ويكيپيديا:لكتابة د الداريجة

شّكل د لكتابة د دّاريجة، لؤرطوڭراف، و لإملاء ديالها كيمتّلو تحدي كبير ف ويكيپيديا ب دّاريجة، على عتيبار بلي هاد لّوغة ماعندهاش صيغة معيارية موحّدة. لهدف د لكتابة هوّا باش نوصّلو لمعلومة ل لقاري ب أبسط طاريقة مومكينة، ؤ بلاما يطراو لتيباسات، يعني بلاما يتغالطو لمعاني بسباب شي كلمة ؤلا كلمات لي عندهوم بزاف د لمعاني ؤلا عندهوم نفس لؤرطوڭراف ف سّيستيم د لؤرطوڭراف لي مستعمل ف تّيكست. هاد لمسايل صعيب يتحققو 100% ف لواقع، حيت جميع لّوغات كانلقاو فيهوم حالات ديال لّتيباس، نيولوجيزم، ؤ تا كلمات لي خاص لواحد يقلّب ف ديكسيونير باش يفهمهوم.

ب عتيبار تّنوعات لّهجاوية ديال دّاريجة، ؤ تّأتيرات لبرانية ديال لوغات قوية بحال لعربية، لفرانساوية ؤ نّڭليزية، كيولّيو عندنا بزاف د لإمكانيات د كيفاش نختارو كلمة كاتعبّر على واحد لمعنى، ؤ كيفاش نكتبو ديك لكلمة. ف هاد لإطار كيبانو عندنا جوج توجهات رئيسية:

• كتابة محافضية ؤلا إيتيمولوجية: كتابة لي كاتحاول تحافض على شّكل ؤ لؤرطوڭراف د لكلمة كيما هيّا ف لّوغة لأصلية ديالها. هادشي كينطابق سيرتو على لكلمات لي جاية من لعربية. هاد شّكل د لكتابة كيكون أسهل ل شي واحد لي مولّف لورطوڭراف د لعربية لفصيحة و مرتاح فيها
• كتابة فونيتيكية: كتابة لي كاتحاول تكتب لكلمات كيما كيتنطقو ؤلا يقدرو يتنطقو عند لمغاربا. كاينين جوج طرقان باش كاتّدار لكتبة لفونيتيكية: تّشكال د لكلمات، متلاً "الْمْغْرِبْ بْلَادْ جَاتْ فْشَمالْ إِفْريقْيَا وْقْرِيبَة لْأُوروپَا، ضَايْرْ بِهَا الْبْحْرْ الشَّامِي والْمُحِيطْ الْأَطْلَسِي"، ؤ لكتابة ديال لڤواييلات مبيّنين بلاصت مايكونو مخفيّين (حيت دّاريجة ف أغلب لحالات مافيهاش لمد، عكس لعربية)، متلاً "لمغريب بلاد جات ف شمال إفريقيا و قريبة ل ؤروپا، ضاير بيها لبحر شّامي و لموحيط لأطلاسي". لكتابة ب تشكال لكلمات ماشي عملية ف مشروع بحال ويكيپيديا ب دّاريجة، داكشي علاش طّريقة تّانية هيّا باش خدّامين سيرتو. هاد شّكل د لكتابة كيكون أسهل ل شي واحد لي مامولّفش لورطوڭراف د لعربية لفصيحة، متلاً ماقاريش ل مستوى تعليمي عالي ف لمغريب، ؤلا دري(ة) صغير(ة) ؤلا مغريبي كابر ف لمهجر، ؤلا ماكيقراش لعربية بزاف.

نقدرو نزيدو توجه تالت، لي هوّا:

• كتابة إصلاحية ؤلا توفيقية: هاد لكتابة كاتحاول توفّق مابين دوك جوج توجهات لّولين ؤ تاخد أحسن مافيهوم، بحيت يكونو لكتابة ؤ لقراية د نّصوص ب دّاريجة ساهلين نسبياً على أي قاري من أي مستوى ؤ يكونو لّتيباسات قلال. هاد تّوجه يقدر يكون مناسب كتر ل ويكيپيديا ب دّاريجة، حيت هوّا توجه تجريبي ؤ كيتطور بشكل مستامر معا تّطور د لموسوعة. ف لواقع أغلبية د لكتاتبيا كيكتبو ب سيستيم توفيقي، وخا يكون عندهوم ميلان ل واحد من سّيستيمات جّوج لّولين د لكتابة. هاد شّكل د لكتابة كينقص لمجهود لي كيخص شي حد ماملولّفش لكتابة د لعربية لفصيحة باش يفهم شنو مكتوب، و ف نفس لوقت كيتطلب مجهود ف التأقلم قل من لكتبة لفونيتيكية باش شي واحد لي قاري لعربية ب مستوى عالي يفهم و يتبّع شنو مكتوب.

حالات د لكتابة

هاد طّابلو كيبيّن حالات د لإملاء ديال بعض لكلمات على حساب واش لكتابة محافضية، فونيتيكية ؤلا توفيقية. لكتابة لفونيتكية ممتّلة ب جوج حالات، وحدة "كاملة" كاتبيّن شـٖوا (ب شرطة لفوق، ؤلا ليف بلا همزة يلا جات ف لبدية) ؤ تّغليض د لكونصونات (ب شرطة لتحت)، و تّكوير (ب ضمة فوق لحرف)، ؤ لوخرة "ناقصة" ماكاتبيّنهومش.

حالة	كتابة محافضية	لمعنى د لكلمة	كتابة توفيقية	كتابة فونيتيكية
				كاملة	ناقصة
تبدال د نّطقان (ع => د)	المغرب	بلاد ف شمال غرب إفريقيا	لمغرب / لمغريب / المغريب	لمـٰغريب	لمغريب
تبدال د نّطقان (ع => د) + را مغلّضة	المغرب	لّخر د لعشية، صلا كاتدار ف داك لوقت	لمغرب / المغرب	لمـٰغرُٖب	لمغرب
لهمزة ف لّخر د كلمة	ماء	سايل شفّاف مكون من ؤكسيجين و هيدروجين	ما	ما	ما
لهمزة ف لّخر د كلمة + أوزان لجمع	علماء	جمع ديال عالم، ناس متخصصين ف مجال علمي	علاما / عولاما	عولاما	عولاما
تنوين	علما	كلمة كاتوضّف باش تعبّر بلي شي حاجة راها ديجا معروفة (علماً بلي...)	علماً / عيلماً	عيلمان / عيلمـٰن	عيلمان /عيلمن
تنوين	تقريبا	بشكل تقريبي، علاين	تقريباً	تـٰقريبان / تـٰقريبـٰن	تقريبان / تقريبن
كونصونات مغلضين/مرققين	راب	تهدّم (رابت دّار)	راب	راب	راب
كونصونات مغلضين/مرققين	راب	ختر، فسد (راب لحليب)	راب	رٖاب	راب
حروف ماكاينينش ف لعربية	راب	نوع د لموسيقا	راپ	راپ	راپ
كونصونات مغلضين/مرققين	برزط	ضيرونجا، صدّع	برزط	بـٖرٖزٖط	برزط
حروف ماكيتنطقوش ف دّاريجة	منظمة	مجموعة د نّاس منضّمين ف واحد لإطار محدد، ب واحد لهاداف ؤلا مجموعة د لأهداف محددين	منضمة	مونـٰضّامة	مونضّامة
حروف ماكيتنطقوش ف دّاريجة + تا مربوطة	أمثلة	جمع ميتال: واحد لحاجة لي كاتبيّن مزية ؤلا مزيات ديال مجموعة د لحوايج لي بحالها	أمتلة / أمتيلة	أٰمتيلا / امتيلا	أمتيلا
حروف ماكاينينش ف لعربية	فيترينة	موبل ف دّار ؤلا ف حانوت كيتحطّو فيه حوايج معروضين باش يتشافو ؤلا يتشراو	ڤيترينة	ڤيترينة	ڤيترينة
حروف ماكاينينش ف لعربية	قرعة / جرعة / غرعة / كرعة	نوع د لخوضار	ڭرعة	ڭـٰرعة	ڭرعة
ميتال د لمقارنة	قرعة	دوزان فين كيتعمّرو سّوائل	قرعة	قـٰرعة	قرعة
ميتال د لمقارنة	قرعة / قرعاء	مرا ماعندهاش شعر	قرعة / قرعا	قـٰرعة / قـٰرعا	قرعة / قرعا
ميتال د لمقارنة	قرعة	عملية كاتّختار فيها واحد نّتيجة ب زّهر	قرعة	قورعة	قورعة
ميتال د لمقارنة	كرع	ساق ديال حيوان (واكل لكرعين)	كرع	كـٰرع	كرع
ميتال د لمقارنة	جرعة	مقدار من شي سايل، كيتّشرب ؤلا كيتّحقن ب ليبرة	جرعة	جـٰرعة / جورعة	جرعة / جورعة
كلمة تقدر تلتابس ف لمعنى	معلمة	مرا كاتقرّي	معلمة / موعليمة	موعـٰليمة	موعليمة
كلمة تقدر تلتابس ف لمعنى	معلمة	مرا كاتّقن شي حرفة، نعت ديال شي وحدة كاتّقن حاجة	معلمة / معلّمة	معـٰلّمة	معلّمة
كلمة تقدر تلتابس ف لمعنى	معلمة	موضع ؤلا مبنى عندو قيمة تاريخية ؤلا فنية	معلامة	معلامة	معلامة