ويكيپيديا:لحروف

لحروف لي مخدّمين ف ويكيپيديا على ود لكتابة د الداريجة هوما لحروف د لعربية، مزيودين عليهوم حروف خرين باش يعبّرو على كونصونات لي ماكاينينش ف لعربية لفصيحة، لي هوما پ، ڤ، و ݣ.

حرف ݣ ف لكتابة د النصوص ف ويكيپيديا يقدر يتدار بلاصتو گ لفارسي و ڭ (من هاد لكلاڤيي د لعربية) ؤلا تا ڴ، و كاينة عطاشة بوتية لي كاتكلّف ب تعويض لݣاوات لخرين ب ݣ لمعمول بيه ف ويكيپيديا ب الداريجة. التخدام ديال حروف خرين لي عندهوم ديجا مدلول صوتي أخور بحال غ، ك، ق، و لي يقدرو يخلقو لإلتباس ف لمعنى ف بزاف د لحالات ماشي مقبول. متلاً: جال، كال، و ݣال ماكيعنيوش نفس لحاجة، نفس الشي بالنسبة ل كرد (حفض بزاف)، قرد و ݣرد (هرّس). تا السميات لأجنبية لي فيها لموقابيل ديال ݣ، ڤ ؤلا پ، خاصهوم يتكتبو ب هاد لحروف، متلا Gustav تّكتب ݣوستاڤ ماشي كوستاف. يلا لقيتي حالات بحال هادو عافاك حاول تصلحهوم فيساع.

لحروف لي ماكيتنطقوش كيما ف لعربية، لي هوما ث، ذ و ظ يقدرو يتخدّمو يلا كانو كيحيّدو لإلتباس ف لفهامة د لمضمون، و كاين لي كيخدّمهوم بشكل عام ف لكتابة د لكلمات لي جايين من لعربية ف إطار الكتابة المحافظة د الدارجة، ولّا ف لكلمات لبرانية من لوغات خرين لي فيهوم ث بحال دجون سميث John Smith، ؤلا ذ بحال ذ تايمز The Times.

لهمزة ء فوق الليف ضروري تّكتب باش مايطراوش حالات ديال لإلتباس مابين ا، أ و إ (متلاً بان # بأن). لهمزة فوق السطر ماشي أصلية ف الداريجة (متلا فقهاء => فقها، علماء => عولاما)، ولاكين ف لحالة د لكلمات لي متداولين بزاف و ماعندهومش موقابيلات معروفين، بحال "فضاء" تقدر تكون مقبولة (شوف حكمة 6 ف كناش لقواعد).

كاينين جوج كونصونات ف الداريجة ماعندهومش حروف عليهوم إتفاق عام، و كاينين كتاتبيا ڭاع كيعتابرو بلي ماشي ضروري يتزادو ليهوم حروف، سيرتو ل أسباب تقنية و حيت أغلبية د لحالات كيتفهمو من السياق، هوما الزاي مغلضة، بحال ف زيزون، لبز (الدراري)، برزط، ديزاين... و الرا مغلضة بحال ف برا (برية، ماشي برا د لخياطة)، مشرّف (من الشاراف، ماشي من الشرف = الشيخوخة)، مرا... يلا الجماعة د لكتاتبيا وصلات ل إتفاق عام على هاد لموضوع، غادي يتدار أپدييت ل هاد لفقرة على حساب لقرار.

ليستة د لحروف

• ء
• ا
• أ
• إ
• ؤ
• ب
• پ
• ت
• ث
• ح
• خ
• ج
• د
• ذ
• ر
• ز
• س
• ش
• ص
• ض
• ط
• ظ
• ع
• غ
• ف
• ڤ
• ق
• ك
• ݣ
• ل
• م
• ن
• ه
• و
• ي