مداكرة:محمد

لحيادية ف لكتابة

مرحبا @Omarboulma1926 و Iliass.Aymaz:. كيبان ليا بلي عندكوم وجهات ناضار مختالفة على شنو خاص يكون ف هاد لمقال. من لأحسن تناقشو هنا لختيلاف لي بيناتكوم ؤ توصلو ل صيغة لي يرضا بيها كولشي. خودو عافاكوم ف عين لعتيبار هاد نّقاطي:

• سياسة لحيادية: هيّا سياسة أساسية ف ويكيپيديا، ؤ ب ختيصار كاتعني بلي جميع لأراء لمتعلقة ب لموضوع لي موتّقة ف عيون موتوقة خاصها تكون ف لمقال. (شوفو ويكيپيديا:لحيادية)
• ويكيپيديا ماكاتقررش شنو لي صحيح ؤ شنو لي غالط: لمحتوى ديال لعيون لموتوقة هوّا لي كيقرر هادشي (شوفو ويكيپيديا:عيون موتوقة)
• لحرب ف لكتابة ممنوعة: خاص يكون تّيفاق بين لكتاتبيا على لمحتوى، ماشي شي كيحيّد ؤلا كيلغي تّعديلات د شي. (شوفو ويكيپيديا:لحرب ف لكتابة)

يلا كان شي سؤال ؤلا قتيراح مرحبا.--Ideophagous (مداكرة) 18:23، 1 أبريل 2022 (+00)

مرحبا ◀ Ideophagous ، شكرا علا تّفعيل ديال نّقاش. غانلخص نّقاطي لي عندي بخصوص وجهة نّظر ديالي فتّعديلات لخرة لي تدارت فهاد صّفحة من طرف سّي ◀ Omarboulma1926 مشكورا:

• إيلا كان ختلاف مع شي جملة/فكرة، كانقتارح إما لمطالبة بمصدر أولا زّيادة ديال لفكرة لمعارضة حداها(بلمصدر).
• لعبارات تّفخيمية ولا تّمجيدية كاتجيني ماشي محايدة. متلا قال فلان بلي فلان هو أحسن شخص فلعالم خصها شي مصدر أولا شي كونتكس.
• بخصوص "التشكيك": بحال أي فكرة موسوعية، رّؤيا بلي "واحد فلان كايقولو شي مصادر يقدر يكون ماكاينش" كاتبقا رؤيا موسوعية يمكن تفيد كاع الناس، بغض النظر علا الخلفية الإيديولوجية. طبعا هدا ماكايمنعش ماتكتبش حداها رأي مخالف (بلمصدر).
• يمكن غانلخص واحد لفكرة بزّربة: ويكيبيديا كاتخدم لمعلومة، وماشي لإيديولوجيات، يعني ممكن تكون فلموسوعة ب دّارجة شي حاجة لي بزاف كاتجيهوم صادمة، لكن لمعلومة كانبقا وخصا تكون نقية.

تحياتي. Iliass.Aymaz (مداكرة) 18:56، 1 أبريل 2022 (+00)

• مخاصش دار صورة لمحمد ومن لأفضل ديرو خطاطة أو صورة فيها الاسم ديالو بشكل مزخرف.
• التشكيك في وجود محمد راه هذا بحد ذاتو انحياز ؤ لإساءة للمسلمين بالاخص أنَّ لمغاربة غالبيتهم مسلمين.
• حيت منقدروش نديرو شي حاجة موصاش عليها لاسلام أو كتضر لمسلمين وهادشي غادي يخلي ويكيبيديا المغربية مصدر غير موثوق بالنسية لمغاربة.

شكرًا ليك اخويا Ideophagous. ونتمنى من الزميل Iliass.Aymaz Omarboulma1926 (مداكرة) 18:41، 1 أبريل 2022 (+00)

بالعكس ماشي معلومات صادمة وانما مستفزة للمغاربة بالاخص وغير منطقية. عند اقتراح غادي يرضي جميع الأطراف هو كل واحد يصاوب مقالة فلملعب، وغادي نديرو عليها تصويت لمزيانة هيَ لي غادي تحط فمقالة محمد عليه الصلاة والسلام Omarboulma1926 (مداكرة) 19:02، 1 أبريل 2022 (+00)

شكرا علا رّد ديالك.

كايجيني ماشي فمصلحة لموسوعة يكونو مقالات مكتوبين وموتقين نسبيا ونمسحوهوم ونكتبو مقالات خاصة ونفتحو تصويت فلوقت لي يمكن لأي واحد يزيد يغني لمقالات لي ديجا كاينين بشكل معقول. ويكيپيديا ماشي ديموقراطية Iliass.Aymaz (مداكرة) 19:17، 1 أبريل 2022 (+00)

هذا مجرد اقتراح، لكن باش دير صورة على انها ديال محمد فهذا راه بحد داتو إساءة وانحياز بحكم انك لا ديني، وكتمشي لمصادر لأجنبية لي كترضي ميولك وافكارك. ننتظر رأي الأخ Ideophagous Omarboulma1926 (مداكرة) 19:54، 1 أبريل 2022 (+00)

ويكيپيديا مافيهاش "مصادر أجنبية"، كاع لمصادر لي علمية وموسوعية مقبولة فلموسوعة. يمكنلك تقلب ف لإرشادات لي مكتوبين هنا علا شمن مصادر يمكن تحطها وشناهي شروط لجودة.

لكن: باش شي كتايبي يمسح مصادر كاملين حيت جاوه "أجنبيين" را حنا كايكون شوي د لإنحياز.

كانقتارح صديقي ترجع صفحة كيف كانت وتزيد تّعديلات ديالك عليها ونتناقشو شنو لي فيها ماشي موسوعي ونحيدوه نقطة بنقطة.

شكرا. Iliass.Aymaz (مداكرة) 08:05، 2 أبريل 2022 (+00)

مرحبا بيكوم مرة خرة @Omarboulma1926 و Iliass.Aymaz:، ؤ شكراً على قبول نّيقاش. كاينين مجموعة د لمسايل لي خاص نوصلو ل تّيفاق عليها هنا، أهم مسألة هيّا ديالت تّصويرة ديال صندوق لمعلومات لي كاتبان ف لبدية د لمقال. لباقي كانضن بلي سّياسة د ويكيپيديا واضحة فيه، من غير يمكن شي تفاصيل. خودو ف عين لعتيبار بلي لمشروع يلا نحاز بزاف على سّياسات لعامة د ويكيپيديا، تقدر مؤسسة ويكيميديا لي كاتجيري سّيستيم تسدّو ب كل بساطة. كانضن كانت ديجا طرات معا ويكيپيديا ب صّربية يلا ماكنتش غالط، لخوت @Anass Sedrati و Reda benkhadra: يقدرو يكونو عندهوم تفاصيل كتر على هاد لموضوع. نبدا ب لمسايل لي محسومة على حساب سّياسة د ويكيپيديا:

• عافاكوم ماتبدّلو تا حاجة ف لمقال تا نخرجو ب قرار جزئي ؤلا كلي. حالياً بجوجكوم درتو ستيرجاع د تّبديلات ف ضرف 24 ساعة. من لأحسن ماندوزوش ل تّالتة (مرة خرة قراو سياسة ويكيپيديا:لحرب ف لكتابة).
• كا أمغار، مامنحقّيش نعطي ري ف هاد لموضوع بشكل لي يستاغل سّلطة لي عطاتها لي جّماعة د لويكيپيديين. لي نقدر ندير هوّا ندكّر لكتاتبيا ب سّياسات د ويكيپيديا ؤ نطبّقها، ب لإضافة ل تفعيل لقرارات لي وصلات ليها جّماعة بشكل متشارك.
• لكتابة ف ويكيپيديا كاتّم بشكل تراكمي ؤ تدريجي، يعني كانبنيو على داكشي لي تدار ديجا. من نّاحية تّنضيمية غادي يضيع بزاف د لوقت يلا كلا مرة طرا خيلاف بحال هادا، كتب كلا واحد مقال ديالو ؤ درنا ڤوط. ؤ أصلا هادشي ماغاديش يحل لموشكيل، حيت كلا واحد غادي يصيغ لمقال ب شّكل لي كيبان ليه مناسب هوّا بوحدو. من لأحسن نتّافقو على شنو غادي يكون ف لمقال ؤ نطبّقو هاد تّيفاق (عادتن أمغار هوّا لي كيكتب داكشي على حساب شنو قررات جّماعة)، ؤ باش نوصلو ل تّيفاق ضاروري يكون شوية د تّنازل من لأطراف كاملين. ب طابيعت لحال أي واحد من حقو يكتب مقال ف لمجال سّمياتي د لواساخ (شوفو ويكيپيديا:لحكام د لمحتوى - لواساخ)، ولاكين ماكاينة حتا ضمانة بلي هاد لواساخ د لمقال غادي يتخاد ف عين لعتيبار (شوفو ميتال ديال لواساخ هنا واساخ:صلاح الدين مزوار). بشكل عام لواساخ كانخدّموه ف لبدية قبل مايتزاد لمقال باش نراجعو مسايل بحال لملحوضية ؤ لأسلوب د لكتابة.
• لمحتوى د لمقال ماخاصوش يتحيّد يلا كان موتّق ب عيون موتوقة، ؤ هاد لعيون براسها ماخاصهاش تّحيّد. حتا يلا كانت شي معلومة ماموتّقاش، من لّباقة باش يزيد بنادم هاد طّاڭ {{خاص شي عين/مصدر لهادشي}} باش يطلب عين موتوقة كاتّبت داكشي لي مكتوب. يلا دازت مدة ؤ تا حد ما وتّق ديك لمعلومة تقدر تّحيّد من لمقال. ب طابيعت لحال يلا كانت لمعلومة باينة بلي غالطة (متلاً "لمغريب كاين ف قارة أسيا") تقدر تحيّد نيشان. كيما مدكور ف ويكيپيديا:كتاتبيا، لكتاتبي خاصو يدير نية مزيانة ؤ يفتارض بلي لمعلومة تقدر تكون بصّح ف شي عين من لعيون (كتاب ؤلا مقال متلاً)، ؤ يحاول نيت يلقاها يلا كانت عندو لإمكانية، بغض نّاضار على واش عاجباه لمعلومة ؤلا لفيكرة ؤلا لا.
• لعيبارات تّمجيدية كيما كاتڭول ويكيپيديا:لحيادية ممنوعة ف لمقال، ؤلا ماخاصهاش تدار ب صوت ويكيپيديا، مي ب صوت مّاليها (متلاً "بزاف د شّيوعيين كيعتابرو كارل ماركس أحسن مفكر ف تّاريخ"، ماشي "كارل ماركس أحسن مفكر ف تّاريخ")، ؤ ب عيون موتوقة لي كاتّبت بلي هاد رّي كاين بصّح، سوا ديال جماعة ؤلا شخص، سيرتو يلا كانت لعين موحايدة، يعني ماشي تابعة ل ديك جّماعة ؤلا داك شّخص.
• ستيفزاز لمشاعر ماشي مسألة لي كاتراعيها سياسات ويكيپيديا، لي كاتهمّها غير دّيقة د لمعلومات ؤ موتوقية د لعيون. ولاكين من نّاحية تّنضيمية خاصها تّخاد ف عين لعتيبار، سيرتو يلا كان لأسلوب لعام ؤ تّنضيم د لمقال كيوحي ب نحياز ل شي ريّ محدد. وخا يكون لمقال فيه جميع لأراء ؤ لمعلومات لمتعلقة ب لموضوع، تّرتيب ؤ تّنضيم ؤ لأسلوب د لإلقاء ديالها، ؤ تا لوزن لي كيتّعطا ل كلا واحد منها يقدر يبيّن نوع د لنحياز ل ري ؤلا ري أخور.
• لمناقشة د تّاريخية د شّخصيات historicity لي مدكورة ف كتوبا د تّاريخ، هيّا مسألة جاري بيها لعامال عند لعولاما د تّاريخ، ؤ لمقال ماغاديش يكون مكمول يلا ماجبدش هاد لموضوع. ف نفس لوقت لأراء لمطروحة خاص يتّعطا ليها لوزن لحقيقي ديالها ؤ ماتاخدش حيّز كبير ف لمقال يلا ماكانتش كاتمتّل تيّار أكاديمي كبير. يلا كان لوزن ديالها صغير بزاف، من لأحسن ماتّدكرش ف لموقدّيمة د لمقال، ؤ تّدار غير ف جوملة من فقرة خاصة ب "تّاريخية د محمد". تقدرو نيت تشوفو لمقال ب لعربية على تاريخية محمد.

هادو نقاطي لي بانو ليا موهيمين. يلا نسيت شي نقطة دكّروني بيها عافاكوم، ؤ مرحبا يلا عندكوم شي تعليق. غادي ندير فقرة خاصة ف هاد صّفحة على لمسألة ديال تّصويرة باش تّناقش بشكل مستاقل، ؤ هاد لمداكرة نخليوها غير ل لمحتوى د لمقال (بلا تّصويرة لفوقانية)

تّصويرة لفوقانية

سلام أ دّراري @Omarboulma1926, Iliass.Aymaz, Anass Sedrati, و Reda benkhadra:. ب نّسبة ل لقضية ديال تّصويرة لفوقانية (لي ف صندوق لمعلومات)، سّياسة د ويكيپيديا ماكاتعطيش توجيهات مدققة 100%، ولاكين كاينين هاد نّقاطي بشكل عام على تّصاور (شوفو Adding_images_to_articles، Images_for_the_lead، Offensive_images):

• تّصويرة خاصها تزيد لفهم د لقاري ل لموضوع.
• لعلاقة د تّصويرة ب لموضوع خاصها تكون واضحة.
• ماكايناش رقابة على لمعلومات ف ويكيپيديا، ب معنى ماكايناش تصويرة لي ممنوعة ؤلا ماخاصهاش تّزاد.
• وخا داكشي تّصويرة لفوقانية خاصها تّختار ب عناية باش ماتسببش سوء تفاهم ؤلا جرح لمشاعر ديال عاداد كبير د لقاريين، سيرتو يلا ماكانتش كاتزيد ف لفهامة د لموضوع.
• تّصويرة لفوقانية خاصها تكون بشكل عام عادية ؤ متوقّعة، يعني أي كتاب ب جودة مزيانة كيتريطي داك لموضوع غادي تكون فيه ديك تّصويرة ؤلا شي حاجة بحالها.
• ماخاصش تزاد تّصويرة غير باش تشٖوكي بنادم. متلاً يلا كان مقال على موعسكار ديال تّعديب بحال تازمامارت، ماغاديش نديرو تصاور ديال تعديب محابسيا من دّخلة د لمقال، مي لداخل ف فقرة مناسبة، ؤ ف دّخلة تكون تصويرة عادية ديال لموضع. لستيتناء هوّا ب نّسبة ل لمواضيع لي باينة من لعنوان بلي كاتهضر على موضوع حساس، بحال لأعضاء تّناسلية.
• خاص يتّخاد ف عين لعتيبار لموضع ديال تّصويرة كي غايبان ل شي حد كيقرا لمقال ف لپورطابل.

مولاحضات عامة ف إطار هاد لموضوع ب تّحديد (ماكانضنش بلي شي حد يقدر يختالف عليها):

• ماكايناش تصويرة أصلية د محمد تدارت ف لعصر ديالو، يعني أي تصويرة درناها راها غير محاولة ل تمتيلو من منضور ديال شي حد.
• محمد رسول لإسلام شخصية معروفة بزاف بدون نيقاش، ؤ لموضوع ديالو مامحتاجش ل تصويرة باش يحدد إينا شخص لي مقصود. ب لعكس، كانضن شي حد لي ماعارفش بلي كاينين تصاور د محمد داروهوم بعض لمسلمين ف لقديم، يقدر يشك ف لبدية واش دخل ل لمقال صّحيح ؤ يحساب ليه كيهضر على شي محمد أخور.
• جرح لمشاعر ديال عاداد كبير د لقاريين ب دّاريجة مسألة ماشي حتيمالية مي حتمية، ؤ يقدرو بزاف مايقراوش لمقال أصلا غير ب سباب تّصويرة د لبدية.
• يلا ماتزادتش تصويرة ف لبدية د لمقال، هادا ماكينمعش باش تزاد لداخل د لمقال ف فقرة مناسبة.

--Ideophagous (مداكرة) 11:32، 2 أبريل 2022 (+00)

أنا متافق تبدل صّورة لفوقانية إيلا كانت كاتسبب مشكل لبعض لقرّاء. هادي من عندي واضحة.

لمشكلة لأساسية لي كاتبانلي هنا هو تمسحات مجموعة مصادر وفقرات وتصاور وتبدل لمقال كامل لهدف إيديولوجي علا ما يبدو بلا ما يكون تا هدف موسوعي.

متال: "هو رسول الله ؤ اخر المرسلين" كاتعريف كاتمتل رّؤية لإسلامية، شي واحد لي غايقرا لمقال وماشي مسلم وتعلم دّارجة غاتجيه غريبة ومامفهوماش.

إيلا ولى أي كتايبي كايnuke أي مقال ويردو ب سّرد لي كايجيه مناسب بلا نقاش وبلا ما غي يزيد رّأي لمخالف ماغاندنش غانوصلو للجودة لموسوعية لي باغين. Iliass.Aymaz (مداكرة) 12:55، 2 أبريل 2022 (+00)

صورة اسم محمد مزخرفة أفضل حاجة، وبصفتتا محررين في ويكيبيديا المغربية ما خصناش نديرو شي حاجة كضر لإسلام و لمسلمين حيت كما هو معروف لا يجوز قطعا دير شي تصويرة ديال محمد او على رسول او صحابي او شخصية دينية قديمة. ويكيبيديا المغربية خاصها تعطي أولوية للإسلام ماشي ضرو، افضل حل هو التصويت. Omarboulma1926 (مداكرة) 11:48، 2 أبريل 2022 (+00)

كانضن بلي وصلنا ل تّيفاق بلي تّصويرة لفوقانية تكون سّمية د محمد ب زخرفة إسلامية. كانقتارح باش نخدّمو هاد تّصويرة من دّخلة د لمسجد نّبوي. يلا عندكوم قتيراح أخور ؤلا بغيتو تخليو ديك لي كاينة دابا، مرحبا.

--Ideophagous (مداكرة) 13:16، 2 أبريل 2022 (+00)

معا Omarboulma1926 (مداكرة) 13:53، 2 أبريل 2022 (+00)

تعليق أمغاري: تطبقات.--Ideophagous (مداكرة) 17:16، 2 أبريل 2022 (+00)

لمقدمة

@Omarboulma1926: لمقدمة لي كانت ف صّفحة كاتعطي تّصور لمحايد ديل محمد ومن بعد كاتطعطي شنو كايعتابروه لمسلمين، لي هو شّيئ لي عطا للشخصية شّهرة. آخر تعديل محا لمقدمة وعطا فقط رّؤيا لإسلامية "رسول الله" من لبدية. كانقتارح تبدل للمقدمة لحالية وتعطي تعريف تاريخي تاهو كيما كان من قبل. إيلا ماكانش تفاعل غاندير تعديلات .Iliass.Aymaz (مداكرة) 15:01، 2 أبريل 2022 (+00)

محمد، سميتو لكاملة هي أبو القاسم محمد بن عبد الله بن عبد المطلب، هو زعيم ديني سياسي وعسكري جا من قبيلة قريش.وكايعتابروه لمسلمين هو نّبي لخر ولوحيد ديال لإسلام و مجدد لإسلام لأصلي عقيدة التوحيد لي نزلها الله على لأنبياء بحال ادم، إبراهيم، عيسى، بزاف، وكيتعتابروه لمسلمين لخر و اعظم لأنبياء على حساب ما جا فتٌّراث لسلامي، محمد تزاد فمكة مابين 570م و مات فلمدينة ف632م. عادة تينطقو لمسلمين لعبارة د "صلى الله عليه وسلم" مورا ماتيقولو سميًتو.

Omarboulma1926 (مداكرة) 15:28، 2 أبريل 2022 (+00)

معا متافق Iliass.Aymaz (مداكرة) 15:47، 2 أبريل 2022 (+00)

شكرًا Omarboulma1926 (مداكرة) 12:21، 3 أبريل 2022 (+00)

تصاور

@Omarboulma1926:

• كاينا واحد صّورة كبيرة لتحت حصها تصغار.
• تصويرة لفوقانية لقديمة خصها ترجع ك صورة تمتيلية ف شي فقرة.
• لبيوغرافيا لي كانت خصها ترجع ف شي فقرة، ولبيوغرافيا لي كاينا دبا خصها مصادر وتكون تحت متلا "علا حساب رّواية لإسلامية".

إيلا ما كانش تفاعل غاندير تعديلاتIliass.Aymaz (مداكرة) 15:02، 2 أبريل 2022 (+00).

درت تصغير ل ديك تّصويرة لتحتانية. تّصويرة لفوقانية بدّلتها ف مرة. كانضن بلي كاينين ديجا بزاف د تّصاور موقارنة معا طّول د لمقال. من لأحسن تانزيدو فيه بزاف عاد نزيدو تصاور خرين متعلقين ب كلا فقرة. داكشي لاخور سير عالله، ؤ نتمناو نّتيجة تكون كاترضي جميع لأطراف ؤ كاتستاجب ل معايير ويكيپيديا. ؤ شكرا على لخدمة ديالك سّي إلياس ؤ تا سّي عمر. عواشركوم مبروكة.--Ideophagous (مداكرة) 17:22، 2 أبريل 2022 (+00)