ويكيپيديا:لحكام د لمحتوى - لواساخ
| هادي صفحة ديال لْحكام د لموسوعة. هاد صّفحة محمية و مايمكنش يبدل فيها غير خدايمي أمغار.
يلا بغيتي تقتارح شي تبديل ف لْحكام ديال لمحتوى د جّملة، حلّ شي حلقة د لمداكرة ف لبرلمان ولا حلّ شي حلقة ف صّفحة د إمغارن. |
لواساخ د مقالة هوّا صفحة ف لمجال سّمياتي د لواساخ لي مديورة على ود لكتابة ؤ تّطوير ؤ لمراجعة د مقالة قبل ماتّزاد ف لمجال سّمياتي رّئيسي. هاد صّفحة د لحكام كاتحاول تعرض لحالات فاش كيتقاد واساخ د مقالة، ؤ كيفاش خاص تدار مراجعة ؤ قبول ؤلا رفض لمقالة ف لّخر. باش تزيد تّعرّف على لمجال سّمياتي د لواساخ، شوف ويكيپيديا:واساخ.
فوقاش كيتزاد واساخ د مقالة؟
كاينين بزاف د لحالات فين لكتاتبي يقدر يفضّل يحط مقالة ف لواساخ، باش تّطور ؤلا تّراجع قبل مايزيدها بشكل رسمي، بحال:
- يلا ماكانش متيقن من لملحوضية ؤلا لمقبولية د لمقالة. شوف ويكيپيديا:ملحوضية
- يلا ماكانش متيقّن بلي لمقالة مكتوبة مزيان من نّاحية د لأسلوب ؤلا لمحتوى، ؤ بغا كتاتبيا خرين يعاونو ف تّطوير ديالها
- يلا بغا يزيد بزاف د لمقالات بشكل بوتي، من غير شي حالات خاصة لي يقدرو يتزادو فيهوم مقالات نيشان ف لمجال سّمياتي رّئيسي. شوف ويكيپيديا:لحكام د لمحتوى - لمحتوى د الجملة
كيفاش ندفع لواساخ ل لمراجعة؟
ملي لواساخ يكون واجد ؤ محتارم لحكام، لكتاتبي يمكنلو يزيد هاد لقالب {{واساخ خاصو يتراجع}} لفوق د صفحة لي خدام فيها باش شي حد من لإمغارن يراجعو.
يلا لواساخ تقبل غادي يتزاد هاد لقالب {{واساخ مراجع ؤ منشور}} ؤ ف لحالة يلا ترفض غادي يتزاد هادا {{واساخ د مقالة ترفضات}}
لكريطيريات باش يتّقبل ؤلا يتّرفض واساخ
- توفرو فيه شروط لملحوضية
- مكتوب ب أسلوب مزيان ؤ مفهوم
- كيكوڤري لموضوع ديالو بشكل كافي
- يلا كان فيه قل من 500 كلمة خاص جوج كتاتبيا يقبلو لمقال
- يلا كان فيه كتر من 500 كلمة كتاتبي واحد كافي
- فيه علّاقل عين وحدة. شوف ويكيپيديا:عيون موتوقة
- فيه علّاقل تصويرة يلا كانت متوفرة، من غير يلا كانت غادي تبان نيشان معا صندوق د لمعلومات
لواساخ د مقال كيتّرفض يلا:
- ماكانش كيلبي شّروط د لملحوضية
- كان ديجا مقال على نفس لموضوع ب ضّبط، ؤلا لمحتوى ديالو يقدر يتزاد ل شي مقال ديجا موجود
ف حالت يلا كان لموضوع د لمقال كيلبّي شّروط د لملحوضية ولاكين مامكتوبش مزيان ؤلا مافيهش عاداد كافي د لمعلومات ؤلا لعناصر لي مدكورة لفوق، خاص يتم تطوير لواساخ د لمقال حتا كيولي كيلبي جميع شّروط قبل مايّتقبل.
لپروصي مورا مايتّقبل ؤلا يتّرفض واساخ
ف حالت لقبول
كيتزاد لمقال ل لمجال سّمياتي رّئيسي، ؤ كيتعوض طّاڭ د {{واساخ خاصو يتراجع}} ب طّاڭ {{واساخ مراجع ؤ منشور|عنوان د لمقال}}. من لأحسن يتحيّدو تّصنيفات لي متعلّقين ب لمحتوى د لمقال (متلاً تّصنيفات لي متعلّقة ب لعام د زّيادة ؤلا لوفاة) باش يكونو تّصنيفات فيهوم غير لپاجات د لمقالات. تّصنيفات د صّيانة، سوا لي كيتزادو بشكل ضمني معا لقوالب، ؤلا لي كيتزادو ب ليد ماشي موشكيل يلا بقاو.
ف حالت رّفض
كيتعوض طّاڭ د {{واساخ خاصو يتراجع}} ب طّاڭ {{واساخ د مقالة ترفضات}}.
لامغار بوحدو لي يقدر يعاود يحل لمداكرة على واساخ د مقالة يلا ترفضات. يلا عندك شي سبب واضح علاش كيبان ليك بلي لقرار د رّفض غالط، عافاك كونطاكطي شي أمغار ف لپاج د لمداكرة ديالو، ؤ عطي لّيان د لواساخ ؤ سّبب علاش خاصّو يتّقبل ؤلا يعاود يتراجع. ف حالت يلا تّافق لامغار غادي يبدّل طّاڭ ديال لواساخ من {{واساخ د مقالة ترفضات}} ل {{واساخ خاصو يتراجع}}.