صاموا

من ويكيپيديا
اذهب إلى التنقل اذهب إلى البحث
صاموا

Malo Sa’oloto Tuto’atasi o Samoa (sm)
Independent State of Samoa (en)
Sāmoa (sm)

Flag of Samoa.svg Coat of arms of Samoa.svg
نشيد The Banner of Freedom

[[File:|100px]]

لعاصيمة أپيا
الساكينة
شحال دالسكان 196,440 (2017)
اللوغات الرسمية نڭليزية
صاموية
متوسط ديال لعمر 75.013 (2016)
لجغرافيا
لميساحة 2,842 كم²
لقمة لعالية سيلي سيلي (1,858 م)
لبلاصة الطايحة لمحيط لمهدّن (0 م)
لإدارة
أو لي آو أو لي مالو فآليتوا سوالافي الثاني
رئيس وزراء ساموا Tuilaepa Aiono Sailele Malielegaoi
لبرلمان لجمعية التشريعية د صاموا
لقتيصاد
مؤشر التنمية لبشرية 0.713 (2017)
لفلوس تالا
معلومات خرا
توقيت ديال لبلاد ڭرينيتش + 13
رمز لبلاد WS
رمز لانترنيت ‎.ws‎
رمز التيليفون +685
نيميرويات دليرجونس 999، 994، 995 و 996
الجهة دالصوگان ليمن و ليسر
السيت الرسمي samoagovt.ws

صاموا، رسميا الدولة لمستقلة د صاموا (بالصاموية: Malo Saʻoloto Tutoʻatasi o Sāmoa - بلينݣليزية: Independent State of Samoa)، و اللي كانت تاتسمّا تا صاموا لغربية ولا صاموا لألمانية، هي بلاد أرخبيل جات ف لمحيط لمهدن و تابعة للقارة د أوقيانوسيا. صاموا فيها 4 د لجزر مسكونة، جوج كبار و جوج صغار، و عاد كاينين بزاف د لجزر صغار ما مسكونينش.

أول ناس سكنو ف صاموا هوما لقبايل ديال لاپيطا، اللي سكنو فيها هادي 3500 عام. ف 1899، ستعمرات ألمانيا لجزر، و بقات فيها تا بدات لحرب لعالمية اللولا ف 1914. من بعد ستعمراتها نيوزيلاندا، تال 1962، اللي هو لعام اللي ستاقلات فيه رسميا صاموا لغربية و ولاّت جمهورية. ف 1997، بلادت لبلاد سميتها من صاموا لغربية ل صاموا.[1]

تيسكنو ف صاموا شويا كتر من 200.000 واحد، و لعاصمة ديالها هي أپيا. اللغات الرسمية د لبلاد هوما الصاموية و لينݣليزية، و لفلوس اللي كاتخدّم ف لبلاد هي تالا. صاموا كاتسما غربية، حيت كاينة جزر صاموا آخرا ف الشرق تابعة للميريكان، سميتها صاموا لميريكانية. صاموا عندها نضام جمهوري، و الديانة الرسمية ديالها هي لمسيحية. دخلات لبلاد مع لأمم لمتحدة ف 1975، و هي داخلة مع منضمات دولية آخرا بحال لكومنويلت.

التاريخ[بدل | بدل لكود]

التاريخ لقديم[بدل | بدل لكود]

عولاما من نيوزيلاندا دارو التأريخ ولقاو باللي أقدم لبقايا ديال لبشري اللي كاينين عمرهوم مابين 2900 و3500 عام. هاد لبقايا تكتاشفو فموقع ديال التقافة داللاپيتا، وتنشرو هاد لأبحات ف1974.[2] لأصول ديال الشعب الصاموي تدارو عليهوم ديراسات جينية ووحدين خرين عندهوم علاقة باللوغة والتاريخ دلبشري. واخّا هاد لبحوت باقين كاينين، بزّاف ديال التخمينات تعطاو. واحد التخمين كايݣول باللي الصامويين لأصليين هوما بحّارة جاو من التوسع ديال الناس صحاب التقافة داللاپيتا من لجانوب ديال آسيا مابين 2500 و1500 قبل لميلاد.[3]

الروابيط اللي كانو مابين صاموا وݣزاير قراب ليها (بحال فيدجي وطونݣا) كانت علاقات ديال الدم والتقافة، ولقصص لقدام اللي باقين كايتعاودو ليوما كاتأكد باللي كان سفر مابين هاد لݣزاير. نافانوا كانت ملكة ومحاربة اللي تدار منها إلاهة فالديانة الصاموية لقديمة واللي لملوك اللي جاو من بعد منها كانو كايطلبو الرعاية ديالها.[4]

لقرون 18 و19[بدل | بدل لكود]

دار صاموية فأپيا، 1842.

بدات لمحاكّة ديال الصامويين معا لأوروپيين فلبدية دلقرن 18. ياكوب روݣيڤين كان هو لبحّار اللول اللي قدر يشوف لݣزاير دصاموا ف1722. من موراها لحݣ عليه لفرانساوي لبحّار لويس أنطوان دو بوݣانڤيل، واللي سمّاهوم ݣزاير لمستكشف "Navigator Islands" ف1768. التماس معا هاد الناس كان محدود حتال التلاتينات ديال لقرن 19، فاش التجار والصيادة ولبعتات لمسيحية اللي جايّة من النݣليز بداو كايمشيو لتمّا.[5]

ماتاآفا يوسيفو (1832-1912) كان منافس ديال لملكية فصاموا.

الزيارات ديال التجار والصيادة لميريكانيين اللوالة كانت سباب فالتطور ديال لقتيصاد ديال صاموا. أول باطو ديال التيجارة كان هو ديال لقبطان بنيامين ڤاندرفورت فأكتوبر 1821، وأول باطو ديال الصيد دلبالين كان ديال لقبطان ريتشارد مايسي ف1824.[6] الصيادة كانو فاللول كاينزلو ف تمّا باش ياخدو لما، لحطب ولمونة، ومن بعد خدّمو معاهوم ولاد لبلاد فلباطوات ديالهوم. آخر صيّاد مسجل مشا لتمّا كان هو "لحاكم مورطون" ف1870.[7] بدات لخدمة ديال لبيعتات دالتبشير اللي كانت جايّة من لندن وزارت جزر كوك من قبل فصاموا تحت لقيادة ديال جون ويليامز ف1830.[8] بحساب ماݣالت باربرا ويست: "الصامويين من مورا ماكايقتلو لعدو ديالهوم، كايحيّدو الراس من لجوتّة وكايورّيوها للقيّاد ديالهوم، باش يبينو ليهوم الشجاعة اللي فيهوم."[9]

لألمان كانو عندهوم طمايع فصاموا، وخصوصا فلݣزيرة دؤپولو، اللي فيا تحكّمات الشركات ديالهوم فلمصايبة دالشكلاط واللحم لبيض دلكوك. لميريكان بغات لحق ديالها من لݣزاير دصاموا، على حساب لپّاريخات اللي كانو عندها تمّا، زيادة على جوج ݣزاير اللي ولّاو ليوما "صاموا لميريكانية" واللي مازالة متّحكّمة فيهوم حتال ليوم. لمملكة لمتحدة حتّى هي صيفطات لعسكر ديالها باش تدافع على لمقاولات ولمراسي ولبيرو ديال لقنصلية ديالها تمّا. كترة الشحين والتݣياد للقبايل الصاموية اللي كانت متحاربة بيناتها، ولمصايبة ديال لحلفاء لكولّا دولة من دوك التلاتة، زيادة على التداريب والسلاح، جات لحرب لأهلية الصاموية اللولة واللي سالات فاش ضربات عاصيفة نهار 15 مارس 1889 وهرسات لباطوات والسلاح ديال دوك الدول كاملين.[10]

لحرب لأهلية الصاموية التانية بدات فاش جاو ألمانيا، لمملكة لمتحدة ولميريكان باش يتفاهمو على شكون غايشد السولطة على ݣزاير صاموا. لحصار د أپيا طرا فمارس 1899 فاش لعسكر ديال لأمير تانو تحاصر، واللي دارو هاكّا هوما توار كانو تابعين لماتاآفا يوسيفو. لعسكر ديال لأمير خداو السلاح من عند ربعة دلپاريخات تاع لحرب لميريكانية ولبريطانية، وربحو لحرب من مورا شي إيّامات دلمقاتلة.[11]

لقرون 20 و21[بدل | بدل لكود]

لبيعتة ديال النݣليز ولالمان ولميريكان حيّدات لملكية فيونيو 1899.

خدات ألمانيا لحوكم ديال لأرخبيل لغربي من 1900 حتال 1914. عيّنات ليمبراطورية لجرمانية لحاكم لعام ويليم صولف. ف1908 بانت حركة ديال لمقاومة اللي كانت سلمية، وكانت سميتها "مو آ بولي". صولف دار النفي للزعيم ديال هاد لحركة، واللي كان هو لاواكي نامولاولو ماموي.[12] لحوكومة دألمانيا خدمات بلمبدأ ديال "كاينة غير حوكومة وحدة فلبلاد"، وماتسوقوش للملك ولّا للحكّام ديالو، ودارو فيهوم غير مستشارين عند الدولة.[13] فالشهر اللول ديال لحرب لعالمية اللولة، نهار 29 غشت 1914، مشات قوات ديال لعسكر لخاص دنيوزيلاندا تحت الطلب ديال لمملكة لمتحدة وخدات لحوكم من عند السلطات لألمانية، ودار "خدمة إمپيريالية واعرة وديال بالزز".[14]

تحكّمات نيوزيلاندا فلݣزاير تحت لمراقبة ديال لأمم لمتحدة حتال 1962.[15] كانت نيوزيلاندا فهاد لفترة (1914-1962) مسؤولة على جوج فواجع: ماتت لخمس ديال السكّان (كتر من 20 فلمية) بسباب الرواح الصبليوني اللي واخّا كان كاينقّز من بلاد لبلاد، ماعمرو قاس صاموا حتّى جابوه لعسكر ديال نيوزيلاندا فباطو جاي من أوكلاند نهار 7 نونبر 1918، واللي وصلات للناس كاملين قبل ماتدوز صيمانة على لمجي ديالو.[16] 30 فلمية دالرجال، 22 دلعيالات و10 فلمية دالدراري الصغار ماتو.[16] لفاجعة التانية كانت نهار 28 دجنبر 1929[17]، فاش لبوليس ديال نيوزيلاندا قتلات توپوا تاماسيسي ليالوفي التالت وهو كان كيحاول يهدّن مابين لبوليس ولمتضاهرين اللي خرجو فلحركة ديال "مو آ بولي"، واللي كانت حركة سلمية ضد ليحتيلال ديال نيوزيلاندا لبلادهوم. عشرة خرين ماتو وشي 50 تجرحو بالرصاص ولعصا ديال لبوليس.[18][19] فالداكرة الشعبية ديال الصامويين داك النهار كايتسمّى "السبت لكحل".

لكنيسة لكاتوليكية ديال صاموا

من مورا بزاف ديال لمحاولات اللي عاوداتها لحركة ديال ليستيقلال، ولّات صاموا لغربية مستاقلة نهار 1 يناير 1962 من مورا ماتفعّل "لقانون ديال صاموا لغربية 1961" واللي خرج نهار 24 نونبر 1961.[20][21] سنات صاموا معاهدة ديال الصلح معا نيوزيلاندا وولات أول دولة ݣزرية فلمحيط لمهدن تاخد ليستيقلال ديالها. واخّا هكاك، صاموا كاتحتافل بعيد ليستيقلال ديالها كولّا عام نهار 1 يونيو.[22][23] دارت لحوكومة ف4 يوليوز 1994 تعديل فالدستور ديال لبلاد باش تبدّل السمية ديال صاموا لغربية وتولّي صاموا[24]، عند لأمم لمتحدة السمية ديال لبلاد كانت ديما مسجّلة ب"صاموا" واخّا هكّاك.[25] صاموا لميريكانية حتجّات على هاد لقرار، "اللي كايصغّر لأهمية ولهوية ديالها".[25] ف2002 عتارفات نيوزيلاندا باللي كانت سباب فلينفلوانزا الصبليونية اللي ضربات صاموا ف1918 وعتادرات على هادشي.[26][27] ف7 شتنبر 2009 بدّلات لحوكومة دصاموا الجيهة دالصوݣان من ليمن باش تولّي فجيهة ليسر، كيما بزاف ديال لبلدان فديك لمينطاقة بحال ؤسطراليا ونيوزيلاندا، واللي ساكنين فيهوم بزاف ديال الصامويين.[28] هادشي خلا صاموا تكون الدولة اللولة فلقرن 21 اللي غاتبدل الجيهة دالصوݣان تاعها.[29]

فاللافان ديال 2011 بدّلات صاموا التوقيت ديالها من ݣرينيتش -11 حتال ݣرينيتش +13، ونقزات نهار الجمعة 30 دجنبر 2011 كاملو ودازو للسبت 31 دجنبر.[30] هادشي كان لهدف منو هو يكون زيادة فالتعامول لقتيصادي مع ؤسطراليا ونيوزيلاندا. التوقيت لقديم واللي داروه ف1984 كان قريب من التوقيت ديال لميريكان.[31] قبل التغيير كانت صاموا موخرة بفرق د23 ساعة على التوقيت ديال مدينة سيدني، أمّا مورا التغيير ولّأت زايدة عليهوم غير بفرق ديال 3 سوايع. ف2017 سنات صاموا على لمعاهدة ديال التحريم دالسلاح النووي.[32] فيونيو 2017 لبرلامان ديال صاموا دار تعديل فلمادة اللولة ديال الدستور، واللي خلّا لمسيحية تولّي دين رسمي ديال الدولة.[33][34]

الدولة[بدل | بدل لكود]

التقسيم ديال لبلاد ولمدون[بدل | بدل لكود]

لخريطة ديال مقاطعات صاموا

صاموا دولة مقسومة ل11 مقاطعة (بالصاموية: itūmālō). هادو كانو لمقاطعات اللي كانو قبل مايجيو لأوروپيين. كولّا مقاطعة عندها لمؤساسة الدستورية ديالتها (fa'avae) اللي مبازية على الترتيب التقليدي اللي كاين فالتحية التقليدية ديالها (faalupega).[35] لڤيلاج لعاصيمة كايدير ليدارة والتسيير تاع لمقاطعة، زيادة على التفعيل ديال التشريف دلعرش لكبير ومسؤوليات خرين. ميتال على هادشي هو ليلومويݣا اللي هي عاصيمة ديال مقاطعة آنا. فالنضام ديال فاآمطاي، التشريف لملكي ديال مدينة آنا (لعائلة لملكية أولا لعشيرة ديالتها) هو تويمالياليفانو. لمقاطعات هوما: توامساݣا، آنا، أيݣا إي لي تاي، أتوا، ڤا آأو فونوتي واللي كاينين فݣزيرة أوپولو، زيادة على فآساليلياݣا، ݣاݣايماوݣا، ݣاݣايفوماوݣا، ڤايسيݣانو، ساتوپايتيا، وپالاولي اللي كاينين فݣزيرة صاڤاي. فليحصاء ديال 2016 كانو 194,320 ساكنين فصاموا.[36] شي 75 فلمية ديال السكان كاينين فلجزيرة الرئيسية دبال أوپولو.[37]

لعيون[بدل | بدل لكود]

  1. شركة ساموا المحدودة المسؤولية (ذ.م.م)
  2. Green, Roger C.; Leach, Helen M. (1989). "New Information for the Ferry Berth Site, Mulifanua, Western Samoa". Journal of the Polynesian Society. 98 (3): 319–330. تطّالع عليه بتاريخ 30 يناير 2011.
  3. The Political Economy of Ancient Samoa: Basalt Adze Production and Linkages to Social Status (Winterhoff 2007)
  4. Sua'ali'i-Sauni, Tamasailau, editor. Tuagalu, I'uogafa, editor. Kirifi-Alai, Tofilau Nina, editor. Fuamatu, Naomi, editor. (November 2017). Su'esu'e manogi = in search of fragrance : Tui Atua Tupua Tamasese Ta'isi Efi and the Samoan indigenous reference. OCLC 1057446674. ردمك 978-1-77550-296-8.CS1 maint: multiple names: authors list (link) CS1 maint: extra text: authors list (link)
  5. Schellinger, Paul; Salkin, Robert, eds. (1996). International Dictionary of Historic Places, Volume 5: Asia and Oceania. Chicago: Fitzroy Dearborn Publishers. p. 724. ردمك 1-884964-04-4.
  6. Rhys Richards, (1992), Samoa’s forgotten whaling heritage; American whaling in Samoan waters 1824-1878, Wellington, Lithographic Services, pp.18-20.
  7. Langdon, Robert (1984) Where the whalers went; an index to the Pacific ports and islands visited by American whalers (and some other ships) in the 19th century, Canberra, Pacific Manuscripts Bureau, p.215. ردمك 086784471X
  8. Watson, R.M. (1919). History of Samoa: THE ADVENT OF THE MISSIONARY. (1830.1839). Chapter III.
  9. West, Barbara A. (2008). Encyclopedia of the Peoples of Asia and Oceania. Infobase Publishing. p. 704. ردمك 0-8160-7109-8
  10. Stevenson, Robert Louis (1892). A Footnote to History: Eight Years of Trouble in Samoa. BiblioBazaar. ردمك 978-1-4264-0754-3.
  11. Mains, P. John; McCarty, Louis Philippe (1906). The Statistician and Economist: Volume 23. p. 249
  12. World History at KMLA, zum.de
  13. Lewthwaite, Gordon R. “Life, Land and Agriculture to Mid-Century,” in Western Samoa. Edited by James W. Fox and Kenneth Brailey Cumberland. Christchurch, New Zealand: Whitcomb & Tombs Ltd. 1962, p. 148
  14. "New Zealand goes to war: The Capture of German Samoa". nzhistory.net.nz.
  15. "Imperialism as a Vocation: Class C Mandates". تطّالع عليه بتاريخ 27 نونبر 2007.
  16. 16.0 16.1 Albert Wendt. "Guardians and Wards: (A study of the origins, causes, and the first two years of the Mau in Western Samoa.)".
  17. "The Mau Movement" (PDF). مؤرشف من الأصل (PDF) في 27 نونبر 2007. تطّالع عليه بتاريخ 27 نونبر 2007.
  18. Field, Michael (2006). Black Saturday: New Zealand's tragic blunders in Samoa. Auckland, N.Z.: Reed Publishing (NZ). ردمك 978-0-7900-1103-5.
  19. "History and migration: Who are the Samoans?". Ministry for Culture and Heritage / Te Manatū Taonga. تطّالع عليه بتاريخ 27 نونبر 2007.
  20. Western Samoa Act 1961 (24 November 1961; 1961 No 68). Resolution 1626 (XVI) of 18 October 1961 of the United Nations General Assembly.
  21. Chapter XII. International Trusteeship System. Charter of the United Nations. legal.un.org
  22. "Celebration of Samoa’s Independence Day", Te Ara Encyclopedia of New Zealand. تخاد نهار 1 يونيو 2014.
  23. "Independence Day", United Nations. تخاد نهار 1 يونيو 2014.
  24. Constitution Amendment Act (No 2) 1997. Paclii.org. تخاد نهار 9 نونبر 2016.
  25. 25.0 25.1 "Samoan History". U.S. Embassy in Samoa. تطّالع عليه بتاريخ 17 يناير 2017.
  26. "New Zealand's apology to Samoa". The New Zealand Herald. 4 يونيو 2002.
  27. Prime Minister Helen Clark's Historic Apology
  28. Samoa switches smoothly to driving on the left, Associated Press, The Guardian, 8 شتنبر 2009
  29. "Samoa switches to driving on left". BBC News. 7 شتنبر 2009. تطّالع عليه بتاريخ 7 شتنبر 2009.
  30. "Samoa to jump forward in time by one day". BBC News. 9 ماي 2011. تطّالع عليه بتاريخ 9 ماي 2011.
  31. Mydans, Seth (29 December 2011). "Samoa Sacrifices a Day for Its Future". The New York Times. تطّالع عليه بتاريخ 16 فبراير 2017.
  32. "Chapter XXVI: Disarmament – No. 9 Treaty on the Prohibition of Nuclear Weapons". United Nations Treaty Collection. 7 يوليوز 2017.
  33. Feagaimaali’i-Luamanu, Joyetter (8 يونيو 2017). "Constitutional Amendment Passes; Samoa Officially Becomes 'Christian State'". Pacific Islands Report. تطّالع عليه بتاريخ 16 يونيو 2017.
  34. Wyeth, Grant (16 يونيو 2017). "Samoa Officially Becomes a Christian State". The Diplomat. مؤرشف من الأصل في 16 يونيو 2017. تطّالع عليه بتاريخ 16 يونيو 2017.
  35. "About Samoa". Government of Samoa. تطّالع عليه بتاريخ 30 دجنبر 2017.
  36. "Population & Demography Indicator Summary". Samoa Bureau of Statistics. مؤرشف من الأصل في 3 أبريل 2019. تطّالع عليه بتاريخ 25 يونيو 2018.
  37. "Background Note: Samoa". U.S. State Department. تطّالع عليه بتاريخ 26 نونبر 2007.
Wikimedia Commons تقدر تزيد شوف بزاف د صور و معلومات ديال Samoa ف ويكيميديا كومنز.