ويكيپيديا:ميزان لكلام

مرحبا ف لميزان د لكلام تاع ويكيپيديا بالدارجة!

هاد الصفحة مخصصة باش نتناقشو على ݣاع لمسايل لمتعلقين باللوغة والطرق دلكتابة فهاد لموسوعة الجديدة. لهدف هو نفكّرو مجموعين في لمعيارة (Standardisation) ديال لكتابة د الداريجة.

كمّل لقراية

• كيف ما كاتعرفو كاملين، هاد التحدي الزوين ديال لبني د لوغة كايهضرو بيها لملاين ديال الناس بلا ما تكون عندها حتى شي مؤسسة أكاديمية يمكن يكون صعيب وساهل فنفس لوقت: ساهل حيت ماكاين حسن من لحرية وبنادم يكتب وهو مرتاح بلا ما يكون مشروط أولّا مربوط بخلاّلات د اللوغة اللي هي "أرثوذوكسية وجامدة" وهي لحاجة اللي تقدر تخلينا نبدعو ونستاغلو لجماليات والتويشيات الزوينة اللي كاينة في اللسان لمغريبي الجديد بݣاع لمناطيق ولعيون د التقافة ف لبلاد، وصعيب حيت أي تقنين بزايد يقدّ يخلينا نعاودو نفس ديك "الأرثوذوكسية اللغوية" ونخلقو لغة محنّطة وحدة خرة.

  لحاجة لمهيمة هي أن كل واحد فالدراري والدريات اللي مشاركين وناشطين فهاد لمشروع الزوين ياخد راحتو ويزعم يشارك فلقواعد والنيقاشات دلهضرة، حيتاش للأسف كاين "غياب مؤسساتي وسبات أكاديمي" فهاد لمجال. نتمنى من المحررين قبل ما يديرو تحويلات أولّا تغييرات تعبيرية فالمقالات يجيو يناقشوها هنا باش نبنيو شوية بشوية واحد السياسات اللي غاتكون مرنة وفعّالة ونستافدو من بعضياتنا. ― أمين التيفراتين.

إلا بغيتي تزيد مناقشة جديدة، ورّك على لبوطونة الزرقة لتحت. غادي تديك نيشان لواحد الصفحة خرة فيها جوج د لخانات. فلخانة اللولة (الصغيرة) عافاك كتب(ي) عنوان قصير كايلخص داكشي اللي بغيتي تݣولو(يه)، فلخانة التانية (لكبيرة) كتب(ي) اللي بغيتي. عافاك منين تسالي لكتبة، حاول(ي) تسيني التعليق ولّا آي حاجة كتبتيها بلكتابة ديال ربعة دلعاريضات بحال هادو (~~~~).

أرشيڤ: 1 · 2

قتيراح ب لقياس علا "علّاقل"

سلام أ دّراري @Anass Sedrati, Reda benkhadra, OussamaOuh, سمير تامر, Amaziɣmorocco, AyourAchtouk, و Samira Seddik:. ف تّخدام ليومي كيڭولو لمغاربة "علّاقل" (ب نّڭليزية at least)، ؤ كاين لي كيكتبها بحال لعربية على الأقل، ؤلا عل لأقل... لقتيراح ديالي هوا ماشي غير نكتبوها علّاقل، ولاكين نزيدو حتا كلمات خرين مشابهين علا نفس لموضيل، لي هوما:

• علّكتر: at most ب لعربية "على الأكثر"، "على أكثر تقدير"
• علّحسن: at best ب لعربية "في أحسن الأحوال"
• علّخيب: at worst ب لعربية "في أسوء الأحوال"

شي مرات كانبغي نعبر علا هاد لمعاني ؤ كيخصني نكتب 3 ؤلا 4 د لكلمات متلا "ف أحسن لأحوال"، ؤ غالبا كيكون تّعبير موخود كيما هوّا من لعربية، شّي لي كيهرس لموسيقية د جّوملة ب دّاريجة. يلا كانو أفكار خرين ؤلا نتيقادات مرحبا. -- Ideophagous (نقاش) 15:51، 28 غشت 2021 (+01)

السلام عليكم السي @Ideophagous: و تبارك الله عليك ديما كاتجيب لينا لجديد ف لوزان. أنا متافق على عاد لفكرة و غادي نبدا نحاول نخدّمها قتاش ما قدرت. شكرا بزاف. -- Anass Sedrati (نقاش) 16:23، 28 غشت 2021 (+01)

سلام خاي أناس. شكرا. ؤ نيت هاد لبلان ديجا مخدّم ف كلمات خرين بحال: علّيسر، علّيمن، عالله، ؤ غيرهوم. --Ideophagous (نقاش) 16:45، 28 غشت 2021 (+01)

السلام السي ونهارك مبروك@Ideophagous:, أنا عندي شوار حسن ماكانقولوش "علاقل" و علكتر لا علكتر كانقولو "فلقليلة..."(فلقليلة كان يجيب غير التعادل بعدا) ، "فلكتيرة..." ، "فلمخيرة..."، "فلخايبة...." وهادشي اللي قشعت من لهضور دالناس --OussamaOuh (نقاش) 22:33، 28 غشت 2021 (+01)

سلام خاي @OussamaOuh:. "علّاقل" مخدمة من طاراف بعض لمغاربا. أنا بعدا ماعمري سمعت "ف لقليلة". ماتنساش بلي دّاريجة كيختالفو مصطلحاتها ؤ تعابيرها من منطقة ل منطقة. ولاكين لقتيراح ديالك حتا هوا مزيان. كولما زادو تّعبيرات كولما زادت تّغنات لّوغة، ؤ ولّاو إمكانيات كتار عند لكتاتبي باش يعبر علا لمعاني. --Ideophagous (نقاش) 09:22، 29 غشت 2021 (+01)

تحياتي لإخوان، بلاصة ف لقليلة نقدرو نخدّمو بلقليلة/بلكتيرة اللي ديجا كاينين. --سمير تامر (نقاش) 19:22، 30 غشت 2021 (+01)

الشدة: كيفاش غانمتلوها فلعنوان؟

@Ideophagous, Anass Sedrati, Reda benkhadra, و OussamaOuh: تحياتي ليكوم لإخوان. ماكرهتش نهضرو على كيفاش غانمتّلو الشدة فلعناوين ديال لمقالات ولقوالب ولپاجات لخرين. أنا كانشوف باللي ضروري خاص تكون شي حاجة تمتلها، متلا "ال" فاللول ديال لكلمة. متلا (على سبيل لمتال ماشي لحصر ومايتقلقش مني اللي كتب لمقالة :) ) "مجلس نواب" جات خايبة فلمنضر وماكاتبانش واش فيها شدة، واخا راه كاينة حيتاش النواب مضاف إليه ديال مجليس. ماعرفتش هادشي يقدر يتلف الناس حتى فالتقلاب ولقراية. آش بان ليكوم؟ --سمير تامر (نقاش) 15:48، 8 شتنبر 2021 (+01)

ب صراحة أنا كاتجيني ديك ال غير زايدة حيت ماكاتّنطق لا لّيف لا لّام. بعدا لعربية كاتّنطق فيها لّيف حتا معا لحروف شّمسية. ف جميع لحالات يلا بغينا نتبعو سيستيم جديد د لكتبة لي يكون مناسب ل دّاريجة ضاروري غادي يخص لقاريين واحد لمدة باش يولفو يقراو بيه، ؤ حنا نيت باش نولفو نكتبو بيه. هادشي ماكيمنعش باش نديرو شي تّيفاق مرحالي علاما نكونو رصّينا لقواعيد د لكتبة. أما لقضية باش يعرف بنادم واش كاين تعريف ؤلا لا، راه كاينين لوغات عر منا، بحال رّوسية مافيهاش أصلا علامة د تّعريف ب مرة، ؤ بنادم خاصو يفهم غير من لكونطيكست واش كاين لكلمة معرّفة ؤلا لا. --Ideophagous (نقاش) 15:54، 8 شتنبر 2021 (+01)

@Ideophagous: هانتا، واش ماشي مزيان إلا تسهلات لقضية؟ زعما داك الليف واللام واخا زايدين راه قاضين غرض ديال يبينو لإضافة والتشديد. أما تبقى لعناوين كولها نكرة هكاك كاتبان ليا ماجاتش. أنا ماكاندويش على لعناوين اللي فيهوم كلمة وحدة (بحال شجرة، تفاح، دولة، سلاح...) هادو مزيان إلا بقاو نكرة غايكون التقلاب عليهوم ولخدمة بيهوم فلمقالات ساهلة، ولاكين متلا "لحركة شعبية" أولّا "حيزب طليعة" كاتبان بحال إلا غا زديان دلكلمات بلا قواعد. أنا ماعرفتش أنا غاݣلت وصافي. --سمير تامر (نقاش) 16:06، 8 شتنبر 2021 (+01)

سلام خاي @سمير تامر:، يلا كان تّيفاق د جّماعة، سيرتو ب نّسبة ل لعناوين، ماشي موشكيل. نشوفو شنو يڭولو لوخرين. --

Ideophagous (نقاش) 17:26، 8 شتنبر 2021 (+01)

سلام دراري،@سمير تامر و Ideophagous: كايبان ليا خاص تمتلوها بحال لعربية وهادشي اللي كاندير أنا "مجلس النواب" مفهومة و ساهلة ماهلة حتا على لقراي ديال النص. و حتا ئلا رديتو لبال للنطقان ديالها ماكانقولوهاش ناشفة "نّواب" ضروري ماكانزيدو واحد "ء" قبل منها واخا ماكاتكتب! وكاتكون مسكّنة باش تقرا بحال هاكا /مجليس ءْنووّاب/ حاولو تعادوها بشوية فدماغكوم وغاتلقاو هاد لقضية، ساع هادشي علاش كاتبانليا ديك ال الشمسية ضرورية حتا فالداريجة وماشي غار لعربية ، حاجة خرا ديك "يدير" مهم ڭاع لفعال بالصيغة اللي كايبداو ب "ي" فلحقيقة و فالنطق اللي معمول بيه خاص ئتبداو ب "ئ" ولا "إ" ، بحال "يدير" خاصها تولي "ئدير"/"إدير"، "يقدر"=>"إقدر"، "ينتاقل" => "إنتاقل" ... من غير لمضارع "كايدير" كاتبقا ديك ل "ي" هادي خاصية فالدارجة كاتبعد فيها على لعربية لفصحا اللي كايكون فيه النطقان دل "ي" باين ؤ مافيهش تخرشيش (و فنفس لوقت نقطة تقارب معا لأمازيغية حيت لفعال فل infintif فالامازيغية حتاهوما كايبداو ب "إ" بحال "إطاس" زعما "إنعس") هاد الصيغة موجودة علقليل فلمنطقة اللي فيها أنا والايني ماعرفتش لبلايص لخرين واش حتاهوما نفس لقضية ؤلا لا-- OussamaOuh (نقاش) 18:01، 8 شتنبر 2021 (+01)

سلام خاي @OussamaOuh:. أنا ب صراحة كانّطقها حرفيا "نّواب"، بلا ليف ؤلا همزة قبل. يمكن ف شي مناطق خرين كاتنطقوها بحال هاكاك، حيت نيت واحد لمرة كنا ناقشنا هاد لبلان ف ميزان لكلام ؤ واحد سّاط حاول يقنعني ب نفس لهضرة، ولاكين وخا عاودتها شحال من مرة ف دماغي ماكاتجينيش همزة تماك. ولاكين ماشي موشكيل يلا درنا قاعيدة باش نزيدو لّيف ؤ لّام ف لحالة ديال لحروف شّمسية، ؤ لّام بوحدها ف لحالة د لحروف لڭمرية. ب نّسبة ل تّصريف د صّيغة د لّاتمام (لي منها كيتّجبد لموضاريع)، حنا كانّطقوها ب ليا، وخا سامع حتا ئ/إ عند بعض نّاس. كانضن لقاعيدة ب ليا غادي تجي سهل، ؤ نيت هيا لي مخدّم لؤستاد محمد لمدلاوي ف كتابو "العربية الدارجة" لي كيوصف فيها لمزايا لّيسانية د دّاريجة. بشكل عام، لكتبة ماشي ضاروري ؤ ماخاصهاش تتبع نّوطق 100% حيت كاينين عتيبارات صرفية ؤ لهجاوية خاصنا ناخدوها ف لحسبان. --Ideophagous (نقاش) 18:33، 8 شتنبر 2021 (+01)

@Ideophagous:،راه نفس الشي اللي قلتا حتانا "ال" الشمسية هيا لمزيانة وخا لمقصود للتخدام ديالها بيناتنا ماشي بحال بحال. ي و ئ كيقلتي على حساب لمناطق -- OussamaOuh (نقاش) 18:54، 8 شتنبر 2021 (+01)

سلام خاي @OussamaOuh:. عاجلا أم آجلا غادي يخص نديرو توحيد ديال لقواعد د لكتبة، سيرتو ف بحال هاد لبلانات. علّاقل ماخاصش يكونو 20 قاعيدة، جوج طرقان د لكتبة علّكتيرة، ؤ غير يلا كان ضاروري. متلا نكتبو يا ال يا غير شّدة ف نّص، ؤ غير ال ف لعنوان باش يكون واضح ؤ حيت تماك مانقدروش نزيدو شّدة. بلاتي غير نزيد لقواعد كاملين من داك لكتاب ف ويقاموس، ؤ نقدرو نّاقشوهوم كاملين ديك سّاع. --Ideophagous (نقاش) 11:57، 28 شتنبر 2021 (+01)

@Ideophagous: كايبان ليا باللي ضروري و ديما خصنا نخليو لقاعيدة لعربية فالشدة "الدورة الدموية" حسن من "دّورة داموية" بلا مانحتاجو نشكلوها وماعمرني شفت ياد(ديجا) شي واحد كايكتب غير بالشدة حتا فلقراية كاتجي معنكشة حيت مامولفينهاش، شخصيا كانتديرونجا فاش كايبان ليا شي كلمة بادية بالشدة...-- OussamaOuh (نقاش) 23:16، 30 شتنبر 2021 (+01)

سلام خاي @OussamaOuh:. أي لوغة فاش كاتستاقل ب داتها راها كاتقاد قواعد د لكتبة لي موالمين ليها، ماشي ضاروري تتبع قاعيدة قديمة. ف لّخر راها مسألة د لولف ؤ صافي. ف جميع لحالات، فاش يجي لوقت د لڤوط، عندك لحق تڤوطي علا لقاعيدة لي كاتجيك مزيانة. --Ideophagous (نقاش) 06:02، 1 أكتوبر 2021 (+01)

تعليق أمغاري: @سمير تامر, OussamaOuh, Anass Sedrati, و Reda benkhadra: سلام أ دّراري. وخا هاد لمداكرة قديمة شوية، بغيت نڭول ليكوم بلي راه تصاوبات لقاعدة ديجا، و تزادت ل كناش لقواعد. لقاعدة كاتڭول بلي "ال" كاتخدّم ف لعناوين" يلا كانت لكلمة كاتبدا ب حرف شمسي، و ف النص كاتبقى لحرية ل لكتاتبي. شوفو التفاصيل ف "حكمة 5".--Ideophagous (مداكرة) 19:04، 6 غشت 2023 (+01)

تنبيه بخصوص لحوروف

كاين شي حروف خاص ضروري نتسخدموها حيت كاينة فلوغتنا الداريجة ولكن ماكايناش فلعربية. والعكس تاني، كاني شي حروف فلعربية لي ماكاينينش فالداريجة. أمتيلا:

حوروف خاص نستخدموها

داريجة	لاتينية
گ	G
پ	P
ڤ	V

حوروف ما خاصناش نستخدموها

داريجة	عربية
ت	ث
ض ولا د	ظ
ض ولا د	ذ

وكاين شي حروف لي خاصنا نلقاو ليها شي حل بحال حرف طا رقيق. ميتال: طران. هاد الحرف كاين بين حرف طا غليضة وحرف التا — هاد لميساج مامسنيش خلاه AyoubBouamriMa (نقاش)، نهار 22 نونبر 2021 معا 15:31

سلام @AyoubBouamriMa:. أول حاجة، شكرا علا لموساهمة ؤ طّرح ديالك ل هاد لموضوع. حوّلت لموضوع ديالك ل ميزان لكلام، حيت هنا فين خاص يطراو لمداكرات علا لمسايل لّوغاوية. تاني حاجة، هاد لموضوع كنا ديجا ناقشناه (شوف لارشيڤ لفوق)، وخا باقي ماكاينش تّيفاق علا شي تويشيات. لي متّافقين عليه هوّا لستيعمال ديال ݣ = g، ڤ = v، ؤ پ = p. تقدر تخدّم ڭ (هادا حرف عندو رمز د لونيكود مختالف علا ݣ) ؤلا گ ديال لفارسية، ولاكين كاين پروصي كيحوّل هاد لݣاوات ل ݣ لي كيتلونصا مرة ؤلا جوج ف شّهر (يلا بان ليك شي حد خدّم ك ؤلا ج ؤلا غ ولا شي حرف أخور بلاصت هاد تّلاتة، تقدر تصلحو). ب نّسبة ل ث، ظ ؤ ذ، بشكل عام ماكانستعملوهومش، ولاكين ماممنوعينش (سيرتو ث ؤ ذ) حيت حتا ف لكلمات لڭاورية كيقدرو يبانو، متلاً "دجون سميث" John Smith. ب نّسبة ل حرف ت لفرانساوي لي كيكون مابين ت ؤ ط، كانخليوه علا حساب لقياس، حيت كلا واحد كي كينطقو، ولاكين بشكل عام كيتّكتب ت. ف لعناوين خاص تكون تحويلة باش لي قلّب ب شي واحد فيهوم يطيح ف لارتيكل. يلا عندك عتيراض ؤلا تعقيب، مرحبا. --Ideophagous (نقاش) 16:43، 22 نونبر 2021 (+01)

أهلا سي @AyoubBouamriMa: هاد لقضية راه رادينلها لبال ؤ راه كاتخدمو دوك لحروف (پ، ڭ، ڤ) ف لمقالات لي كاينين هنا، بحال دابا هادا ديال پاراݣواي.

أما ب نسبة لموضوع تاني ديال لحروف (ث، ظ، ذ)، لقضية شوية معنكشة حيت هاد لحروف كيتخدمو حتا ف شي لهجات د داريجة بحال ف ريف ولا لأطلس، والاكين راه باديين نيقاش عليه ف هاد صفحة. تقدر حتا نتا تعطي رييك فيه ؤ تقول شنو باليك. تهلا --Reda benkhadra (نقاش) 16:48، 22 نونبر 2021 (+01)

لفاصيلة ؤ نّقطة

سلام أ دّراري @Reda benkhadra و Anass Sedrati:. كانقتارح باش نّاقشو لموضوع ديال تخدام لفاصيلة ؤ نّقطة، لي كان جبدو أناس واحد لمرة. حاليان كاينة شوية د لفوضا ف تخدام لفواصل لعربية ، ؤ لّاتينية , ب لإضافة ل نّقطة ف لكتابة د نّماري ؤ لأعداد. كانضن راه واضح بلي لفاصيلة لعربية هيّا لي خاصها تخدّم ف نص عادي، ؤ بلي جميع لفواصل لّاتينية ف هاد لحالة خاصهوم يتعوضو. لي ماواضحش 100% هوّا ب نّسبة ل نّماري ؤ لأعداد. على حساب هاد لمقال ف ويكيپيديا ب نّڭليزية، لأعداد لعشرية ف لمغريب خاصهوم يتكتبو ب لفاصيلة لّاتينية، بحال 1,25 (واحد فاصيلة خمسة ؤ عشرين)، ولاكين ماكيوضحش واش ف لمغريب خاص يتكتبو لأعداد لكبار ب نّقطة، بحال 100.000.000 (ميات مليون) باش تكون لقراية ديالهوم واضحة. غادي يخصنا نخرجو ب قاعيدة إلزامية ديال لكتابة د لفاصيلة ؤ لأعداد لعشرية ؤ نّماري لكبار. قتيراح:

• لفاصيلة لعربية ديما كاتخدّم ف نص عادي. أي فاصيلة لاتينية ف بحال هاد لحالة خاصها تّعوض ب فاصيلة عربية.
• لأعداد لعشرية يتكتبو ب فاصيلة لاتينية ديما، كيما متافق عليه ف لمغريب.
• لأعداد ؤ نّماري لكبار (لي فايتين 9999) يتكتبو ديما ب نقطة مابين كلا تلاتة د نّماري باش لقراية ديالهوم تسهال.

واش بانت ليكوم شي حالة خرة ماتطرقتش ليها؟ فاش نتّافقو على لقاعيدة، خاصها تّزاد ل حكام لّوغة، ؤ غادي يكون مزيان يلا قادّينا دليل د سّتيل بحال هادا د نّڭليزية. نقدر نقاد عطاشة بوتية لي كاتصلح هاد لفواصل على حساب لقاعيدة لي تّافقنا عليها.--Ideophagous (نقاش) 12:03، 24 فبراير 2022 (+01)

السلام @Ideophagous:. شكرا بزاف حيت جبدتي هاد النقاش لمهم بزاف. الصراحة لإقتراح ديالك مزيان (هو اللي كانخدم بيه ملّي كاندير لأرقام). اللي غايبقا صعيب هو واش نتا ساهل ليك تدير عطاشة تاتقاد لفواصل لا عرفتي هاد لحالات ب تلاتة؟ -- Anass Sedrati (نقاش) 15:55، 24 فبراير 2022 (+01)

سلام خاي أناس. تقدر تكون معنكشة شوية ب نّسبة ل نّماري، ولاكين كاينين "تّعبيرات لمعاودة" Regular expressions لي كيسهّلو بحال هاد نّوع د لعطاشات. متلاً لپروڭرام يقدر يميز لأعداد من لحروف ب تعبير بحال هادا '[0-9]+' يعني ([0-9] = واحد لحاجة لي فيها نماري 0 تال 9، + = لي كيتّعاودو). حتا يلا ماكانش شي حل كامل، غادي نحاول علّاقل نصلح داكشي لي يقدر يتّصلح ب لبوت، ؤ نعلّم لوخرين ب شي طاڭ ؤلا تصنيف باش نصلحوه بيدينا. ؤ يلا بان ليكوم لبوت دار شي غلطة تقدرو تعلموني ديك سّاع. --Ideophagous (نقاش) 16:37، 24 فبراير 2022 (+01)

لكتابة ديال لكلمات ؤ سّيستيم د لڤواييلات

سلام أ دّراري، @Anass Sedrati, Reda benkhadra, THEpr4stro, Mico2022, Fatima Zahra Gouida, و Omarboulma1926:. لاحضت واحد لإشكالية ف لكتابة ديال لكلمات، سيرتو لأجنبية، ب دّاريجة، يمكن سبابها هوّا لخلط مابين سّيستيم د لڤواييلات د لعربية موقابيل ديال دّاريجة. هاد جّوج سيستيمات راهم مختالفين، ؤ لكلمات (لأجنبية) كي كيكتبو ب لعربية، ماشي ب ضّارورة يتكتبو ب نفس طّاريقة ب دّاريجة.

• سّيستيم د لڤواييلات د لعربية: فيه تلاتة د لڤواييلات قصار a (= فتحة)، u (= ضمة)، i (= كسرة)، لي عندهوم موقابيلات طوال كيتمتّلو ف لكتابة ب لمد: ا، و، ي. لاحضو متلا كيفاش كاتّنطق كلمت "بُطُولَة" buṭuulah. عندها ڤواييلة u قصيرة مورا لبا، ؤ ڤواييلة u طويلة مورا طّا.
• سّيستيم د لڤواييلات د دّاريجة: كانلقاو دوك تّلاتة د لڤواييلات د لعربية، ولاكين ب لإضافة ل هادشي عندنا 4 د تّويشيات ماكانلقاوش ڭاع ف لعربية:
  • واحد لڤواييلة قصيرة بزاف كاتسمّا عند مّالين لّيسانيات "شٖوا" ؤلا "شٖڤا" schwa. لاحضو متلاً لفرق مابين نّطقان ديال لفيعل حبـٰس (= وقف، شد شي واحد ف لحـٰبس) ؤ كلمت حـٰبس (لموضع فين كيتّحبس بنادم). كاينين بزاف د لكلمات لي مايمكن نفرقو بيناتهوم غير ب هاد شّٖوا. ولاكين هادا موضوع ل وقت أخور.
  • واحد لخاصية كاتسمّا تّدوير لي كاتجي بحال واو خفيفة مورا شي حروف، سيرتو لكاف ؤ لڭاف. متلاً لاحضو لفرق ف نّطقان مابين كمية (مقدار) ؤ كٗمية (خنجر مغريبي). حتا هنا كاينين بزاف د لكلمات لي مايمكن تّمييز بيناتهوم غير ب هاد تّدوير ؤ لي لمعنى ديالهوم كيتبدّل تماماً.
  • بشكل عام ماكاينش تمييز مابين ڤواييلات قصار ؤ طوال ف دّاريجة. داكشي علاش لكتابة د لڤواييلات بشكل باين مناسبة ل دّاريجة حيت ماكاينة تا معنى باش نميزو مابين صوت ب لمد ؤ بلا مد. ضونك ف لميتال لي قبل نقدرو نكتبو ب دّاريجة "بوطولة" boṭola بلاصت "بطولة".
  • لڤواييلة u كاتولي o يلا تلاقت معا كونصونة مفخمة (بحال ط، ض، ص...) ؤ لعكس تا هوّا، يلا شفنا لڤوييلة o كانضن بلي حسن نكتبوها ب كونصونة مفخمة. متلاً لكاتب جّاپوني Akira Toriyama، ف لعربية كيكتبو كنيتو "تورياما"، ولاكين ف دّاريجة كانّطقو "طورياما". ف دّاريجة "تورياما" غادي تكون هاكا Turiyama.

كاينين بزاف د لمواضيع لي خاصهوم يتناقشو هنا، ولاكين نركّزو دابا حسن غير على هاد لبلان ديال لڤواييلات سيرتو نّقطة لّخرانية. لكونصونات ف دّاريجة حتا هوما ب خبيزتهم تا نّاقشوهوم من بعد. ؤ يلا عندكوم مولاحضات مرحبا. تهلاو!--Ideophagous (مداكرة) 09:35، 14 مارس 2022 (+01)

واخا فهمت Mico2022 02:10، 15 مارس 2022 (+01)

omarboulma1926 معا

ال vs شّدة

سلام أ دّراري @Anass Sedrati, Reda benkhadra, سمير تامر, Mico2022, Omarboulma1926, DocPPicola, و Mehdi Immähder: @Marocsite, AmineHadji93, AyourAchtouk, Mr. Lechkar, Mohamed.mdb, و عصام أزناك:. هاد لمسألة ناقشناها بزاف د لمرات بلا مانوصلو ل تّيفاق نهائي (شوفو نيت لفوق ؤلا ف لارشيڤ). كانقتارح باش نديرو ڤوط على لقاعيدة باش غادي نكتبو ف لعناوين، ف لحالة ديال لكلمات لمعرّفة لي كاتبدا ب حرف شمسي. هاد لڤوط ماكيشملش لكتابة ف نّص براسو، لي كيبقا لكتاتبي بشكل عام حر فيه (طالمّا لمعنى مفهوم). يعني واش نكتبو ف لعنوان:

1. لإمبراطورية الرومانية (ب ال)
2. لإمبراطورية رومانية (ب عتيبار بلي رّا خاصها تّقرا ب شّدة)
3. لإمبراطورية رّومانية (نديرو ستيتناء ديال لمنع د لكتابة د تّشكال ف لعناوين ف هاد لحالة)

مولاحضات خاصة:

• لحالة 1: باينة ؤ مولّفينها لمغاربا من لإملاء د لعربية. لي كايضيرونجي فيها هوّا بلي هاد جّوج حروف (ليف ؤ لام) ماكيتنطقوش، ؤ حنا بشكل عام كانحاولو نبسّطو لكتابة د دّاريجة ماشي نصعّبوها ؤلا نخليو صّعوبات د لعربية فيها
• لحالة 2: غادية معا تّبسيط د لكتابة، ولاكين تقدر تّقرا غالطة (بلا شدة ؤلا تعريف)، ؤ ماشي مستبعد باش تسبب شي سوء تفاهم ف لقراية ؤلا لمعنى
• لحالة 3: حالة ميتالية ف نضري، مي عاوتان واش نكسرو لقاعيدة ديال تّشكال ف لعنوان ؤلا لا. تقدر تّزاد تحويلة بلا شدة بشكل ؤطوماتيكي ب لبوت.

لمداكرة ؤ لڤوط ل مدة شهر، موراها غادي نطبّقو لقاعيدة لي تّافقات عليها جّماعة. تهلّاو! Ideophagous (مداكرة) 07:42، 5 يوليوز 2022 (+01)

سلام خويا Ideophagous ، هاد لبلان طاح ليا وولبارح فراسي فاش قادّيت لمقالة ديال أگادير ؤ حتّى انا فنضري لحالة تّالتة مزيانة و باينة مافيهاش فين ايدوخ لقاري. DocPPicola (مداكرة) 15:43، 5 يوليوز 2022 (+01)

فهاد لحالة دلامبراطورية رومانية ، فهاد لحالة رومانية مضاف ليه و "ال" تتضغم. ال لگمرية فلمضاف ولمضاف ليه تيتم لاضغام ديالها ديما فنوطق " وماتتحتاش توضحها بالشدة. ولكان ضروري تكون شي زيادة باش تفسرها وتوضحها ملاحسن تبقا كيف متعارفين عليها الناس بالالف واللام. ولاغلبية تيكتبوها بلا "ال"، ومفهومة. تيخص لقواعد والصعوبات ينقصو لمينيموم ولا غاتنتج لوغة غريبة عل ماليها. وكيف قلتي خاص لمغربية تبسط، باش تكون بسيطة وحلوة وشكلاط خاص ينقصو لقواعد، لقواعد لي تيصعبو اللوغات.

بالنسبة ليا تنقترح فلمضاف ولمضاف ليه تكتب بلا "ال" :گمرية طبع ما الشمشة ضروريةا" وبلا شدة. "الجمهورية تونسية" " المملكة سعودية" " الجمهورية صينية" تتبان مسنتكة بلا شدة وبلا ال، ساهلة باش يولفوها الناس وماتبانش معيقة . علاش بالضبط لحرف اللول نشكلوه مادام ماتشكلوش لحروف لخرا. Marocsite (مداكرة) 01:52، 6 يوليوز 2022 (+01)

السلام سي Ideophagous وشكرا بزاف حيت بديتي هاد النقاش. ف لحقيقة هاد لموضوع مهم حيت بالصح خاص نتافقو ونكتبو كلنا بطريقة وحدا. أنا شخصيا تانكتب ب 1، حيت هي اللي تيفهمها أي واحد واخا ماشي معانا، ولكن نقدر نكتب 3. 2 جاني ماشي بلان حيث يقدر يتّقرا غالط ولا عوج، حيث ماغاديش نعرفو قتاش نفرقو ف النطيق ما بين واش كاينة شدة ولا ماكايناش. لمهم نشوفو الجماعة شنو أتقول وانا معاكم ف اللي قررتيو. -- Anass Sedrati (مداكرة) 18:34، 6 يوليوز 2022 (+01)

◀ Anass Sedrati مرحبا الأعزاء. بس شيء يوم واجتهه أن "ال" عندكم يرتبك مع بعض الأسماء الخاصة، مثلا: "اليمن" (دولة) مع "اليمين" (جهة)، افتحوا مقالة لعراق وأذهبوا إلى جيهة د صوڭان وهي "ليمن" ولا "اليمين" بالفصحى. Ruwaym (مداكرة) 10:31، 8 يوليوز 2022 (+01)

مرحبا سّي @Ruwaym:. هادي حالها ساهل: لْيامان (داريجة) = اليَمَن (عربية)، لِيمْنْ (داريجة) = اليَمِين (عربية). لمقالة لي كاتدّي ليها ليمن صايبها شي حد غير مؤخراً ؤ غادي تّدمج معا ليامان. Ideophagous (مداكرة) 11:25، 8 يوليوز 2022 (+01)

سلام لخوت، أنا معا ل (لإمبراطورية الرومانية) حيتاش 1) موالفينها من لعربية لفوصحى زعما راه ماشي عيب إلا خدينا منهوم هاد لخاصية كولا لوغة كاتاخد شي حاجة من لوخرين 2) صعيب تلقى الشدة فلكلاڤيي وكاتعنكش فلكتابة إلا ياد لقيتيها 3) مشاكيل د لبوت فلعناوين كيما ݣال لأخ Ideophagous و 4) لپاج اللي فيها الشدة صعيب تلقاها من لبحت اللي فلفوق د الصفحة إلا ماكتبتيهاش، يعني هي واخا كاينة لموطور د لبحث ماكايطلعهاش. --سمير تامر (مداكرة) 11:49، 13 يوليوز 2022 (+01)

تعليق أمغاري: آخر فورصة لي بغا يبدّل لڤوط ديالو. غدا معا 9 د صّباح غادي يتسد.--Ideophagous (مداكرة) 22:14، 4 غشت 2022 (+01)

تعليق أمغاري: نّتيجة ل حد سّاعة:

طابلو د لڤوط

كتاتبي	ب ال (لإمبراطورية الرومانية)	ب شّدة (لإمبراطورية رّومانية)	بلا ال ؤ بلا شدة (لإمبراطورية رومانية)
DocPPicola	0	1	0
Marocsite	1	0	0
Anass Sedrati	1	0	0
Ideophagous	1	0	0
سمير تامر	1	0	0
Reda benkhadra	0	1	0
Rachidourkia	0	1	0
لمجموع	4	3	0

لڤوط غادي يتسد نهار 5 غشت معا 9:00 د صّباح د لمغريب. أي واحد يقدر يڤوطي ؤلا يبدّل لڤوط ديالو من هنا ل ديك سّاع. نّتيجة غادي تّزاد ف صّفاحي ديال لحكام د لّوغة ؤ لحكام د لعناوين. عافاكوم ماتكومونطيوش ف هاد لفقرة تحت من هاد طّابلو.--Ideophagous (مداكرة) 12:07، 10 يوليوز 2022 (+01)

تعليق أمغاري: طاڭ ل لكتاتبيا لي شاركو ف لڤوط @Anass Sedrati, Reda benkhadra, سمير تامر, DocPPicola, Marocsite, و Rachidourkia: لحكمة تزادت ل لّيستات د لحكام ديال لّوغة ؤ د لعناوين. تقدرو تطّالعو عليهوم ف:

• ويكيپيديا:لحكام د لمحتوى - عناوين لمقالات
• ويكيپيديا:كناش لقواعد

الهمزة في اللخر ديال لكلمة

اهلا بغيت نطرح مسألة الهمزة فاللخر ديال الكلمة حيت تانظن بلي مانقدروش نطبقو عليها نفس القاعدة ديال التاء في أخر الكلمة، بسبب طريقة نطق هاد الكلمات فالدارجة. مثلا جات تقيلة نقولو مدراسا ولا دراجا ولا سيارا، لابد من التا مربوطة واخا ماكاتنطقش، لكن بالنسبة للهمزة الأمر مختلف في بعض الحالات، واخا هي كاتنطق فأخر الكلمات تانظن أنه ماخصناش نكتبوها باش نحافظو على أصالة النطق ديال الدارجية. مثلا: صلاحا، لأوليا، شعارا، لأتقيا، لأدابا، الوزارا، لأطبا ---------- حيت بمجرد مانكتبوها تايولي خاصها تنطق، ويلا تنطقات كاتفقد تامغريبيت ديالها موضوع للنقاش --Mounir Neddi (مداكرة) 12:46، 11 غشت 2022 (+01)

سلام خاي @Mounir Neddi:. متافق معاك 100%. لهمزة يلا ماكانتش منطوقة ف كلمة لي متداولة ب دّاريجة بحال فقها ؤلا شوعارا ؤلا عولاما، ماخاصهاش تّكتب. ولاكين كلمات بحال "فضاء" ؤلا "إملاء" لي ماعندهومش موقابيلات داريجية متداولة، كانضن ماشي موشكيل يلا كتبناهوم كيما هوما ف لأصل ب لعربية. Ideophagous (مداكرة) 17:58، 13 غشت 2022 (+01)

طاڭ ل إمغارن: @Reda benkhadra, Mico2022, Mounir Neddi, و Anass Sedrati:، طاڭ ل لكتاتبيا النشيطين @Siaahmed, Mr. Lechkar, Alitoar, Achraf112, U13N4M, و Bisel91:، طاڭ ل لكتاتبيا لي كانو كيساهمو ف حلقات لمداكرة د ميزان لكلام @Elmerrakchi, Rabio10, DocPPicola, Marocsite, سمير تامر, و Rachidourkia:

إقتراح ديال قاعدة جديدة ب النسبة للكلمات لي أصلهوم عربي و كيتكتبو ب لهمزة ف اللخر (ماكاينينش كلمات من أصول خرين لي يقدرو يتكتبو ب لهمزة). تقدرو تشوفو لقواعد لقدام لي ديجا تّافقات عليهوم الجماعة ف كناش لقواعد

• لهمزة ف اللخر د لكلمة ماكاتّكتبش يلا كان النطقان ديالها ف الداريجة متداول بلا همزة، متلاً:
  • أطباء => طبّا
  • فقهاء => فقها
  • علماء => عولاما/علما
  • ماء => ما
  • دكاء => داكا/دكا
  • سماء => سما
• تقدر تّكتب لهمزة ف حالات ستيتنائية يلا لكلمة مامتداولاش ڭاع عند لمغاربا بلا همزة و تقدر ماتّفهمش ولا تسبب لتيباس ف لفهامة يلا ماتكتباتش لهمزة، و ماعندهاش موقابيل ب الداريجة لي مافيهش لهمزة، بحال:
  • فضاء
  • إنشاء
• كاينين كلمات لي مقبولين ف لإستعمال لعام، وخا عندهوم موقابيلات ديالهوم بلا همزة، حيت هاد لموقابيل ماكيكونش متداول بزاف. ف هاد لحالة، الصيغات بجوج مقبولين. متلاً:
  • جزء <=> ڭزو
  • أجزاء <=> ڭزوّات

لقاعدة خاصها تّناقش، بشكل عام و ف تفاصيلها، تا نوصلو ل إتفاق عام لي يرضي كولشي ؤلا علّقليلة لأغلبية الساحقة ديال لكتاتبيا لمشاركين. لإقتراح هوّ باش تكون هاد لقاعدة إلزامية. يعني ف الجواب ديالكوم عافاكوم وضّحو:

• واش هاد لقاعدة متافقين معاها ؤلا كاترفضوها بشكل كامل
• واش هاد لقاعدة كاتوافقو على جزء/ڭزو منها ؤ كاترفضو ڭزوات خرين
• شنو التبريرات لي عندكوم ل الرأي ديالكوم
• شنو التغييرات لي بغيتو تديرو ف لقاعدة يلا كنتو مامتافقينش
• واش لقاعدة خاصها تكون توجيهية، يعني مستحسن باش يتبّعوها لكتاتبيا، ولاكين ماشي ملزّمة عليهوم؛ ؤلا إلزامية يعني أي واحد شاف شي كلمة مامكتوباش على حساب لقاعدة خاصو يصححها، و نقدرو ڭاع نديرو سيستيم ديال التصحيح لؤطوماتيكي ل هاد لقاعدة لي مطبق و معمم على لموسوعة كاملة.--Ideophagous (مداكرة) 15:40، 7 غشت 2023 (+01)

متّافق Achraf112 (مداكرة) 10:21، 29 غشت 2023 (+01)

متّافق Alitoar (مداكرة) 03:47، 4 شتنبر 2023 (+01)

جليد، ڭلاص، Ice

سلام أ دّراري @Anass Sedrati, Reda benkhadra, Mounir Neddi, و Elmerrakchi:. ملي كنا جبدنا لهضرة على شنو لموقابيل ديال "جليد" ب دّاريجة. كانضن عندنا 4 د لحلول: إما نقلّبو مزيان ف لمصادر تا نلقاو كلمة مناسبة ديجا كانت مستعملة، ؤلا ناخدو كلمة مستعملة و قريبة ؤ نوسّعو لمعنى ديالها، ؤلا ناخدو لكلمة من لوغة خرة (جليد، ڭلاص)، ؤلا نصاوبو كلمة جديدة. هنا كانقتارح "جْمادة" ؤلا "جْمادة د لما". ضونك عندنا:

1. جليد
2. ڭلاص
3. جمادة
4. جمادة د لما
5. شي كلمة خرة؟

Ideophagous (مداكرة) 18:06، 28 غشت 2022 (+01)

مسا الخير أنا بعدا تتعبني كلمة تلج ولّ التبروري — هاد لميساج مامسنيش خلاه Elmerrakchi (نقاش)، نهار 18 شتنبر 2022، 15:43

تلج، تبروري، و "جليد" كلا واحد فيهوم عندو معنى خاص بيه، ؤ ماكانضنش بلي خاصنا نخلطوهوم.--Ideophagous (مداكرة) 10:35، 13 أكتوبر 2022 (+01)

تيبان ليا ناخدو الكلمة من لغة اجنبية و أقرب وحدة لبنادم لي تيقرا هي "جليد" Rabio10 (مداكرة) 22:05، 28 أبريل 2023 (+01)

سلام السي ◀ Rabio10. سمح ليّا ماشفتش الجواب ديالك قبل، حيت كانو تخربقو شوية لكومونطيرات هنا، تا قادّيتهوم دابا. لإقتراح ديالك مزيان و نقدرو نقضيو بيه، غير هوّ 100% غادي تكون الداريجة فيها شي كلمة كاتعني "جليد"، غير حنا ماعارفينهاش ؤلا ماطاحتش علينا ف لبال بسباب قلة لإستعمال. حيت متلا ف الجبال د لأطلس غادي يكون لما كيجمد ف الليل ف الشتوة، و كيشوفوه الناس ف الصباح و عاطينو شي سمية. Ideophagous (مداكرة) 16:00، 7 غشت 2023 (+01)

تحياد vs حدف

سلام أ دّراري @Anass Sedrati, Reda benkhadra, Elmerrakchi, Mounir Neddi, سمير تامر, Marocsite, و Rachidourkia: @DocPPicola, MHMD DM, و Achraf112:. كيبان ليّا بلي كلمة "تحياد" هيّا لكلمة لمتداولة ؤ لعادية ف دّاريجة، ماشي "حدف" لي مدرّجة من لعربية "حذف". داكشي علاش كانقتارح باش ف لعناوين و لانطيرفاص، ؤ تا صّفاحي د شّرح، لمعاونة و لپروجي تّعوّض كلمة حدف/حذف ب "تحياد". لكلمات بجوج مقبولين ف لكتابة د لمقالات ب طبيعة لحال. هاد تّبديل يقدر يتدار بشكل بوتي. شنو بان ليكوم؟-- Ideophagous (مداكرة) 09:43، 13 أكتوبر 2022 (+01)

متافق Reda benkhadra (مداكرة) 09:57، 13 أكتوبر 2022 (+01)

متافق، و لكن واش خاص نكتبو "تحياد" ولا "حيّد"؟ حيث شي مرات را كيكون فعل، مثلا إلا شي أمغار بغا يحيد مقالة را "حدف" كاتعني "حيد" ولا لا؟ -- Anass Sedrati (مداكرة) 13:18، 13 أكتوبر 2022 (+01)

على حساب سّياق، واش خاص نخدمو لفيعل "حيّد" ؤلا سّمية "تحياد". -- Ideophagous (مداكرة) 13:34، 13 أكتوبر 2022 (+01)

الصحيح هو "حيد" عنوان فعل مبني للمجهول ماتحتاج لا تأنتو ولا تدكرو فالحالة ملي تتكون ايكون Icon فشي موقع او بحال هنا هنا فويكيگبيديا. ترجمة ل حدف او Delete. وتحياد او تحيدات تتبقا ممكنة ملي تكون مصرفة فشي وقت. بحال تحيدات = deleted او been deleted .او تم حدفها بالغربية Marocsite (مداكرة) 18:50، 16 أكتوبر 2022 (+01)

سلام سّي @Marocsite:. شكراً على لمداخلة ديالك. لي كنت قصدت هوّا سّمية حَدف => تحياد ماشي لفيعل، حيت سّمية تاهيّا مستعملة ف بزاف د لعناوين و شّروحات، ولاكين ف لحالة ديال لفيعل "حدف" غادي يتعوّض ب لفيعل لموقابيل ليه "حيّد".-- Ideophagous (مداكرة) 22:03، 16 أكتوبر 2022 (+01)

غا هي واحد لملاحضة لي شفت كلشي تيستعملها وهي الشكل دلكلمات، بحال لتتخافو لواحد مايفهمش ،فلحقيقة ماتتعجبنيش وخايفها تولي تقليد وقاعدة كلشي ايديرها او بنادم يولي معگاز ويولف الشكل باش يفهم وتصعاب لقضية ويكتارو لاميين فلغوتهوم لي ماغيفهموها غا لكانت مشكزلة. لي مافهمش لمغربية "او الدارجة كيفما تتسميوها" بلا شكل غا من السياق، راه المشكل ديالو، ماشي ديال لي تيكتب. Marocsite (مداكرة) 20:59، 17 أكتوبر 2022 (+01)

@Marocsite: بحالاش تّشكال لي كاتقصد؟ واش شّدة؟ حيت كانضن أغلبية خدّامين بلا تشكال (فتحة، ضمة، كسرة).-- Ideophagous (مداكرة) 18:08، 19 أكتوبر 2022 (+01)

متافق Achraf112 (مداكرة) 14:06، 19 أكتوبر 2022 (+01)

متافق --Mounir Neddi (مداكرة) 14:07، 13 أكتوبر 2022 (+01)