فريدريش نيتشه
فريدريش نيتشه (مزيود ف 15 أكتوبر 1844 ف روكن ف مملكة پروسيا، مات ف 25 غشت 1900 ف ڤايمار ف لإمبراطورية لألمانية) فيلسوف، ناقد، ؤ فيلولوجيست ألماني، لي لأعمال ديالو كان عندها تأتير عميق على لفلسفة لموعاصيرة. كان بدا لكاريير ديالو ف لفيلولوجيا لكلاسيكية، ؤ موراها تحوّل ل لفلسفة. ف 1869 ولّا أصغر واحد شد لكرسي ديال لفيلولوجيا لكلاسيكية ف جاميعة بازل (ف مدينت بازل، دابا ف سويسرا) ملي كان عندو 24 عام. ف 1879، عتازل تّدريس ف لجاميعة بسباب مشاكل صحية لي عانا منها حياتو كاملة. أغلبية د لمؤلفات ديالو سالاهوم ف لعقد لي موراه. ف 1889، جاه نهيار كامل ؤ فقد لقدرات لعقلية ديالو. بقات مّو كاتعتاني بيه حتا ماتت ف 1897، ؤ موراها ختو إيليزابيت فورستر نيتشه حتا مات هوّا ف عام 1900.[1]
لأعمال د نيتشه كاتطرّق ل لمناݣرات لفلسافية، شّيعر، نّقد تّقافي، ؤ لأداب د تّعاويد، معا تفضيل ل لحكام لمأتورة ؤ سّخرية. كيتّعتابر نيتشه من أكبر نّقاد ديال دّين سيرتو لمسيحية ؤ لأخلاق لي كاتدعو ليها، ؤ كيحاول ف لفلسفة ديالو يعطي بديل ل هاد لمنضومة لأخلاقية تّقليدية لي، من لمنضور ديالو، مابقاتش عندها فايدة بعد لموت د الله لي تسبب ف أزمة ديال لعدمية. نيتشه كيركّز أيضا بزاف على لقدرة د لفرد باش يتجاوز لأخلاق تّقليدية، ب ليعتيماد على لإرادة ديالو د لقوة، ؤ تخدام لقدرة لإبداعية ديالو باش يخلق قيم ؤ أخلاق جديدة. لكتوبا دياولو مستهلمين بزاف من طّراجيديا ليونانية، ب لإضافة ل موفكيرين بحال زاراتوسطرا، أرتور شوپنهاور، رالف والدو إميرسون، ريشارد ڤاݣنر ؤ ݣوته.
مورما مات، ختو إيليزابيت ولّات أمينة على لمكتوبات ديالو، ؤ حرّفاتهوم باش تروّج ل لأفكار لقومية لمتطرفة ديالها، بشكل لي كيتناقض معا أراء معروفة ديالو لي ضد لقومية ؤ لمعادية د ليهود. داكشي علاش لفلسفة د نيتشه واحد لمدة كانت ولّات مرتابطة ب لفاشية ؤ نّازية. ولاكين ف خيلال لقرن 20، قدرو مجموعة د لفلاسفة بحال والتر كاوفمان ؤ جورج باطاي باش يصلحو صّورة د نيتشه، ؤ نشرو ڤيرسيونات جداد مصححة د لأعمال ديالو. ف عوام 1960 تّشهر نيتشه بزاف ؤ ستامر تّأتير ديالو على شلا مدارس فلسافية حتال ليوم.[2]
- لولادة د طّراجيديا (1872)
- على لحقيقة ؤ لكدوب ب معنى لاأخلاقي (1873)
- لفلسفة ف لعصر طّراجيدي د ليونانيين (1873; تّنشر أول مرة ف 1923)
- تأمّولات ماشي ف وقتها (1876)
- إنسان إنساني ب زّايد (1878)
- لفجر (1881)
- صّيونص لفرحانة (1882)
- هاكا هضر زاراتوسطرا (1883)
- مورا لخير ؤ شّر (1886)
- على جينيالوجيا لأخلاق (1887)
- لقضية د ڤاݣنر (1888)
- نّزول د لأصنام (1888)
- لمسيح دّجال (1888)
- هادا هوّا بنادم (1888; تّنشر أول مرة ف 1908)
- نيتشه ضد ڤاݣنر (1888)
- لإرادة د لقوة (مجموعة د لمكتوبات ب ليد ماكانتش تنشرات ف حياة نيتشه، لي كانت ختو إليزابيت حرراتها، ؤ لي من جوايه 1960 مابقاتش كاتّعتابر عامال موحّد)
- ^ "Internet Encyclopedia of Philosophy, Friedrich Nietzsche" (ب نڭليزية). مأرشيڤي من لأصل ف 2023-09-29. تطّالع عليه ب تاريخ 2022-03-12.
- ^ "Stanford Encyclopedia of Philosophy, Friedrich Nietzsche" (ب نڭليزية). مأرشيڤي من لأصل ف 2023-03-09. تطّالع عليه ب تاريخ 2022-03-12.