ويكيپيديا:لأداب د لمداكرة
هاد الصفحة كاتشرح طرقان لمداكرة و لحوار بين لخدايميا د ويكيپيديا لي مزيان يلتازمو بيها سيرتو فاش كيتناقشو ف الصفاحي د لمداكرة. لإحترام لمتبادل هوّ السّاس ديال أي تعاون ؤلا تبادل إجتماعي متحضر. أي جماعة ماكاتلتازمش ب هاد الشرط، إلا و كاتفشل ف تحقيق لأهداف ديالها، حيت كيتراكمو لمدابزات بين لأعضاء، و كاتضيع الطاقة ف مسايل خاوية ولّا سلبية ماكاتصبش ف الطريق لي راسمينها الناس ل راسهوم. ف نفس لوقت ويكيپيديا كا مشروع د موسوعة (كاتوسع جميع لمعارف)، و ف إطار السياسات التلاتة لأساسية ديالها، مايمكنش ليها تحقق لهدف لأسمى ديالها، لبني ديال موسوعة معرفية حرة، بلا مايكون تنوع ف لأراء و التوجهات، لي ف لإطار د لمعرفة د بنادم، وخا يكونو متناقضين، هوما ف لواقع كيكمّلو بعضياتهوم. متلاً مايمكنش تكون عندنا نضرة وافية على لحرب لعالمية الجاوجة يلا لمقال ماشملش لمنضور ديال بلدان لحولافا و لمنضور ديال بلدان لمحور بجوج، و مايمكنش نحطو غير واحد فيهوم، حيت غادي يكون عندنا منضور ناقص. لفرد يقدر يكون متحيّز و ماشي محايد ف شي مواضيع، ولاكين الجماعة يلا كانت مكوّنة من أفراد مستاقلين و عندهوم معرفة مقبولة ف شي موضوع، كاتكون عندها، ف لمجموع، نضرة محايدة و متوازنة، حيت كلا فرد كيوازن لإنحياز لي كاين عند وحدين خرين (شوف لحكمة د الجماعة).
لحاصول، هادو 10 د لقواعد لي مزيان يلتازم بيهوم لواحد ملي كيناقش معا لكتاتبيا لخرين ف الصفاحي د لمداكرة:
- ماتهاجمش لأشخاص: ركّز على تطوير لمحتوى د لويكي و لأفكار و لمعلومات لي فيها، و نسى عليك لأشخاص و شنو لي فيهوم ؤلا مافيهومش. ماتحاولش تجرح شي حد ف مشاعرو ؤلا تسبو ؤلا تتاهمو ب شي تهمة كيما كانت.
- فتارض نية مزيانة: أغلبية د لكتاتبيا هدفهوم هوّ يخلّيو ويكيپيديا تولي حسن من لي كانت. يقدر يبان ليك شي حد دار تبديل ماشي مزيان ؤلا تخريبي. مي وخا داكشي، فتارض بلي ماقصدش، و ماتّهجّمش عليه ؤلا تدابز معاه. حاول تصلح داكشي، ولا ماتّافقتوش، حاول تفهم وجهة النضر ديالو و تشرح وجهة النضر ديالك، باش ف اللخر توصلو ل شي تيفاق لي مزيان ل كولشي.
- سني التعليق ديالك ب السمية و النهار و الساعة: يلا ماسنيتيش يقدر لواحد ميعرفش بلي نتا لي كاتب لكومونطير، و يتجاهلو ؤلا ماينتابهش ليه.
- كون مكالمي و ضريّف: يلا كنتي معصّب على شي حاجة، بدّل ساعة ب خرة. تا تكون مكالمي و مرتاح عاد ناقش.
- ماتّجاهلش لكتاتبيا لخرين و حاول تعاون: ويكيپيديا ماشي ديما ساهلة، و فيها مسايل تقنية و إدارية لي تقدر تبان معنكشة حتا عند لكتاتبيا لقدام، عاد شوف الجداد. يلا سوّلك شي حد شي سؤال، حاول على قدر لوقت ديالك تجاوبو ف أقرب وقت، و ماتعطلوش غير هاكاك. التعاون بين لكتاتبيا كيقوّي الروح د الجماعة و كيزيد يحفّزهوم باش يشاركو ف تطوير لموسوعة.
- ماتسنّاش شي حد يلبي الطلبات ديالك: كلنا هنا متطوّعين، و تا حد ماكيتخلّص على لكتابة ف ويكيپيديا. يلا تعطل عليك شي واحد ف الجواب، كون تصبر و ماتقلقش.
- زعم و ماتكونش حشمان: دير شرع يديك و زعم، ماتحشمش تبدل ؤلا تحيد ؤلا تزيد شي حاجة يلا بانت ليك خاصها تدار. و ماتحشمش تسول ؤلا تجاوب أي واحد ف أي موضوع، طالمّا كاتبقى ف إطار لموضوع ديال الصفحة لمعنية و النشاطات د ويكيپيديا.
- تحاور ديريكت: من لأحسن تتناقش معا لمعني ديريكت، ماشي تدخّل أطراف خرين باش "تغلبو" ب لكترة. و يلا بانت ليك لمداكرة شابكة و غادي تطوّل، حاولو تّداكرو ف شي بلاصة خرة (متلا ف التيليفون ؤلا واطساپ).
- كون متسامح و ماتبقاش شاد ف قلبك: كولشي كيغلط. عتارف ب لغالاط ديالك (لإعتراف ب لحق فضيلة)، و تقبّل يلا لاخور عتارف ب لغالاط ديالو، و سامحو. و تا يلا ماعتارفش، الله يسامح، ماتبقاش شاد عليه ديك لغلطة، و خلي لامور تمشي ل لقدام.
- فهم شنو هيّ ويكيپيديا و شنو ماهيّاش: شي مرات كيقدر لواحد ينسى شنو لي دايز و شنو لي مادايزش ف ويكيپيديا. يقدر يطرا سوء تفاهم سبابو عدم فهم النوع د لمحتوى لي مقبول باش يكون ف ويكيپيديا، و لأهداف لي كاتسعى ليها. داكشي علاش ماتنساش مرة مرة تقرا الصفاحي د السياسات و لحكام، و تسوّل و تّناقش معا لكتاتبيا لخرين باش تفهم كتر.