نݣليزية

من ويكيپيديا
(تحولات من نّڭليزية)
نݣليزية
تسمّات على لينڭليز
النوع لغة طبيعية، لغة حية و لوغة
ليستيعمال
اللي كبرو بيها 379,007,140 (2019)
كايتهضر بيها ف ساموا الأمريكية، أنغويلا، أنتيڭوا ؤباربودا، أروبا، ؤستراليا، باهاماس، لبحرين، باربادوس، بيليز، برمودا، بوطان، بوتسوانا، إقليم المحيط الهندي البريطاني، جزر العذراء البريطانية، بروناي، كامبودج، كاميرون، كانادا، جزر كايمان، جزر كوك، دومينيكا، إريتيريا، إتيوپيا، جزر فوكلاند، فيدجي، ڭامبيا، غانا، جبل طارق، ڭرينادا، لميريكان، غيرنزي، ڭويانا، لهيند، إرلاندا، جزيرة مان، إسرائيل، جامايكا، جيرزي، كينيا، كيريباتي، لوبنان، ليسوطو، ليبيريا، ماداڭاسكار، مالاوي، ماليزيا، مالديڤ، مالطا، جزر مارشال، موريس، ميكرونيزيا، مونتسرات، ناميبيا، ناورو، نيوزيلاندا، نيجيريا، نييوي، عومان، پاكيستان، پالاوس، پاپوا غينيا جديدة، ڤيليپين، جزر بيتكيرن، رواندا، سانت هيلانة وأسينشين وتريستان دا كونا، سان كيتس ؤنيڤيس، سانت لوسيا، تجمع سان مارتين، سان ڤينسنت ؤلڭرنادينز، صاموا، سيشيل، سييرا ليون، صنغافورة، سينت مارتن، جزر صالومون، جنوب إفريقيا، جنوب سودان، سري لانكا، سودان، إسواتيني، طانزانيا، توكيلاو، طونغا، طرينيضاض ؤطوباڭو، جزر توركس وكايكوس، توڤالو، جزر العذراء الأمريكية، ؤغاندا، لإمارات، نڭليز، ڤانواتو، زامبيا و زيمبابوي
أصلية ف لينڭليز، سكوطلاندا، نڭليز، ويلز، إرلاندا و جزيرة مان
لخصائيص
لكتبة أبجدية إنجليزية و أبجدية لاتينية
لمؤسسة دلمعيارة لا قيمة
كاتقرّا ف دراسات اللغة الإنجليزية
النّيڤو دالضعف (1) عادية
لوضعية داللوغة 1 وطنية
لفاميلة داللوغات
لوغة د بنادم
لغات نوستراتية
لغات أوروآسيوية
لغات هندية أوروبية
لغات جرمانية
لغات جرمانية غربية
Anglo-Frisian
Anglic
لخاريطة
Anglospeak (subnational version).svg
لكواض لي كايعرّفو اللوغة
إيزو 639-1 en
إيزو 639-2 eng
إيزو 639-3 eng
ڭلوطولوڭ stan1293
لينڭواسفير 52-ABA
إيطنولوڭ eng

لينݣليزية ولا نّݣليزية ؤلا لونݣلي (ب نّݣليزية English) هيّا لوغة هندوؤروپية، ؤ ب ضبط جرمانية غربية لي لأصل ديالها من نّݣليز. تاتًهضر نّݣليزية ف ݣاع لقارّات د لعالم ؤ تاتعتابر حاليا هي لّوغة لّولة ف لعالم من ناحية د لينتاج لعلمي. تقريبا مليار ؤ نص د ناس ف لعالم تيهضرو نّݣليزية، منهم مابين 360 و 400 مليون لي هي لّوغة د لم ديالهم.[1][2]

نّݣليزية هي واحد لّوغة جرمانية. هي تالت أكتر لوغة كيهضرو بها ناس ف لعالم كا لوغة د لم أما أكتر لوغة كيهضرو بيها هي شينوية ؤ تابعاها صبليونية.[3]

نتاشرات لينݣليزية ف لعالم من بعد لقرن 17، مع لإمبراطورية لبريطانية ؤ لميريكان. مورا لحرب لعالمية التانية، ؤ حيث ولات لميريكان قوة عوضما، فرضات لينݣليزية راسها كا لوغة عالمية، ؤ ولات هي لوغة لولة ف لعالم ف بزاف د لينتاجات ؤ ضّومينات. لينݣليزية هي لوغة رسمية ف بزاف د لهيئات ؤ لمؤسسات ف لعالم بحال لأمم لمتًحدة ؤ ليتيحاد لؤروپي.[4] نݣليزية هي لوغة رسمية ف 67 بلاد. ؤ هيّا لّولة من حيت تّعلام ديالها كا لوغة تانية.

ماكاينش شي فرق كبير ما بين لينݣليزية ديال ميريكان و لينݣليزية ديال بريطانيا ف لمفردات ؤ لقواعد. كاينين شلة ديال لّهجات ؤ لّكنات ديال نّݣليزية، ف بزاف د لبلدان ؤ لمناطق، لّي كتختالف بيناتها ف لفونولوجيا ؤ صّوتيات، ؤ شي مرات حتا ف لموعجام، لإيديومات، لݣرامير، ؤ طّريقة د لكتبة، ولاكين ب شكل عام كيتفاهمو بيناتهم، من غير شي حالات فاش كيكونو جوج لهجات متباعدين بزاف جغرافيّان. شّخص نّاطق ب نّݣليزية كيتسما أنݣلوفوني.

لينݣليزية هي لوغة لأجنبية تانية من حيت عدد ناس لي تيهضروها ف لمغريب، من بعد لفرانساوية. تقريبا 6 د لمليون د لمغاربة قالو علا راسهم بلي تيهضرو نّݣليزية ف إحصائيات د 2014.[5]

تّصنيف لّوغاوي[بدل | بدل لكود]

شّجرة ديال لّوغات لجرمانية لغربية

نّݣليزية لوغة هندوؤروپية، ؤ ب تّحديد كتنتامي ل لفرع ديال لّوغات لجرمانية لغربية. نّݣليزية لقديمة جات من ستيمرارية لوغاوية كتمتّل مجموعة د لّهجات ؤ لّوغات لّي كانو كيهضرو قبايل جرمانية علا شّط ديال لبحر شّمالي ف لمنطقة د فريزيا. هاد لّوغات تطورو ب شكل تدريجي ل تلاتة د مجموعات، هوما لّوغات لأنݣلية ف لجزر د بريطانيا، لّوغات لفريزية، ؤ لألمانية سّهلية.

لّوغات لأنݣلية ؤ لوغات لفريزية كيتجمعو عادة ف فاميلة وحدة د لّوغات لأنݣلوفريزية، لّي كتمتل مجموعة د لّوغات كاتعتابر أقرب وحدين ل نّݣليزية. ؤ هاد لفاميلة بدورها كتّجمع معا لألمانية سّهلية ف فاميلة كتسمّا لّوغات لإنݣڤايونية ؤلا لّوغات لجرمانية د لبحر شّمالي، مي كاينين عولاما د لّيسانيات كيعارضو هاد تّصنيف لّخر.

نّݣليزية لقديمة من بعد غادي تطور ل نّݣليزية لوسطانية، لّي حتا هيّا غادي تطور ل نّݣليزية لّي كنعرفو دابا. نّݣليزية كتبان مختالفة علا لّوغات لجرمانية لوخرة، حيت عزلها لبحر علا خواتاتها ل مدة طويلة، ؤ من بعد غادي تأتر ب نّوردية لقديمة ؤ لفرانساوية. واحد نّيسبة كبيرة ديال لموعجام د نّݣليزية جاي من لفرانساوية.[6]

نّݣليزية كتّعتابر لوغة جرمانية حيت كتّشارك معا لّوغات لجرمانية لوخرة ف تغييرات ؤ زيادات لّي ماكانلقاوش ف لوغات خرين. هادشي كيدل بلي هاد لّوغات منحادرة من شي لوغة قديمة كتسما لپروطوجرمانية لّي كانت كتّهضر ف شمال ؤروپا ف لعصر د لحديد. من بين لخاصيات لّي كيتشاركو فيها لّوغات لجرمانية، كاين تّقسيم ديال لفعال ل فعال قوية ؤ فعال ضعيفة. نّݣليزية كتّعتابر لوغة أنݣلوفريزية حيت هيّا ؤ لّوغة لفريزية كيتشاركو ف خاصيّات إضافية، سيرتو شي تويشيات ف تّصريف د لفعال ؤ ف نّوطق.[7]

تّاريخ[بدل | بدل لكود]

نّݣليزية لقديمة[بدل | بدل لكود]

لبدية ديال لملحامة د بيوُولف مكتوبة ب نّݣليزية لقديمة

أقدم شكل من شّكال د نّݣليزية كيتسما نّݣليزية لقديمة ؤلا لأنݣلوساكسونية، لّي كانت مهضورة مابين لقرن سّات ؤ لقرن حضاش ميلادي. نّݣليزية لقديمة تطورات من مجموعة د لّهجات لجرمانية لغربية، لّي عادتن كتّجمع ف إطار لّوغات لأنݣلوفريزية، ؤلا لّوغات لجرمانية د لبحر شّمالي، ؤ كانت مهضورة ف فريزيا (شمال د هولاندا ؤ شوية ف لغرب د ألمانيا)، ف ساكسونيا سّفلية (شّمال لغربي د ألمانيا)، ؤ ف لجنوب ديال شبه جزيرة يوتلاند (شّمال د ألمانيا ؤ لجنوب د دّانمارك).[8]

ف لقرن لخامس لميلادي، لقبايل لأنݣلوساكسونية ستاقرات ف بريطانيا من بعد ما طاحت لإمبراطورية رّومانية لغربية. جوج قرون مورا داكشي ولّات لّهجات لجرمانية ديالهم هيّا لّي مسيطرة ف بريطانيا، ؤ خدات لبلاصة ديال لّوغات لّي كانت ف إقليم بريطانيا رّومانية، بحال لبريطونية لقديمة لّي كتعتابر لوغة كيلتية، ؤ لّاتينية. هاد لّهجات ولّات كتسما Ænglisc إنݣليسك لي ولّات English إنݣليش نيسباتن ل لقبايل لأنݣلية، ؤ لبلاد ديالهوم ولّات كتسما Ænglaland إنݣلالاند ؤلا بختيصار England إنݣلاند.[8][9]

نّݣليزية لقديمة كانو فيها 4 ديال لّهجات رّئيسية، لّي كينقاسمو ل جوج مجموعات: لّهجات لأنݣلية (لّهجة لميرسية ؤ لّهجة نّورثامبرية) ؤ لّهجات سّاكسونية (لّهجة لكينتية ؤ لّهجة سّاكسونية لغربية).ب سباب لإصلاحات تّعليمية ديال لماليك ألفريد لعاضيم ف لقرن تّاسع غادي تولي لّهجة سّاكسونية لغربية ديال مملكة ويسيكس هيّا لّوغة لمعيارية ديال نّݣليزية لقديمة.[10]

جوج د نّوصوص لمعروفين ب نّݣليزية لقديمة هوما لملحامة ديال بيوُولف لّي كانت مكتوبة ب سّاكسونية لغربية، ؤ نّشيد ديال كييْدمون لّي تكتبات ب لّهجة نّورثامبرية، ؤ لّي هيا أقدم قصيدة شيعرية نݣليزية معروفة.[11] نّݣليزية لعصرية تطورات سيرتو من لّهجة لميرسية ؤ سّكوطلاندية من لّهجة نّورثامبرية. ف لقرن لخامس كانت نّݣليزية لقديمة كتّكتب ب لأبجدية رّونية بحال لّوغات لجرمانية لوخرة، سيرتو لّوغات لأنݣلوفريزية، مي معا لقرن سّات، ولّات كتّكتب ب لأبجدية لّاتينية، معا شي رموز رونية بحال þ (= ث) ؤ ð (= ذ).[12]

نّݣليزية لقديمة وخا هيّا لجدة د نّݣليزية لعصرية، ماكاينش تفاهوم بيناتهوم، ؤ شي نݣليزي من لقرن لواحد ؤ عشرين مايقدش يفهم نّݣليزية لقديمة بلا مايتعلّم ليها. لݣرامّير ديال نّݣليزية لقديمة كتشبه ل ديال لألمانية ديال دابا، ؤ أقرب لوغة ليها كانت هيّا لفريزية لقديمة. نّݣليزية لقديمة متلان فيها لإعراب ديال سّميات، بحال ف لألمانية، علا حساب واش فاعل، مفعول، ؤلا مجرور، ؤ نفس شي كينطابق علا لحروف د لإضافة، لفعال ؤ نّْعوت. نّݣليزية لعصرية ب لمقارنة، فيها شكال قلال ديال ضّماير ؤ شّكال ديال تّصريف د لفعال حتا هوما قل من دوك لّي كاينين ف نّݣليزية لقديمة.[8] هاد تطور كيشبه لّي وقع ما بين لعربية ؤ دّاريجة. هادا ميتال ديال جملة ب نّݣليزية لقديمة ؤ لموقابيل ديالها ب نّݣليزية لعصرية، ب طرجمة ل دّاريجة:

  • نّݣليزية لقديمة: Foxas habbað holu and heofonan fuglas nest
  • نّݣليزية لعصرية: Foxes have holes and the birds of heaven nests[13]
  • داريجة: تّعالب عندهوم حفاري ؤ طّيور د سّما عندهوم عشاش

نّݣليزية لوسطانية[بدل | بدل لكود]

معا تّأتير ديال لوغات خرة، غادي تطور نّݣليزية لقديمة بشكل تدريجي ل نّݣليزية لوسطانية. تّاريخ لّي كيتّعطا عادة ديال لبدية د هاد تّطور هوّا 1066 فاش جا ويليام لفاتح نّورماندي باش يسيطر علا نّݣليز. ولاكين نّݣليزية لوسطانية ماكاتميّز ب شكل فيعلي حتال مابين لقرن تلطاش ؤ لقرن خمسطاش.

بزاف د لكلمات ديال نّݣليزية لقديمة غادي يبداو كيتّنساو ؤ كيتعوضو ب كلمات ديال نّوردية لقديمة لّي كانو جابوها سّكانديناڤيين من لقرن لعاشر، يعني قرن قبل من ويليام لفاتح. هادشي طرا بشكل تدريجي، ؤ مدة طويلة كانو لكلمات ديال نّݣليزية ؤ لموقابيلات نّوردية ديالهوم كيتّسعملو جنب ب جنب. لكاتب ؤ دّيپلوماسي نّݣيليزي ويليام كاكستون ف لّخر ديال لقرن 15 كان متلا كيتشكا بلي بنادم ماكيعرفش إينا كلمة فيهوم يخدّم، بحال كلمة ey إي لّي ب نّݣليزية لقديمة كتعني بيضة (ب لألمانية Ei)، ؤ لموقابيل ديالها egg إيݣ، لّي دخل من نّوردية ؤ لّي مستعمل دابا ف نّݣليزية لعصرية. أمتلة خرين لّي تّنساو فيهوم لكلمات ديال نّݣليزية لقديمة ل صالح كلمات ديال نّوردية كاين sweostor موقابيل syster (دابا sister بمعنى خت)، niman موقابيل taca (دابا take، بمعنى خدا)، ؤ grama موقابيل angr (دابا anger، بمعنى غضبة).[8]

معا لستيعمار نّورماندي ديال ويليام لفاتح، غادي تبدا نّݣليزية كتأتر ب لفرانساوية لقديمة. لأغلبية د نّوبالا من أصل نݣليزي يا غادي يموتو ف لمعارك ضد لجيش نّورماندي ديال ويليام، يا غادي يتّحكم عليهوم ب لإعدام ب تهمة د لخيانة، من بعد ما ويليام شد لحكم د نّݣليز. غادي تولي ضونك لفرانساوية ل مدة جوج قرون هيّا لّوغة د لقصر لمالاكي ؤ ديال طّبقة د نّوبالا نّورماندية لّي عوضات طّبقة لقديمة. ب سباب لختيلاط ديال نّورمانديين معا نّݣالزا ب جّواج، ؤ حيت نّاس ديال طّبقات لجتيماعية نّازلة خاصهوم يكومونيكيو معا سيادهوم، غادي ينتاشرو لكلمات لّي جايين من لفرانساوية ف لهضرة ديال لعامة د نّݣالزا.[8]

وحدة من لموميزات ديال نّݣليزية لوسطانية ف لݣرامير هوّا بلي فقدات تّمييز لعشوائي ديال جّندر د سّميات (دكري، نتوي، محايد) لّي كان ف نّݣليزية لقديمة، ؤ ولّا جّندر متعلق ب لمعنى ديال سّمية، لّي كيتسما جّندر طّبيعي. لإعراب حتا هوّا بدا كيطير بشوية حتا غبر ف مرة معا لبدية د لقرن 16 فاش كتبدا لفترة ديال نّݣليزية لعصرية.[8]

من بين أهم لمكتوبات لأدابية لّي تكتبو ب نّݣليزية لوسطانية، كاين لحجّايات د كانتربوري The Canterbury Tales ديال دجوفري تشوصر، أعضم كاتب نݣليزي قبل من شيكسپير، ؤ كتبو مابين عام 1387 ؤ 1400.[8]

مرة خرة نفس لميتال ديال قبل، ولاكين معا لجوملة ب نّݣليزية لوسطانية حتا هيّا:

  • نݣليزية قديمة: Foxas habbað holu and heofonan fuglas nest
  • نّݣليزية لوسطانية: Foxis han dennes, and briddis of heuene han nestis
  • نݣليزية عصرية: Foxes have holes and the birds of heaven nests[13]
  • داريجة: تّعالب عندهوم حفاري ؤ طّيور د سّما عندهوم عشاش

لبدية د نّݣليزية لعصرية[بدل | بدل لكود]

ف لقرن 16 كاتبدا لفترة ديال نّݣليزية لعصرية. هاد لفترة نقدرو نقسموها ل جوج فترات، نّݣليزية لعصرية لمبكّرة (من لبدية د لقرن سطاش تال لقرن تمنطاش)، ؤ نّݣليزية لعصرية لمعطلة (من لقرن تمنطاش ؤ تسعطاش تال دابا).[14]

نّݣليزية لعصرية لمبكّرة[بدل | بدل لكود]

تميزات هاد لفترة ب تلاتة د لحوايج رئيسيين: تّكحيزة لڤوايلية لكبيرة، تّبسيط ديال لقواعد د لإعراب، ؤ لمعيرة لّوغاوية د نّݣليزية. تّكحيزة لڤوايلية لكبيرة هوّا فينومين ليساني لي أدّا ل تغيير جدري ف طّاريقة د نّوطق ديال لڤواييلات ف نّݣليزية، سيرتو لڤواييلات طّوال. متلا كلمة bite (ب معنى عض) كانت كاتّنطق بحال beet بيت، مي مورا لقرن 16 ولات كاتّنطق بايت، ؤ كلمة about كانت كاتّنطق أبوت (بحال boot) ؤ دابا ولات أباوت. هاد تّكحيزة كانت كبيرة حيت كلا تبديل ف سّيستيم د لڤواييلات كان كيأدي ل تبديلات خرين ؤهيا غادية. هاد لفينومين كيفسّر علاش نّڭليزية لعصرية مامتناسقاش ديما ف نّطقان ؤ لإملاء، حيت بزاف د شّكال لكتابة بقاو من نّڭليزية لوسطانية، ؤ علاش لحروف د لڤواييلات ف نّڭليزية كيختالف نطقانهوم ف شلا حالات على نّطقان ديالهوم ف لوغات ؤروپية خرة.[15]

تّوزيع لجغرافي[بدل | بدل لكود]

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها
خريطة د دّول للي فيها لونݣلي لغة رسمية

لفونولوجيا[بدل | بدل لكود]

Bästa utökade.svg
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها
مثال د هضرة بلينݣليزية ب صّوت د راجل ميريكاني

عيون لكلام[بدل | بدل لكود]

  1. ^ لإحصائيات د لمجلة د بابل
  2. ^ "What are the top 200 most spoken languages? [شنو هوما لّوغات ل 200 لأكتر مهضورين ف لعالم؟]" (بنڭليزية).
  3. ^ "English Language Statistics [سطاتيستيك ديال نّݣليزية]" (بنڭليزية).
  4. ^ ليستة د لّوغات رّسمية د ليتيحاد لؤروپي
  5. ^ لإحصائيات د لهضرة د لينݣليزية فلمغريب
  6. ^ "History of English [تّاريخ د نّݣليزية]" (بنڭليزية).
  7. ^ ويين هيربيرت (2007). The Germanic Languages [لّوغات لجرمانية]. لمطبعة ديال جامعة كامبريدج.
  8. ^ a b c d e f g ألبرت س. باف، طوماس كييبل (2002). A History of the English Language [تاريخ د لّوغة نّݣليزية] (بنڭليزية). روتليدج.CS1 maint: uses authors parameter (link)
  9. ^ "Engla land" (بنڭليزية).
  10. ^ طوماس تون (1992). The Cambridge History of the English Language. 1: The Beginnings to 1066 [تّاريخ ديال كامبريدج د لّوغة نّݣليزية، لݣزو لّول، من لبدية حتال 1066]. لمطبعة ديال جامعة كامبريدج.
  11. ^ دانييل دونوݣو (2004). "Old English Literature [لأداب نّݣليزي لقديم]". doi:10.1002/9780470776025. Cite journal requires |journal= (معاونة)
  12. ^ "Anglo-Saxon runes (ᚠᚢᚦᚩᚱ/Futhorc/Fuþorc)" (بنڭليزية).
  13. ^ a b لاص, روجر (2006). دينيسون, ديڤيد; هوݣ, ريتشارد م. (إيديتورات). A History of the English language [تّاريخ د لّوغة نّݣليزية]. لمطبعة ديال جامعة كامبريدج. pp. 46–47. ردمك 978-0-521-71799-1.
  14. ^ "Late Modern English" (بنڭليزية).
  15. ^ مانفريد ڭورلاخ (1991). Introduction to Early Modern English. مطباعة جامعة كامبريدج. pp. 66–70.

شوف تا[بدل | بدل لكود]

Wikimedia Commons تقدر تزيد شوف بزاف د صور و معلومات ديال English language ف ويكيميديا كومنز.