ميكرونيزيا

بدل ليانات
سمع (فيشي)
من ويكيپيديا
ميكرونيزيا

Federated States of Micronesia (en)
Mikronesia (yap)

نشيد Patriots of Micronesia

لعاصيمة پاليكير و كاولونيا
الساكينة
شحال دالسكان 105,544 (2017)
السمية ديال السكان ميكرونيزي، ميكرونيزية، ميكرونيزيين, ميكرونيزيات
اللوغات الرسمية نڭليزية
متوسط ديال لعمر 69.195 (2016)
لجغرافيا
لميساحة 702 كم²
لقمة لعالية Dolohmwar (791 م)
لبلاصة الطايحة لمحيط لمهدّن (0 م)
لإدارة
نضام الدولة جمهورية فيديرالية
رئيس ولايات ميكرونيسيا المتحدة Wesley Simina
رئيس ولايات ميكرونيسيا المتحدة Wesley Simina
لبرلمان Congress of the Federated States of Micronesia
لقتيصاد
الناتج الداخلي لكامل 404,028,900 $ (2021)
مؤشر التنمية لبشرية 0.628 (2021)
لفلوس الدولار د ميريكان
معلومات خرة
توقيت ديال لبلاد ڭرينيتش +10
ڭريتينش +11
رمز لبلاد FM
رمز لانترنيت ‎.fm‎
رمز التيليفون +691
نماري د ليرجونس 911 و 111
جيهة د صوڭان ليمن
السيت الرسمي fsmgov.org



ميكرونيزيا، رسميا لولايات لفيديرالية ديال ميكرونيزيا (بلينݣليزية: Federated States of Micronesia) هي دولة ݣزرية مستاقلة فيها بزاف د لجزر جات ف أوقيانوسيا، و بالضبط ف لمحيط لهادي، ف الشمال الشرقي د پاپوا غينيا الجديدة. ميكرونيزيا فيها ربعة ديال لويلايات اللي فيها 607 د لجزر فلمجموع، واللي واصلة لميساحة ديالها 702 كم². هاد لݣزاير مشتتة فواحد لمسافة ديال 2700 كيلوميتر. هادشي كايخلي لبلاد تكون عندها مساحة إجمالية بلبحر فايتة 2.6 مليون كم².[1]

تيسكنو ف ميكرونيزيا شويا كتر من 105.000 واحد، و لعاصمة ديالها هي پاليكير وأكبر مدينة هي وينو. اللغة الرسمية د لبلاد هي لينݣليزية و عاد كاين 4 د اللغات محلية اللي معتارفين بيها لغات جهوية. لفلوس اللي كاتخدّم ف ميكرونيزيا هي الدولار لميريكاني، و النضام د لحكيم هو نضام فيديرالي، فيه 4 ديال لولايات. لݣزاير ديال ميكرونيزيا كانت طرف من لإقليم د لمحيط لهادي اللي كان تابع للميريكان. ف 1979 دارت ميكرونيزيا دستور ديالها و مورا 7 سنين (ف 3 نونبر 1986) علنات لإستقلال ديالها.

السمية[بدل | بدل لكود]

السمية ديال ميكرونيزيا جات من ليونانية لقديمة وكاتعني "ݣزيرة صغيرة" (μικρός ميكروس "صغير" وνῆσος نيصوص "ݣزيرة"). جاتهوم هاد السمية من عند جيل ديمون ديرڤيل (بلفرانساوية: Jules Dumont d'Urville) ف 1831 اللي حاول يعطي سمية لهاد لمينطاقة.[2]

التاريخ[بدل | بدل لكود]

الناس اللولين[بدل | بدل لكود]

باطو تقليدي "موّ" من ياپ

لجدود لأوسطرونيزيين ديال لميكرونيزيين جاو لهاد لݣزاير من هادي كتر من 4000 عام. بدا معاهوم واحد السيستيم لامركزي اللي ولّا من بعد سيستيم وتقافة دينية مصونطراليزية ودايرة على ݣزيرة ياپ[3]، وكانت عندهوم علاقات معا شعب الشامورو ديال ݣزاير ماريانا، و حتى كانو كايديرو سفار للݣزاير الشرقية ديال لفيليپين.[4] ݣزيرة ياپ خلقات واحد السيستيم قتيصادي وجتيماعي مطوّر معا لجزر لمحاديين معاها وتقادّات لإمبراطورية لياپية فجوايه 1500 ق.م[5]، واللي كانت كاتحكم 1500 كيلوميتر ديال لبحر بلجزر ديالو. كانت لهدايا بحال اللباس، زيت الكوك ولحبال اللي مصاوبين من لقوقة دلكوك، والزرابي ولكوكيّاج كاتجي للإمبراطور اللي كايطلبها صحّة[6]، واللي كايردها ليهوم بلمعونة من لݣزيرة فلوقت اللي كاتكون فيها كارتة فدوك لجزر بحال لإعصار ولّا الزلزال، أوّلا السلعة بحال لحرقوم ولحجر لغالي ولباطويات.[6] هاد السيستيم كانو كايطراو فيه مشاكيل اللي دغيا كايتفكّو، وايني راب كاملو فاش جا ليستيعمار ديال ألمانيا لهاد لمينطاقة. كايتقسم التاريخ ديال هاد لمبراطورية بحساب الرواية ديال السكان لتلاتة ديال لمراحيل: "مويهين كاوا" (لعهد د لبني؛ لبدية)، قبل 1100 ميلادية؛ "مويهين صوديلور" (لعهد ديال لملوك د صوديلور)، من 1100 حتال 1628 ميلادية[7]؛ و"نويهين ناهنمواركي" (لعهد ديال روايس لقبايل) من 1628 حتال 1885.[8][9]

ليستيعمار د ؤروپا[بدل | بدل لكود]

باطوات جايين يستاكشو ميكرونيزيا، رسمة من 1590.

وصلو لمستكشيفين ديال لبرتقيز لهاد لبلايص فاش كانو كايقلبوا على الجزر ديال لعطرية (إندونيسيا)، ومن موراهوم الصبليون فلقرن 16، واللي بداو لستيعمار تمّا.

باعت الصبليون لݣزاير لألمانيا ف 1899 من مورا لمعاهدة لألمانية الصبليونية. حاولات ألمانيا تقاد لبنية السياسية ديال لجزر وتصاوب لبنية التحتية اللي خدّمات فيها الناس صحّة، الشي اللي جاب عليها التورة ديال قبيلة صوكيهس ف 1910 واللي بدات بلقتيلة ديال لمسؤولين وشي عسكر ديال لألمان قبل مايجيو وحدين خرين كتار ويوقفو التورة ويعدمو 15 من التوار لكبار[10] وينفيو لقبيلة كاملة (426 بنادم) لپالاو.[11]

كانت ݣزيرة ياپ صونطر ديال التواصلات دلبحر تاع لاليمان قبل لحرب لعالمية اللولة وكانو كايدوزو فيها لكابلات ديال التيليݣراف. جات الجاپون اللي ستعمرات هاد لݣزاير ف 1914، ودازت تحت لحضية ديال لعصبة دلأمم ف 1919. ف11 فبراير 1922 ولات عند لميريكان لحقوق التجارية ديال لبلاد من مورا ماتّافقات على هادشي معا الجاپون.[12]

لحروب لعالمية[بدل | بدل لكود]

ناس كايصاوبو حوت منشّف فميكرونيزيا، 1931.

فلحرب لعالمية اللولة دخلات الجاپون على ميكرونيزيا اللي كانت تابعة لألمانيا وستعمراتها. دارت الجاپون لإدارة ديالها على لأرض من 1920 فاش تعطا ليها هاد لحق معا عصبة لأمم. فهاد لفترة كبرات الساكينة اللي لأوصول ديالها جاپونية لكتر من 100 ألف، أما السكان لأصليين ماكانوش فايتين فلمجموع 40000 دلبشري. الصناعات ديال لجزر فهاد لوقت ولات هي الصيد لبحري، لمينات، الزيراعة ديال قصب السكر والديسير لإستيوائي.[13]

فلحرب لعالمية التانية الجاپون كانت كاتحامي على ݣزيرة ياپ من لميريكان اللي كانت كاتقصفها مرة مرة بالطيارات ولباطويات دلحرب. لعسكر ديال الجاپون فلجزيرة كان شي 4423 تحت لقيادة ديال لجينيرال ضايهاتشي إيتوه ومعاه شي 1494 ديال لعسكر دلبحرية. عملية هيلسطون ف فبراير 1944 دارتها لميريكان واللي ريبات فيها بلقصف ݣاع لعتاد دلعسكر دالجاپون.[14] هاد لحرب فضّات مع التطور اللي كانت غادية فيه لبلاد فاش كانت حاكماها الجاپون.

لقرون 20 و21[بدل | بدل لكود]

طوسيوو ناكاياما هو أول رايس ديال لويلايات لفيديرالية د ميكرونيزيا.

ف 1947 صاوبات لأمم لمتحدة "لأرض لمواتقة ديال لمحيط لمهدن" واللي كانو فيها پوهنپي (ومعاها كوصري ديك الساع)، تروك، ياپ، پالاو، جزر مارشال، وݣزاير ماريانا الشمالية. لميريكان قبلات تضن لمواتقة ديال هاد لمناطيق واللي كانت مواتقة أمنية وكان الدور ديال لميريكان هو "تجيب التطور ولكيتفاء الداتي ديال السكان.

ف 10 ماي 1979 دخلات 4 من هاد لمناطيق فلمصاوبة ديال الدستور تاع لويلايات لفيديرالية ديال ميكرونيزيا. پالاو، جزر مارشال، وݣزاير ماريانا الشمالية ختارو مايدخلوش. طوسيوو ناكاياما، اللي كان الرايس ديال لمجليس دلكونݣريس تاع ميكرونيزيا ولّا هو أول رايس دلبلاد، من 1979 حتال 1983. ف3 نونبر 1986 سنات لبلاد تيفاقية ديال الربط لحر مع ميريكان، واللي خلاتها تحامي عليهوم، واللي تعاودات تسينات ف 2004. هاد ليتيفاقية تقدر تحبس فوقاش مابغاو هاد جوج د لبلدان.[15] سالات لمواتقة ف 22 دجنبر 1990 فاش داز لقرار ديال لمجليس دلأمن نمرة 683.

دازو بزاف ديال لأزمات على لبلاد فلافّان ديال لقرن 20 ولبدية ديال لقرن 21. فاللول من مورا ماتعاود تنتاخب الرئيس بايلي أولطر، شداتو أزمة قلبية ف يوليوز 1996. من 1996 حتال 1998 دازت فترة ديال لفياضانات لكتار واللي ريبات لبلاد كاملة، واللي علنات فيها ميكرونيزيا حالة ديال الطوارئ. ف 1999 و 2000 نتاشرات لكوليرا وقتلات 10 دالناس فپوهنپي الشي اللي خلا لحوكومة تدير حملة كبيرة ديال التلقيح.[16]

الدولة[بدل | بدل لكود]

التقسيم ديال لبلاد ولمدون[بدل | بدل لكود]

لخاريطة ديال لويلايات لفيديرالية ديال ميكرونيزيا

ميكرونيزيا مقسومة لربعة ديال لويلايات واللي مازال كيتقسمو لبلديات، واللي هي من لغرب للشرق:

الراية لويلايات[17] لعاصيمة لحاكيم لأرض السكان [18] لكتافة
دالسكان
كلم2 ميل مربع[19] لكلّا كلم2[18] لكلّا ميل مربع
ياپ كولونيا جيسي صالالو[20] 118.1 45.6 16,436 94 243
تشووك وينو أليكساندر ناروهن[21] 127.4 49.2 54,595 420 1088
پوهنپي كاولونيا ريد أوليڤر[22] 345.5 133.4 34,685 98 255
كوصري طوفول كارصون سيݣراه[23] 109.6 42.3 7,686 66 170

لحوكومة والسياسات[بدل | بدل لكود]

هيليكوپتير ميريكانية كاتطير فوق لبحر ديال ميكرونيزيا.

فالسياسة الدخلانية ميكرونيزيا هي بلاد ديموقراطية ماشي حزبية وجمهورية فيديرالية عندها مجليس مستاقل، محكومة بالدستور ديال 1979 واللي كايضمن لحقوق ديال بنادم وكايفرّق مابين السلط. الدستور كايخلي لحوكومة تكون دايرة بحال (واينّي ماشي نيت بحال) لميريكان. لكونݣريس ديال لبلاد فيه 14 واحد كاتصوت عليهوم الناس. 4 ديال السيناتورات (من لويلايات بربعة) كايخدمو فيه 4 سنين، ولعشرة لخرين كايتبدلو كولا عامين. هاد السيناتورات كاملين هوما اللي كايصوتو من مابيناتهوم على الرئيس والنايب ديالو، واللي كايشد بلاصتهوم جوج سيناتورات جداد كايتختارو فنتيخابات خاصة. كايتعيّن مجليس ديال لويزارة اللي كايدعم الرئيس والنايب ديالو. ماكاينينش أحزاب رسمية فميكرونيزيا.

فالسياسة لبرّانية، ميكرونيزيا ديما كاتصوت معا لميريكان فلقرارات ديال مجليس لأمن.[24] ميكرونيزيا هي بلاد مستاقلة فمشاركة حرة مع لميريكان اللي كاتضمن ليها لأمن ديالها وكاتحامي عليها بموجب كونطرا سانياها معاها. هاد لكونطرا كاتخلي الناس اللي من ميكرونيزيا يدخلو للعسكر ديال لميريكان واخا ماتكونش عندهوم لجنسية[25]، وكاتخليهوم يهاجرو ويخدمو تما، وكاتخلي لمساعدات لقتيصادية والتقنية تدوز. لبلاد عندها علاقات خارجية مع 54 بلاد[26]، ودخلات للأمم لمتحدة ف17 شتنبر 1991.[27] لبلاد كانت داخلة مع لمنتدى ديال ݣزاير لمحيط لهادي[28]، ولاكين خرجات منو رسميا ففبراير 2021 حيتاش طرات مدابزة فاش ولّا هنري پونا أمين عام ديالو.[29][30]

الشعب[بدل | بدل لكود]

ميكرونيزيين كايديرو حفلة ديال الترحاب

السكان لأصليين ديال لبلاد، واللي هوما فلغاليب الشعوب لميكرونيزية، فيهوم بزاف ديال لمجموعات لإتنية-اللغوية. ميكرونيزيا عندها تقريبا 100 فلمية ديال الناس اللي أصولهم من سكان لمحيط لمهدن أولّا آسيا: 48% تشووكيين، 24.2% پوهنپينيين، 6.2% كوصريين، 9.8% ياپيين، 1.8% من آسيا، 1.5% پولينيزيين، و7.8% من بلايص خرين أولّا مامعروفش لأصل ديالهوم. كاينة واحد النيسبة اللي عندها أصول جاپونية، واللي جات من التزاوج ديال السكان لأصليين والجاپونيين فلفترة ديال لاحتلال الجاپوني.[31] كاينة 18 لوغة فلبلاد اللي عدد ديال الناس كايهضرو بيها كتر من 30.[32] كاينة نيسبة ديال لمراكنة اللي كاتغرّب فميكرونيزيا، ولينݣليزية ولات لوغة ديال لحوكومة والتعليم فالليسي ولجاميعات. كاينة نيسبة كاتهضر بالصبليونية، منها الناس اللي داخلة فلبيعتة لكاتوليكية فويلاية پوهنپي.

لأغلبية ديال السكان مسيحيين، فالطوايف لكاتوليك ولپروطيسطان.[33] بزاف ديال الناس اللي پروطيسطان جاتهوم هاد الصيفة من عند لميسيونات لميريكانية، خصوصا فݣزيرة كوصري اللي 95 فلمية ديال السكان ديالها (7800 بنادم) پروطيسطان. فپوهنپي 35000 ديال السكان مقسومة نص نص على الطوايف بجوج. كاينين طوايف مسيحية خرين فميكرونيزيا واخا النيسبة ديال اللي متبّعينها قلال. كاينة نيسبة قليلة ديال لبوديين ولبهائيين.[33] لكنايس عندهوم دور كبير فلمجتمع لمدني.[33] الدستور فيه لحرية ديال لعتيقاد، والدولة كاتضمن هادشي. ف 2007 ماوصل للميريكان حتى شي تقرير فيه التمييز الديني طرا فشي بلاصة فلبلاد.[33]

لجغرافيا[بدل | بدل لكود]

لجيولوجيا[بدل | بدل لكود]

جبل پوسيهن ماليك.

لويلايات لفيديرالية ديال ميكرونيزيا فيها 607 دلݣزاير شادة الطولة ديال 2900 كيلوميتر فوق خط ليستيواء حتال لمحادية دلفيليپين. لميساحة ديال هاد لجزر مجموعة واصلة ل 702 كم². هاد لجزر مجموعين فربعة ديال لويلايات. لمجموع د الطولة ديال لبحورة هي 6112 كيلوميتر. لميساحة ديال لبلاد بالزيادة ديال حقها فلبحر (لمينطاقة لقتيصادية لخالصة) كاتوصل تقريبا ل 3 دلمليون كم². التضاريس ديال لبلاد متنوعة بزاف، من الجبال لعالية (جبل نانلوض - 782 ميترو فلعلو) [34]، حتال لحيود لمرجانية فلمحيط لمهدن.

لموناخ[بدل | بدل لكود]

الطبيعة فميكرونيزيا، يوليوز 2011.

ميكرونيزيا عندها لموناخ ديال لغابة ليستيوائية (تصنيف كوپن: Af). لجو كايكون دافي، فيه الرطوبة بزايد وكاينة الشتا لعام كامل. لبلاد كاينة فالشمال ديال خط ليستيواء، وكاتجي فيها الريح التجارية ديما، واللي كاتقاد لحرارة اللي كاتكون مابين 22 و25 درجة فلعام كامل، وفاش كاتطلع ماكاتفوتش 32 درجة. الشتا اللي كاتطيح كاتوصل مابين 2000 و5000 ملم، وتقدر تفوت 6000 ملم فالسفوحة ديال الجبال اللي مواليين لجيهة الريح. جبل نانلوض يقدر يوصل حتال 10.160 ملم، واخا لعلو ديالو مافايتش 800 ميترو. هاد الجبل هادا من أكتر لبلايص اللي كاتطيح فيهوم الشتا بزايد فوق لأرض، والسما فوقو ديما مغيمة. الشتا فلبلاد كاتطيح مجهدة بزاف ولاكين فمدة قليلة. الشهورة الناشفين هوما يناير وفبراير، اللي مكايفوتش فيهوم لقياس ديال الشتا 250 ملم. مرة مرة كايقيس لجفاف ميكرونيزيا، وكايكون جفاف قاسح حتال كايوصل لما اللي تحت اللرض لنيڤو ديال لخطر.

لبيئة[بدل | بدل لكود]

لبيئة ديال لبلاد زوينة ومتنوعة. ميكرونيزيا مسجلة 1000 نوع ديال لحوت و 1200 نوع ديال لكوكياج. فلغابات ديال لمانݣروڤ حدا لبحر كيعيش السلطعون والحوت، وحتى الطيور اللي كاتاكلهوم. زيد على هادشي واحد 1230 نوع ديال لورد، اللي 782 منهوم أصلية فديك لبلاد. قل من 3 فلمية دلأرض صالحة للفلاحة، والربع ديالها فيها شجر اللي كايتحصد الديسير ديالو. لمشاكيل دلبيئة اللي كاتعاني منها لبلاد هي الصيد بالزايد، والتلوت دلما ولأرض. كايجيو لميكرونيزيا لأعاصير من يونيو حتال دجنبر، الشي اللي كايريب لبنية التحتية ديال لبلاد وكايزيد فالتلوت.

لقتيصاد[بدل | بدل لكود]

نشاط لقتيصادي فميكرونيزيا كيعتامد على زراعة ديال لمعيشة وصيادة. لجزر عندهم حقول ديال لمعادن لي يتسحقو لاستغلال، ماعدا لفوسفاط لي نيڤو ديالو طالع. صيادة ديال طون ب لخيوط طوال خدام مزيان خصوصا معا لباطوات ديال شينوا لي موجودين من تسعينات. لإمكانيات ديال سياحة موجودة، والاكين لبعد ديال لبلاصة و لقلة ديال تجهيزات ماكيعاونش فتنمية. لمعاونة ب لفلوس من لميريكان هي لمصدر لول ديال لمدخول، معا لميريكان صرفات 1.3 مليار دولار ف لجزر بين 1986 و2001؛ ملي لكومپاكط تبدل فـ2004، لميريكان لتازمات باش تعاون بـ110 مليون دولار فتنمية حتال 2023.[35] لكتاب د لحقائق د سيا عتابر لاعتماد لكبير ديال ميكرونيزيا على لمعاونة د لميريكان بلي راه واحد من لمشاكل ديال لبلاد.[36] لعزلة لجغرافية وتجهيزات ضعيفة هوما لعقبات لكبار لتنمية على لمدى طويل.[37]

عيون لكلام[بدل | بدل لكود]

  1. ^ "Drops in the ocean: France's marine territories". The Economist. 13 يناير 2016. مأرشيڤي من لأصل ف 2 فبراير 2021. تطّالع عليه ب تاريخ 28 يناير 2021.
  2. ^ "Micronesia, www.newworldencyclopedia.org". مأرشيڤي من لأصل ف 2023-04-19. تطّالع عليه ب تاريخ 2022-06-25.
  3. ^ "Background Note: Micronesia". United States Department of State. مأرشيڤي من لأصل ف 2023-08-29. تطّالع عليه ب تاريخ 2012-01-06.
  4. ^ Peterson، John A. (2012). "Latte villages in Guam and the Marianas: Monumentality or monumenterity?" (PDF). Micronesica. 42 (1/2): 183–208. مأرشيڤي (PDF) من لأصل ف 2023-03-26. تطّالع عليه ب تاريخ 2022-06-25.
  5. ^ "The History of Yap Island from 1500 B.C. to Present". www.visityap.com (ب نڭليزية). مأرشيڤي من لأصل ف 2023-06-08. تطّالع عليه ب تاريخ 2021-05-28.
  6. ^ a b Petersen، Glenn (2000). "Indigenous Island Empires: Yap and Tonga Considered". The Journal of Pacific History. 35 (1): 5–27. ISSN 0022-3344. مأرشيڤي من لأصل ف 2023-02-28. تطّالع عليه ب تاريخ 2022-06-25.
  7. ^ Flood، Bo؛ Strong، Beret E.؛ Flood، William (2002). Micronesian Legends. Bess Press. pp. 145–7, 160. ردمك 1-57306-129-8. مأرشيڤي من لأصل ف 2023-07-06. تطّالع عليه ب تاريخ 2012-01-01.
  8. ^ Hanlon، David L (1988). Upon a Stone Altar: A History of the Island of Pohnpei to 1890. Pacific Islands Monograph. 5. University of Hawaii Press. pp. 13–25. ردمك 0-8248-1124-0. مأرشيڤي من لأصل ف 2022-10-23. تطّالع عليه ب تاريخ 2012-01-01.
  9. ^ Panholzer، Tom؛ Rufino، Mauricio (2003). Place Names of Pohnpei Island: Including And (Ant) and Pakin Atolls. Bess Press. pp. xiii, xii, 101. ردمك 1-57306-166-2. مأرشيڤي من لأصل ف 2023-07-06. تطّالع عليه ب تاريخ 2011-12-31.
  10. ^ Morlang, 23 Sep 2010
  11. ^ Schultz-Naumann, p. 140
  12. ^ Text in League of Nations Treaty Series, vol. 12, pp. 202-211.
  13. ^ Arnold، Bruce Makoto (2011). "Conflicted Childhoods in the South Seas: The Failure of Racial Assiimilation in the Nan'yo". Tufts Historical Review. 4 (11): 79–96. مأرشيڤي من لأصل ف 2023-07-09. تطّالع عليه ب تاريخ 2022-06-25.
  14. ^ Takizawa، Akira؛ Alsleben، Allan (1999–2000). "Japanese garrisons on the by-passed Pacific Islands 1944-1945". Forgotten Campaign: The Dutch East Indies Campaign 1941-1942. مأرشيڤي من لأصل ف 2016-01-06.
  15. ^ "Compact of Free Association". مأرشيڤي من لأصل ف 26 يناير 2016. تطّالع عليه ب تاريخ 2 يناير 2016.
  16. ^ "History of Micronesia, Britannica.com". مأرشيڤي من لأصل ف 2023-03-09. تطّالع عليه ب تاريخ 2022-06-25.
  17. ^ "The World Factbook -- Central Intelligence Agency". Cia World Factbook. مأرشيڤي من لأصل ف يناير 2021. تطّالع عليه ب تاريخ 8 غشت 2018.
  18. ^ a b "FSM government website - Population". مأرشيڤي من لأصل ف يونيو 29، 2012. Check date values in: |archive-date= (معاونة)
  19. ^ "FSM government website - Geography". مأرشيڤي من لأصل ف 4 مارس 2016.
  20. ^ "Yap - Legal Information System of the Federated States of Micronesia". www.fsmlaw.org. مأرشيڤي من لأصل ف 2023-08-07. تطّالع عليه ب تاريخ 2022-03-02.
  21. ^ "Chuuk State - Legal Information System of the Federated States of Micronesia". www.fsmlaw.org. مأرشيڤي من لأصل ف 2023-06-04. تطّالع عليه ب تاريخ 2022-03-02.
  22. ^ "Pohnpei - Legal Information System of the Federated States of Micronesia". www.fsmlaw.org. مأرشيڤي من لأصل ف 2023-05-05. تطّالع عليه ب تاريخ 2022-03-02.
  23. ^ "Kosrae - Legal Information System of the Federated States of Micronesia". www.fsmlaw.org. مأرشيڤي من لأصل ف 2023-06-05. تطّالع عليه ب تاريخ 2022-03-02.
  24. ^ General Assembly - Overall Votes - Comparison with U.S. vote مؤرشف 2023-03-15 فموقع وايباك ماشين lists Micronesia as in the country with the fourth high coincidence of votes. Micronesia has always been in the top four.
  25. ^ "U.S. Military Enlistment Standards" (PDF). مأرشيڤي من لأصل (PDF) ف 2008-10-01.
  26. ^ "FSM Diplomatic Relations List". www.fsmgov.org. مأرشيڤي من لأصل ف 13 غشت 2021. تطّالع عليه ب تاريخ 2021-09-02.
  27. ^ "United Nations Official Document". www.un.org. مأرشيڤي من لأصل ف September 3, 2015.
  28. ^ "Federated States of Micronesia". U.S. Department of the Interior. يونيو 11, 2015. مأرشيڤي من لأصل ف أكتوبر 23, 2016. تطّالع عليه ب تاريخ دجنبر 2, 2016.
  29. ^ "Five Micronesian countries leave Pacific Islands Forum". RNZ. 9 فبراير 2021. مأرشيڤي من لأصل ف 8 مارس 2021. تطّالع عليه ب تاريخ 9 فبراير 2021.
  30. ^ "Pacific Islands Forum in crisis as one-third of member nations quit". The Guardian. 8 فبراير 2021. مأرشيڤي من لأصل ف 9 فبراير 2021. تطّالع عليه ب تاريخ 9 فبراير 2021.
  31. ^ President Emanuel Mori Meets With Japan Prime Minister Yasuo Fukuda مؤرشف 2021-11-03 فموقع وايباك ماشين; AESonline.org مؤرشف 2007-06-16 في Archive.today لحوكومة د ميكرونيزيا، 12 دجنبر 2007
  32. ^ "Micronesia". Ethnologue (ب نڭليزية). مأرشيڤي من لأصل ف February 2, 2019. تطّالع عليه ب تاريخ 2019-02-01.
  33. ^ a b c d "International Religious Freedom Report 2007: Micronesia, Federated States of". Archived from the original on April 9, 2022. تطّالع عليه ب تاريخ June 25, 2022.CS1 maint: unfit url (link)
  34. ^ "Mount Nanlaud". GeoNames. مأرشيڤي من لأصل ف 2023-03-17. تطّالع عليه ب تاريخ 12 ماي 2013.
  35. ^ "U.S. Relations With the Federated States of Micronesia". US Department of State (ب نڭليزية). 2016-02-25. مأرشيڤي من لأصل ف 2023-08-29. تطّالع عليه ب تاريخ 2020-06-07.
  36. ^ "The World Factbook". Central Intelligence Agency (ب نڭليزية). 2020-06-02. مأرشيڤي من لأصل ف 2020-12-18. تطّالع عليه ب تاريخ 2020-06-07.
  37. ^ "Federated States of Micronesia". United Nations (ب نڭليزية). مأرشيڤي من لأصل ف 30 نونبر 2012.
Wikimedia Commons تقدر تزيد شوف بزاف د تّصاور و لمعلومات ديال Micronesia ف ويكيميديا كومنز.
مرجّعة من "https://ary.wikipedia.org/w/index.php?title=ميكرونيزيا&oldid=325048"