ويكيپيديا:منضور حيادي

من ويكيپيديا

جميع لمحتويات لموسوعية د ويكيپيديا خاصها تكون مكتوبة من منضور حيادي. هادشي كيعني بلي لكتاتبي خاصو يحاول، على قدر ليمكان ؤ ب نية مزيانة، باش يطرح جميع وجهات د نّاضار لي متعلقة ب موضوع لي كاينة ف عيون موتوقة، بلا مايحابي ؤلا يفضّل بيناتها (طالمّا كيبقا ف إطار داكشي لي كاين ف لعيون).

هاد سّياسة كاتّعتابر من سّياسات تّلاتة لأساسية د لمحتوى د ويكيپيديا. جّوج لوخرين هوما "لمراجعية" (لقابلية د لمراجعة) ؤ "بلا فيخرات" (لكتاتبي مايزيدش معلومات ؤلا أفكار من راسو). هاد سّياسات تّلاتة ماقابلاش ل نّيقاش، ؤ خاص جميع لكتاتبيا يديرو ما فجهدهوم باش يلتازمو بيها.

تطبيق عامالي[بدل لكود]

  • ويكيپيديا خاصها توصف لخلافات، ماشي تدخّل ؤلا تساهم فيهوم: لخلافات ؤلا لمطايفات سّياسية ؤلا لفكرية ؤلا دّينية ؤ غيرهوم، خاص يتم لوصف ديالها ف لمقالات لمناسبة ب جميع لمنضورات لي كاينة، بلا تاحايّوز ل واحد فيهوم. لكتاتبيا ب طابيعت لحال يقدر يكون عندهوم منضور ؤلا ري ف لموضوع، ولاكين وخا داكشي خاصهوم يكتبو لمقال ؤلا يزيدو معلومات فيه ب نية مزيانة، ؤ بلا مايحاولو يأتّرو ف لقاري باش يتّاخد فيكرة محددة. جميع وجهات نّاضار لي ملقيّة ف عيون موتوقة خاصها تكون ممتّلة ف لارتيكل، على حساب لوزن ديالها ف نّيقاش ديال لموضوع ف لعيون/لمصادر (شوف لتحت لفقرة ديال لوزن د وجهة د ناضار).
  • ماتكتبش ري بحال يلا حقيقة: ف بزاف د لمواضيع كيكونو أراء مختالفين، لي خاص يعبّر عليهوم لمقال. ولاكين هاد لأراء ماخاصش يتكتبو ب صّوت ديال ويكيپيديا، مي ب سّمية ديال مّاليها. متلاً ماتكتبش عبد القادر قدّور أحسن فنان ف لعالم، مي على حساب لكاتب لمغريبي عمّور بن عامر، عبد القادر قدّور أحسن فنان ف لعالم.
  • ماتكتبش حقيقة بحال يلا ري: ب لموقابيل كاينين تصورات على موضوع لي كاتكون مقبولة عند جميع لحرايفيا ديال شي مجال، ؤ لي ف هاد لحالة ماخاصش تّكتب بحال يلا غير ري من بين أراء، ؤلا بلي كاين نيقاش عليها، ؤلا بلي كاين فيها شك. متلاً ماتكتبش على حساب لموسوعة لبريطانية، لمغريب كاين ف قارة إفريقيا، مي لمغريب كاين ف قارة إفريقيا.
  • متخدّمش لوغة حكايمية: لّوغة لحكايمية هيّا لوغة لي كاتخدّم تعابير لي كاتحكم على لأراء واش مزيانين ؤلا خايبين، حتا لو بشكل ضمني. لأسلوب د لكتابة خاصو يكون مامتّافق مامعارض لأراء لمطروحة، بحال يلا لكتاتبي مامسوّقش إينا واحد فيهوم لي صحيح.
  • ليستي لأراء على حساب لوزن ديالها: وخا يقدرو يكونو أراء مختالفين على موضوع، ماشي كلهوم كيكونو ممتّلين ب ضّارورة ب نفس لمقدار ف لعيون لموتوقة. لمقال خاصو يعكس هاد لأراء على حساب لوزن ديالها. رّي ؤلا وجهة د نّاضار لي منتاشرة كتر (ف لعيون لموتوقة) خاصها تاخد حيّز كبر ف لمقال من وجهة د نّاضار لي غير مدكورة بشكل عاراضي، ؤلا لي أغلبية د لحرايفيا د شي مجال كيعارضوها. أولا خاص يتّدكر ف لمقال بلي شي رّي عندو وزن كبر من ري أخور.

عتيراضات ؤ أجوبة[بدل لكود]

  • "ماكايناش شي حاجة سميتها موضوعية كاملة": سّياسة لي كيهضر عليها هاد لمقال هيّا لحيادية ماشي لموضوعية. لحيادية هيا تدير لأراء لي كاينين ف لعيون كيما هيّا، على حساب لوزن ديالها، ؤ بلا ماتحاول تميّز بيناتها بشكل متعمّد ؤلا باش تأتر ف لقاري. لموضوعية هيّا تطرح وجهة د نّاضار وحدة لي كاتّجاوز لمنضور دّاتي ؤلا وجهات نّاضار دّاتية، بحال يلا كاتشوف لموضوع من برّا، ؤ هادا ماشي هوّا لهاداف د هاد سّياسة.