مكناس

مكناس
‫مكناس‬ (ar) ⵎⴽⵏⴰⵙ (tzm)
ساحة لهديم وباب منصور فمدينة مكناس
لبلاصة
لبلاد	لمغريب
لإقليم	عمالة مكناس
لإدارة
لعمدة	عبد الله بووانو (2015)
السكان
شحال دالسكان	520,428 (2014)
شحال دلفاميلات	126,319 (2014)
لجغرافيا
لميساحة	370 كم²
لعلو	535 م
خط الطول بـ °	-5.52886963
خط لعرض بـ °	33.85673153
معلومات خرا
كود د لبوصطة	50000
الرمز لجغرافي	2542715
لخريطة

مكناس (تمازيغت: ⴰⵎⴽⵏⴰⵙ) مدينة ف شمال د لمغريب، وخامس أكتر مدينة ف لمملكة من ناحية سكان. مكناس كان عاصيمة ديال لمغريب ف عهد سلطان مولاي سماعيل (1672–1727)، قبل ما ترجع مراكش عاصمة من جديد. عدد سكان مدينة مكناس 632.079 والمدينة جاية ف جهة فاس مكناس. السمية ديال المدينة جات من سمية قبيلة مكناسة (بتمازيغت ⵉⵎⴽⵏⴰⵙⵏ). لمدينة القديمة ديال مكناس عطاتها ليونيسكو صفة ترات عالمي ف 1996.

أصل د سمية

لمدينة د مكناس

سمية ديال مدينة مكناس جاية من سمية ديال لقبيلة لأمازيغية د مكناسة. ناس ديال هاد لقبيلة كيتسماو "إمكناسن" ف لجمع و "أمكناس" ف لمفرد. "أمكناس" ب تمازيغت كتعني لعسكري ولا لمقاتل. وزيدون، المناضلين الشلوح كيسميوها كتر "أمكناس". قبيلة مكناسة شاركو ف 711 مع طارق بن زياد ف فتح الاندلس، وسكنو ف شمال د قرطبة. و جوايه القرن حضاش، أسسو السلالة ديال بنو لأفطس ف بطليوس (باداخوس). البعض منهوم شارك ف تورة لي نوضها ميسارة (739 ل 742) ودخلو ل لمدهب د الخوارج. أسسو إمارة سيجيلماسة لي جات ف لحدود شمالية د صحرا. وباش يقدو على لهجمات د لفاطميين، تحالفو مع لخلافة د قرطبة. ولكن فاش شاف ديالهم لمعتز تحالف مع الفاطميين، جاو مغراوة لي كانو متحالفين معا لأمويين د قرطبة، وجراو على مكناسة من سيجيلماسة. بعد ما تحاربو مع بزاف ديال لقبايل اخرى، منها الصالحيين، ومن بعد لمرابطين، مكناسة ضعافو وف القرن 11 مشاو ستاقرو ف مكناس.

تاريخ

باب لمنصور ف 1931.

قبيلة مكناسة ناضو ضد لحاكم ديال قيروان ف تونس، وجاو ستاقرو حدا واد ويسلان. ف لقرن 11 جاو لمرابطين و دارو ف لمنطقة فين مستاقرين مكناسة قشلة. فاش جاو لموحدين، ريبو داكشي، حيت تاهمو مكناسة بلي كيعاكسوهم، وباش يبنيو مدينة كبر ؤ حسن، فيها جوامع (ومنها جامع لكبير لي تبنى ما بين 1199 و 1213) وسوار عالية. فاش ستولاو عليها لمرينيين، بناو فيها مدراسات (ومنهم لمدراسة لبوعنانية لي بدا لبني ديالها مع لحوكم ديال بو لحسن ف 1331 و ما تسالا على 20 عام من بعد)، قصبات و جوامع ف لبدو د لقرن 14. فاش خداو لوطاسيين لحوكم، مدينة مكناس تمعشات بزاف. أهم ماليك علوي هو مولاي سماعيل لي حكم لبلاد خمسة وخمسين عام (1672 ل 1727). عاود نضم لمغريب وهدنو، بعدما لعسكر ديالو ربحو ݣاع لقبايل لي كان مدابزة معاه، و غلبو لعتمانيين والنصارى. وهاكدا لمخزن تحكم ف لبلاد كاملة. مولاي سماعيل خلا بزاف ديال لمآتر، كبر مدينة مكناس وردها عاصمة ديالو. دار الشان ل لمدينة ب لفلوس لي كانو كايدخلو من لبيع ديال لبحارة نصارى لي كانو من بعدما كيقبطو عليهم، كيحبسوهم ف حبس كبير تحت لأرض ف مكناس: حبس قارا. هاد لحبس مزال كاين ويقدر بنادم يزورو حتى اليوم. مولاي سماعيل بنى بزاف د المنشآت، جرادي، بيبان كبيرة، سوار طولها فات ربعين كيلومتر وشلا من جامع بصوامع زوينة. هدشي علاش مكناس كيسميوها مرة مرة "مدينة الميات صمعة". ف يامات ستيعمار د لمغريب (1912 ل 1956)، كانت مكناس كتسمى "ڤرساي د لمغريب"، ولا "باريز صغيرة" حيت الفرانسويين كانت كتعجبهوم وكتجيهوم اجمل مدينة ملكية ف لمغريب. واحد الوقيتة كانت ݣاع إقامة ديال لماريشال ليوطي وكان دار فيها لكارتيي جينيرال ديالو.

جغرافيا

أوّل إحصاء د سّكان تدار ف لمغريب مورا سّتيقلال ف 1960، تّلقا فيه بلي كاينين 177.128 لي ساكنين ف مكناس، سوا مغاربا ؤلا أجانب.

لجماعة لحضرية

لجماعة لحضرية د مكناس تابعة ل عمالة مكناس، جهة فاس مكناس، ساكنين فيها 517376 واحد، على حسب لإحصاء لعام 2014.

تعليم

• نسبة لأمية (نّاس لّي ما كايعرفوش يقراو ولا يكتبو) : 19,9%
• نسبة سّكان لّي قاريين فوق تّانوي (تانوي و جامعة): 26,1%

اقتصاد

• نسبة نّاس نّشيطين (لّي يقدرو يخدمو): 47,1%
• نسبة لبطالة (نّاس لّي ما خدامينش و تايقلبو على خدمة): 21%
• نسبة نّاس اللي خدامين ف دّولة (ولا لعاطلين اللي سبق ليهوم خدمو): 18,3%
• نسبة نّاس اللي خدامين في لقطاع لخاص (ولا لعاطلين اللي سبق ليهوم خدمو):48,7%

عيون لكلام

تقدر تزيد شوف بزاف د تّصاور و لمعلومات ديال Meknes ف ويكيميديا كومنز.