ويكيپيديا:عافاك درج

ويكيپيديا بالداريجة هيّ موسوعة مكتوبة بالداريجة لمغريبية. أغلبية د لمصطلحات لمتداولة ديال الداريجة لمغريبية جايين من لهجات عربية قديمة، معا تأتير ديال لفصحى، زيادة على التأتير لكبير ديال لأمازيغية، و شوية د لكلمات من لفرانساوية و الصبليونية و لوغات خرين. وخا كاين هاد التنوع ف الروافد ديال الداريجة، هادا ماشي مبرر كافي باش لواحد يبقى غير كياخد مصطلحات ولّا تعابير من لوغات خرين، سوا عربية، فرانساوية ولّا غيرها، ف لوقت لي هاد لمصطلحات و التعابير عندها موقابيلات معروفة و منتاشرة ف الداريجة.

عافاك حاول تفكر شوية قبل ماتكتب مصطلح ولا تعبير، و حاول تدرّج لأساليب ديالك على قدر لإمكان و لمعرفة ديالك. غير ف نفس لوقت ماتنساش بلي أهم هدف علاياش كانكتبو لمقالات، هوّ باش لمغاربا و الناس لي كيهضرو بالداريجة بشكل عام، يفهمو لمحتوى و يستافدو منو. داكشي علاش يلا خدّمتي مصطلح لي ماشي متداول ف جميع لمناطق، ولّا ڭاع ضطريتي تصاوب مصطلح تقني جديد، ماتنساش تشرحو ف نويطة لتحت (من غير يلا كان لمقال نيت على داك لمفهوم ولّا لمصطلح).

الداريجة عامرة ب لكلمات و التعابير لي يقدر لواحد ينسى بلي كاينين، ولّا مايكونش واعي بيهم. لكائنات لحية (حيوانات، نباتات/عشبات، حوتات، بخوش...) لي كيعيشو ف لمغريب، ف لغالب عندهم سميات محلية لي خاص لواحد يقلّب عليها. يلا ماعرفتيش شي مصطلح، تقدر تسوّل لكتاتبيا لخرين ف لويكي، و تقدر تشوف لمصادر بحال لمعاجم ديال الداريجة لي جامعين بحال هاد لمصطلحات بشكل عام، ولّا ف مجال خاص.

زيد قرا هنا

قضايا د اللوغة

تخميمات على الداريجة

لماراجيع

مشاريع برّانية