كلمات ؤلا عيبارات مشهورة منها، بحال لخو لكبير Big Brother، حنا لميتين We are the dead، لخو لكبير راه حاضيك Big Brother is watching you، جوج + جوج = خمسة ؤ غيرها. بزاف د لكلمات لي ختارعهوم ؤرويل ف هاد رّواية دخلو ل لموعجام د نّݣليزية بحال doublethink (تفكير مضوبل، يعني تكون كاتعتاقد ب لحاجة ؤ لعكس ديالها ف نفس لوقت)، Thought Police (لبوليس د لأفكار، يعني أي مجموعة ؤلا مونضّامة كاتحاول تّحكّم ف طّاريقة د تّفكير ديال نّاس)، thoughtcrime (جاريمة د تّفكير)، unperson (لاشخص، يعني شخص غبراتو دّولة ف مرة ؤ محاتو من سّجلات كاملين بحال يلا ماعمرو كان، شوف حتا ضامناتيو ميمورياي)، ؤ زيد ؤ زيد.[4]
|
تقدر تزيد شوف بزاف د تّصاور و لمعلومات ديال Nineteen Eighty-Four ف ويكيميديا كومنز. |
- ^ a b مورفي، بروس (1996). موسوعة د لقاريين ديال بينيت. نيويورك: هارپر كولينز. ص. 734. OCLC 35572906. ردمك 978-0-06-181088-6.
- ^ "The masterpiece that killed George Orwell" (ب نڭليزية). 10 ماي 2009. مأرشيڤي من لأصل ف 2023-09-03. تطّالع عليه ب تاريخ 2022-01-04.
- ^ لينسكي، دوريان (2019). The Ministry of Truth: The Biography of George Orwell's 1984 [وزارة د لحقيقة: لبيوݣرافيا ديال 1984 د جورج ؤرويل]. Doubleday. ص. 167. ردمك 978-0-385-54406-1.
- ^ كيز، رالف (2009). I Love It When You Talk Retro. St Martins. ص. 222. ردمك 978-0-312-34005-6.