سارس-كوڤ-2
.jpg)
سارس-كوڤ-2 هوّا واحد لڤيروس اللي كاينتامي للنوع كوروناڤيروس (بلاتينية :Coronavirus) اللي براصو كينتامي ل لفاميلا ديال لكوروناڤيريداي (بلاتينية: Coronaviridae). لمرضة اللي كايديرها السارس-كوڤ-2 كاتسما ب كوڤيد- 19.
تسما السارس SARS أولا SRAS حيتاش كايتسبب فالساندروم التنفسي لمجهد الصعيب(بلفرونصي :Syndrome Aïgue Respiratoire Sévère) و اللي هو لكوڤيد، و كوڤ حيت كاينتامي للنوع د لكوروناڤيروس، و 2 حيت ديجا كاين السارس-كوڤ-1 اللي كان ف 2003 .
السارس-كوڤ-2 هو فصيلة د لڤيروسات اللي نورمالمو معروفة بطفرات، فاش هاد طفرة كاتبدل التمرضين د لڤيروس (لقدرة ديالو باش يمرض الضيف ديالو) كاتعطينا طاسيلا جديدة، و ل حد التاريخ فاش تكتب هاد لمقال (نص من مارس 2021) كاين عندو ربعا ديال الطاسيلات اللي معروفين:[1]
- طاسيلا ديال ووهان (لوريجينال) و هيا اللي منتاشرة بزاف
- طاسيلا ديال النݣليز (لقراية على دهاد الطاسيلا بينات باللي كاتنتاشر بزربة ولكن لخطورة مقارنة بالطاسيلات اللولا بقات هيا هيا)
- طاسيلا ديال جنوب إفريقيا
- طاسيلا ديال لبريزيل
سارس-كوڤ-2 هو ڤيروس ب لARN، لحمض النووي ديالو مخبي فواحد صاك پروتيني سميتو لكاپسيد اللي كاين عند ݣاع لڤيروسات، زيد على داكشي ان لڤيروس مغطي بواحد لغشا كيعاونو باش يتفيكسا على لمستقبيل ديال السارس ف الرية دالضيف، هاد لغشا كايتكون من بزاف دلبروتينات الي كاتحدد التمرضين د لڤيروس، واللي أهمها هو "لݣليكوپروتين S" و اللي جات من لكلمة "Spike" (ب المغريبية كاتعني :شوكة ولا مسمار) هادي هي اللي كاتفيكسا على المستقبيل ACE-2 : الأنزيم المحويلة للأنجيوطونسين 2 اللي كاين ف لغشا ديال لخلايا ديال الرية داكشي اللي كايفسر علاش الڤيروس كايدوز ب الهوا.[2]
رد لبال: ACE-2 مكايناش غير ف لخلايا ديال الرية بوحدها ولكن كاينا حتا ف لجهاز لهضمي و ف لقلب و لكلوة ، داكشي علاش لڤيروس يقدر يدوز حتا ب لماكلة ولا بليدين: باش تجنب لڤيروس دير لكمامة و غسل يديك و لماكلة اللي كاتاكول خاصها تكون نقية.[3]
لفيروس فاش كايضرب بنادم كانلاحضو فلبيولوجي باللي كاينقصو عندو اللمفاويات و كاتزيد عندو نسبة تاع لپروتينات لحرقاوية بحال CRP فالدم.
التيستات باش نديتيكتيو لفيروس كتار، منهوم اللي ديريكت(بحال PCR و تيست أنتيجينيك) و اللي ماشي ديريكت ( بحال السيرولوجي تيست ديال الدم تاع IgM ولا IgG) ولكن التيست لمرجعي هو ل RT-PCR.
*RT-PCR:الاجابيات ديالها هي انها هيا لفعالة فيهوم و ممكن نديتيكتيو بيها لفيروس حتا قبل مايبانو الاعراض ولكن لموشكيل ديالها هيا خاصها لوقت لجواب.[4]
*تيست أنتيجينيك: صالحة فلخمسيام اللولة من بعد مايبانو الاعراض(السخانة) وكاتعطي لجواب فربع ساعة ، هادي خدامة الا كان لفيروس ضاير بين الناس وبغينا لجواب دغية .
الهزان ديال لفيروس غالبا كايكون بالتدخال ديال واحد لعيبة سميتها عويدة-قطن لنيف وكايكون فاللابو.
اللي معروف هو انهو الا مكانش التباعد ليجتيماعي واحد لمريض يقدر يدوز لعدوى ل 2,5 دلباشار فخمسيام، وفشهر يقدر يدوزها حتال 400 واحد. ولكين الا كان التباعد غادي ينقص لعدد ل1,25 دلباشار فخمسيام، و فشهر غايدوزها ل 15 واحد صافي.[5]
164 لابو بداو كايقلبو على الليقاح فلعالام و لكن قلال منهوم اللي قدرو يوصلو للمرحلة ديال ستيعمال، المغريب قرر انهو ينوع من الليقاحات ضد لفيروس بحال أسترازينيكا ديال أكسفورد و سينوفارم ديال الشينوا وهاد جوج دالليقاحات خاصك ديرها جوج مرات باش تكتاسب لمناعة ضد لفيروس.
- ^ https://www.who.int/csr/don/31-december-2020-sars-cov2-variants/fr/
- ^ https://www.futura-sciences.com/sante/definitions/coronavirus-sars-cov-2-18559/
- ^ https://www.cchst.ca/products/posters/prevent_spread.html
- ^ https://www.eurofins-biomnis.com/fr-int/services/referentiel-des-examens/page/COVBM/
- ^ https://www.leparisien.fr/societe/epidemie-de-coronavirus-toutes-les-reponses-a-vos-questions-31-01-2020-8249223.php
|
تقدر تزيد شوف بزاف د تّصاور و لمعلومات ديال SARS-CoV-2 ف ويكيميديا كومنز. |