1Q84 (رواية)

من ويكيپيديا
Book inscription (signature) by Haruki Murakami.jpg

1Q84 (ولا 1984، و هاد سّمية لعب ب لحروف حيت كيو Q هي كيفاش كايتقرا رقم تسعود ب جّاپونيّة) هي ريواية د لكاتب جّاپوني هاروكي موراكامي كانت خرجات ف تلاتة د لأجزاء بين 2009 و 2010.[1] كانت عرفات نجاح كبير بحيت تباعت منّها مليون نسخة غير ف شّهر لّول فاش خرجات و غير ف جّاپون بوحدها.

سّمية د رّيواية[بدل | بدل لكود]

لوگو د شّركة طّاليانية إيني

1Q84 فيها تلميح ل رّيواية د جورج أورويل 1984، لّي كانت كاتصوّر واحد دّيسطوپيا كاتجري ف 1984، و هو نفس لعام لّي كاتدور فيه لقصّة د رّيواية د موراكامي. لعالم ديال 1Q84 حتّا هو مبدّل، بلا ما يوصل ل دّرجة د دّيسطوپيا، بحال يلا موازي ل لعالم ديالنا و مبدّلة فيه تفاصيل صغيرة (بحال أنو عندو جوج د لأقمار و سّبع لّي كاين ف لّوݣو د شركة طّاليانية د لمحروقات إيني مقلوب). لخو لكبير (Big Brother) لّي كاين ف رّيواية د أورويل تّا هو حاضر والاكين ب شكل مختالف: كاينين واحد لمخلوقات فوقطبيعية لّي سميتهوم "نّاس صّغار" (Little People) لّي كايوسوسو ل نّاس بلا ما يعيقو بيهوم و مرتابطين ب واحد طّايفة ديال ليمن لمتطرّف جّاپونيّ سميتهوم "لّوالا". هاد طّايفة كاتفكّر لقارئ ب طّايفة لمتطرّفة أومو شينيريكيو لّي كانت دارت عملية إرهابية ب غاز سّارين ف لميطرو د طوكيو ف 1995.

لعقدة د رّيواية[بدل | بدل لكود]

Exclam iconD.svg عنداك سپويلر!. عنداك... هاد لفقرة يمكن تديرليك سپويلر و تحرقليك لقيصّة.

رّيواية محكية من جوج د شّوفات: ديال لأبطال رّئيسيين طينݣو Tengo (لّي ف عمرو 29 عام) و آومامي Aomamé (لّي عندها 30 عام). ف جوج د لأجزاء لّوالا، كل فصل كايتبدل بين لمسار د آومامي و ديال طينݣو. ف لجزء تّالت كايتزاد واحد لمنضور آخور ديال واحد شّخصية خرا لّي هي أوشيكاوا. لمسارات كايبانو بحال يلا منفاصلين و كايبداو يتقاربو شوية ب شوية مع لفصول د رّيواية.

شخصيات رّيواية[بدل | بدل لكود]

  • آومامي : عندها 30 عام و كاتخدم معالجة طبيعية و أستادة د فنون لمدابزة. كبرات ف عائلة متديّنة من طّايفة ديال "الشهود" و بقات فيها تال عمر 11 لعام، و من بعد علّقات من دارهوم. آومامي بنت وحدانية و منعازلة على نّاس و كاتخدم قتّالة پروفيسيونيل لحساب واحد لمنظّمة كاتقتل رّجال لّي كايتكرفصو على نّسا.
  • طينݣو كاوانا : پروف د لماط و كايخدم قرّاي عند واحد دار نّشر. عزيز عليه لكتابة والاكين كايكون مازال مبلوكي باش يكتب أول كتاب مكمول ديالو. دوّز صغرو مع بّاه لّي كانت خدمتو يدور على دّيور يجمع فلوس ديال لشتيراك ف تّلفازا د جّابون إناتشكيّي NHK، و كان كايدّي معاه ولدو ف ديك لجولات. واحد نّهار نّاشير لّي كايخدم معاه غادي يطيح على واحد لمخطوط ديال واحد لبنت عندها 17 لعام (فوكاييري) سميتو "كريزاليد لهوا"، و غادي يطلب من طينݣو باش يكتبو على شكل ريواية باش يترشّحو بيه ل جايزة لأدباء شّباب.
منحوتة د لفوكوسوكي، لّي كاتشبه ل أوشيكاوا.
  • أوشيكاوا : واحد شّخصية لّي غريبة و كاتخوّف و لّي دكي بزّاف و عندو قفوزية كبيرة لّي كاتخلّيه يقرا لأحدات قبل من ما توقع، هو مدير د جمعية سميتها "جمعية تّنمية لعلمية و لفنية د جّاپون جّديد"، لّي تّمويل ديالها و نّاس لّي من موراها ما معروفينش. أوشيكاوا عندو فورما غريبة كايشبّهها لكاتيب ب لفوكوسوكي (لّي هوما منحوتات كاريكاتوريين عندهوم شعبيّة كبيرة ف جّاپون).
  • كوماتسو: عندو 45 عام و هو نّاشير ديال طينݣو.
  • فوكاييري: بنت عندها 17 لعام و هي لّي كتبات لمحطوط د "كريزاليد لهوا".
  • شيزوي أوݣاطا: مرا كبيرة رزينة و متبتة، عندها 70 عام. هي لّي كاتسير لجمعية لّي كاتآوي نّسا لّي تعرّضو ل لعنف. هي لّي حطّات سّيستيم ديال لنتيقام من رّجال لّي كايتكرفصو على نّسا و كاتقتلهوم عل يدّ قتّالة محتارفين بحال آومامي.
  • طامارو: 40 عام، هو لݣاردكور د شيزوي أوݣاطا. هو إنسان زامل و لأصل ديالو كوري.
  • أستاد إيبيسونو: هو ولي لأمر د فوكاييري و هو خبير ف لإثنولوجيا.
  • كيوكو ياسودا: هي لمرا لّي متصاحب معاها طينݣو، و هي مرا مجوجة.
  • آيومي: صاحبت آومامي و كاتخدم بوليسية.

تلميحات تقافية كاينة ف رّيواية[بدل | بدل لكود]

لموسيقا[بدل | بدل لكود]

بحال ݣاع رّيوايات د موراكامي، لإشارات ل أعمال موسيقية حاضرة ب شكل كبير ف رّيواية. نّجاح لكبير د لكتاب شمل حتا بزّاف ديال دّياسك و لمعزوفات لّي حياو من جديد و تزادو نسب لمشاهدة و لستيماع ديالهوم ف لمواقع و لمنصّات د لموسيقا:[2][3]

  • "هادا غير قمر د لكاغط" It’s Only a Paper Moon، و هي غنيةشعبية ميريكانية ديال لملحن هارولد آرلين و لكلمات ديالها كتبوهوم إيدݣار هاربورݣ و بيلي روز. لكلام د لغنية هو لّي مدكور ف لإيپيݣراف د لكتاب و معاود ف بزّاف د لبلايص ف لكتاب، و كايرمز ل لقيصّة د لحبّ لّي بين لأبطال د رّيواية.
  • سّينفونييطا Sinfonietta : و هي سيمفونية د لموسيقار تّشيكوسلوفاكي ليوش ياناتشيك. هاد لمعزوفة عندها دور د لايتموتيڤ د لكتاب. لأبطال ب جوج، كل واحد ف لعالم ديالو، و كايتصادفو معاها و كايحسّو أنها كاتربطهوم ب شي حاجة لّي ماقادرينش يحدّدو شناهيا.
  • لكلاڤيي لّي ݣانتو مزيانة Das Wohltemperierte Clavier: و هي معزوفة د يوهان سيباستيان باخ، و لّي عزيزة على لأبطال ب جوج و ب دّات طينݣو لّي كايشوف أن عندها بنية رياضياتية.
  • لوجع د لمسيح على حساب متّى Passion selon saint Matthieu، معزوفة د يوهان سيباستيان باخ لّي حاضرة ف لكتاب ف شّخصية د فوكاييري، لّي كاتغنّيها، و حتّا عند طينݣو: هي وحدة من لمقطوعات لّي كاتجيبليه لإلهام ف وقت لكتابة.
  • لاكريمايي ولا دّموع سّبعة Lachrimæ, or Seven Teares، معزوفة د لموسيقار لألماني جون دولاند و لّي عزيزة على سّيدة شيزوي أوݣاطا.
  • ألبوم Louis Armstrong Plays W.C. Handy ديال لويس آرمسترونݣ لّي تسجّل ف 1954، و كاتكون كيوكو ياسودا (جمّة طينݣو) عي لّي هداتوليه و كايعجبهوم يطلقو لألبوم من بعد ماكاينعسو معا بعضياتهوم. لألبوم حاضر حتا عند فوكاييري.
  • The Beat Goes On ديال تّونائي لميريكاني صوني و تشير. هي لغنية لّي كاتطيح ف راس طينݣو فاش كايشوف أنه هو و فوكاييري يلا وحّدو لقوة ديالهوم يمكن يشكّلو أقوى تونائي ف لعالم.

لأداب[بدل | بدل لكود]

موراكامي كايشير ف رّيواية ديالو ل بزّاف د لأعمال لأدبية لخرا، و بحالها بحال لإشارات لموسيقية، لكتوبا و لأودابا لمدكورين ف رّيواية عندهوم دور كبير ف رّسم ديال شّخصيات و لأحدات د رّيواية:

  • لكوجيكي و هوما قصص جاپونية قديمة كاتعتابر سّاس ديال تقافة د جّاپون بحيت كاتجمع لأساطير لّي كاتحكي كيفاش بانو دّزيرات د ليابان و رّبوبة ديال دّين شّينطوي. فوكاييري عزاز عليها قصص لكوجيكي و حافضاهوم مزيان.
  • أريسطو و أفلاطون : ف واحد لمقطع، طينݣو كايغلط ف شكون مول لمقولة ديال "روح بنادم مكوّنة من لمنطق، لإرادة و شّهوات"، ب نّسبة ليه هاد لهدرة ديال أريسطو و كايصحّحهاليه كوماتسو، لمقولة ف لاصل ديال أفلاطون.
  • تشارلز ديكنز: فاش كان موراهيق، طينݣو كانو عزاز عليه رّيوايات ديال ديكنز و بدّات أوليڤر تويست.

عيون لكلام[بدل | بدل لكود]