ويكيپيديا:لحكام

لْحْكام هوما سّياسات و لقواعْد لّي كاينضمو لخدمة بين لأعضاء د لموسوعة و فيهوم مجموعة د لمبادئ و لإرشادات لّي كاتعاون باش نبنيو مجموعين موسوعة حرّة و منضمة و لّي نّاس يقدرو يتيقو فيها. لحْكام و سّياسات و لإرشادات لّي كاينين ف هاد صّفحة فيهوم جوج ديال نّواع:

سياسات فوقانية مشروكين بين لمشاريع د ويكيميديا، لّي ولاو ناضجين و شاركو ف لبني ديالهوم لأعضاء د مجتمع ويكيميديا من لبدية ديالو.
سياسات خاصّين ب ويكيپيديا ب الدّارجة لّي تّافقو عليهوم لأعضاء د جّماعة لويكيپيدية د هاد لمشروع.

كيفاش كايتدارو لحكام و كايتبدّلو

لحكام كيتحددو نطيلاقا من لحاجة باش تأطر شي طرف من لموسوعة لي بان عليها نيقاش ولا فيها شي خوا من حيت سياسات و لإرشادات (لكونسيپط د فراغ قانوني)
لحكام يمكنلهوم يتوضعو باش نستابقو شي مشكيل يقدر يوقع.
لحكام كي خرجو و كايطبقو مورما ناقشاتهم جماعة د ويكيپيديا ب دارجة و كان عليهم إجماع.
- بنفس طريقة، لحكام يمكن ليهم يتبدلو باش يتعاود يتلقى إجماع جديد ديال جماعة.
من غير لْحكام لكبار د ويكيپيديا، لْحكام د لمحتوى ماشي تابتين، يقدرو يتطورو علا حساب لإجماع لي تافقات عليه جماعة د ويكيپيديا ب دارجة.

لْحكام لكبار د ويكيپيديا

صفحة متعمقة: ويكيپيديا:لحكام لكبار د ويكيپيديا

لحْكام لكبار ديال ويكيپيديا هوما لمبادئ لكبيرة لّي كاتوصف رّوح د ويكيپيديا:

ويكيپيديا پروجي (مشروع) د موسوعة، ما خاصّش نحمّلوها كتر من لهدف لّول و رئيسي ديالها. شوف هاد صّفحة ديال ويكيپيديا:ويكيپيديا ماشي هي.. باش تزيد تفهم كْتر.
بعّد على ستيل د لكتبة لّي ماشي محايد. لّي كايكتب ف ويكيپيديا خاصو يكون معقول ف كتابتو و ماكايستاغلّش لمشروع باش يدوّز لمواقف ولا لإيديولوجيات ديالو. شوف ويكيپيديا:منضور حيادي.
خاص لحتيرام ديال لحقوق د تّأليف و نّشر: ويكيپيديا پروجي د موسوعة حرّة مرخّصة على حساب لْحكام د رخصة GNU ل لوتايق لحرّة. أي زيادة ديال محتوى (كتبة، تصاور...) ب شكل ما كايحتارمش حقوق نّشر يمكن تخرج على لموسوعة و على لهدف ديالها باش تدير محتوى يمكن أي واحد يعاود ينشرو، وتقدر هاد لقضية تخلق مشاكيل قانونية. تفاصيل زايدة كاينة ف هاد صّفحة: ويكيپيديا:حقوق تّاليف و نّشر.
خاص لحتيرام يكون بين لمساهمين و نّاس لّي كايخدمو ف جّماعة لويكيپيدية: لموساهمين كاملين راهوم غير متطوّعين و هوما من مناطق و عقليات متنوعة. خاصّ لختيلافات و لمداكرات تدوز ف جوّ مبني على لحتيرام و لهدف لّول ديالو هو باش لموسوعة تكبر ب طريقة مزيانة. تفاصيل و إرشادات زايدة كاينة ف هاد صّفحات: ويكيپيديا:صّواب، ويكيپيديا:لحرب ف لكتابة، ويكيپيديا:حلّ صّداعات.

لْحكام د لمحتوى

لموسوعة ماشي بلوݣ ولا شبكة سوسيال ميديا ولا قاعدة بيانات باش يتكتب فيها على أي شخصية ولا أي بلاصة ولا أي موضوع كيف ما كان.
- خاص لمقالة تكون عندها مينيموم ديال لفايدة لموسوعية.

لقواعد ديال لملحوضية غادي تبنيهوم جّماعة حالة ب حالة. أي موساهيم عندو لحقّ يناقش واش شي مقالة تستاهل تكون ولا لا.

لمصادر

صفحة متعمقة: ويكيپيديا:لحكام د لمحتوى - عيون لكلام

لمحتوى د جّملة

صفحة متعمقة: ويكيپيديا:لحكام د لمحتوى - لمحتوى د الجملة

معايير لجودة د لمقالات

صفحة متعمقة: ويكيپيديا:لحكام د لمحتوى - معايير لجودة د لمقالات

تّبديلات لهيكلية د لمحتوى (لحدف - دّمج - الترجاع...)

صفحة متعمقة: ويكيپيديا:لحكام د لمحتوى - التبديلات لهيكلية د لمحتوى

لحكام د جّماعة

الصلاحيات

صفحة متعمقة: ويكيپيديا:لحكام د جّماعة - صّلاحيات

كاين بزاف د الصلاحيات ف ويكيپيديا ب الدارجة، و كل وحدا و شنو خاص باش يوصل ليها شي واحد:

لحكام د لمنع و لمسطرة ديالها

أي واحد ماتيحتارمش لحكام ديال لموسوعة تينبًهوه إمغارن للسلوك ديالو.
إلا عاود داك السلوك للمرة التالة تيتجمعو إمغارن و يديرو تصويت باش يمنعوه يا إما مؤقتا ولا ل ديما.

التحكيم و لإتفاق

خاص تكون حكام باينة ديال شكون كيقرر ف شنو.
يلا ماكانتش شي حاجة مكتوبة هنا، غادي يكون لقرار فيها ب التصويت د الناس النشيطين د لمجتمع د الدارجة.

شكون يقدر يصوّت

لميكانيزمات لأساسيين باش كايتخادو لقرارات ف ويكيپيديا ب الدارجة هوما لكتابة و التبديل ف لويكي (إتفاق ضمني طالمّا تا واحد ما عتارض)، لمداكرات بين لكتاتبيا باش يوصلو ل إتفاق على شي قضية فيها خلاف ولّا عدم وضوح، و التصويت ف حالة يلا ماتّافقوش 100% ولّا يلا لإداري لي كايسيّر لمداكرة بغى باش تكون النتيجة د لمداكرة واضحة ل كولشي.
كانقسّمو لخدايميا ل 8 د لڭروپات على حساب الصلاحيات ديالهم و لقدرة ديالهم باش يصوّتو:
1. إمغارن (ليستة): هوما لإداريين ديال لويكي و عندهم صلاحيات كبيرة بحال تحياد الصفاحي، لبلوك، و غيرهم.
2. إمغارن لقدام (ليستة): خدايميا كانو إداريين قبل و مابقاوش.
3. خدايميا ب خبرة عالية (ليستة): عندهم كونط قديم ب 6 شهور ولّا كتر، صاوبو 50 مقال جديد و دارو 500 تبديل ولّا كتر ف لمقالات و 200 تبديل ولّا كتر ف لمجالات السمياتية التقنية و لإدارية (تصنيف، موضيل، مودول، معاونة، ...). التبديلات خاصهم يكونو مامرجّعينش، و الصفاحي لي تصاوبو تراجعو و ماتحيّدوش. خاص يكون عندهم 100 تبديل ف 6 شهور اللخرة.
4. خدايميا ب خبرة مزيانة (ليستة): عندهم كونط قديم ب 3 شهور ولّا كتر، صاوبو 20 مقال جديد و دارو 200 تبديل ولّا كتر ف لمقالات و 50 تبديل ولّا كتر ف لمجالات السمياتية التقنية و لإدارية (تصنيف، موضيل، مودول، معاونة، ...). التبديلات خاصهم يكونو مامرجّعينش، و الصفاحي لي صاوبو تراجعو و ماتحيّدوش. خاص يكون عندهم 50 تبديل ف 3 شهور اللخرة.
5. مبتدئين (ليستة): أي خدايميا عندهم كونط قديم ب سيمانة ولّا كتر و دارو مقال تراجع و ماتحيّدش، و 10 د التبديلات ف لمقالات ولّا كتر.
6. جميع لكتاتبيا لخرين (ب كونط)
7. خدايميا بلا كونط (كونط مؤقت)
8. خدايميا مبلوكين
أي كتاتبي ولّا خدايمي ب كونط مؤقت يقدر يشارك الرأي ديالو ف أي مداكرة، من غير يلا كان من لڭروپ 8 (مبلوكي). لخدايميا لمبلوكين ماخاصهمش يتحايلو على لبلوك ب لمصاوبة ديال كونط جديد ولّا لمشاركة بلا كونط شخصي (أيپي ولّا كونط مؤقت، شوف لحكام د لمقاشرة)، و ماعندهم حق لا ف لمداكرة لا ف التصويت ف أي نوع د لمداكرات.
نواع لمداكرات و شكون يقدر يصوّت فيهم يلا وصلو للتصويت:
1. مداكرات د لمحتوى: بحال لإختيار د عنوان ديال مقال، لمعلومات ف لمقال واش صحاح ولا لا، لمصادر لي مخدّمين ف لمقالات، لمحتويات ديال لموضيلات د التسركيل لي كايبانو ف لمقالات، لمداكرات ديال اللوغة و لإملاء و غيرهم: لكتاتبي لي صاوب لمحتوى ولّا دار التبديل لي عليه مداكرة + لڭروپات من 1 ل 5.
2. مداكرات تقنية: مداكرات متعلقين ب مسايل تقنية بحال لموضيلات و لمودولات بشكل عام، لبوتات، الصفاحي د ميدياويكي و الطرجامة التقنية و غيرهم: لڭروپات من 1 ل 4.
3. مداكرات إدارية و تنظيمية: مداكرات متعلّقين ب لحكام د لويكي و التنظيم ديالها و التطوير ديال لحكام و الصلاحيات، و غيرهم: لڭروپات من 1 ل 3.
لحكام لي لفوق كاينطابقو بشكل عام، ولايني لحكام لخاصين ب شي نوع د لأنشطة ولّا لمداكرات يقدرو يكونو فيهم تفاصيل ولّا تغييرات على الصلاحيات لمطلوبين على ود لمشاركة ولّا التصويت ف داك النوع ديال لمداكرات.