ويكيپيديا:ماتزيدش فيخرات

من ويكيپيديا

لمقالات د ويكيپيديا ماخاصش يتزادو فيها فّيخرات ؤ ويكيپيديا ماشي بلاصة فين كيتنشرو أبحات ماتنشروش قبل. لمقصود هنا ب "فّيخرات" ؤ "أبحات ماتنشروش قبل" هوما وقائع، مقولات ؤلا أفكار، لي ماكايناش عيون/مصادر موتوقة كاتدعمها. هادشي كيشمل حتا تحليل، سانتيز ؤلا ستينتاجات مبنية على عيون موتوقة، ؤ لي ماكايناش ف حد دّاتها ف عيون موتوقة (سوا ديك لعيون براسها ؤلا ف عيون خرين). ميتال: يلا لكتاتبي كتب ف مقال 1 + 2 = 3، خاص هاد لعيبارة كلها تكون مدكورة ف عين ؤلا عيون موتوقة، سوا حرفيا، ؤلا ب عيبارة خرة عندها نفس لمعنى (متلا يلا زدتي واحد على جوج كايعطيو تلاتة، تلاتة هيّا جوج مزيود عليها واحد، ...)، ماشي لكتاتبي ياخد 1 من عين، 2 من نفس لعين ؤلا عين خرة، ؤ يستنتج من راسو بلي 1 + 2 = 3. باش تتبت بلي مازدتيش فّيخرات ف مقال، خاصّك تحط عين لي كاتدعم بشكل موباشير داكشي لي مدكور ف لمقال. باش تعرف كيفاش تزيد عيون، شوف معاونة:كيفاش تزيد لعيون.

هادشي ب لموقابيل ماكينطابقش على مداكرات د لمقالات ؤلا پاجات خرين لي ماكاينينش ف لمجال سّمياتي د لمقالات، ؤ لي كيتداكرو فيها لكتاتبيا على مواضيع عندها علاقة ب لمحتوى، ؤلا لعيون ؤلا غيرهوم.

هاد سّياسة كاتّعتابر من سّياسات تّلاتة لأساسية د لمحتوى د ويكيپيديا. جّوج لوخرين هوما "لمراجعية" (لقابلية د لمراجعة) ؤ "لحيادية". هاد سّياسات تّلاتة ماقابلاش ل نّيقاش، ؤ خاص جميع لكتاتبيا يديرو ما فجهدهوم باش يلتازمو بيها.