ويكيپيديا:لبرلمان

مرحبا فلبرلمان د ويكيپيديا بالدارجة!

هادا هو لبرلمان ديال ويكيپيديا بالدارجة، واللي كانتناقشو فيه على شلّا حوايج متعلّقين بهاد لموسوعة لحرّة. فهاد لبلاصة كانهضرو على لحكام، كانقتارحو لمشاريع، كانحاولّو نفكّو لمشاكيل التقنية، كانحددو لخدامي د لبوت و زيد ؤ زيد. خلاص، هادا هو لمجمع ديالنا.

هنايا كانتعاملو بواحد الطريقة ديموقراطية، إلا وحَل النيقاش وماقدرش يكمل، كاندوزو للتصويت اللي كايفاريها فاللخر. فحالات خرين يقدر أي واحد يقتارح التصويت على أي حاجة بانت ليه غاتكون زيادة مزيانة للموسوعة، ولخرين اللي حاضرين كايصوتو.

إلا بغيتي تزيد مناقشة جديدة، ورّك على لبوطونة الزرقة لتحت. غادي تديك نيشان لواحد الصفحة خرة فيها جوج د لخانات. فلخانة اللولة (الصغيرة) عافاك كتب(ي) عنوان قصير كايلخص داكشي اللي بغيتي تݣولو(يه)، فلخانة التانية (لكبيرة) كتب(ي) اللي بغيتي. عافاك منين تسالي لكتبة، حاول(ي) تسيني التعليق ولّا آي حاجة كتبتيها بلكتابة ديال ربعة دلعاريضات بحال هادو (~~~~).

أرشيڤ: 1 · 2  · 3

الزيادة د الشخصيات لمغريبية ف الصفاحي د التوارخ

سلام أ دّراري ◀ Anass Sedrati ◀ Reda benkhadra ◀ Mounir Neddi ◀ Mico2022. كيما كنا تّافقنا لعام لي فات، راني درت تبديل ف لعطاشة لبوتية نمرة 12 باش تزيد التوارخ د الزيادة و لوفاة ديال الشخصيات لمغريبية لي كاينين ف ويكيپيديا لعربية (شوفو متلا صفاحي من نوع 5 فبراير ؤلا 2022). هاد السميات كيبانو كا ليانات حومر، لي خاص يتزادو ليهوم مقالات. يلا بغيتو تصاوبو مقال، حضيو عافاكوم معا جوج حوايج:

• شي مرات لعنوان ب لعربية كيكون زايد فيه شي كلمة ؤلا عيبارة بين جوج قواس باش تميّزو على عنوان مقالة خرة، متلا "محمد بن عيسى (سياسي مغربي)". هاد لقضية يلا ماكناش محتاجين ليها ف ويكيپيديا ب الداريجة غير ديرو السمية حافية.
• لعربية مافيهاش حروف ڭ، ڤ ؤ پ، فا حضيو معا السميات لي خاص يتكتبو فيهوم (پ ؤ ڤ كيكونو بعض لمرات ف سميات ديال ليهود لمغاربا بحال "پيريز" ؤلا "ليڤي").

Ideophagous (مداكرة) 17:57، 3 يناير 2023 (+01)

واخا فهمت◀ Ideophagous Mico2022 18:08، 3 يناير 2023 (+01)

ترجمة ديال كلمات تقنية

سلام الله عليكم الخوت

بغيت نسولكم؛ شناهيا احسن طريقة باش نترجمو كلمات تقنية لي ماكيناش فالدارجة، انا كيبان ليا من الاحسن نكتبوها بالونغلي بلاست مانترجموها بالدارجة، حيت ايلا جاب الله شي واحد بغا يقرا كتر علا ديك اللعيبة غادا تجيه صعيبة يقلب عليها و حنا كاتبينها بالدارجة

نتوما كيفاش كاتديرو؟ Elkhiar (مداكرة) 10:04، 24 يناير 2023 (+01)

سلام سّي @Elkhiar:، و مرحبا بيك ف ويكيپيديا ب الداريجة. ب النسبة ل السؤال ديالك، كاينة صفحة كنّا جمعنا فيها بعض لأفكار على هاد لموضوع، شوف ويكيپيديا:كيفاش نزيدو كلمات جداد. بشكل عام، من لأحسن ماتكونش قاعدة مطلقة نخدمو بيها ف جميع لحالات، مي كلا حالة نتعاملو معاها بوحدها. وخا لمصطلحات ديال النڭليزية غادي يلعبو دور كبير، مافيها شك، ولاكين يقدرو يكونو حالات لي كاينة ديجا كلمة منتاشرة بين لعامة د الناس، ؤلا تا غير لحرايفيا (المتخصصين) د شي مجال تقني، و من لأحسن هيّا لي ناخدو. متلاً network كاين ديجا موقابيل ديالها "ريزو"، و مامحتاجينش ناخدو شي كلمة خرة و ندرّجوها ؤلا نطرجموها. نفس الشي بالنسبة ل بازضّوني، لونڭاج، فيشي، ؤرديناتور... لي مخدّمينها الناس سيرتو لي متخصصين ف لانفورماتيك. و كاينين حالات فين الطرجامة كاتكون حسن، باش لمفهوم يكون قريب ف لفهامة ل لقاري ؤلا السامع. يلا عندك أي قتراحات ؤلا أسئلة، مرحبا. Ideophagous (مداكرة) 19:19، 24 يناير 2023 (+01)

السلام، شكرا على الجواب ديالك.. فهمت البلان، ولكن انا دويت علا مثلا شي كونصيبت ف شي حاجة تقنية، كيبان ليا صعيب يكون عندها مقابل فداريجة، مثلا فترجمة ديال مقال على كونصيبت فليكونومي (Dilemme du prisonnier)، كنت كانفكر واش نخلي الكلمة هي هاديك ولا ندير ترجمة حرفية للداريجة. فحالة ترجمتها و جا واحد عجبو المقال و بغا يفهم كثر، كيبان ليا صعيب يلقى شناهيا المعضلة ديال الحباسا؟ شبان ليك Elkhiar (مداكرة) 22:50، 24 يناير 2023 (+01)

يلا شفتي بزاف د اللوغات، كاتلقاهوم كاملين كيطرجمو هاد لمفهوم، نڭليزية Prisoner's dilemma، فرانساوية Dilemme du prisonnier، عربية معضلة السجينين، ألمانية Gefangenendilemma، ... يعني تا حنا نقدرو نديرو نفس لبلان. عكس مفاهيم خرة لي كاتلقاها ف لغالب ماكاتطرجمش بحال پروطون، إليكطرون ... ب النسبة ل لقضية د التقلاب، تقدر تزيد تحويل ب ديك كلمة ؤلا لمصطلح لي يقدر شي حد يقلّب بيه. متلا Dilemme du prisonnier باقة كاتدّي ل نفس لمقال وخا بدّلنا لعنوان. باش تزيد تحويلة جديدة، دير بحال يلا بغيتي تقاد مقال جديد، و ف لبارّة لي فوق لبلاصة د لكتابة كليكي على "متقدم"، و موراها على واحد لبوطونة فيها سهم، و دخّل وسط لكوض لي بان لعنوان د الصفحة لي خإص تدي ليها التحويلة. Ideophagous (مداكرة) 23:34، 24 يناير 2023 (+01)

صافي الله يحفضك ليا! هاداك البلان ديال يديك لمقال آخر هو لي كنت كانقلب عليه.

و قول ليا، كان لقا موشكيل فاش كاندير هاداك Infobox شنو نقدر ندير؟ Elkhiar (مداكرة) 10:19، 25 يناير 2023 (+01)

شوف على حساب لموضوع إينا صندوق د لمعلومات لي مناسب. كاينة ليستة هنا (ماكاملاش للأسف، فاش يكون عندي وقت نزيد فيها الصنادق لي موجودين و مامديورينش ف الليستة). لمعلومات ب لمناسبة كيجيو ديريكت من ويكيداطا، فا ماتحتاجش تكتبهوم الراسك، من غير يلا كانت شي معلومة ناقصة. يعني تقدر تدير الصندوق لفوق هاكا {{معلومات فيلم}} متلاً بالنسبة ل لأفلام. سينو، تقدر تخدم ب هادا. تقدر تخدم ب Databox لي ف لعادة كيجبد الصندوق لمناسب على حساب نوع لموضوع، ولاكين باقي مافيهش جميع لمواضيع. Ideophagous (مداكرة) 11:50، 25 يناير 2023 (+01)

صافي الله يحفظك خويا Elkhiar (مداكرة) 12:56، 25 يناير 2023 (+01)

العناوين ديال الصفحات

السلام عليكم

نتمنا تكونو كاملين بيخير.

واحد السؤال لي عندي هو واش كينا شي طريقة خرا باش نكتبو العوانين.. ؟ واش مايكونش من الأحسن نخليوهم بلعربية الفصحى ؟ حيت مثلا ايلا بغيت انا نقلب علا شي حاجا ب داريجة، كينين بزاف ديال الطرق لي نقدر نكتب بيها هاديك الحاجا، و ماكاتطلع ليا فريزولطا ديال روشيرش، حيت كل واحد جاي من شي جهة ولا مدينا كايقول ديك الكلمة بالضبط بطرق خرين. Elkhiar (مداكرة) 14:02، 30 يناير 2023 (+01)

لا، لعنوان كيكون ديما ب نفس اللوغة ديال لويكي (الداريجة ف هاد لحالة). ف لعادة لعنوان خاصو يكون طبيعي و منتاشر و معروف عند أغلبية د لقاريين و الناطقين ب ديك اللوغة. يلا ماكانش شي عنوان بحال هاكا، كانشوفو أقرب واحد كيحقق هاد الشروط. ف جميع لحالات خاص يكونو تحويلات ب عناوين خرة لي يقدرو يقلّبو بيهوم الناس. لعربية و الداريجة راهوم متقاربين ف بزاف د لحالات، ضونك شحال من عنوان غادي يكون بحال د لعربية لفصيحة ؤلا قريب ليها. يلا كانو بزاف د الطرقان د لكتابة ديال عنوان، عافاك زيدهوم كاملين كا تحويلات ل نفس لمقال. متلا شركة و كامبيانة (مخدمة ف شمال لمغريب) كيدّيو ل نفس لمقال. Ideophagous (مداكرة) 15:36، 30 يناير 2023 (+01)

صافي شكرا ! Elkhiar (مداكرة) 17:02، 30 يناير 2023 (+01)

مرحبا! -- Ideophagous (مداكرة) 17:07، 30 يناير 2023 (+01)

بلوڭات ف الليستة لبيضا

طاڭ ل إمغارن: ◀ Reda benkhadra ◀ Anass Sedrati ◀ Mounir Neddi ◀ Mico2022. سؤال: واش هاد لبلوڭ لي مخدم ف مقال كاس لعرش (2015)، خاصو يتزاد ل الليستة لبيضا ديال لمصادر؟ حيت مبدئيا لبلوڭات ماشي مقبولين كا مصادر ل لمعلومات، من غير لي عندهوم طابع رسمي ف حالات محدودة. Ideophagous (مداكرة) 22:21، 3 يوليوز 2023 (+01)

◀ Ideophagous تانظن نمنغة ليبلوغ فمرة، الى كانت المعلومة فلبلوغ عندها مصدر، يخدم المصدر الأصلي Mounir Neddi (مداكرة) 22:49، 3 يوليوز 2023 (+01)

◀ Mounir Neddi. راهوم ممنوعين أصلا. غير كاينين بلوڭات خاصين كيكونو مخدمين بحال سيت رسمي ديال شي مؤسسة، و يقدرو ف شي حالات يتخدّمو (متلا يلا كان إعلان رسمي ديال لمؤسسة، ؤلا شي معلومة متعلقة بيها ماكاينة ف تا بلاصة خرة). السؤال غير على هاد لبلوڭ ب التحديد واش منهوم ؤلا لا. Ideophagous (مداكرة) 23:12، 3 يوليوز 2023 (+01)

سلام خاي @Ideophagous: ف نضري مبدئيا هاد لپلوك نقدرو نقبلوه حيت غير كيقدم معلومات بساط لي يقدرو يكونو مابقاوش مأرشيڤيين ف بلايص خرين ؤ لي مهمين باش يكونو ف لمقالات ديال كورة (بحال تواريخ، لحكام، ؤ نتايج). Reda benkhadra (مداكرة) 23:49، 3 يوليوز 2023 (+01)

سلام خاي ◀ Reda benkhadra. لمعلومات لي مديورين ف داك لمقال لقيتهوم موجودين ف سيت كوورة (شوف هنا). يعني ماكانضنش بلي محتاجين نخدمو داك لبلوڭ. بالنسبة ل ترشيڤ لمعلومات، خاصني نكمّل عطاشة 3 ديال داريجابوت باش تبقى ترشّڤ جميع الليانات لي مخدّمين عندنا (ؤلا تجبدهوم من لارشيڤ يلا كانو ماتو)، باش مايضيعوش. -- Ideophagous (مداكرة) 17:26، 4 يوليوز 2023 (+01)

راس مداكرة + صفحة د خدايمي

سلام خوتي لكتاتبيّا. @Reda benkhadra @Anass Sedrati @Mounir Neddi @Yosh cvd @Mico2022 @Achraf112 @High Atlas Man @HichamEB @Bisel91 @Marokistorique @شاب مراكشي @Elmerrakchi بغيت نبدا نفرّق هاد الجوج طاڭات {{راس مداكرة}} و {{صفحة د خدايمي}}. هنا السؤال هوّ واش نفرقهوم ف جميع الصفاحي لمعنيين ؤلا غير شي وحدين. ب نّسبة ل {{راس مداكرة}} خاصو يتزاد ف الصفاحي د لمداكرة ب جميع نواعهوم، و عندنا دابا 3 د لإحتمالات:

1. نفرّقوه غير ف الصفاحي د لمداكرة لي ديجا محلولين (يعني بداو فيهوم مداكرات)
2. نفرّقوه تا ف الصفاحي لي خاويين/ماكاينينش دابا، مي غير ف لمداكرات د لمقالات، و باقي لمداكرات (پروجي، معاونة، فيشي، تصنيف، موضيل...) غير يلا كانت مداكرة محلولة.
3. نفرّقوه ف جميع الصفاحي د لمداكرة كيما كانو سوا كاينين ؤلا لا (ماكاننصحش بيها)

ب نّسبة ل {{صفحة د خدايمي}} خاصو يتزاد ف الصفاحي د لخدايميا (حيت كاينين سيتات كيكوپيو لمحتوى د ويكيپيديا، فا كيبيّن تماك بلي لخدايمي ماشي مسؤول على لمحتوى لي كاين ف السيت لمراية). عندنا عاوتان 3 د لإحتمالات:

1. جميع الصفاحي د لخدايميا، مصاوبين ؤلا لا (ماكاننصحش بيها)
2. الصفاحي لي كاينين كاملين
3. نديرو ليستة كحلة ل لخدايميا لي مابغاوش الصفحة ديالهوم يتزاد ليها هاد لموضيل

ف جميع لحالات غادي يتزاد هاد لموضيل ب لبوت مرة وحدة، و يلا حيّدو لواحد ماغاديش يعاود يتزاد مبدئيا. تهلّاو! Ideophagous (مداكرة) 18:47، 24 أكتوبر 2023 (+01)

طلب محلول ديال صلاحيات أمغار

سلام معشر لويكيپيديين @Alitoar @Yosh cvd @Siaahmed @Bisel91 @الناجم العاجم @Reda benkhadra @Anass Sedrati @Mounir Neddi. كاين دابا هنا طلب محلول ديال صلاحيات أمغار ديال لأخ مصطفى، عافاكوم عطيو الرأي ديالكوم تماك و/ولّا طرحو أسئلة يلا عندكوم. تهلّاو! Ideophagous (مداكرة) 10:36، 17 نونبر 2023 (+01)

خاصنا نعروفو بالبروفيلات المغربية فنانين شعراء كتاب مغنيين

خاصنا نعروفو بالبروفيلات المغربية فنانين شعراء كتاب مغنيين... ماشي تعيا تكتب على شخصية معروفة فالمغرب و فالتالي يجي واحد مشرقي ماعارف والو يمسحوا ولا من الأفضل نتختارو شي محرر معتمد و نعطيوه المعلومات و هو يتكلف بالتحرير و ديكشي د الروبو و من الأفظل المقالات يكونو بالدارجة Yassirob (مداكرة) 04:34، 12 دجنبر 2023 (+01)

سلام السي @Yassirob. مرحبا، تفضّل نتا و كتب على لفنانين لمغاربا لي بانو ليك ماعندهومش مقالات. غير تيقّن بلي كيستوفيو شروط لملحوضية قبل ماكتكتب. يلا لقيتي شي موشكيل ؤلا عندك ملاحضة ماعليك غير تسوّل. ويكيپيديا ب الداريجة مافيها محررين (ل حد الساعة)، كاينين غير لكتاتبيا لعاديين و لإداريين (إمغارن)، و أي واحد يقدر يكتب مقالات و يبدّل فيها، طالمّا كيكتب كيدير محتوى مزيان و معقول. Ideophagous (مداكرة) 22:11، 12 دجنبر 2023 (+01)

انا غادي نحاول نجمع معلومات و نقادهوم و نتوكل على الله و نشوف واش حتا هما يتحدفو Yassirob (مداكرة) 05:35، 14 دجنبر 2023 (+01)

ترشيح تصاور مزيانين

السلام عليكم. ف هاد الصفحة حطيت مجموعة ديال تصاور لي كنرشح باش يتحطو ف الصفحة اللولا د ويكيپيديا. ثلاثة لولين راهم ديجا كاينين، زدت ثلاثين وحدة لي هما سوا Featured ؤلا Quality فكومنز. ثلوثين ديال هاد تصاور راهم عندهم علاقة بلجغرافيا وطبيعة وثقافة دلمغريب، وثلث لباقي راهم من بلايص مختلفة فلعالم. وحيت هاد تصاور راهم بزاف مجاتش نحط ترشيح لكل وحدة بوحدها، ولكن راني درت ليهم أرقام، باش هكدا يسهال نقاش: شوفو تصاور، تنوع وحتى لوصف ديالهم، وقولو ليا لأراء ديالكم.
نغز @Reda benkhadra, Ideophagous, سنوببي, Lucyin, Abdes101, Mr.Kenzo1, و Mounir Neddi: --الناجم العاجم ❄ 00:59، 2 غشت 2024 (+01)

مزيانين اسي @الناجم العاجم تبارك الله عليك !

بانو ليا شي كلمات ماكيتخدموش بزاف فالدارجة .

تقدر تعوض مثلا قلعة ب"قصبة" , بارجة ب"بابور د الحرب/الڭيرا , فوانيس ب"قنادل" ولا "لمبات" , مسجد ب"جامع" Abdes101 (مداكرة) 01:21، 2 غشت 2024 (+01)

كاين بلان اخور , كايبان ليا من الاحسن غي التصاور اللي ديجا مكتوبين عليهم ارتيكلات فويكيبيديا الدارجة هوما اللي يكونو فالصفحة اللولة , مثلا : جبال اكاكوس , الجامع الاقصى , موسم طانطان ... ماكاتبينش عليهم فالموسوعة . Abdes101 (مداكرة) 01:35، 2 غشت 2024 (+01)

@Abdes101: شكرا على لملاحظات ديالك. غدي نبدل دوك لكلمات لي قلتي ليا. وبنسبة لبلان ثاني، كنشوف بلي دوك ليانات لحمرين غدي يزعمونا باش نكرييو لأرتيكلات مع لوقت، ولكن غدي نقص منهم شوية.

ؤواحد لقضية، راه كاين فرق ما بين لقلعة ولقصبة، مثلا فالتصويرة 9، كتبت "قصبة لمرية"، ولكن هديك لي فالتصويرة 21 ميمكنش نسميوها قصبة، كنشوف خاصها تبقا "قلعة دي هار". --الناجم العاجم ❄ 02:02، 2 غشت 2024 (+01)

أهلا السي @الناجم العاجم: شكرا على لقتيراح ديالك ؤ لخدمة لي درتي. من جيهتي تانا متافق باش هاد تصاور يبقاو يبانو ف الصفحة لولة. درت شي إصلاحات صغار ف لكتابة باش يكون داكشي كيما متافقين عليه هنا. Reda benkhadra (مداكرة) 18:35، 2 غشت 2024 (+01)

التصاور لي معروضين الصراحه مفيهم ميتقال وخدمه نقية، كيبان ليا من الاحسن لبلان يكونو فيه غير التصاور لي عندهم علاقة كبيرة بلمغريب، ولي كتشم فيه الريحة ديال لهوية لمغربية، حيت مادام هاد التصاور غيكونو فالصفحة اللولا دويكيپيديا بالدارجة خاص نبينو الحوايج لي كيتميز بيهم المغريب ولي مستحيل تلقاه عند شي بلدان اوخرى، ومنها نيت نحافظو على الخصوصية ديال هويتنا لي غنية وغنية بزاااف. بحال التصاور رقم 4 و 7 و 8 و 23 و 25.

ومن واحد ناحية اوخرة، هاد التصاور غيعاونونا بزاف باش نزيدو ليزارتيكل، وكنقتارح نزيدو شي ليانات حومر منهم فليسطا ديال لمقالات لي خاص يكونو فويكيپيديا بالدارجة. خصوصا لي صعيب يطيحو فلبال، وكيمثلو جزء موهيم من تراث لمغريبي وضروري يكونو عندنا، مثلا بحال فاش كنت كنسكرولي فتصاور تفاجأت فاش لقيت مكاينش شي ارتيكل على "لبلغة" !!!

وشكرا مرة اوخرة السي @الناجم العاجم على لمجهودات لكبيرة ديالك Mr.Kenzo1 (مداكرة) 19:11، 2 غشت 2024 (+01)

سلام @الناجم العاجم شكرا على لمجهود. متافق معا جميع التصاور لي قتارحتي. Ideophagous (مداكرة) 14:40، 3 غشت 2024 (+01)

شكرا ليكم كاملين على لملاحظات وتعليقات زوينة ديالكم. ملي نسالي غادي نصاوب موضيل لكل تصويرة. --الناجم العاجم ❄ 22:52، 3 غشت 2024 (+01)

Y صاف لموضيلات تصاوبو. --الناجم العاجم ❄ 06:15، 5 غشت 2024 (+01)

مسابقة ويكيميديا واش مزالا؟ ممكن نشارك

شنووالمطلوب وشنو الجوائز دالفايزين جابر نيت (مداكرة) 00:37، 23 غشت 2024 (+01)

سلام @جابر نيت و مرحبا بيك ف ويكيپيديا. لمسابقة باقية تال 31 غشت معا 12 د الليل د لمغريب. باش تشارك ساهل، خاصك غير تصاوب و تبدّل ف مقالات ف ويكيپيديا ب الداريجة. من لأحسن تخدم على لمواضيع لي كاينين ف هاد الصفحة باش تاخد نقاط كتر. قرا عافاك مزيان لقواعد د لمسابقة ف هاد الصفحة (و فيها نيت غادي تلقى الترتيب ديال لمشاركين). يلا باقي عندك شي سؤال، مرحبا. Ideophagous (مداكرة) 08:55، 23 غشت 2024 (+01)

تغير لـ "عيون لكلام"

أوّل مرة دخلت لهنا مفهمتش مصطلح "عيون لكلام"، وكنقترح نبدلوه بـ"مصدر لمعلومات"، حيث هاد المصطلح واضح ومفهوم، وزيد عليها أنه مستعمل بزاف فالحياة اليومية. مثلا، فاش كتقول شي معلومات، غالبا كيجيك سؤال: "عطيني مصدر لمعلومات؟".

درت شوية ديال البحث وبغيت نعرف شنو كتعتمد الأغلبية، وها النتائج اللي لقيت:

1. قنوات يوتيوب:

• قناة "أجي تفهم": كاتستعمل مصطلح "المصادر". رابط الفيديو: هنا قناة "أجي تفهم" نفسها استعملات كلمة "المراجع" فشي سياقات أخرى.
• قناة Marouane Lamharzi Alaoui: حتى هي كتستعمل "المصادر". رابط الفيديو: هنا
• قناة نجيب المختاري: كتستعمل مصطلح "المراجع". رابط الفيديو: هنا
• قناة أمين العوني: حتى هو كيستعمل مصطلح "المراجع". رابط الفيديو: هنا

السؤال: علاش قررنا نستعملو مصطلح "عيون لكلام" عوض كلمات اللي واضحة ومفهومة بحال "المصادر" أو "المراجع"، واللي فعلا مستعملة بكثرة فالسياق ديال البحث والمعلومة؟ Mrflashow (مداكرة) 20:30، 16 دجنبر 2024 (+01)

سلام @Mrflashow. على العموم متافق معا المنهجية ديالك، حيت خاصنا نشوفو شنو لي متداول كتر عند المغاربا، عاد نختارعو مصطلح ولّا نديرو الإستعارة يلا مالقينا والو. يلا كانو كتاتبيا خرين متافقين، ماعنديش إشكال نبدّل السكريپت لي كايقادّ عنوان ديك الفقرة. بعدا نطاڭي الكتاتبيا النشيطين فالويكي @Reda benkhadra @Anass Sedrati @Abdes101 @سنوببي @Rachidourkia @Med MFD2000 @Achraf112 @Elmerrakchi @Najem Ajem @Mr. Lechkar @Mr.Kenzo1 @PediAki شكرا و تهلا! Ideophagous (مداكرة) 21:19، 16 دجنبر 2024 (+01)

@Mrflashow@Ideophagous، كايبان لي كايخصنا نخدّمو الطرجامة لحرفية، يلا كنا كانعنيو مصدر=Source، ف راه "عين" كاتعطي نفس لمعنى، أما يلا كنا كانعنيو مرجع=reference، مادام ماكايناش ف الداريجة شي كلمة لي كاتوصف هاد لمصطلح ب شكل دقيق، كايبان لي "الفصحى" هي الداعم اللول. ف ريّي. سنوببي (مداكرة) 01:47، 17 دجنبر 2024 (+01)

انا فنظري الهدف الاول والاسمى هو يكون الفهم واضح وبسيط، باش تفتح الشهية للقارئ ، فنظري ايلا مكانش شي مصطلح فالدارجة اللي كنستعملوه بزاف نقدرو نرجعو للغة العربية ونعدلو عليه باش ايكون مفهوم مثلا فاللغة العربية كاين "المصادر" نديرو فالدارجة "لمصادر" وايضا اللغة العربية لغة البلاد الاولى يعني موجودة فالدستور وبزاف يعني نشوفو اول حاجة واش كنخدمو بمصطلح ايلا ملقيناش نشوفو اللغة العربية وندرجوه لكن ايكون بشكل مفهوم وواضح

مثلا انا كنقتارح نديرو "مصدر لمعلومات" كنستعملوه بزاف افضل من "عيون لكلام" اللي غريب واول مرة نسمع به وشكرا لكم بزاف الهدف هو نكبرو المعرفة وكلشي يفهم معندناش المنفعة تبقى المعرفة فدائرة صغيرة وشكرا. Mrflashow (مداكرة) 04:52، 17 دجنبر 2024 (+01)

@Mrflashow و Ideophagous: حتا أنا مع فكرة أن لمصطلحات ديال ويكيپيديا خاصها تكون مفهومة لأكبر قدر ممكن من لمغاربة (كتر من مجرد اختلافها مع لمصطلحات لعربية)، وملي كنت كنشوف "عيون لكلام" فلتحت ديال لمقالات كنگول مع راسي راها ربما لهجة فشي منطقة من لمغريب، ولا مصطلح في ثقافة لمغربية، وعليها مفتحتش نقاش فلموضوع، خصوصا باعتبار أن كتاتبيا أخرين كيساهمو كتر مني وموافقين على هاد لمصطلح. أنا بالنسبة ليا مصدر لمعلومات مفهومة كتر من عيون لكلام، وفنفس لوقت راني مع رأي لأغلبية. تحياتي، --الناجم العاجم ❄ 14:20، 17 دجنبر 2024 (+01)

@Ideophagous @الناجم العاجم @سنوببي @Reda benkhadra @Anass Sedrati @Abdes101 @سنوببي @Rachidourkia @Med MFD2000 @Achraf112 @Elmerrakchi @Najem Ajem @Mr. Lechkar @Mr.Kenzo1 @PediAki

ادن نصوتو على هاد المقترح اللي هو نبدلو مصطلح "عيون لكلام" بـ "مصدر لمعلومات" الاخوان لي متافق ايقولها باش "امغار" اتخد الاجراءات، انا متافق اتبدل وكنصوت بـ "نعم" واش متفقين اتبدل؟ Mrflashow (مداكرة) 21:08، 18 دجنبر 2024 (+01)

@Mrflashow كانضن "مصادر" ف صيغة الجمع حسن، حيت ماكيكونش مصدر واحد. من الأحسن كل واحد يصوّت على الإختيار لي بغى، و الإختيار لي خدا أكبر عدد د الأصوات ف المجموع يتخاد. Ideophagous (مداكرة) 21:36، 18 دجنبر 2024 (+01)

@Ideophagous انا متافق معاك "مصادر" افضل وسهلة فالفهم وبسيطة ادن انا متافق نديرو "مصادر" Mrflashow (مداكرة) 21:39، 18 دجنبر 2024 (+01)

التصويت

@Achraf112, Elmerrakchi, Mr. Lechkar, Mr.Kenzo1, PediAki, و Reda benkhadra:
@Mrflashow, Ideophagous, سنوببي, Anass Sedrati, Abdes101, Rachidourkia, و Med MFD2000:

1. عيون لكلام

...

2. مصدر لمعلومات

...

3. مصادر لمعلومات

معا --الناجم العاجم ❄ 00:37، 19 دجنبر 2024 (+01)

هذا مزيان : 3. مصادر لمعلومات Mrflashow (مداكرة) 01:18، 19 دجنبر 2024 (+01)

@سنوببي قتارح "مرجع/مراجع". Ideophagous (مداكرة) 06:57، 19 دجنبر 2024 (+01)

مقترح اخر بما انكم شي قال مراجع وشي قال مصادر نجمعهوم فواحد بسيط ومفهوم: "مصادر و مراجع" Mrflashow (مداكرة) 15:42، 19 دجنبر 2024 (+01)

@Mrflashow كايبان ليّا بلي "المصادر" و "المراجع" ماشي نفس الحاجة. "المصادر" كايكونو ف السطور على مستوى كلا فقرة ولّا معلومة، بينمّا "المراجع" هوما بحال مقالات ولّا كتوبا لي يقدر يزيد يقرا فيهم الواحد يلا بغى يتعلم كتر. "المراجع" ب هاد المعنى عادةً كانسمّيوهم "لمزاود". Ideophagous (مداكرة) 17:47، 19 دجنبر 2024 (+01)

@Ideophagous بناءً على النقاش اللي دار والآراء اللي تعطات، كايبان بلي اختيار المصطلحات خاصو يراعي وضوح الفهم وسهولة الاستعمال فالسياق ديال الدارجة المغربية.

المقترحات:

1. "مصادر": سهل وبسيط، كيتستعمل بزاف فالخطاب اليومي، وكايشمل كل شي.
2. "مراجع": ممكن يستعمل فالسياقات اللي كتعني حاجة أعمق أو أكثر توثيقاً
3. "مصادر ومراجع": حل وسطي كايجمع بين المصطلحين باش مايبقاش سوء فهم.
4. "عيون لكلام": تعبير جميل لكنه غريب وغير شائع وممفهموش.

الرأي ديالي:

نظراً للهدف اللي هو تبسيط الفهم وتشجيع الناس على القراءة، "مصادر" هو الخيار الأفضل حيث سهل ومعروف عند الأغلبية.

شنو رأيك؟ Mrflashow (مداكرة) 17:55، 19 دجنبر 2024 (+01)

سلام @Mrflashow لي تافقو عليه الأغلبية راه مزيان. أنا ما عليا غير نّفّد القرار ديال الجماعة. ل حد الساعة كاينين جوج، نتا و @Najem Ajem لي ختاريتو مصدر/مصادر (+لمعلومات). يلا دازت سيمانة على لبدية د النقاش و ماكانوش أراء خرين معارضين، غادي ندير "مصادر لمعلومات". Ideophagous (مداكرة) 18:08، 19 دجنبر 2024 (+01)

@Ideophagous صراحة عندك الحق "مصادر لمعلومات" تاهي مزيانة المهم هو الناس تفهم وتستافد، شكرا على الاقتراحات دياك Mrflashow (مداكرة) 18:26، 19 دجنبر 2024 (+01)