فوقبنادم
لفوقبنادم ؤلا بنادم لفوقاني (ب لألمانية Übermensch) هوّا مفهوم ف لفلسفة د نيتشه، لي ستعملو سيرتو ف كتابو هاكا هضر زاراتوسطرا. ف هاد لكتاب لي كينتامي ل لجنس لأدابي د تّعاويد لفلسافي، نيتشه كيݣول على لسان زاراتوسطرا بلي لفوقبنادم هوّا لهدف لي خاص تسعا ليه لبشرية. نيتشه حط لمفهوم د لفوقبنادم كا قيمة موقابيلة ل لوعود لغيبية (بحال لحساب ؤ لعقاب، ؤ لاخرة) لي كاينين ف دّيانات لبراهيمية سيرتو لمسيحية. هاد لموصطلح كيبان ف بزاف د لمقاطع د لكتاب، بحال:[1]
راني كانعلّمكوم على لفوقبنادم. بنادم هوّا واحد لحاجة لي غادة تّجاوز. أشنو درتو باش تّجاوزوه؟ جميع لكائنات ل حد سّاعة خلقات شي حاجة فوق منها؛ واش بغيتو تكونو نتوما لمارية لحسيبة ديال هاد لفيضة لعضيمة ؤ ترجعو ݣاع ل لبهايم بلاصت ماتّجاوزو بنادم؟ شنو هوّا لقرد ب نّسبة ل بنادم؟ موضوع د تّقشاب كيقدر يمرݣ منو لواحد. ؤ بنادم تا هوّا هاكا غايكون عند لفوقبنادم: موضوع د تّقشاب يقدر يمرݣ منو. راكو ضربتو طريقكوم ديجا من دودة ل بنادم، ؤ باقي ف داتكوم من دّود كتر من ما فيها د بنادم. واحد زّمان كنتو قرودا، ؤ حتا دابا بنادم راه قرد كتر من أي قرد.
حضيو، راني كانعلّمكوم على لفوقبنادم. لفوقبنادم هوّا لمعنى د لأرض، خلّيو إرادتكوم تݣول "لفوقبنادم غادي يكون لمعنى د لأرض!" كانترجّاكوم أ خوتي، خلّيو وفاكوم يبقا ل لأرض، ؤ ماتّيّقوش دوك لي كيهضرولكوم على أمال من عالم أخور. خلّاطين د سّم هوما، سوا كانو واعيين بيها ؤلا لا. كارهين ل لحياة هوما، مسوّسين ؤ مسمومين براسهوم، لي لأرض عيات منهوم: خلّيوهوم يزيدو فحالهوم.
هاكا هضر زاراتوسطرا، كتاب 1، فقرة 3
ف لألمانية، لموصطلح د Übermensch مركب من über ؤ Mensch. لمزيودة über تقدر تاخد معاني بزاف على حساب لكلمة لي لصقات فيها، بحال "تّفوق"، "لإفراط"، "سّمو" ؤلا "تّعالي"، "لقوة"، ؤ زيد ؤ زيد.[2] كلمت Mensch كاتعني "بنادم" ب لمعنى لعام بلا تحديد لجينس، ماشي راجل ؤلا مرا، سوا كا نوع حيواني ؤلا كا فرد ديال هاد نّوع.[3]
كاينين بزاف د طّرجامات ديال هاكا هضر زاراتوسطرا ل لعربية، أغلبيتها تّافقات باش تطرجم Übermensch ب الإنسان الأرقى. فيليكس فارس طرجم لموصطلح ل لعربية ب الإنسان المتفوق، ؤ علي مصباح، لي نتاقد لختيار د فيليكس فارس، طرجمو ب الإنسان الأعلى.[4][5]
ب نّݣليزية، أول طرجامة دارها أليكساندر تيل ف 1896، ؤ ختار لموقابيل Beyond-Man ب نّݣليزية. من ديك سّاع طرجامات خرين بانو لي ستعملو موصطلحات خرين بحال Superman و Overman. لفيلسوف لألماني لميريكاني والتر كاوفمان نتاقد تّخدام ديال Superman، حيت من ناحية لمزيودة نّݣليزية سوپر super ماشي موقابيل مزيان ل لمزيودة لألمانية über ؤ من ناحية خرة، حيت ملي تشهرات شّخصية لخيالية د سوپرمان، يقدر يطرا سوء تفاهم ؤلا خلط عند لقاريين ؤلا سّامعين.[6] بزاف د لفلاسفة لأنݣلوفونيين كيفضّلو يستعملو لموصطلح د Übermensch كيما هوّا ب لألمانية.
لمفهوم د لفوقبنادم مرتابط ب بزاف د لمفاهيم خرين ف لفلسفة د نيتشه، ؤ مايمكنش يتّفهم مزيان خارج سّياق د لأعمال لخرين ديالو. لفوقبنادم عند نيتشه كيمتل واحد لإنسان لي ب لإرادة د لقوة لي عندو، قدر يتجاوز راسو ؤ دّوافع لبدائية ديالو، باش يحقق مستوى أخلاقي ؤ إبداعي كيتجاوز داكشي لّي عند بنادم. ؤ هوّا ب هاد لمعنى كيمتّل لجوهر د لإنسانية ف معناها صّافي، لي سّعي ليها كيعطي معنى ل لحياة، ؤ كيحارب لحالة د لعدمية لي جات بسباب رّفض د دّين، بعد ما مات الله من لمنضور ديال نيتشه.[7]
ب نّسبة ل نيتشه، ل حد سّاعة، حتا فرد بشري ف تّاريخ ماقدر يوصل ل هاد لمستوى، ولاكين كاينين بعض لأفراد لي دكرهوم كا أمتيلا لي يقدر بنادم يحتادي بيهوم باش يمشي ف طّريق د لفوقبنادم، منهوم سقراط، ليسوع، يوليوس قيصر، ليوناردو داڤينتشي، مايكل أنجيلو، شيكسپير، ݣوته ؤ ناپوليون.[7]
نيتشه كيحط لمعنى د لأرض، لي لهدف ديالو لوصول ل لفوقبنادم، كا بديل ل لمعنى لي جابتو لمسيحية، لي متعلق ب لحياة لموراوية يعني مورا لموت. من لمنضور د نيتشه هاد لمعنى دّيني تّقليدي مابقاش كيجاوب على لأسئلة د لإنسان لعصري، ؤ فقد لقوة ديالو ف لحياة د بنادم، شّي لي كيعبّر عليه ب لعيبارة لمشهورة "الله مات". من هاد لوجهة د نّضر، لفوقبنادم هوّا مفهوم لي كيعوّض "الله" ف لفلسفة د نيتشه.[7]
لمسيحية أيضا كاتعتابر لكسدة د بنادم ؤ لمادة بشكل عام شي حاجة لي قيمتها هابطة، ب لموقارنة معا رّوح ؤ لعالم لّامادي، ؤ داكشي علاش خرجو منها تّيجاهات لي كاتحتاقر لكسدة ؤ كاتدعو ل رفض عطيانها شنو كاتحتاج، بحال لمداهب د زّهد Ascetism. نيتشه ب لموقابيل كيعتابر رّوح ؤ لكسدة نفس لحاجة، ؤلا بلي رّوح طرف من لكسدة.[1]
ف لفلسفة د نيتشه، لأطروحة لمضادة ل لفوقبنادم، هيّا "لبنادم لّخراني"، لي كيمتّل تّدهور ؤ نّحيطاط لي يقدر يوصل ليه بنادم. لبنادم لّخراني هوّا واحد لإنسان لي ماكينتج ؤ ماكيبدع والو، غير كيستهلك، ؤ ماعندو حتا قيم ؤلا أهداف عالية كيسعا ليها. كيعيش ف رّاحة ؤ لملدات ليومية، ؤ كيحساب ليه بلي هادي هيّا سّعادة، ولاكين ف لجوهر ديالو كيكون تعيس ؤ حاقد.[8]
جا لوقت باش بنادم يحط هدف ل راسو. جا لوقت باش يغرس زّريعة ديال أعلى أمل عندو. حيت ترابو باقي يغني ؤ يوفي. ولاكين واحد نّهار غايجي ملي هاد تّراب غادي يفقار ؤ يتمدّن، ؤ تا شجرة عالية ماتقدر تنبت فيه. واكواك أ زّمان، قريب بنادم مايبقا يرمي نبلة شوقو بعد من بنادم، ؤ وتر قوسو ينسا كيف يزنزن!
"شنو هوّا لحب؟ شنو هوّا لإبداع؟ شنو هوّا شّوق؟ شنو هوما نّجوم؟" هاكا كيسوّل لبنادم لّخراني ؤ كيرمّش.
هاكا هضر زاراتوسطرا، كتاب 1، فقرة 4
مقالة متعمقة: نازية
لموصطلح ديال Übermensch كان مخدّم من طاراف هيطلر ؤ نّازيين باش يوصف لفيكرة ديالهوم د عيرق أري جرماني متفوّق.
- مقالة متعمقة: أناركية
- مقالة متعمقة: موربنادمية
- ^ a b Also Sprach Zarathustra [هاكا هضر زاراتوسطرا] (PDF) (ب لالمانية). ص. 5-6. مأرشيڤي (PDF) من لأصل ف 2023-07-05. تطّالع عليه ب تاريخ 2022-02-26.
- ^ "Duden, über-" (ب لالمانية). مأرشيڤي من لأصل ف 2023-05-28. تطّالع عليه ب تاريخ 2022-02-26.
- ^ "Duden, Mensch" (ب لالمانية). مأرشيڤي من لأصل ف 2023-03-24. تطّالع عليه ب تاريخ 2022-02-26.
- ^ هكذا تكلم زرادشت (ب لعربية). مطرجم من طاراف علي مصباح. منشورات الجمل. ص. 40.
- ^ "إذن ما هو الإنسان الأعلى؟" (ب لعربية). مأرشيڤي من لأصل ف 2022-02-26. تطّالع عليه ب تاريخ 2022-02-26.
- ^ فريدريش نيتشه (1982). The Portable Nietzsche (PDF) (ب نڭليزية). مطرجم من طاراف والتر كاوفمان. Penguin Books. مأرشيڤي (PDF) من لأصل ف 2023-04-08. تطّالع عليه ب تاريخ 2022-02-26.
- ^ a b c "Friedrich Nietzsche philosophy, the Overman or Superman" (ب نڭليزية). مأرشيڤي من لأصل ف 2023-06-07. تطّالع عليه ب تاريخ 2022-02-26.
- ^ "Nietzsche and Thus Spoke Zarathustra: The Last Man and The Superman" (ب نڭليزية). 17 أكتوبر 2017. مأرشيڤي من لأصل ف 2023-09-10. تطّالع عليه ب تاريخ 2022-02-26.