جاپونية
 مقالة ماكافيينش فيها لعيون.هاد لمقالة فيها عيون، ولاكين خاصها باقي تزيد تّوتّق. عافاك قلّب على مصادر مناسبين (كتوبا، مقالات موتوقة ؤ غيرها) ؤ زيدها هنا. شوف هنا كيفاش تزيد لعيون. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
جاپونية
| ||
| ||
| النوع | لغة طبيعية و لغة حية | |
| تخدام | ||
| اللي كبرو بيها | 128,000,000 (2019) | |
| كايتهضر بيها ف | چاپون، الولايات المتاحدة د ميريكان، طايوان، كوريا شمالية، كوريا لجنوبية، ڤيليپين، پيرو و ؤسطراليا | |
| أصلية ف | چاپون | |
| لخصائيص | ||
| لكتبة | كانجي، كانا، كاتاكانا و هيراغانا | |
| لمؤسسة دلمعيارة | Kokugo Shingikai • Council for Cultural Affairs • مونبوشو • وكالة الشؤون الثقافية اليابانية | |
| كاتقرّا ف | علم اللسانيات اليابانية | |
| النّيڤو دالضعف | (1) عادية | |
| لوضعية داللوغة | 1 وطنية | |
| لفاميلة داللوغات | ||
| لغات يابانية | ||
| لخاريطة | ||
| ||
| لكواض لي كايعرّفو اللوغة | ||
| إيزو 639-1 | ja | |
| إيزو 639-2 | jpn | |
| إيزو 639-3 | jpn | |
| ڭلوطولوڭ | nucl1643 | |
| لينڭواسفير | 45-CAA | |
| إيطنولوڭ | jpn | |
جّاپونية (日本語 ، نيهونݣو | نيهون 日本 = جّاپون، ݣو 語 = لوغة) واحد لّوغة شرق أسياوية معزولة كايهضرو بيها شي 128 مليون، أغلبهوم ف جّاپون، لّي تمّا هي لّوغة د لبلاد، ؤ كتر من 1.5 مليون زماݣري جاپوني ؤ ولادهوم ؤ حفادهوم لي عايشين ف بلدان خرين، سيرتو ف أمريكا شّمالية ؤ لجنوبية.[1] جّاپونية كاتّكتب من ليسر ل ليمن ولّا من لفوق لتحت.
مامعروفش بزّاف فوقاش أوّل مرة بانت ف جاپّون. لوتائيق شّينوية من لقرن تّالت مسجّلة شي كليمات ب جّاپونية، ولاكين نّصوص د بصّح ما بانو حتا لقرن تّامن ف لوقيتة د هييان (794 – 1185)، شّينوية عندها تأتير كبير علا لكلمات ؤ لفونولوجيا ديال جّاپونية لقديمة. جّاپونية لوسطانية لمعطّلة (1185 – 1600) مبدّلة واحد شّوية ؤ قرب ل ديال دابا، ؤ فيها بداو يبانو لكلمات لّي موخودين من لّغات د ؤروپا. لّهجة سطوندار تبدّلات من لّهجة د كانساي ل لّهجة د إيدو (فين كاينة طوكيو دابا) ف لوقيتة د جّاپونية لموديرن ديال بكري (لبدية د لقرن 17 – لوسط د لقرن 19). من بعد ما تحيّد لعَزل لّي كانت دايراه جّاپون ل راسها ف 1853، ل كلمات لّي موخودين من لّغات د ؤروپا تزادو بزاف، بحال لكلمات لّي لأصل ديالهوم هو لونݣلي متلا.
واخّا جّاپونية ماكاتجيش ل شّينوية، ولكن كاتخدم ب رّموز شّينوية ف لكتبة ديالها، لّي كيتسمّاو لكانجي (漢字)، لّي لأغلبية ديال رّموز ديالو جايين من شّينوية. سيستيم د لكتبة د جّاپونية خدّام ب لكانجي ؤ لهيراݣانا (ひらがな ولّا 平仮名) ؤ لكاطاكانا (カタカナ ولّا 片仮名). لكتبة لّاتينية كاتستعمل مرة مرة، بحال ف لختيصارات، ؤ ف سيستيم د لأرقام كاتخدم غالبا ب لأرقام لغبارية ؤ حتا لأرقام د شّينوية.
جّاپونية لبدائية، لّوغة لأصل ديال جّاپونية ؤ لّغات ريوكيوانية، كايݣولو بلّي جابوها نّاس لّي جاو ل جّاپون من لقارّة د آسيا ولّا لجزر لقراب د لمحيط لهادي من قبل لقرن 2 قبل لميلاد (لوقيتة د يايوي)، بلاصات لّغات دّوريجين ديال جومون لي كانو عايشين تماك، ؤ حتا لّوغة لأصل د لأينو. مامعروفش بزاف علا جّاپونية فهاد لوقيتة، حيت كانو مازال ما جابو لكتابة من شّينوا.
هي أقدم ڤيرسيو عندنا علا جّاپونية، سيستيم د لكتبة د شّينوية جا ل جّاپون مع لإنتيشار د لبودية. نّصوص لقدام لّي تلقاو ف جّاپون كانو مكتوبين ب شّينوية لكلاسيكية، لّي يقدر يكونو كايتّقراو ب طّريقة د كانبون، شي نصوص كان عندهوم تأتير على لݣرامّير ديال جّاپونية، بحال تّرتيب د لكلمات (متلا، لفيعل مورا لمفعول به). ف هاد نّصوص لهجينة، رّموز شّينوية كانو مرة مرة كايتستاعملو باش يعبّرو علا صّوت ديال شي حرف جّاپوني. نّصوص لقدام، لكوجيكي، لّي لوقت ديالهوم كايرجع لقرن 8، كانو مكتوبين كاملين ب رّموز د شّينوية. نّهاية د جّاپونية لقديمة جات مع نّهاية د لوقيتة د نارا ف 794. جّاپونية لقديمة كاتستعمل سيستيم د لكتابة مانيوݣانا.
جّاپونية لوسطانية د بكري هي جّاپونية ف لوقيتة د هييان، من 794 حتال 1185. جّاپونية لوسطانية د بكري كان عليها تأتير كبير ديال شّينوية من ناحية د لفونولوجي ديالها.
جّاپونية لوسطانية لمعطّلة كانت من 1185 تال 1600، تقدر تقسّمها علا جوج، لوقيتة د كاماكورا، ؤ لوقيتة د موروماتشي.
لفورمة لّخرانية د جّاپونية لوسطانية لمعطّلة كانت هي لّولا لّي توصفات من مصادر ماشي جّاپونية.
جّاپونية لوسطانية لمعطّلة فيها أوّل لكلمات لّي موخودين من لّغات د ؤروپا بحال پان ("لخبز") ؤ طاباكو ("طّابا") بجوج من لبرطقيزية.
جّاپونية لموديرن ديال بكري كانت لّهجة لي تستعملات مورا لإصلاح د ميجي. جّاپونية لموديرن ديال بكري طّورات بشوية بشوية ف لقرن 19 ل جّاپونية لموديرن. غير من بعد 1945، منين سالات لحرب لعالمية تّانية، عاد ولّات جّاپونية لموديرن سطوندار، ؤ ولّا كايبان لستيعمال ديالها ف أغلب لتيصالات رّسمية. ف هاد لوقيتة كانو كايستعملو ف لكتابة ل هيراݣانا ؤ لكاطاكانا ؤ رّموز د شّينوية تقليدية لي كايتسمّاو "هان" لّي من بعد تطورات ل "لكانجي".
جّاپونية لموديرن بدات مع لوقيتة د إيدو، لّي دوّزات من 1603 تال 1868. من يّامات جّاپونية لقديمة جّاپونية سّطوندار كانت هي لّهجة د كانساي، خصوصا ديال كيوطو. ولكن ف لوقيتة د إيدو، إيدو (لّي هي طوكيو دابا) تطورات ولّات أكبر مدينة ف جّاپون، ؤ ولّات لّهجة ديال ديك لبلاصة هي لّهجة سّطوندار. ملّي حيدات جّاپون لحصار لي كانت دايراه علا راسها ف 1853، تزادو بزاف لكلمات لّي موخودين من لّغات د ؤروپا، بحال لألمانية، لبرطقيزية ؤ لونݣلي. بزاف د لكلمات لّي موخودين من لونݣلي عندهوم علاقة ب طيكنولوجيا، بحال pasokon - باسوكون (ختيصار ل "personal computer" - لحاسوب شّخصي)، intānetto - إينطانيطّو ("internet" - لانطيرنيط)، ؤ kamera - كاميرا ("camera" - لكاميرا).
واخّا جّاپونية كايهدرو بيها تقريبا غير ف جّاپون، كانو كايهدرو بيها حتا برّا، ف لوقيتة د لحرب لعالمية تّانية ؤ قبل منّها. ملّي جّاپون كانت شادّة طّايوان ؤ كوريا، ؤ شي بلايص من شّينوا ؤ لفيليپّين، ؤ شي جزر من لمحيط لهادي، نّاس لي ف هاد لبلدان تعلمو جّاپونية حيت هي لّوغة د لإمبراطورية، حتال دابا نّاس لكبار ف هاد لبلايص مازالين كايهدرو بيها.
جّاپونيين لّي ف لخاريج (أكبر نسبة كانلقاوها ف لبريزيل، ما بين 1.4 مليون ؤ 1.5 مليون جاپّوني زماݣري ؤ لّي كابرين تمّا، علا حساب لمعلومات د لـ IBGE، ؤ كتار من 1.2 مليون ف ميريكان) بعض لمرّات كايخدّمو جّاپونية هي لّوغة لأساسية. تقريبا 12% ديال سكّان د هاواي كايهدرو ب جّاپونية، حيت تقريبا 12.6% من سكّان أصلهوم من جّاپون ف2008. تقدر تلقا زماݣرية د جّاپون حتا ف پيرو، لارجنتين، ؤسطراليا (خصوصا لولايات د شّرق)، كاندا، (خصوصا ف ڤانكوڤر لّي 1.4 من سكّان ديالها لأصل ديالهوم جاپّوني)، ميريكان (خصوصا ف هاواي، لّي 16.7 من سكّان ديالها لأصل ديالهوم جاپّوني، ؤ كاليفورنيا)، ؤ لفيليپين (شوية من لمنطقة ديال داڤاو ؤ لجهة د لاݣونا).
جاپّونية ماشي رسمية ف تّا دولة، ولكن هي لّوغة د لبلاد لّي معمول بيها ف جاپّون. كاينة لفورمة سطوندار ديال جّاپونية: هيوجونݣو (標準語)، زعما "جّاپونية سطوندار"، ولّا كيوتسوݣو (共通語)، زعما "لّوغة لعامّية". تقريبا هاد لكلمات بجوج عندهوم نفس لمعنى. هاد لّوغة تولدات مورا لإصلاح د ميجي (明治維新، مِيْجِي إشين، 1868) من لّوغة لّي كانو كايهدرو بيها لبلايص ديال طّبقة لعاليا ف طوكيو (يامانوطي). هيوجونݣو كاتّقرّا ف لمدارس ؤ كاتستعمل ف تّلفازة ؤ ف تّواصل رّسمي. ؤ هي جّاپونية لّي داويين عليها ف هاد لارتيكل.
كانت لكتابة سطوندار د جّاپونية (文語، بونݣو، "لّوغة لحرفية") مبدّلة على لعامّية (口語، كوݣو). هاد سّيستيمات بجوج كان عندهوم تّراكيب مبدّل ؤ حتا شي ختيلاف ف لكلمات. بونݣو كانت هي طّريقة لأساسية د لكتابة ب جّاپونية حتال جوايه 1900؛ من تمّا كوݣو بدات كاتعطي تأتير بشّوية بشوية ؤ بقاو كايتستاعملو سيستيمات بجوج حتال رّبعينات د لقرن لّي فات. بونݣو باقي كايحتاجوها نّاس د لآداب، لمؤرّخين ؤ حتا لمحاميين ؤ نّاس د لقانون (بزاف د لقوانين د جّاپون لّي باقا من قبل لحرب لعالمية تّانية مازالا مكتوبة ب لـ بونݣو، واخّا كايدّارو مجهودات باش يردّوهوم مكتوبين ب لوغة موديرن). كوݣو هي طّريقة د لكتابة ؤ لهدرة لّي خدّامة بيها جّاپونية د ليوم، واخّا هاكّاك تّراكيب ؤ لكلمات ديال ل بونݣو كايتستاعملو مرة مرة ف جّاپونية لموديرن.
كاينين بزاف د لّهجات ف جّاپون. هادشّي راجع ل بزاف د لعوامل، بحال طّول د لمدة لّي تسكن فيها لأرخبيل د جّاپون، كترة جّبال ف لجزر ديالو، ؤ تّاريخ طّويل ديال لعزل دّاخلي ؤ لخارجي د جّاپون.
أهمّ ختيلاف ف لّهجات د جّاپون هي لّي كاين ما بين لفورمة ديال طوكيو (東京式، طوكيو-شيكي) ؤ لفورمة د كيوطو-ؤساكا (京 式، كيْهان-شيكي). لّي كل وحدة ف هاد جّوج حتا هي فيها أنواع. لّهجات ديال لفورمة د كيوطو-ؤساكا كاينين ف لمنطقة لوسطانية، لّي مكوّنة من كانساي، شيكوكو، ؤ لمناطق لغربية ديال هوكوريكو.
لّهجات ديال لمناطق لّي جاو ف لقنات، بحال طوهوكو ولّا كاݣوشيما، يقدرو ݣاع ما يفهموهم نّاس لّي من لبلايص لوخرا د لبلاد.
كاينين شي جزر د لّغات ف لڤيلاجات لّي ف جّبال ولّا ف لجزر لمهجورة بحال لجزيرة د هاتشيجو-جيما لّي لّهجات ديالها جايّة من لّهجات شّرقية د جّاپونية لقديمة. لّهجات ديال لمنطقة د كانساي معروفين ولّا كايهدرو بيهوم بزاف د جّاپونيين، ؤ لّهجة د ؤساكا بضّبط مرتابطة ب لكوميديا. لّهجات ديال طوهوكو ؤ شّمال د كانطو مرتابطين ب لفلّاحة.
لّغات ريوكيوانية لّي كايهدرو بيهوم ف ؤكيناوا ؤ لجزر د أمامي (لي راهوم جزء من كاݣوشيما)، مبدّلين بشكل كافي باش يتحسبو برونش بوحدها ف لعائلة د لّغات جاپّونيكية؛ حيت ماشي غير مامفهومينش لنّاس لّي كايهدرو ب جّاپونية، ولكن مامفهومينش حتا لّي كايهدرو ب لّغات رّيوكيوانية لخرا. وخّا هكاك، بزاف د نّاس كايعتابرو هاد لّغات ريوكيانية لهجات د جّاپونية. نّاس لّي كايهدرو لّغات رّيوكيوانية هوما نّاس لكبار لّي لعدد ديالهوم غادي ؤ كاينقص، حتا ليونيسكو كلاساتهوم مهدَّدين، حيت يقدرو مايبقاوش ف 2050. ؤ نّاس صّغار ف لعمر كايستاعملو غير جّاپونية ؤ ماكايفهموش لّغات ريوكيوانية. جّاپونية د ؤكيناوان جايّة من جّاپونية سّطوندار ؤ متأترا ب لّغات ريوكيوانية. ؤ هي لّهجة لّي كايهدرو بيها نّاس صّغار ف لجزر د ريوكيو.
جّاپونية لموديرن ولّات طاغية ف ݣاع لبلاد (حتا ف لجزر د ريوكيو) بسباب تّعليم، لميديا، ؤ لرتيفاع ديال تّنقل ف جّاپون، ؤ حتا لإدماج ليقتيصادي.
جّاپونية من لعائلة د لّغات جّاپونيكية، لّي فيها حتا لّغات لّي كاينين ف لجزر د ريوكيو. حيت هاد لّغات قراب لبعضياتهوم، غالبا كايتعاملو معاهوم علا أساس لهجات ديال لوغة وحدة، جّاپونية كاتعتابر غالبا لوغة معزولة.
علا حساب مارتين إيرما روبيتس، كانت بزاف د لمحاولات باش يبيّنو لعلاقة د جّاپونية مع لغات وحداخرا ف لعالم.
لهتيمام د لعلماء د لّسانيات ب جّاپونية بدا ف لّخر د لقرن 19، من ديك سّاعة شي محاولات دّارو باش يشوفو لعلاقة د جاپونية ب لغات اخرا ولّا عائلة د لّغات بحال متلا أينو، لكورية، شّينوية، تّيبيتية-لبورمية، لؤرالية-لألطائية، لألطائية، لؤرالية، لأسترو-أسيوية، لمالايو-پولينيزية ؤ ريوكيوانية. غير بزّز، شي علماء د لّسانيات قتارحو يربطوها مع لّغات لهندية-لؤروپية، ولكن ف لّخر غير ربط مع رّيوكيوانية لّي كان عندها دعم كبير.
نّضريات جديدة كاتحاول تربط جّاپونية من جهة ب لّغات د شمال آسيا، بحال لكورية ولّا لعائلة لكبيرة د لّغات لألطائية، ؤ من جهة اخرا ب شي لغات د لجنوب شّرقي د آسيا، خصوصا لؤسطرالونيزية. حتا وحدا من هاد لقتيراحات ما كان عندها قبول كبير، ؤ لّغات لالطائية براسهوم باقي عليهوم لهضرا.
نضريات اخرا كاتشوف جاپونية يا إمّا واحد لّوغة كريولية قديمة بانت ب تأتير ديال عل لأقل د شي جوج لغات مبدلين علا بعضياتهوم ولّا جوج مجموعة د لّغات، ولّا لوغة بوحدها مختالفة لّي تأترات ب لّغات لّي حداها.
ؤ دابا، جّاپونية مصنفة مع لّغات جّاپونيكية ولّا لوغة معزولة، بلا مامعروف واش رّيوكيوانية محسوبة لهجة ولّا لّا.
| لقدّام | لوسط | لّور | |
|---|---|---|---|
| مسدود | i | u | |
| مابين ؤ بين | e | o | |
| محلول | a |
لكتابة بانت ف جّاپون على شكل د سيستيم د لكتابة د شّينوية، من عند بايكجي قبل لقرن لخامس. لملك د جاپبون بو كان كتب عريضة ل لإمبراطور شون د صونݣ ف عام 478. مورا لإنهيار د بايكجي، جّاپون عرضات علا لمختصّين شّناوا يجيو باش تعلّم كتار على سيستيم د لكتابة د شّينوية. لأباطرة د جّاپون رسّمو لمختصّين شّناوا ؤ نشرو لستعمال د رّموز شّينوية من لقرن سّابع حتا لقرن تّامن.
ف لبدية، جّاپونية تكتبات ب شّينوية لكلاسيكية، ؤ سّميات جّاپونية تكتبو برّموز لّي عندهوم نفس لمعنى مع سّمية ماشي لّي كايتنطقو بحالها. من بعد ف لقرن سّابع، جّاپونية كانت كاتّكتب ب رّمز علا حساب كيفاش كاتنطق، ؤ شي كلمات كانو مازالين كايتكتبو علا حساب لمعنى ماشي نّطق. من هنا بدات لكتابة ب جّاپبونية تمشي ف طريق بوحدو. ؤ فهاد لوقت، جّاپونية كانت ديجا مبدلة بزاف علا لّغات رّيوكيوانية لخرا.
مع لوقت، بان واحد سيستيم د لكتابة جديد، رّموز شّينوية (لكانجي) كانو كايتستاعملو يا إما باش يتكتبو لكلمات لّي موخودين من شّينوية، ولا لكلمات جّاپونية لّي عندهوم معني قريب ولّا هو نّيت. ؤ كان كايتّكتب ب هاد رّموز حتا لعناصر ديال تّراكيب، لّي من بعد تبسّطو ؤ ولّاو كلمات صغار: هيراݣانا ؤ كاطاكانا لّي بازاوهوم علا لمانيوݣانا من بايكجي. ولكن هاد لفتيراض د "مانيوݣانا من بايكجي" كايرفضوه شي مختصّين.
لهيراݣانا ؤ لكاطاكانا ف لّول تبسطو من لكانجي، ؤ لهيراݣانا ف جوايه لقرن تّاسع كانو كايتبو بيهوم لعيالات. لهيراݣانا كانت كاتعتابر كتابة ماشي رسمية، ؤ لكانجي ؤ لكاطاكانا كانو كايتعتابرو رسميين كتر، كانو كاكتبو بيهوم رّجال ؤ ف لحاجات رّسمية. ولكن لهيراݣانا من بعد ف لقرن 10، ولّا كلشي كايكتب بيها.
جّاپونية ديال ديال دابا كاتكاتب ب تّخليطة ديالهوم ب تلاتة: لكانجي، لّي جاي من رّموز شّينوية كايتكتبو بيهوم لكلمات لّي موخودين من شّينوية ؤ عدد ديال لمورفيمات لّي أصلا جاپونية؛ ؤ لهيراݣانا ؤ لكاطاكانا.
لكتبة لّاتينية (ب جّاپونية: روماجي) كايتستخدم مرة مرة، بحال لختيصارات لّي جايّين من برّا ولّا باش يعرفو نّاس لّي ماكايهدروش ب جّاپونية كيفاش كاتنطق شي كلمة. لأرقام د لعربية كايتخدّمو كتار من لكانجي بزاف ف لحساب، ولكن لأرقام د لكانجي باقي كايتستاعملو فلكلمات لمركّبة، بحال متلا 統一 طويتسو ("تّيحاد").
تاريخيا، لمحاولات باش ينقصو لعدد د لكانجي بداو ف وسط لقرن 19، ولكن هادشي ماتدخلاتش فيه لحكومة حتا خسرات جّاپون ف لحرب لعالمية تّانية. ف لوقيتة مور لحرب، تقتارح يتحيّد لكانجي ݣاع ؤ يتّكتب غير ب رّوماجي. ولكن لقتيراح د جويو كانجي ("لكانجي لمتداول بزاف") دّار بيه كـ حل وسط.
تّلاميد جّاپونيين كايبداو يتعلّمو لكانجي من لبيت لّول ف لپتيدائي. لوزارة ديال تّعليم د جّاپون دايرة واحد دّليل د لإرشاد، لّيسطة ديال لكيوئكو كانجي ("لكانجي تّعليمي")، فيه 1006 ديال رّموز لبساط لّي خص تّلميد يكون تعلّمهوم ملّي يسالي بيت سّادس. دّراري صّغار كايقراو 1130 رمز وحداخر ف لإعدادي، باش يكون كمّلو 2136 جويو كانجي. لّيسطة رّسمية ديال جويو كانجي تراجعات شي مرات، ولكن لعدد ديال رموز بقا هو هاداك.
أمّا بنّسبة لـ لكانجي لّي كايتستخدم ف لكتابة د سّميات، لقضية شوية معقدة، جويو كانجي ؤ جينمييو كانجي (زيادة د رموز اخرا لـ سّميات) معتارفين بيهوم ف تّسجيل د سّميات. سّميات لّي فيهوم شي رموز ݣاع ما معترف بيها ماكايتقبلوش ف تّسجيل. ولكن لّيسطة د جويو كانجي، لمعايير ديال لقبول غالبا تعسفية ؤ ردّات بزاف د رّموز لمتداولة ؤ شّائعة أنها ترفض. تحت ضّغط د نّاس ؤ متابعة قضائية، لّيسطة ديال جينمييو كانجي تزادت من 92 ف 1951 لـ 983 ف 2004.
لهيراݣانا كايتكتبو بيهوم لكلمات لّي ماعندهوم حتا كتبة ب لكانجي، ؤ لـ كلمات لّي مابقاوش كايتكتبو ب لكانجي، ؤ مورا لكانجي باش يبيّنو تّصريف د لكلمة. حيت طّريقة باش لأفعال (ؤ صِّفات) كايتصرّفو ف جّاپونية، لكانجي بوحدو ماكافيش باش تعبّر على تّصريف، حيت لكانجي مايمكنش تبدّل طّريقة د لكتابة ديالو بلا مايتبدّليه لمعنى. هاد طّريقة د ليستيخدام ديال لهيراݣانا كاتسمّى ؤكوريݣانا.
لهيراݣانا تقدر تلقاها مكتوبة كتبة صغيورة فوق ولّا حدا لكانجي باش تورّي طريقة صّحيحة باش كايتّقرا، هاد لّعيبة سميتها فوريݣانا. ؤ كاتدّار باش تسهّل تّعليم، ؤ باش توضّح لكتابة لّي قديمة ولّا مامفهوماش (ولّا بعض لمرّات مصاوبة).
لكاطاكانا، كايكتبو بيهوم لكلمات لبرّانية، سّميات د نّباتات ؤ لحيوانات، ولّا لتّوكيد.
متلا، "ؤسطراليا" لّي هي ؤوسوطوراريا (オーストラリア)، ؤ "سوپّيرمارشي" لّي هي سوپّا (スーパー).
- ^ "Japanese language". لموسوعة لبريطانية (ب نڭليزية). مأرشيڤي من لأصل ف 2023-07-15. تطّالع عليه ب تاريخ 2021-10-03.
|
تقدر تزيد شوف بزاف د تّصاور و لمعلومات ديال Japanese language ف ويكيميديا كومنز. |