لخو لكبير

من ويكيپيديا
اذهب إلى التنقل اذهب إلى البحث
"لخو لكبير راه حاضيك" ف واحد لافيش د لكتاب د رّيواية د 1984 د أورويل

لخو لكبير ولا لبيگ براظر (من نگليزية Big Brother) هو ف لاصل ديالو شخصية متخيّلة ف رّيواية دّيسطوپية 1984 د جورج أورويل[1] و لّي كاتشير ل دّيكتاتور د دّولة د أوصيانيا و شّاف د لحيزب لوحيد لّي مسيطر على كولّشي فيها. لمفهوم د "لخو لكبير" كايتستعمل حتا باش يوصف لمؤسسات (دول، شركات، مؤسسات حوكومية بحال لموخابرات) لّي ما كاتحتارمش حقوق لإنسان لأساسية و لحياة لخاصّة د لمواطنين.[2]

ف رّيواية د أورويل[بدل | بدل لكود]

شّخصية د لخو لكبير ف رواية 1984 هي ديال واحد دّيكتاتور د واحد لبلاد متخيّلة سميتها أوصيانيا ف واحد لعالم مستقبلي دّيسطوپي. هاد دّيكتاتور فارض عبادة شّخصية على لمجتمع ديالو و شّعار لّي كايتعاود بزّاف ف دّولة هو Big Brother is watching you يعني "لخو لكبير راه حاضيك" و على حساب سّياسة د لپروپاگاندا لّي داير، كاتلقاه معمّر لّافيتات ف شّوارع ديال لبلاد.

لخو لكبير كايحضي لمواطنين كاملين و عارف آش كايديرو حتّا ف لبلايص لحميمية و لخاصّة ديالهوم: دّيور كاملين معمّرين ب أجهزة د لمراقبة و لحضية.

لخو لكبير عمّرو ما كايبان و ديما كايتصوّر ب وجه راجل عندو 45 عام ب شّلاغم و كايشوف ف لعينين نيشان ب واحد شّكل لّي كايرهب.

على حساب رّيواية رّسمية لخو لكبير هو لّي أسّس لحيزب لوحيد د لبلاد و عندو بزّاف لبوطولات و لإنجازات الثورية و لحربية.

لقضية ديال أنه كايبقا ديما صغير ب نّسبة لداكشي لّي كايتقال عليه كايخلي نّاس تشكّ واش بصّاح كاين و بأنه يقدر يكون غير ختيراع ديال لماكينة د لپروپاگاندا د لحوكومة د أوصيانيا.

ف تّقافة شّعبية[بدل | بدل لكود]

لخو لكبير ولّا من بعد ما تشهرات رّيواية د أورويل رمز باش كايتوصفو دّول ولا لمنظمات لّي فيهوم تفرعين كبير ديال لبوليس ولا لموخابرات ولا لأنظمة لأمنية لّي فيها لمراقبة لمعيّقة ديال كولشي و كتيرشي فاش ماكاتحتارمش لحياة لخاصّة د نّاس.[1]

مصادر[بدل | بدل لكود]

  1. 1.0 1.1 "1984" de George Orwell, un roman visionnaire ou satirique?
  2. BIG BROTHER - Le scandale de la surveillance des données personnelles booste les ventes de « 1984 »
Wikimedia Commons تقدر تزيد شوف بزاف د صور و معلومات ديال Big Brother ف ويكيميديا كومنز.